15/04/2025
ده پښتون قام د ازادۍ ستر مبارز فقیر ایپي (حاجي ميرزا علي خان) د ۶۵م تلین غونډه
سبا د پښتنو د تاریخ هغه باب ته د درناوي ورځ ده، چې خپل ژوند یې د استعمار او غلامۍ پر ضد وقف کړی و.
فقیر ایپي، د ازادۍ هغه سمبول و، چې د انګریز، پاکستانی ریاست او ظلم پر وړاندې کلکه مقابله وکړه.
د هغه د ۶۵م تلین په مناسبت یوه درنه غونډه سبا د لنډي کوتل په پریس کلب کې جوړیږي.
وخت: ۱۰:۳۰ (سحر)
ځای: ډسټرکټ پریس کلب خیبر لنډیکوتل بازار باچا خان چوک
تابیا: خیبر اولس
په غونډه کې به د فقیر ایپي د ژوند، مبارزې او نظریاتو په اړه ویناوی او مقالې وړاندې کیږي، او د سیمې د باشعوره اولس ګډون ته هرکلی ویل کیږي.
راشئ، د دې ستر اتل یاد تازه کړو — ځکه چې تاریخ هغه څوک نه هیر وي، څوک چې د خاورې، خدای او قام لپاره ودریږي.
15/04/2025
د PTM هالنډ څانګی د اپریل پر ۱۴مه نېټه یو احتجاجی لاریون/ long march د هالنډ په دنهاخ(The Hague) ښار کی تر سره کړئ. دا لاریون د هغه لاریونونو لړۍ ده کوم چی ښاغلی منظور پښتین د PTM ټولو څانګو ته تجویز کړی وو. په نوموړی لاریون کی د PTM هالنډ د ملګرو برسېره د یوې مدنی ټولنی، د یوه اسلامی انجمن او د بلوڅو د غورځنګ غړو ګډون کړی وو. په دی لاریون کی په پاکستان کی د افغان کډوالو ځورول، لوټول، بېځایه کول، د دوی شتمنۍ تالا کول د پاکستانۍ جنایتکاره ادارې له خوا په صریح توګه او لوړ ږغ تقبیح سول. د دې لاریون پرېکړه لیک د هالنډ د مهاجرینو وزارت، امنسټی انټرنشنل، د بشری حقوقو سازمانونو، د اروپایی اتحادیی د جنوب شرقی آسیا و دفتر ته واستول سول په نزدې راتلونکی کی به د هالنډ پارلمان او د UNHCR دفتر ته لاس په لاس ورتسلیم سی.
15/04/2025
په چمن کې د افغانانو د جبري ایستلو پر ضد احتجاجي پرلت دوام لري.
چمن – د اپرېل ۱۵مه: د افغانانو د جبري او ظالمانه ایستلو پر ضد او په پي ټي ايم بنديز، د غورځنګ ځوانان په شيډول فور کي اچولو پرضد نن د چمن ښار کې د پښتون ژغورنې غورځنګ (PTM)، بیلابیلو سیاسي ګوندونو او د سوداګرو ټولنې له خوا په ګډه احتجاجي پرلت پیل شوی چې دا مهال هم دوام لري.
په دې احتجاجي ناسته کې د غورځنګ غړي، د قامي ګوندونو مشران او ګڼ شمېر فعاله کارکوونکي پراخ ګډون کړی دی. ګډونوال وايي چې افغان کډوال له کلونو راهیسې د سولې سره ژوند کوي، خو اوس له هېڅ قانوني اسنادو پرته په زور ایستل کېږي، چې دا نه یوازې د بشري حقونو سرغړونه ده، بلکې سیمه ییز اقتصاد او بشري اړیکې هم له خطر سره مخ کوي.
د پرلت ګډونوال غوښتنه کوي چې د افغان کډوالو ایستل باید د انساني اصولو، قانوني طریقهکار او مشورو له مخې وشي، نه د زور او توهین له لارې. هغوی خبرداری ورکړی، که غوښتنې یې و نه منل شي، نو به خپلو احتجاجي لارو چارو ته دوام ورکړي.
15/04/2025