كلام فى الصميم

حتى نلتقى قريبا .. مافيش غير كلمتين يتقالوا بيحملوا كل معانى الفخر والعزة !
🇪🇬💪

مع الضرب والرزع اللى شغال ده ومستبيح سماوات دول المنطقة ومهدد امنهم .. عايز اقول جملة واحدة بس !
"شكرا جيش مصر" 🫡

الضربة .. !!
ا----------------

قولنا فى مقالنا امبارح انه لايمكن التعويل ابداً على كلام ترامب المعلن بخصوص موعد الضربة على ايران ... وإننا هنعرف فى خلال ايام او ساعات !! ... و أهو الضربة الاميريكية حصلت وطلع ترامب يعلن عن انه تم القضاء على البرنامج النووى الايرانى ... فهل ترامب كلامه صحيح المرة دى والا زى كل مرة ! 🤔

الحقيقة ان ايران أعلنت ان الضربة اللى تم توجيهها لمفاعلاتها النووية كانت ضربة سطحية ، وبالذات مفاعل فرودو .. وكمان قامت بتوجيه ضربة صاروخية استهدفت عموم الاراضى الإسرائيلية .. لكن مش ده الرد طبعا على الضربة الاميريكية.

عموما .. الكرة دلوقتى فى الملعب الايرانى .. لأن ايران أعلنت قبل كدة انها هتستهدف القواعد والمصالح الاميريكية فى المنطقة فى حال قيام الولايات المتحدة بتوجيه ضربة مباشرة لإيران ! .. وبالتالى الأسئلة اللى بتطرح نفسها:-

👈 هل تقوم ايران باستهداف القواعد الاميريكية ردا على ماقامت به اميريكا !؟
👈 هل تقوم ايران باستهداف مفاعل ديمونة ، ردا على استهداف مفاعلاتها النووية !؟
👈 هل يتحرك من تبقى من الاذرع الإيرانية لمهاجمة المصالح الاميريكية فى المنطقة !؟

الواقع بيقول ان الساعات القادمة هتكون حبلى بالأحداث ..وللأسف كل الاحتمالات مطروحة ! 🙄

حفظ الله مصر برئيسها وجيشها وشعبها 🤲



صفحة

الأسبوعين ... !!
ا--------------

فى عز ما الهبد والرزع شغال بين دولة الملالى والكيان ، وفى عز ما التوقعات كلها كانت رايحة فى سكة إن أميريكا خلاص قدامها ساعات وتتدخل فى الـ7رب ضد إيران ، طلع الرئيس الأميريكى ترامب وقال إن أميريكا قدامها أسبوعين علشان تقرر ما إذا كانت هــ تتدخل فى الـ7رب وإلا لأ !!

خلونا بس نتفق على حاجة مهمة قبل مانكمل المقال .. وهو إن الشهور السابقة منذ تولى ترامب الحكم ، اثبتت إنه مافيش عاقل ممكن يراهن على إن كلام ترامب هــ يتنفذ زى ما هو بيقول .. ومافيش عاقل ممكن يجزم ما إذا كان اللى بيقوله ترامب كلام حقيقى ، والا فرقعة إعلامية ، والا مناورة سياسية وإستراتيجية !

الوضع الحالى بيقول إن طرفى الـ7رب الدائرة حاليا متعورين .. ومتعورين جامد جداً .. صحيح الإصابات اللى تعرضت لها إيران تعتبر أخطر على المستوى العسكرى والإستراتيجى .. لكن ده لايمنع إن الكيان متضرر بشكل كبير ، وحصل تطور نوعى فى الضربات اللى بتوجهها إيران للكيان فى الــ 3 ايام الأخيرة ، بعد إستهدافهم لمواقع حيوية داخل الكيان .. خلى رئيس وزرائهم "بى بى" يصرخ ويستدعى مود المظلومية باللعب على موضوع المدنيين والأطفال .. وكدزة 😁 .. وبرغم إن الخسائر البشرية فى الجانب الإيرانى أكبر بكتير من الكيان !! .. لكن مشاهد الإصابات وحالة الذعر والتدمير اللى طال البنية التحتية وبعض المواقع العسكرية للكيان عامل حالة سعادة عند شعوب المجرة كلها ، مش المنطقة بس

التاريخ والمواقف بتثبت إنه بمجرد ماحد كان بيلمس حاجب الكيان ويطرف رمشه بس ، كانت أميريكا والعالم الغربى كله بـيتدخل بشكل سريع وحاسم سياسياً وعسكرياً ، لحماية أمن الكيان وإستراجع هيبة الشعرة اللى طارت منه .. وده يرجعنا تانى لموضوع الأسبوعين اللى قال عليهم ترامب ! ..
ياترى إييه سببهم !!؟ ..
وليه التأخير فى التحرك !؟
وهل مهلة الأسبوعين دى حقيقية !؟
بس علشان نجاوب على السؤال ده ، ومن خلال ماهو متاح من معلومات .. لازم نقسم الشاشة اللى بنتفرج عليها لقسمين ... قسم دولة الكيان ، وقسم دولة الملالى

⭕️ أولا فيما يخص دولة الكيان:-

فى الوقت اللى كانت المفاوضات شغالة فى سلطنة عمان بين أميريكا ودولة المرشد .. وكانت المؤشرات كلها رايحة فى سكة إيجابية ، وشبه إتفاق .. وكان الخلاف تقريبا شبه محصور فى نقاط بسيطة ، وفى الصياغة النهائية اللى تحفظ لدولة الملالى ماء الوجه ، يقوم الكيان يتهور ويروح ضارب إيران ضربة موجعة يتحدث عنها العالم كله ، و ده ضرب مفك فى المفاوضات كلها .. وعلشان كدة المتابع هــ يلاقى إن التصريحات اللى خرجت من أميريكا بعد الضربة هو ضرورة العودة للمفاوضات !

الولايات المتحدة حاولت تستغل اللى حصل لمصلحة المفاوضات وإعتبرته وسيلة للضغط على دولة الملالى ... لكن الرد الإيرانى بعد ما إستوعب الضربة كان قوى .. مما وضع أميريكا فى موقف المجبر على التدخل لصالح الكيان .. بعد إستمرار تبادل الضربات بين الدولتين ، ومش كدة وبس .. لكن كمان تصاعد مستوى تأثير الضربات من جانب إيران فى قلب الكيان وبالذات فى تل أبيب .. وصولا إلى الحديث عن قرب إنهيار منظومة القبة الحديدية .. ده إذا ماكانتش إنهارت أصلا ! .. وعلشان كدة هتلاقى تصريحات أميريكا بقت فى صورة هرتلة ، وإن الكيان لن يتوقف عن الضربات حتى يحقق أهدافه ، وإن إيران لازم تذعن لما يتم إملائه عليها ، ولازم تنهى البرنامج النووى ، وسكان طهران لازم يغادروها ، وأنا اللى موقف خطة إ3تيال المرشد .. ألخ ألخ ألخ ! .. وبرغم كل ده .. مازال تبادل الضربات مستمر !

نقطة بس خارج السياق تتعلق بالكيان ، وهو إنه لحد دلوقتى بيظهر إنه جامد جمدان التنين ، ولم يتأثر بالضربات الصاروخية الإيرانية ، برغم إن تصريحاته كلها بتقول إنه متبهدل ، وبيلوش وبيقوم بإبتزاز جميع الأطراف علشان حد يتدخل ويلحقه أو حتى يتدخل ويوقف الحرب:-
🔹️على أميريكا أن تتدخل بجانبنا لتدمير البرنامج النووى الإيرانى.
🔹️على الإتحاد الأوروبى أن يضغط على إيران لتعطيل برنامجها النووى.
🔹️على دول الخليج أن تتحمل تكلفة الحرب على إيران لأننا نقوم بالدفاع عنهم.
🔹️فى حالة ضرب مفاعل ديمونة ، فإن مصر ستكون أكثر المتضررين. 😎😁

⭕️ ثانيا فيما يخص دولة الملالى:-

أخطر شيئ إنك توصل فى 7ربك مع طرف ما ، إنك توصله لمرحلة إنه يبقى ماعندوش حاجة يخسرها .. و ده الوضع اللى فيه النظام إيران دلوقتى !
انت حولت النظام من نظام لدولة وظيفية ، موجودة لأهداف محددة فى المنطقة ، إلى دولة مقطوعة الأذرع ، ومُقلمة الأظافر الخارجية ، ونظام مقرى فاتحته ، و آان أوان زواله !
إنت بتطلب من النظام التنازل عن كل شيئ ، يعنى وقف برنامجه النووى ، وتعطيل برنامجه الصاروخى .. والإذعان التام ، وكل ده بدون تقديم أى ضمانات لبقائه أو إستمراره .. لأنك فعليا بتتصرف من منطلق تغيير النظام نفسه !

ولأن النظام مابقاش عنه اللى يخسره ، فهو تعدى مرحلة التطاول على صبيّك .. وإبتدى يتطاول عليك إنت شخصياً ... وسواء صحت الروايات عن الدعم الروسى الصينى أم لا .. لكن المهم إنه أصبح بيهددك بضرب قواعدك العسكرية فى المنطقة ، فى حال إ3تيال المرشد ، أو تعرض الأراضى الإيران لضربة قوية ومباشرة من أميريكا نفسها ، سواء كانت بإمدادات خارجية ، أو من خلال القواعد العسكرية نفسها الموجودة فى المنطقة .. ومع الوضع الحالى ، نعتقد إن ضرب القواعد دى مش هــ يكون بصعوبة ضرب الكيان وإختراق منظومته الدفاعية .. بالعكس .. هــ يكون أسهل بكتير !

وعلشان كدة هــ نلخص أسباب مايبدو انه تردد أميريكى فى التدخل المباشر ، واللى منحه ترامب مدة أسبوعين لإتخاذ القرار فى 6 نقاط:-

👈 مواجهة نظام ماعندوش حاجة يخسرها .. ولو لقى نفسه بيروح ، هيبقى عليا وعلى أعدائى !

👈 تورط الولايات المتحدة فى حرب مباشرة فى المنطقة قد تطول ، فى الوقت اللى السياسة العامة للرئيس الأميريكى ترامب ، بتسعى لنزع فتيل الصراعات اللى بتستنزف الإقتصاد الأميريكى.

👈 عدم ثقة القيادات العسكرية والسياسية فى أميريكا بنسبة 100% ، من إن نتائج الضربة الأميريكية قد تؤدى إلى تحقيق اهدافها من تدمير البرنامج النووى الإيرانى وإسقاط النظام.

👈 عدم ثقة الولايات المتحدة حتى الأن من ردود أفعال القوى العالمية على خطوة التدخل الأميريكى فى الحرب على إيران بشكل مباشر .. وخصوصا مع الانباء عن الدعم الصينى الروسى لإيران !

👈 محاولة حماية الأصول الأميريكية فى المنطقة من طائرات وجنود وضباط ، إما بالقيام بإخلاء القواعد تحسبا لأى رد فعل من إيران .. أو بحشد غير مسبوق لتوجيه ضربة قاصمة للظلخل الايرانى تعجز معه ايران عن الرد .. لأن أميريكا مش هــ تخاطر بخسارة أصولها العسكرية فى المنطقة ولا هتخاطر بخسارة سمعتها عالميا ... وطبعا تحريك الأصول دى بــ ياخد وقت !

👈 وأخر نقطة إنه إذا كان ولا بد من التورط فى ضربة مباشرة لإيران .. فيجب ترك الكيان يقوم بكل مايمكن لغربلة الدفاعات الإيرانية ، وضرب كل مايمكنه من أهداف عسكرية وتدمير بنية تحتية فى الداخل الإيرانى لاستنزاف القدرات الإيرانية، مهما كانت خسائر الكيان من ردود الفعل الإيرانية .. سواء طال الوقت أم قصر .. علشان لما ييجى وقت التدخل الأميريكى ، تكون الأرض ممهدة تماماً لإنهاء الأمور بالضربة القاضية .. وده برضوا شيئ بيستلزم وقت !

وهنا السؤال االى بيطرح نفسه ..
هل ترامب كان جاد فى مدة الأسبوعين اللى طرحهم دوول ، والا الموضوع كان عبارة عن مناورة سياسية ، وإن أميريكا ممكن تتدخل قبل كدة ، .. وخصوصاً بعد وصول حاملات الطائرات إلى منطقة الخليج .. والاعلان عن تحرك القاذفات الشبحية B-2 من قواعدها فى الولايات المتحدة الاميريكية .. ناهيك عن الحشد العسكرى اللى بيقوم به الامريكان فى قواعدهم العسكرية بحسب الإعلام الاميريكى

ده اللى الأيام ويمكن الساعات القادمة هــ تجاوب عليه ...

⛔️ الحاجة الوحيدة اللى ممكن تغير المعطيات كلها هو إن ايران تعلن عن امتلاكها للسلاح النووى .. وخصوصا ان ايران من كام يوم نشرت فيديو على كل مواقعها لشخص ماسك قنبلة نووية سوغنطوطة بيطبطب عليها ومكتوب على بالعربي والانجليزي والعبرى كلمة #ربما .. !! 😎... وناهيك عن ان فيه انباء طالعة النهاردة بتتكلم عن زلزال بقوة 5.1 ريختر ضرب منطقة صحراوية فى ايران بيطلقوا عليه مثلث برمودا الايرانى .. وان ده ممكن يكون مؤشر لتفجير نووى ايرانى ! 🙄

✋️ قبل مانختم المقال ، فيه شيئ مهم لازم نأكد عليه ...
إنه مافيش دولة في العالم بتنهار بضربات عسكرية صاروخية او جوية …. ولكن بتنهار من الداخل …..
الحسابات الامريكية و الصهيونية بتشتغل على ضرب النظام من الداخل و تأليب الشعب الايرانى المنقسم اساسا عرقياً على حكومته.
يعنى اللى حيحسم الحرب دى لا امريكا و لا اسرائيل ….. لكن اللى حيحسمها هو الشعبين الايرانى و الاسرائيلي !

عشان كده ترامب قال اسبوعين .. عشان فيه شغل كبير بيتم على الارض مستنى نتيجته .. ده مع فرض انه استنى مدة الاسبوعين !

و ده يبين كلمة الرئيس السيسي اللى دايما كان بيقول ….. انا اواجه الدنيا كلها و ماتشغلوش نفسكم باللى بره طول ما انتم ايد واحدة ….. انا مش بخاف على مصر غير منكم.

وربنا يحفظ بلدنا .. وكل المنطقة من أى عمل متهور أحمق قد يقود المنطقة إلى جحيم لا يعلم مداه الا الله ..

🇪🇬🇪🇬

صفحة

إنها مصر .. !!
ا----------------

فى وسط كل الاحداث القاسية اللى بنعيشها .. والاخبار الكابوسية اللى بنشوفها ونسمعها كل دقيقة .. تلاقى خبر كدة جاى علشان ينزل برداً وسلاماً على قلب الواحد ويشعرك بالفخر ببلدك ويحسسك بنعمة الأمن والأمان اللى بنعيشها .. واللى الموتورين كانوا طول الوقت بيسخروا منها ويحسسوك انها شيئ هامشي، برغم إننا بنعيش فى اقليم مشتعل بقاله سنوات طويلة ، بننام فيه بالليل واحنا مش عارفين هنصحى على اييه تانى يوم !!

مصر فى عز الازمة اللى المنطقة فيها .. سايبة المعجنة اللى حاصلة والاقتتال اللى داير فى كل حتة .. ونيران الخطر اللى بتحيط بمصر من الاتجاهات الأربعة لكل حدودها .. وبتلعب فى حتة تانية خالص ..
بتلعب لعب استراتيجى ..
بتستخدم نوع من السياسة الخشنة فى مواجهة الناس اللى مولعين فى الكوكب وبيديروا سياساته المجحفة وبيطبقوها على دول العالم !

السيد السفير / أسامة عبد الخالق .. مندوب مصر فى الأمم المتحدة بيحط العالم كله من قلب منظمة الأمم المتحدة أمام مسؤولياته .. وبيعرى الجميع وبيفضح الاليات والمواقف المستخدمة فى ترسيخ استمرار حالة عدم الاستقرار ، وخلق بؤر مشتعلة واشعال حروب فى كل مناطق العالم وبالذات فى منطقة الشرق الاوسط لفرض البلطجة بالقوة ودعم الكيان على حساب دول وشعوب المنطقة.

📌 مصر بتهاجم الفيتو الاميريكى وبتقول انه مش هيغير حقيقة ان زفتائيل بترتكب جرائم حرب وجرائم ضد الإنسانية بصورة ممنهجة فى القطاع .. وبالتالى فانه يجب إصلاح منظومة مجلس الأمن لانها بالشكل ده غير مفيدة وغير عادلة !

📌 وقال كمان ان استمرار مايحدث فى القطاع عار على المجتمع الدولى كله ويجب وقفه فورا.

📌 وهاجمت مصر استهداف زفتائيل لإيران ووصفه السفير أسامة عبد الخالق بإنه خرق للقانون الدولى .. وانه يجب انضمام كل دول المنطقة لمعاهدة منع انتشار الأسلحة النووية .. وإخلاء الشرق الاوسط من أسلحة الدمار الشامل .. يعنى الشرق الاوسط بالكامل .. مش دولة آآه ودولة تانية لأ !! 😉

طب لييه مصر ركزت على موضوع غزة والقضية والتهجير فى الوقت الحساس ده !؟

لان هو ده بيت القصيد وحل الموضوع ده هيحل 90% من مشاكل المنطقة .. وخصوصا ان جزء من اهداف اللى بيحصل دلوقتى من صراع هو التغطية على مايحدث فى القطاع !!

العالم كله مشغول الان بأخبار القصف والقصف الاخر .. وماحدش بيتكلم على القطاع اللى سقط فيه فى الساعات الماضية 70 شهيد ، وماحدش اتكلم عنهم ! .. ده غير الدفع باتجاه عملية التهجير عن طريق تحويل القطاع إلى منطقة لا تصلح للحياة.

وبرغم كل كلام عشاق الدونية بعد اشتعال الصراع بين دولة الملالى ودولة الكيان الدخيل، انه بعد ايران الدور على مصر .. وياعينى ياليلى عليكى يامصر ، مع موسيقى تصويرية حزينة .. إلا ان مصر القوية اللى احنا نعرفها ، هاجمت امريكا والكيان وهاجمت نظام مجلس الامن القائم على الفيتو الظالم .. و ماهمهاش الكلام ده كله اللى بيتقال ... وده تصرف من دولة عارفة قيمتها وعارفة قدراتها .. وفاهمة قواعد اللعبة كويس .... لعبة العفى اللى ماحدش يقدر ياكل لقمته !

الحمد لله على نعمة مصر .. وفخورين بماتقوم به مصر وماتسجله من مواقف سياسية ، وماتقوم به من تحركات على المستوى الإقليمى والدولى من العمل على نزع فتيل الازمات التى تهدد المنطقة لحماية أمن مصر القومى والامن الاقليمى ايضا ..

مصر بتعمل اللى ماطلعش من دول كتير تقوم ب 10% حتى من الدور ده !

افخروا بمصر وبدورها وبكل اللى بتعمله .. وماتسمحوش ابدا لأى حد يقلل من بلدكم ومن قيمتها .. لأن مصر حقيقى كبيرة أوى👌🇪🇬🫡💪

حفظ الله مصر برئيسها وجيشها وشعبها 🤲

🇪🇬🇪🇬

صفحة

اخبار سريعة !
ا----------------

👈 اندلاع حريق فى مصفاة حيفا شمال اسرائيل نتيجة هجوم صاروخى ايرانى.

👈 استهداف مقر امان التابع للموساد فى قلب تل أبيب واصابته بأضرار بالغة
.
👈 حاملة الطائرات الاميريكية USS نيميتز تتجه إلى منطقة الخليج قادمة من بحر الصين .. لتنضم إلى الحاملة USS كارل فينسون الموجودة فى الشرق الاوسط.

👈 السفارة الروسية تطلب من مواطنيها مغادرة إسرائيل عبر معابر برية فى مصر والاردن

👈 الصين تبدأ اجلاء رعاياها من إيران.

👈 المرشد العام خامنئى أعطى صلاحياته للمجلس الأعلى للحرس الثورى.

ومازالت الأحداث تتداعى ..

صفحة

بعد نشر خبر اغتيال نجاد عن وسائل اعلامية .. تعود وسائل الاعلام الإيرانية وتنفى الخبر .. ومازال الإعلان والنفى خبران غير مؤكدان !!

اخبار سريعة

👈 تبادل ضربات بين قصف صاروخى من الجانب الايرانى وقصف جوى من جانب الكيان

👈 خمسة مصابين مدنيين فى الكيان ناتجة عن قصف صاروخى ايرانى

‌👈 جيش الكيان يعلن مقتل رئيس الأركان الإيرانى الجديد على شادمانى على اثر غارة دقيقة كما تم وصفها.

👈 ترامب يصرح انه على ايران الاستسلام والاذعان دون قيود او شروط !

👈 منذ دقائق انطلقت صواريخ إيرانية لاستهداف قاعدة نيفاتيم فى صحراء النقب جنوبا وصفارات الإنذار تدوى فى المفاعل النووى ديمونة وفى محيطه.

👈وسائل إعلام إيرانية تعلن انقطاع واسع لخدمات الانترنت داخل البلاد.

ومازال فى الأحداث مستجدات 🙄

صفحة

قواعد الإشتباك .. !!
ا-------------------

أكيد حضراتكم متابعين الموقف الحالى ، وقاعدين قدام شاشات القنوات الإخبارية ، ومتابعين الفيسبوك لحظة بلحظة ... طبعا .. ماهو اصل مش كل يوم هيبقى فيه 7رب فى المنطقة ، وعلى بعد خطوات من أرضنا .. والصواريخ والطيران الحربى عمالين يتفسحوا فى أجواء المنطقة داخل وخارج الغلاف الجوى .. لأ وكمان إييه .. ده الكيان طرف فيها .. 🙂

أهم حاجة إنك ماتاخدش كل خبر بإعتباره من المسلمات .. وخصوصا من بعض القنوات الإخبارية .. لأن كل قناة ولها أجندة ، وبتمثل توجهاتها .. وبــ تبثلك الأخبار بالطريقة اللى هى عايزاك تشوفها بيها .. فــ تابع الكل ، وقارن بين الرسائل الإخبارية كلها .. وإستبعد الرسائل الموجهة ، وانت تقدر توصل لحقيقة الموقف .... و ده اللى هــ نحاول نعمله مع حضراتكم فى المقال ده

فيه حاجة فى المواجهات العسكرية إسمها .. ولاحظ هنا إننا قولنا فى المواجهات مش الحروب .. لأن لحد دلوقتى ، اللى بيحصل بين إسراء والفرس مواجهة عسكرية وليست 7رب شاملة _حتى الأن_ لأن الــ7رب الشاملة بيبقى لها قواعد تانية خالص ! ..

المهم .. إييه هى قواعد الإشتباك دى !؟

دى ياسيدى بــ تبقى عبارة عن خطوط توافقية .. بيضعها طرفي المواجهة ، ولكن بدون إتفاق مكتوب .. حاجة زى عرف كدة يعنى ... بمعنى إننا صحيح فى مواجهة لكن داخل إطار لايجب تجاوزه .. يعنى هــ نخش راجل لراجل ونتبادل الهجمات .. لكن هــ تضربلى العمق ، هــ أضربلك العمق .. هتقصف مدنيين ، هــ أقصفلك مدنيين .. هــ تدمر بنية تحتية ، هــ أدمرلك بنية تحتية .. مصنع بمصنع .. محطة قطار بمحطة قطار .. إستهداف قيادات بقيادات .. مصافى بترول بمصافى بترول .. قواعد عسكرية ، بقواعد عسكرية .. وهكذا !ّ

طب هل فى المواجهة الحالية ، تم الإلتزام بقواعد الإشتباك دى !؟
الحقيقة أااه .. و لأ
طب إزاى يعنى .. ؟؟
هاقولك ..

فى البداية ، إسراء قامت بضربة قوية .. كبدت الفرس خسائر فادحة سواء على مستوى الأفراد أو حتى على مستوى البنية التحتية ، والنووية .. يعنى الاطاحة بقادة عسكريين وقادة فى الحرس الثورى وعلماء طاقة نووية وقواعد عسكرية وجوية ومراكز لوجيستية ومحطات طاقة نووية خرجت من الخدمة ! .. بالرغم من إن إيران أعلنت إنها كانت عارفة بميعاد الضربة من دول صديقة فى المنطقة !
الضربة كانت موجعة فعلا .. أفقدت إيران التوازن .. لكن لما ردت .. حاولت تحافظ على قواعد الإشتباك ، وطلعت زريبة صواريخ ضربت أراضى الكيان .. لكن لم يكن لها تأثير يذكر زى ما ذكرنا فى مقالنا من يومين ! .. يعنى شوية إصابات على كام مبنى إتهدموا

طب إييه اللى حصل ..
حصل حاجتين ..
👈 الأولى .. تصريحات أميريكية بضرورة إستئناف المفاوضات النووية .. وكأن أمريكا بتقول لدولة الملالى ، تقعدى على مائدة المفاوضات ، وتقبلى بشروطنا !
👈 الثانية .. ضربة تانية من إسراء تستهدف مصافى البترول ، وقواعد عسكرية ومراكز تابعة للحرس الثورى ، ناهيك عن ضرب عمق العاصمة طهران !

هنا إيران بدأت تستوعب الضربة ، و تستعيد توازنها .. لا لشيئ .. ولكن لإدراكهم إنه خلاص الفاتحة إتقرت ، ومكافئة نهاية الخدمة هتكون .. إما بتحييد الدولة كلها وتدمير البرنامج النووى والبنية التحتية العسكرية ، أو على أقل تقدير إسقاط النظام ...
وهنا تحولت المواجهة إلى صراع بقاء !! ..
ومش علشان الجهاد ولا الإسلام والا القدس ولا الكلام ده خالص ..
لأ .. ابثلوتلى .. دول تخلوا عن سماح وباعوا غزة فى ثانية !

وكان لازم تبدأ إيران تصعد من هجماتها .. وتستخدم مخزونها الإستراتيجى الصاروخى لضرب أهداف فى عمق الكيان .. لكن برضوا فضلت محافظة على قواعد الإشتباك ولو جزئياً ..
يعنى مثلا ضربت محيط مفاعل ديمونة ، مش المفاعل نفسه .. لم تقم بإستهداف أى قيادة عسكرية أو أمنية إخرائيلية .. إستهدفت معهد بحوث وايزمان كمبنى ، مش الباحثين والعلماء اللى فيه .. وهكذا ..

وبرغم إن إخرائيل تبادلت معها الهجمات .. وردت إمبارح فى غارة تخلصت فيها من رئيس مخابرات الحرس الثورى والنائب بتاعه وأحد ضباطه ... إلا إن إيران ردت بقصف صاروخى فى كل أنحاء أرض الكيان ، وفى عمق تل أبيب .. وأصاب البنى التحتية بأضرار بالغة .. وخسائر فادحة ، قدرها بعض الخبراء بأنها تجاوزت المليار شيكل .. وكأن إيران بتحاول التركيز على الصور الحية اللى بتعمل شو إعلامى كبير مع صور وفيديوهات الحرائق والمبانى المتهدمة ، وصفارات الإنذار اللى بتدوى فى كل مكان.

طب الوضع إييه دلوقتى ..
الوضع دلوقتى إن كل دولة برغم إن الصورة العامة ، إنها راكبة دماغها ، وماضية فى طريق الــ7رب .. لكن كل دولة بتسعى جاهدة لإنهائها .. ولكن بالشكل الذى يحفظ لها ماء الوجه !!
يعنى إيران بقت بتقول دلوقتى إنها لن تتوقف حتى زوال إسراء .. والكيان بيقول إنه مسيطر على الأجواء الإيرانية ، وإنه لن يتوقف حتى يتم تحقيق كل الأهداف ..

النهاردة اخرائيل ضربت ايران تانى واستهظفت مبنى التليفزيون .. وايران اعلنت انها هترد بضربة كبرى .... لكن الحقيقة إن إسراء بتستجدى أميريكا علشان تتدخل ... وإيران على لسان رويترز ، و وول ستريت جورنال نقلاً عن مصادر، إن إيران بعتت رسائل عاجلة لإسرائيل وأمريكا من خلال وسطاء، بتطلب فيها وقف الهجمات واستئناف المفاوضات النووية، مع إمكانية إبداء مرونة ! .. عارف لييه !؟ .. لإن إيران مدركة كويس جدا اللى مش قادر يدركه المهيصاتية اللى قاعدين بيصفقوا طول الوقت ، إن المخزون الصاروخى اللى عندهم ، له نهاية وغير قابل للتعويض ، إلا لو الصين تدخلت بشكل مباشر .. فى حين إن إسراء عندها دعم غير محدود ..

والغريب بقى إن الدولتين بيعملوا عكس اللى المفروض يتعمل فى الحروب اللى من النوع ده .. وهو إن كل دولة تضخم فى مكاسبها وتقلل وتسفه من خسائرها ... لكن اللى بيحصل هنا العكس ، وهو إن إيران بتعلن طول الوقت عن اللى إسراء بتعمله فيها .. وإسراء بتعلن وتضخم من خسائرها الناتجة عن الهجمات الإيرانية !

طب الأميريكان والروس والصينيين فين بقى من كل ده !؟
📌 الروس بيعرضو الوساطة ، والتدخل لإقناع إيران بالتخلى عن برنامجها النووى ، وإنهم ياخدوا الماء الثقيل من إيران وتخزينه عندهم لحين الحاجة له فى أغراض سلمية

📌الصين ، لابدة فى الذرة ، وبــ توعز لباكستنان من تحت لتحت بالتهديد بالتدخل لدعم إيران

📌 ترامب أميريكا بقى .. طلع بتصريحات النهاردة ، إنه علاقة أميريكا بإسراء جيدة ، وعلى إيران إنهاء الحرب لأنها مش هــ تفوز بيها ، وعليهم الرجوع للمفاوضات قبل فوات الأوان ... وبعدها الجزيرة ورويترز و CNBC وسكاى نيوز قالوا إن ترامب رفض خطة إسراء لإ3تيال المرشد الأعلى .. وطبعا دى رسالة تهديد ضمنية للقيادة الروحية العليا فى النظام الإيرانى.

⛔️ نقطة نظام .. !
من حقك تفرح وتصفق للى بيحصل فى إسراء .. وعارفين ومقدرين تماما إن كلنا محروقين ، ونفسنا نشوف فيهم 6 سنين مش يوم .. لكن فى النهاية لازم تحط مشاعرك على جنب وإنت بتحكم على الأمور !
وإحنا مش مع حد ضد حد .. والإتنين مايفرقوش معانا .. لأن الدولتين فى الأساس دول وظيفية ، والإتنين أعداء للدولة المصرية ، والإتنين عايشين بمبدأ إستعمارى ، وعندهم أجندة توسعية ! .. فــ ياكش ياكلوا بعض .. إحنا اللى يهمنا بلدنا .. بلدنا وبس ... والصراع الحاصل دلوقتى ، بيأثر على مصر ، لأنه بيأثر على إستقرار المنطقة ... وبالنسبة لمهاويس الكضية ... فلازم تبقى فاهم إن اللى بيحصل ده مش فى صالح الكضية !

⭕️ كلمة أخيرة ..
بالنسبة للمنبطحين وعشاق الدونية اللى مافيش فى بقهم لبانة غير إنه بعد إيران هــ يبقى الدور على مصر ، الدور على مصر ... وإن بقاء إيران فى مصلحة الأمن القومى المصرى
هو فيه إييه يابنى انت وهو ... !!؟
هو إحساس الدونية واخد معاك حقه للدرجة دى !!؟؟
هو حد قالك إن إيران حائط صد بــ يحمى مصر !!؟
زى ماكنت بتقول إن سماح خط الدفاع الأول لمصر ، ووجوده يصب فى مصلحة الأمن القومى !!
هو الأمن القومى ده مالوش جيش وشعب يسألوا عليه !؟
للدرجة دى إنت شايف مصر صغيرة فى عينك ، وتقوللى انا خايف على مصر !
ده إنت مافيش جواك بتعريفة نخوة أو إحساس بالعزة !
يابنى اللى حامى مصر بعد ربنا ، هو جيشها وشعبها
يابنى مصر مش مقويها بعد ربنا ، غير ذراعها
رئيسك لما قال إن العفى ماحدش ياكل لقمته ، وماكانتش كلمة وخلاص
كانت حقيقة ..
يابنى ده الربيع العربى كله إتعمل علشان خاطرك ، وفى الأخر غفلتهم ورجعت أقوى من الأول
يابنى العراق راحت وسوريا راحت ، وإنت ماحدش عارف يعمل معاك حاجة
يابنى إنت بتتحاصر من اصدقائك قبل اعدائك ، ولسة واقف زى الصخرة
يابنى إنت الدولة الوحيدة فى العالم دلوقتى اللى مهددة تهديد يومى من إتجاهات حدودها الأربعة .. وماحدش عارف يقرب منك
يابنى إنت الدولة اللى وقفت قدام العالم كله فى مخطط التهجير وماحدش قدر يلوى ذراعك !
بطل إنبطاح ودونية بقى !

المواجهة معانا كدة كدة جاية .. سواء إيران راحت أو فضلت ..
قدرك إنك تبقى فى رباط ليوم القيامة ..
وقدرك إنك تلعب على الفاينال ..
و ده اللى مصر بتستعد له كويس جدا برغم كل المصاعب اللى بنواجهها

حفظ الله مصر بئيسها وجيشها وشعبها

🇪🇬🇪🇬

صفحة

ا(2)
مجموعة اخبار تانية فى الصور .. وضيف عليهم الخبر التالى:-
الحرس الثورى الإيراني يعلن اغtيال رئيس استخباراته ونائبه وضابط اخر فى غارة جوية !

ومازالت الأحداث الساخنة تتداعى ..

صفحة

مجموعة اخبار مهمة ، لحد مانكتب مقال عن اللى بيحصل !
الأحداث فى منتهى السخونة .. وكل الأطراف واقفة محفزة .. وقرار غير مسئول ممكن يقلب المنطقة كلها لجحيم !

ادعو لمصر بلدنا .. وربنا يوفق رئيسنا لكل خير فى الظروف دى .. ويحمى جيشنا واجهزتنا الأمنية ويسدد خطاهم 🤲

صفحة

التداعيات ... !!
ا------------------

اللى موجود فى صورة مقال النهاردة ده جزء من مقالنا اللى نشرناه امبارح علشان بس مانعيدش الكلام من تانى !! ... لان المقطع ده هو لب الموضوع والكلام اللى فيه الخلاصة !! ..

طب لييه بننشره تانى النهاردة ، وهل فيه جديد يخلينا نعيد نشره ؟؟ ..
الحقيقة آآه ...
النهاردة خرجت من ايران تصريحات بتقول انهم بيدرسوا غلق مضيق هرمز ..
وللى مايعرفش .. فمضيق هرمز بيمر منه حوالى 70% من التدفقات البترولية اللى بتخرج من دول الخليج للعالم .. واللى بتمثل 26% من حجم تجارة البترول المتداول فى العالم كله ... و ده معناه انه لو ده فعلا حصل .. فإحنا مقبلين على صدمة اقتصادية للعالم كله نتيجة ارتفاع أسعار البترول لأرقام فلكية !

طب اييه اللى يخلى ايران تعلن عن ده !؟ ...

📌 اولا:- ده معناه ان الضربة اللى تلقتها ايران بكل تفاصيلها المعلنة ، وناهيك عن التفاصيل الغير معلنة كانت اقوى واكبر من قدرة ايران على استيعابها او تجاوزها او حتى محاولة تعويضها .. ولاحظوا إننا بنتكلم عن الاطاحة بقادة عسكريين وقادة فى الحرس الثورى وعلماء طاقة نووية وقواعد عسكرية وجوية ومراكز لوجيستية ومحطات طاقة نووية خرجت من الخدمة !

📌 ثانيا:- ده معناه برضوا ان الضربة اللى قامت بيها ايران للرد على الكيان كانت نتائجها كلها بلح من الناحية العسكرية والاستراتيجية ..
سيبكم من صور الكام مبنى والكام رصيف اللى اتكسروا .. وفيديوهات الصواريخ اللى كانت بتنفجر .. والناس اللى نزلت المخابئ وإغلاق مطار بن جوريون .. وكل الكلام اللى تم الترويج له لتضخيم حجم الضربة علشان الكيان يرسخ اكثر لفكرة المظلومية وضرب مواقع مدنية على طريقة الفنان عادل امام فى المسرحية لما قال للضابط "ضربني بوشه على ايدى ياسعادة البييه" !! ... لكن عسكريا .. للاسف .. وكالعادة .. الضربة للكيان على المستوى العسكرى ، لاتوازى حجم النتائج اللى حققها الكيان من ضربه للعمق الايرانى.

وخلينا نقول ونؤكد على شيئ مهم .. وهو ان اللعب فى المضايق الدولية ، هو اللعب فى عداد عمر الدولة او الجهة اللى بتفكر فيها .. لأن العالم مش هيقف يتفرج ... وعلشان كدة ... السؤال اللى بيطرح نفسه .. هل ايران حاسبة كويس رد الفعل على خطوة زى دى !؟

و ده يرجعنا مرة تانية لصورة المقال المقتطعة من مقالنا بالأمس ... لأن لو ايران قررت تعمل كدة ، فده معناه انهم متأكدين ان قرار التخلص من النظام الايرانى تم اتخاذه خلاص .. و إن خطوة زى ده معناها ان نظام الملالى وصل لمرحلة "عليا وعلى اعدائى" ... و ده ممكن يصل بمعادلات المنطقة لحتة تانية خالص !!

⛔️ طب هل الاستبياع ده هو الشيئ الوحيد اللى مقوى قلب إيران أوى كدة ، لدرجة انها تقدم على خطوة انتحارية زى دى .. وكمان تعلن انها مش هتستأنف المفاوضات النوية مع اميريكا !؟
الحقيقة لأ .. فيه مستجدات
باكستان أعلنت دعمها لإيران متجاوزة كل الخلافات اللى بيهم .. وكمان الراجل الطيب بتاع كوريا الشمالية دخل على الخط واعلن استعداد بلاده للتدخل العسكرى المباشر ضد الكيان واميريكا للدفاع عن ايران ... وفى المقابل أعلنت فرنسا دعمها التام للكيان فى مواجهة ايران .. ولاحظ ان الدول دى كلها نووية !! 😎 ... يعنى الموضوع ممكن يقلب بصراع كارثى فى المنطقة كلها !!


👈 طب حاجة كدة على جنب ...
مصر النهاردة أعلنت عن تأجيل افتتاح المتحف المصرى الكبير للربع الاخير من العام الحالى !
لاحظوا ان الافتتاح كان محدد له 3 يوليو المقبل .. يعنى كمان 3 اسابيع ... و ده جايز يكون معناه ادراك القيادة السياسية والامنية فى مصر ان الأحداث الحالية ، وحالة عدم الاستقرار فى المنطقة .. شكلها مطولة معانا شويتين 😎

كل شيئ وارد ..

الأحداث متسارعة .. ونتائج التحركات قد تخرج عن نطاق التوقعات .. فخلونا نشوف اييه اللى هيحصل .. ونتمنى يكون القادم خير !

لكن الاهم من ده كله …. اننا في مصر بخير …. و ربنا يخللى الشعب اللى بيحافظ على بلده ، و بيدعم جيشه الوطنى ومالوش في شغل الميليشيات و الشعارات الحنجورية


حفظ الله مصر برئيسها وجيشها وشعبها 🤲

🇪🇬🇪🇬

صفحة