07/10/2026
भोक र रोगसँग जुधिरहेकी १३ वर्षीया प्रभाको कारुणिक कथा! 💔
घोराही उपमहानगरपालिका–१३ की १३ वर्षीया प्रभा मगर अहिले विद्यालय जाने, पढ्ने र साथीहरूसँग खेल्ने उमेरकी हुन्। तर, आज यी सानी बालिकाको हातमा किताब–कापी होइन, पूरै परिवारको भोक मेटाउने ठूलो जिम्मेवारी आइलागेको छ।
प्रभा मात्र ७ वर्षकी हुँदा करेन्ट लागेर उनका बुवाको निधन भएको थियो। त्यसपछि उनकी आमाले दिनरात मजदुरी गरेर जसोतसो छोरीलाई हुर्काउँदै आउनुभएको थियो। प्रभा कक्षा ४ मा पढ्दै गर्दा परिवारमा अर्को ठूलो बज्रपात आइपर्यो। गत वैशाखदेखि आमालाई क्यान्सर भएपछि यो परिवार पूर्ण रूपमा ओछ्यान परेको छ।
उपचारका लागि आवश्यक रकम जुटाउन नसक्दा आमा घरमै थला पर्नुभएको छ। एकातिर आमाको कडा रोग, अर्कोतिर बिहान–बेलुका घरको चुल्हो बाल्ने कोही नहुँदा प्रभाले आफ्नो पढाइ र विद्यालय सधैँका लागि छोड्नुपरेको छ।
अहिले यी बालिकाको दिन पढाइमा होइन, "आज के खाने र आमालाई कसरी बचाउने" भन्ने चिन्तामै आँसु बगाएर बित्ने गरेको छ। उनी रुँदै भन्छिन्— "कसैले दया गरेर दिएपछि खान्छु, नत्र म र मेरी आमा भोकभोकै बस्छौँ।"
के यो कलिलो उमेरमा यति ठूलो पीडा भोग्नु प्रभाको नियति हो? हाम्रो समाज र सम्बन्धित निकायको नजर यस्ता असहाय परिवारमा कहिले पर्ला? आउनुहोस्, यी बालिका र उनकी क्यान्सर पीडित आमालाई बचाउन हामी सबैले आ-आफ्नो ठाउँबाट आवाज उठाऔँ र सहयोगको हात बढाऔँ। 🙏
