22/10/2026
Gjykata e Shkallës së Parë të Juridiksionit të Përgjithshëm Tiranë shqyrtoi kërkesat e Prokurorisë për të arrestuarit e dyshuar për organizim dhe pjesëmarrje në grumbullime të paligjshme, kundërshtim të punonjësve të policisë dhe shkatërrim prone. Ajo konstatoi të paligjshëm arrestimin në flagrancë të 17 personave të ndaluar gjatë protestës. Për ta vendosi rrëzimin e kërkesave për masa sigurimi dhe lirimin e menjëhershëm, nëse nuk ka shkak tjetër ligjor. Në total, gjykata liroi nga burgu 22 protestues të tubimeve që u shoqëruan me tensione.
Për disa të arrestuar, gjykata vlerësoi të paligjshëm arrestimin në flagrancë dhe urdhëroi lirimin pa caktuar masë sigurimi. Ky vendim përfshiu persona si A. R., A. B., D. L., G. B., A. L., Y. I., Rr. Ç., A. S. dhe L. M., si dhe të tjerë në një vendim të veçantë. Edhe për A. B., F. L., Dh. H., B. T. dhe K. P. u vendos moscaktimi i masave të sigurisë dhe lirimi i menjëhershëm. Këto vendime u morën me kusht që personat të mos mbahen për ndonjë shkak tjetër ligjor.
Për T. T. dhe F. M., arrestimi në flagrancë u vlerësua i ligjshëm, por u caktua masa “Detyrimi për t’u paraqitur në Policinë Gjyqësore”. E njëjta masë u caktua edhe për M. M., L. S. dhe E. G., me paraqitje të hënën e tretë të çdo muaji në orën 10:00. Për D. D., gjykata konstatoi të paligjshëm arrestimin, por vendosi gjithashtu detyrimin për t’u paraqitur në Policinë Gjyqësore. Ndërsa për E. B., arrestimi u vlerësua i paligjshëm dhe nuk u caktua asnjë masë sigurimi.
