النائب محمود عصام

في وقت العالم كله بقى بيتكلم فيه عن أهمية توطين الصناعة، أصبح من الضروري نؤمن إن قوة أي دولة مش في اللي بتستورده، لكن في اللي تقدر تصنعه بإيديها وبخبرات أبنائها.

الحقيقة إن مصر عندها إمكانيات كبيرة جدا، وعندها عقول وخبرات قادرة تنافس، لكن الأهم هو وجود ناس عندها إصرار إنها تحول الكلام إلى شغل حقيقي على الأرض.

ومن هنا أقدر أقول بكل فخر إن تجربتنا في توطين صناعة الفنادر البحرية من خلال مصنع المهندس كانت بالنسبة لنا خطوة مهمة جدا، مش مجرد مشروع صناعي وخلاص، لكن محاولة حقيقية إننا نقدم منتج محلي بجودة محترمة يقدر ينافس ويثبت نفسه.

الفكرة مش بس تصنيع منتج داخل مصر، الفكرة إنك تبني خبرة، وتوفر فرص عمل، وتقلل الاعتماد على الاستيراد، وتخلي الصناعة المحلية تاخد المكانة اللي تستحقها.

النهاردة كل دولة قوية اقتصاديا بدأت من الصناعة، وكل منتج محلي ناجح هو خطوة حقيقية ناحية اقتصاد أقوى ومستقبل أفضل.

ورهاننا دائما سيظل على الصناعة المصرية، طالما فيها ناس بتشتغل بإخلاص، وبتؤمن إن “صنع في مصر” ممكن تكون علامة جودة وفخر حقيقي.

رئيس فرنسا بالشورت في شوارع الإسكندرية.. يا مصر بتعمليها إزاي؟

بابتسامة كبيرة على وشوشنا كلنا.. وبمشاعر فخر ملهاش حدود في صدورنا.. تابعنا ممارسة الرئيس الفرنسي إيمانويل ماكرون، النهاردة الصبح، رياضة الجري في شوارع الإسكندرية، ومعاه عدد من أعضاء الوفد الرسمي الفرنسي المرافق، خلال زيارته الحالية إلى مصر.

ولما نربط المشهد العظيم ده بافتتاح المقر الجديد لجامعة سنجور في مدينة برج العرب الجديدة امبارح، هنقدر نفهم وندرك العظمة اللي بتعملها مصر في صدارة أخبار العالم.. بلد بتفتح المزيد من صروح العلم، وبتنفتح على ثقافات العالم، وفي نفس الوقت بتقدم مثال ونموذج على إرساء الأمن والأمان وحسن استقبال الضيوف.

طاقة من التفاؤل والأمل حقيقي بتلاقيها لما بتتكلم مع أي ضيف عزيز لمصر من الدول الشقيقة والصديقة.

المكاسب هنا كبيرة حتى على المستوى المحلي.. هتلاقي شبابنا وبناتنا على السوشيال ميديا متفاعلين جدا مع صور الرئيس الفرنسي في شوارع إسكندرية وتحديدا في شارع خالد بن الوليد بمنطقة الكورنيش.. مشهد مش بس بيفرحنا ببلدنا.. ولكن كمان بيغذي الفخر والانتماء للبلد العظيم ده اللي فعلا بيخلينا نسأل بحب وفرح واحتفال: "يا مصر بتعمليها إزاي؟!"

#ماكرون

صناعة الفنادر والمصدات البحرية من الصناعات المهمة وتوطينها بيساهم بشكل مباشر في تقليل فاتورة الاستيراد، خصوصا مع التوسع الكبير اللي بتشهده الموانئ المصرية ضمن خطة الدولة لتصبح مصر مركز إقليمي للتجارة والخدمات اللوجستية.
وأشعر بكل فخر واعتزاز باختيار مصنعنا “المهندس” كنموذج رائد يتعرض أمام الرئيس عبد الفتاح السيسي خلال احتفالات عيد العمال بشرق بورسعيد، بحضور الفريق كامل الوزير، دي حقيقي شهادة ثقة في قدرتنا على توطين صناعات كانت معتمدة بالكامل على الاستيراد، إذا ما أتيحت لنا الفرصة الاستثمارية وبيئة العمل المحفزة.
الإنشاءات تسير بالسرعة المطلوبة في مصنعنا الثاني في برج العرب وقبل نهاية السنة هتكون المعدات راكبة وشغالة.
أجدد الشكر للقيادة السياسية والفريق كامل الوزير على دعمهم المستمر للصناعة الوطنية.. الدعم ده بيدي دفعة قوية للقطاع الخاص للتوسع وزيادة الاستثمار في الصناعات الاستراتيجية.

البرلمان | موقع برلماني متخصص | محمود عصام: توطين صناعة الفنادر يسهم في خفض فاتورة الاستيراد في ظل خطط تطوير الموانئ البحرية أشاد المهندس محمود عصام عضو مجلس النواب السابقبجهود القيادة السياسية المصرية في دعم العمال وصون حقوقهم مؤكدا أ

كل سنة وكل عمال مصر طيبين بمناسبة عيد العمال.
فى المناسبة دى أحب أقول أن مجهود العمال اللى بنشوفه يوميا وتعبهم واجتهادهم هو الأساس الحقيقي لأي تنمية. كل مصنع شغال، وكل مشروع قائم، وراه مجموعة من الجنود هم العمال اللى بيتحملوا كل الصعاب علشان الإنتاج يفضل مستمر.
كل الاحترام والتقدير لكل عامل مصري.

بصراحة كده.. خبر إعفاء الصين لوارداتها من 53 دولة أفريقية (ومنهم مصر) من الجمارك شكله حلو جدا على الورق، بس محتاجين نبصله بهدوء شوية ومن غير ما نبالغ في التفاؤل.

آه طبعا القرار ممكن يساعد شوية في تحسين تنافسية صادراتنا هناك، بس لما نبص على طبيعة الصادرات المصرية للصين هنلاقيها في الأساس:
موالح ، فراولة ، شوية منسوجات، وأسمدة وخامات.
يعني مش منتجات ذات قيمة مضافة عالية تخليها تعمل طفرة ضخمة فجأة.

كمان خلينا نتكلم بالأرقام:
صادرات مصر للصين أصلا رقمها صغير جدا لا يتجاوز 400 مليون دولار مقارنة بحجم الواردات الضخم بيتخطي 19 مليار دولار.. شايفين الفجوة عاملة ازاي؟!

طيب لو افترضنا أحسن سيناريو ممكن — إن الصادرات زادت مثلا 50%، هنلاقي إن الزيادة دي برضه “رقم محدود” ومش هتغير الصورة الكبيرة قوي، ولا هتقلب ميزان التجارة لصالحنا، الصين أصلا مش من الأسواق الرئيسية المستهدفة للصادرات المصرية، وده بيخلي فكرة تحقيق طفرة كبيرة فيها مش سهلة خالص، خصوصا مع المنافسة القوية جدا هناك.

وما ننساش نقطة مهمة الميزة دي مش لمصر لوحدها.. دي لـ 53 دولة أفريقية!
يعني إحنا داخلين ننافس دول كتير جدا على نفس السوق، مش واخدين ميزة حصرية.

في المقابل، الصين ممكن تكون هي المستفيد الأكبر لأنها بتأمن خامات وموارد من أفريقيا (ومنها مصر) بتكلفة أقل وبتقوي علاقاتها الاقتصادية والسياسية مع القارة وكمان بتفتح الباب أكتر لتصدير منتجاتها لينا.

القرار إيجابي “نسبيا”، وممكن يدي دفعة بسيطة للصادرات بس مش هيعمل طفرة كبيرة لوحده.
اللي محتاجينه بجد هو تنويع صادراتنا وزيادة القيمة المضافة فيها.. ساعتها بس أي فرصة زي دي ممكن تبقى حقيقة.

أتقدم بخالص العزاء والمواساة لمعالي رئيس مجلس الوزراء الدكتور مصطفى مدبولي فى وفاة والد سيادته، غفر الله ما تقدم من ذنبه وما تأخر ودعواتنا للأسرة الكريمة بالصبر والسلوان.
إنا لله وإنا إليه راجعون

في ذكرى عيد تحرير سيناء، بنجدد العهد مع أبطالنا وشهدائنا اللي دفعوا ثمن استعادة سيناء من دمهم وأرواحهم. وبنقول لهم إن تضحياتكم العظيمة هي اللي بترسم لنا الطريق اللي بنمشي عليه لبناء الجمهورية الجديدة.
كل عام ومصر بألف خير.

للأسف، خلال الأيام الأخيرة حصلت حرائق متكررة داخل عدد من المصانع في أكتر من مكان؛ حريق في مصنع مشغولات ذهبية بمدينة بدر، وحريق داخل مصنع بالمحلة الكبرى، وكمان حريق ضخم في مصنع أثاث بدمياط. تكرار الوقائع بالشكل خطير، وبيفتح تساؤلات واضحة عن مدى الالتزام بإجراءات السلامة داخل بعض المنشآت الصناعية.

الملف ده سبق واتكلمت فيه داخل مجلس النواب، وتقدمت بأكثر من أداة رقابية بخصوص معايير الأمن الصناعي، وطالبت وقتها بتشديد الرقابة، لأن أي تقصير في الموضوع ده بيكون ثمنه كبير.

دلوقتي محتاجين إجراءات واضحة وسريعة: تفتيش مفاجئ ودوري على المصانع، مراجعة فعلية لأنظمة الإطفاء والإنذار، تدريب العمال على التعامل مع الطوارئ، وإيقاف أي منشأة غير ملتزمة لحين تصحيح أوضاعها.

أناشد بسرعة التحرك واحنا على أعتاب فصل الصيف اللي بتزيد فيه الحرائق، واللي بيحصل لازم يقابله تحرك بنفس السرعة، وكل تأخير في الملف ده ثمنه أرواح ناس.