Subject

💡حالنا في زمن الكرونا:
انا شايف انا ربنا سبحانه وتعالي بعتلنا الكرونا دي دواء في شكل ابتلاء يعني الناس اللي كانت حتموت وتاخد يوم اجازه وتريح شويه فبيوتها وتقعد وسط عيالها واسرتها سبحان الله بقي قاعدين اكبر وقت ممكن وقربو من بعض.. الناس اللي كانت ضرباها صرمه وصرمحه وقاعده ع القهاوي ونسوان وقله ادب ربنا هداهم واستقامو الستات اللي كانت بتشتغل ومش فاضيه تطبخ ومقضيها دليفري قعدت في البيت وانتبهت لجوزها وعيالها وبقت تعملهم اكل صحي ومضمون من ايديها واللي كان بيخلص شغله متأخر ونفسه ولو يوم يروح متأخر عشان يريح شويه بقي يروح بدري عن اللي كان بيتمناه واللي كان مقضيها بوس واحضان وقله ادب ربنا هداه وبعد عن السكه خالص. والاشكال الزباله اللي كنا بنشوفها علي اليوتيوب اختفت وبقت حتي لو ظهرت الناس بتهاجمهم وتقولوهم هو ده وقته بتوع المهرجانات فين والفنانين والرقاصات اللي دلوقتي فعلاً تعبان ومعرضين للخطر ومش بيرتاحو هما الاطباء والممرضات يعني خلاصه الموضوع ان ربنا سبحانه وتعالي مش بيبعتلنا حاجه وحشه بالعكس حتي المصيبه والبلاء لو ركزنا فيهم شويه حنلاقي فيهم حكمه ورحمه من ربنا سبحانه وتعالي
وفي النهايه احب اقولكم احمدو ربنا واشكروه علي كل حال وكل وقت. ويمكن يكون ربنا بعتلنا الكرونا دي عشان تنضفنا من جوه ومن بره ... 🙏🤲

:عمراللي راح ماحيرجع تاني 💡

زمان لما كان بيجيلك واحد صاحبك البيت كنت تدخل امك واخواتك البنات فأوضه وتقفل عليهم وتخليهم يمنعو الصوت خالص لحد ماصاحبك ينزل مش بس كده لا وكان ممكن كمان تضلم الصاله عشان لو حدي عدي متجرحش حرمه أهل بيتك كان في نخوه كنت تشوف جارتك تحط وشك في الارض رغم انها مربياك وحافظ شكلها كنا بنقول لأي حد اكبر مننا بسنه ياعمو ولوشوفت جارك شايل حاجه تجري عليه وتخدها من ايده اما في زمانا ده بقيت الفيديوهات تتصور فغرف النوم والابن بينده علي ابوه بأسمه علي أساس انه نوع من انواع الدلع يعني وغيرها ياما حاجات بقت في زمانا موضه قديمه ورجعيه تفتكر احنا ممكن نرجع كده تاني اقولك مستحيل لانك فقدت القدوه والاخلاق والمبادئ اللي بتطلع الجيل والنتيجه دي للمجتمع و فعلاً عمراللي راح ماحيرجع تاني ... وبس كده 👌

مقبره الشباب
المهرجانات # يوتيــوب # ميوزكلي # هوس الشهره # تيك توك

💡أيوه أنا متخلف:

الغرابه ياآخي اليومين دوول موازين الحاجه كلها أتغيرت يعني مبقتش فعلاً حاجه زي زمان بقت قلت الادب والفجور اسمه حريه
والحجاب بقي بالكيف وبالمزاج وبالسن والتدين بقي تطرف وارهاب والهدوء والوقار والأحترام بقي إنعزال وعقد ونفسيه
المبادئ والعادات بقت تخلف ياااه ده حتي تناسق الالوان😂 في اللبس بقيت أسمها موضه قديمه الزوووق العام انعدم خلاص من كل حاجه حتي في التفكير والكلام مش اللبس بس
ياأخي ده حتي زمان انا افتكر ابويا رحمه الله عليه كان قبل مايخرج ممكن يقعد ساعتين علشان يختار لون الكرافته والشراب المناسبين للمكان اللي هو رايحه وللطقم اللي هو لابسه شوف الاهتمام بالتفاصيل 😂 بالرغم انه مكنش حيلته غير يمكن بدله واحده او بدلتين وخد من دي امثله يااااما بقي....الخ وتقولي موضه؟؟ 😂موضه ايه ياجدع اللي تخليك تلبس بدله علي كوتشي😂 وتخلي البنت من دوول تلبس طرحه علي نص كم...
: القصد ان
الناس زمان كانت بتهتم بالتفاصيل والحاجات الصغيره وهو ده اللي كان محليهم وبرضو هو ده اللي مخلينا طالعين في الزمن ده واحنا حاسين اننا نازليين من طبق طاير و من كوكب أخر.. وجيل الزمان ده بيقولو علي جيلنا متخلفين وانابعد لما فهمتها وشوفت اللي بيحصلو حوالينا دلوقتي وفهمت ان دي تربيه واخلاق ومباءي وزوق احنا خلاص فقدناها فعصرنا ده وبقت بتتسمي تخلف عايز اقف فوسط الشارع واصرخ واقوووووول انا الحمد لله "أيوه انا متخلف " بس كده 👌

i need relax

💡اللي تقدره تخسره:

احنا عندنا مبدأ غريب أوي في علاقاتنا مع الناس.. مبدأ ممكن يدمر أقوى العلاقات اللي مبنية من سنين و سنين..
مبدأ " طالما استحملت مرة يبقي شيل طول عمرك و انت ساكت ".
في ناس لو لقوا حد بيحبهم ييجوا عليه و يزهقوه معاهم و يطلعوا عينه عشان عارفين انه بيحبهم فا هيسكت...فا عادي يسيبوه زعلان، يخبط دماغه في الحيط، كل ده عشان ضامنين ان الناس اللي قارفينهم معاهم دول بيحبوهم..

في مديرين في الشغل لو لقوا موظف بيحب الشغل و متفاني فيه يطلعوا روحه !! مش انت بتحب شغلك استحمل بقي!! بيشيلوه شغل 5 موظفين معاه طالما عمره ما قال لأ!! يخلوك تكره الشغل حتي لو كنت مبدع فيه و حتي لو كان أكتر حاجة بتحبها.. هو فعلا في ناس تقدرهم تخسرهم ... بس كده 👌

💡مش وش نعمه:

أحنا أصلاً مش وش نعمه أه والله مش وش
نعمه
بنقعد ندعي ربنا أن يرزقنا بالحاجه ولما بتجيلنا بنتعمد أننا نخسرها ولاء وأيه بنخسرها بضمير بنضيعها مننا بستماته

الْمَالُ وَالْبَنُونَ زِينَةُ الْحَيَاةِ الدُّنْيَا ۖ وَالْبَاقِيَاتُ الصَّالِحَاتُ
خَيْرٌ عِندَ رَبِّكَ ثَوَابًا وَخَيْرٌ أَمَلًا (46)

يعني دول زينه وهبه ومكافأه من ربنا سبحانه وتعالي لينا في الدنيا. لاء وأيه كمان دي اللي فاقدهم بيقعدليل ونهار يحلم ويدعي ربنا فكل صلاه وسجود أن يرزقه بيهم علي الرغم من أنك متأكد أنه مش رزقك أو مش وقته أو أنت مش مؤهل ليهم دلوقتي ومع ذلك ربنا سبحانه وتعالى من رحمته وعطفه علي العباد بيسمع ويستجيب وتيجي أنت بقي بعد مايستجيب ويرزقك بأحدهما أو كلاهما ويبقي ساعتها أنت كده مستجاب الدعوه وربنا رزقك من وسع وباقي عليك انك ترد الهديه بقي الباقيات الصالحات اللي، هي الصلاه والصوم والصدقه والعباده المخلصه لله عز وجل والأنفاق في الخير والتربيه والتعليم والدين للذريه اللي مفروض تكون صالحه دي أقل حاجه لأنك اللي طالبها بنفسك يعني بمعني أدق أنت إللي طالب الهديه دي بالتحديد من ربنا سبحانه وتعالى يعني المفروض تشيلها فعنيك وتحافظ عليها وتستغلها أحسن أستغلال...
لا ده أحنا أول ماربنا بيفتح علينا ويرزقنا بنفتري ونجيب اللي عايزينه واللي مليزمناش، كمان والحجه اصلنا كنا محرومين طيب تمام 👌ياعم وماله عدت فتره جبت اللي فنفسك كله اتمتعت ومبقتش خلاص محروم ساعتهامن حاجه.. بتيجي بقي المرحله التانيه انك تألف النعمه تنسي أصلك تنسي بدايتك تفتري علي اللي اقل منك والمحتاج وتفتري علي النعمه نفسها وعلي نفسك وتنسي ان في ربنا موجود وزي، مارزقك بيها بدون أسباب وبدون مقابل قادر أنه يغير كل ده في لمح البصر وتزول من أيديك.. ده كله
بالنسبه للمال أما بقي البنون فده محتاج بوست لوحده.. البنون دي بقي نعمه لا يقدرها الا من فقدها لكن في زمنا ده محدش فاهم يعني أيه تربيه ويعني أيه تعليم حبيبي التربيه مش انك تودي ابنك احسن نادي وتلبسه احسن لبس وتجبله احسن واغلي حاجه لااااااا ولا حتي كان التعليم ان تدخله اغلي وافخم مدارس او جامعات ولو كانت حتي مالتي ناشيونال لااااا
التربيه والتعليم هما.. انك لما تزرع فأبنك بذره تكون اولها دينه واخلاقه وحياءه واحترامه لنفسه و لاهله ولدينه وللاكبر منه خليه رقيب نفسه عارف ايه الصح من الغلط الحرام من الحلال العيب من اللي مش، عيب، خلي الواد يطلع راجل شكلا ومضمونا وكذالك البنت تطلع أنثي محترمة تخاف علي نفسها واهلها وشرفها مؤهله انها تبقي، أم لجيل بعد كده المفروض انه حيكمل اللي أحنا بدأناه ده إذا كنا أساسا بدأنا حاجه من أصله يعني لااحنا بنحافظ علي مال ولابنون ولا حتي بنعمل حاجه نستاهل عليها
..... جزاء الباقيات الصالحات

أحفظ نعمه ربنا عليك ربنا يحفظك.... ويزيدك وينجيك.
ف‏مَن كَان فِي نِعْمَة ولَم يَشْكُر خَرَج مِنْهَا دْونَ أن يَشْعُر

بس كده 👌

💡الفاتورة :
فى مرحلة عمرية فى حياتنا اسمها "دفع الفاتورة" ..
مرحلة دفع حساب كل اللى طلبناه قبل كده
المرحلة دى بتبدأ مع دخولك فى سن الأربعين
اللى بيحصل ان الحياة كانت ماشية زى الفل .. طفولة ومراهقة سعيدة .. بيت دافى .. حضن الكبار اللى حواليك اللى مفتوحلك ٢٤ ساعة .. اصحابك ليل نهار معاك مبتعملوش حاجة فى الدنيا غير الضحك ..
شوية وتسحب معاك للعشرينات .. مستقبل مشرق .. وظيفة .. علاقات .. حب .. ارتباط .. سن ال ٣٠ .. جواز .. عيال .. كل ده تمام انت لسه مقضيها فسح واستمتاع ودلع

وفجأة .. ومن غير مقدمات .. تدخل على الأربعينيات .. تصحى من النوم .. تلاقى نفسك اتغيرت .. شريك او شريكة حياتك اتغيروا .. عيالك كبروا ..كبروا امتى؟؟ .. مش مهم المهم انهم كبروا وطالبين منك طلبات كتير .. وحالا .. مراتك ولا جوزك طالب منك طلبات .. ضغوط الشغل بقت مهولة .. بتضطر تقبل حاجات وضغوطات مكنتش بتقبلها قبل كده .. اهلك بيكلموك عالموبايل عايزينك تروحلهم وفى حاجة خطيرة أو طالبين منك حاجات برضه حالا ..
اليوم بقى عبارة عن قائمة من المهام بتخلصها لغيرك مش لنفسك .. وقتك ومجهودك وطاقتك بقت لغيرك مش ليك.
تروح تزور اهلك تلاقى ابوك كبر .. الراجل السوبر هيرو ده بقى يمشى فى البيت بالعافية .. امك السوبر تيربو بقت مش عارفة تعمل لنفسها حاجة سخنة تشربها .. تروح مناسبة عائلية تلاقى قرايبك كبروا اووووى وتفضل تبص عليهم وانت مستغرب ..ده غير عيالهم اللى كبرو وخلفوا وعيالهم بقوا يجوا يسلموا عليك ويقولولك يا انكل...انكل مين يابنى بطولك وشنبك ده؟؟ .. هو انا بقيت انكل؟؟ .. طيب امتى؟؟
الافراح فى السن ده بتقل قوى لان اللى فى سنك واللى أصغر منك بعشر سنين اتجوزوا .. والعيال لسه بدرى على جوازهم .. اللى بيكتر قوى الفراق .. بتودع كبار كنت يوم بتلعب على حجرهم وبتودع الأمان معاهم .. الخوف كمان بيزيد .. خوف على ولادك وعلى مستقبلهم .. على بيتك اللى شقيت على ما بنيته ..على اهلك اللى خايف تفقدهم فى اى لحظة .. على شغلك اللى تعبت فيه ومبقاش مستقر .. بقى يتزعل منك .. يتلام عليك .. محدش بيرحمك لو غلطت حتى لو مش قاصد .. محدش بيطبط عليك زى زمان لما كنت صغير ويقولك معلش .. عادى .. حصل خير .. !!!
فى الأربيعنيات الناس كلها فجأة بتعاملك كإنسان ناضج بكل قسوة حتى ولو مش قاصدين .. مش من حقك تضعف أو تتعب أو تحس انك محتاج وقت لنفسك أو تكتئب ..
بمعنى اوضح فى السن ال ٤٠ الدنيا بتديك الفاتورة وعليك تدفع حساب كل اللى فات ..بس👌 !!

💡القلم الأبيض :
وأحناصغيرين كنا لما بنشتري علبه ألوان أول حاجه بنعملها نطلع القلم الأبيض ونرميه ولو حد سألنا.. ليه كده .. كنا نقول أصله مابيلونش مكناش نعرف أن دي حاجة حلوه انه مش بيلون. مكناااش نعرف ان القلم الأبيض يعني الحاجه النقيه اللي مش بتزيف ولا بتغير الواقع. الحقيقه اللي أوقات مبتعجبناش عشان بتوجعنا. وكبرنا وبقي ده مبدأنا في الحياه ان اي حاجه علي طبيعتها او صريحه او واقعية بتزعلنا.. الكلام الصريح من حد او الشخص الدوغري اللي ميعرفش اللف والدوران مبيعجبناش. وأدينااا كبرنا وفهمنااا قيمه القلم الأبيض فعلبه الألوان.... وبس 👌

💡أنت عجزت ولاأيه.؟
حتفضل طوول عمرك شايف نفسك لسه صغير طول ماأبوك وأمك حواليك وبصحه وخير وشايفينك صغير حتشوف نفسك صغير ؛طووول ماأنت فوسط أخواتك ترتيبك الصغير حتشوف نفسك صغير ؛ طول ماانت بصحتك وقادر تتحمل الضغوط اللي حواليك وتقول عادي فترة وحتعدي حتشوف نفسك صغير ؛ لحد ما حتيجي اللحظه اللي فجأه حتغير كل موازين حياتك. لحظه لما تلاقي أمك وأبوك بقو مجرد أسم وصوره بس. لحظه لما تبقي فوسط أخواتك مسئول انك تحل مشكلهم عشان انت مبقتش صغير. لما تلاقي دايره الضغوط بتضيق عليك وانت مبقتش بتستحمل زي الاول. وقت ماتلاقي نفسك مش اي حاجه تخصك بشخصك بتفرح لانك عندك اسره وعيله واهتمامات اكبر من كده وقت ماتلاقي نفسك بتحرم نفسك من احب حاجات ليك عشان ممكن تأثر اوتضر حد عزيز عليك اوقريب منك حتعرف انك مبقتش صغير. لما يبقي الدنيا بالنسبالك شغل ونوم وتفكير فمستقبل عيلتك بس ودورك انت سواق الرحله بس ساعتها أقف قدام مرايتك وأسأل نفسك.... أنت عجزت ولا أيه... ؟... بس... 👌