Sahar Talaat Mostafa - سحر طلعت مصطفى

أتقدم بخالص العزاء إلى معالي دولة رئيس مجلس الوزراء الدكتور مصطفى مدبولي في وفاة والده، اللواء أركان حرب كمال مدبولي.
أسأل الله أن يتغمده بواسع رحمته، وأن يرزقه الفردوس الأعلى، وأن يجعل جهوده الوطنية الجليلة في ميزان حسناته.

النهارده، في عيد تحرير سيناء، لازم نفتكر إن الجزء الغالي ده من وطننا مرجعش غير بعد تضحيات عظيمة قدمها خيرة شباب مصر من أرواحهم وحياتهم.
كل شبر، وكل حبة رمل في سيناء، بتحكي قصة بطولة، وهتفضل دايمًا حاضرة في وجدان كل المصريين.
كل عام ومصر دايمًا بخير.

صعب انك تلاقى شعب فى العالم بيحتفل بيوم له أصل فى تاريخه من 7000 سنة فاتوا، ولسه بيحتفل بيه لحد النهاردة، علشان كده شم النسيم هو جزء أصيل من الهوية المصرية.

ولو ده بيثبت شئ فيثبت إن مصر هى فجر التاريخ وأن الأمة المصرية هى أصل الحضارة الإنسانية اللى قدرت تحتفظ بشخصيتها رغم كل السنين دي.

كل سنة والمصريين بخير وسعادة ❤️🇪🇬

في عيد القيامة المجيد، خالص مودتي ومحبتي لإخواتنا الأقباط ولكل الشعب المصري، ربنا يديم علينا الخير والمحبة والمودة، وتفضل وحدتنا الوطنية أهم حاجة بتميزنا، ونفضل دايمًا إيد واحدة في مواجهة أي صعاب أو تحديات.
كل سنة ومصر بألف خير.

سنة 1955، لما انطلق بينالي الإسكندرية للفنون التشكيلية، ماكانش مجرد معرض بيتعمل كل فترة… كان حدث دولي كبير بيحط مصر في قلب الحركة الفنية العالمية، وفي وقت كانت فيه المنطقة كلها بتدور على منصة تجمع فنانيها، كانت الإسكندرية هي الاختيار.

فنانين من دول البحر المتوسط، من أوروبا لشمال أفريقيا، كانوا بيجتمعوا في مدينة واحدة، بيقدموا أعمالهم، ويتناقشوا، ويتنافسوا، ويصنعوا حالة فنية فريدة.

البينالي ماكانش بس عرض لوحات وتماثيل… كان مساحة للتجريب، لاكتشاف مدارس جديدة، ونافذة مصر على العالم، والعالم على مصر، ومع كل دورة، كانت الإسكندرية بتتحول لورشة فن مفتوحة… شوارعها، قاعاتها، وجمهورها، كله بيشارك في حالة ثقافية نادرة، خلت البينالي واحد من أقدم وأهم الفعاليات الفنية الدولية، وتاني أقدم بينالي بعد فينيسيا.

وده ماكانش صدفة… ده كان انعكاس لقوة مصر الناعمة، وقدرتها وقتها إنها تقود المشهد الثقافي في المنطقة.

لكن مع غياب البينالي لفترات، المشهد اتغير…
والمكان اللي كنا فيه بقى محتاج مجهود عشان نرجعله تاني.

النهارده، رجوع بينالي الإسكندرية مش رفاهية، ومش مجرد إحياء ذكرى… ده ضرورة حقيقية لاستعادة دور مصر الثقافي، وتنشيط السياحة الثقافية، وفتح الباب لجيل جديد من الفنانين إنهم يوصلوا للعالم من نفس المنصة اللي صنعت تاريخ كبير قبل كده.

وعلشان كده، لازم يكون فيه تحرك واضح وجاد لإعادة إطلاق بينالي الإسكندرية بشكل مستمر ومنظم، يليق باسمه وتاريخه، ويرجعه لمكانه الطبيعي على خريطة الفن العالمية.

كل الدعم للفن والثقافة… لأنهم دايمًا كانوا وهيفضلوا قوة مصر الحقيقية.

أحد السعف وبداية أسبوع الآلام من الأيام اللي ليها مكانة خاصة، وبتفكرنا دايمًا بمعاني الإيمان والصبر.
وبالمناسبة دي، بحب أقدم خالص التهاني لإخواتنا المسيحيين، ربنا يعيدها عليهم بالخير والبركات، وتكون أيام مليانة سلام وراحة بال.
المناسبة دي بتأكد لنا قد إيه قيم المحبة والتسامح مهمة في حياتنا، وإن مصر دايمًا هتفضل نموذج جميل للتعايش والمحبة بين كل أبنائها.
كل سنة وأنتم طيبين، ومصر دايمًا بخير

الإسكندرية جزء من ذاكرة مصر وتاريخها واختيار ترام الإسكندرية ليكون بطل البوستر الرسمي لمهرجان الإسكندرية للفيلم القصير، بيعكس قيمتها اللي ظلت لسنوات جزء من حياة الناس وتفاصيل يومهم.
ترام الإسكندرية كان شاهد على حكايات كتيرة وبقى مرتبط بوجدان المدينة حتى بعد غيابه عن المشهد.
ودي قيمة الفن، ودوره المهم في الحفاظ على الذاكرة وتقديمها للأجيال بشكل يعكس قيمة ما نملكه من تاريخ وتراث، علشان تفضل الإسكندرية مدينة لها طابع خاص بتاريخها وثقافتها مهما عدى عليها السنين.

خلال اجتماع لجنة السياحة والطيران المدني اليوم، ومناقشة لتداعيات التصعيد الإقليمي وتأثيره على قطاعي السياحة والطيران، حيث توافقت اللجنة على دعوة وزيري السياحة والطيران المدني لاجتماع قريب لعرض خطط التعامل مع هذه التحديات.
نستهدف خلال الاجتماع الوقوف على موقف الحجوزات، وخطط جذب السائحين إلى مصر باعتبارها وجهة آمنة ومستقرة، إلى جانب بحث آليات الاستفادة من حركة السياحة الخليجية وموسم السياحة الشاطئية.
كما سنناقش مع وزير الطيران سبل تعظيم الاستفادة من الطائرات المتوقفة، وعدد من طلبات الإحاطة المتعلقة بالقطاع.
وفي الوقت نفسه، نتابع تأثير بعض القرارات الداخلية على القطاع، مع التأكيد على أهمية التوازن بين دعم السياحة والحفاظ على موارد الدولة.

أدرجت مجلة TIME العالمية المتحف المصري الكبير ضمن قائمة أفضل الأماكن التي يُنصح بزيارتها خلال عام 2026 وهو ما يعكس الاهتمام العالمي بالحضارة المصرية.
المتحف المصري الكبير اللي بيضم واحدة من أكبر المجموعات الأثرية في العالم وبيعرض كنوز الملك توت عنخ آمون كاملة، بيمثل إضافة مهمة لقطاع السياحة في مصر، وتقدير مجلة TIME بيعكس قيمة ما تمتلكه مصر من مقومات سياحية وثقافية، ويؤكد أن المتحف المصري الكبير يمثل نقلة كبيرة في تعزيز مكانة مصر على خريطة السياحة العالمية.
مصر التي كانت وستظل مصدر إلهام للعالم كله.. مصر أم الدنيا وبلد الحضارة.

مشاركة أكثر من 2000 شخص في المحاضرة الأخيرة للدكتور زاهي حواس في روما عن كنوز الفراعنة، دليل واضح على قيمة مصر ومكانتها قدام العالم.

الاهتمام الكبير بالحضارة المصرية، والإقبال العالمي على معرفة تاريخنا، بيأكد إن حضارتنا هتفضل مصدر إلهام للعالم كله، وأهم عامل لجذب السياحة من مختلف دول العالم.

كل التقدير للدور الكبير اللي بيقوم بيه العالم الدكتور زاهي حواس في تعريف العالم بعظمة حضارة بلادنا.
Dr. Zahi Hawass

إلي أمي .. وإلي كل أم ❤️
ربنا يخليكم لينا ويديكم الصحة وطول العمر .. انتوا السند .. ودعواتكم لينا مصدر الأمان 🙏

عيد فطر سعيد .. كل سنة وحضراتكم بخير وصحة وسعادة .. ويارب دايماً مصر بخير وأمان ❤️🇪🇬