السيدة زينب - القاهرة

حكايات السيدة حكاية شياخة العتريس وسر القبتين اللي على واجهة المقام 🕌

لو أنت من سكان السيدة زينب أو بتعدي من قدام المقام مفيش مرة لفت نظرك القبتين الحجر المزدوجين اللي على واجهة المسجد من برة؟

دول مش مجرد قبتين عاديين، دول حكاية شياخة العتريس واحدة من أعرق وأقدم الشياخات في حي السيدة زينب ووراهم تاريخ صوفي وبشري عجيب يمس القلب .

مين هو سيدي العتريس؟
هو السيد محمد القرشي المشهور بـ العتريس(والعتريس في اللغة يعني القوي الشديد). وهو من آل بيت النبي وينتهي نسبه للإمام علي زين العابدين رضي الله عنه.
والمعلومة اللي كتير من الناس ميعرفوهاش.. إنه الشقيق الأصغر لقطب التصوف الشهير سيدي إبراهيم الدسوقي صاحب المقام المعروف في مدينة دسوق .

سيدي العتريس ساب دسوق وجيه القاهرة وعاش حياته كلها خادم ومحب ومُعلّم في محراب أم العواجز لسيدة زينب.
كان بيقضي يومه يعلّم الناس ويدعوهم للخير في كنف الحرم الزينبي ولما حس بقرب أجله في أواخر القرن السابع الهجري أوصى إنه يتدفن في نفس المكان اللي قضى فيه عمره بيعبد ربنا.. وفعلاً اندفن في الطرف الشمالي الغربي للجامع.

ومين جاره العيدروس؟
جمب سيدي العتريس هتلاقي مقام سيدي عبد الرحمن العيدروس وهو عالم وشاعر متصوف جليل جيه من بلاد حضرموت في اليمن وطاف بلاد كتير زي الهند والحجاز والشام لحد ما استقر في مصر وحب سيدي العتريس وتأثر بيه وأوصى هو كمان إنه يتدفن جمبه لما يموت.

تاريخ القبتين:
في سنة 1173 هجرية الأمير عبد الرحمن كتخدا وهو بيجدد مسجد السيدة زينب أمر ببناء القبتين دول على قبر العتريس والعيدروس بشكل معماري فريد جداً ومزدوجة والجميل إن الدولة سجلت القبتين دول رسمياً في عداد الآثار الإسلامية لحمايتهم وتخليد تاريخهم.

حكاية شعبية مبهجة يا سيدي العتريس.. ابعتلي العريس💍
المكان ده برضه ليه حكاية لطيفة وتضحك في الفولكلور الشعبي المصري ارتبط مقام سيدي العتريس تاريخياً بزيارات البنات اللي اتأخر جوازهم أو نفسهم يلاقوا ابن الحلال فكانوا بييجوا يطوفوا حوالين المقام ويقولوا العبارة الشهيرة يا سيدي العتريس.. ابعتلي العريسكنوع من التبرك والدعاء بالستر والبهجة وسط لمة الستات .

شياخة العتريس مش مجرد تقسيم إداري في حي السيدة دي قطعة من تاريخ مصر، وريحة من روايح آل البيت اللي بتملى الشارع دفا وبركة.

تحية لكل أهلنا في شياخة العتريس.. قولولنا مين منكم ساكن هناك أو من جيران الشياخة؟ ومين عدى على القبتين دول وهو داخل يزور ستنا السيدة؟ 👇❤️

في رحاب رئيسة الديوان أم العواجز المشيرة خديجة الطاهرة.. السيدة زينب بنت بنت النبي صلى الله عليه وسلم. 🕌
مكان تروحله وهموم الدنيا فوق كتافك تخرج منه والراحة مالية قلبك والابتسامة على وشك كرم آل البيت ملوش حدود.
اللهم صلِّ وسلم وبارك على سيدنا محمد وعلى آله وصحبه أجمعين ❤️

مِن رحاب رئيسة الديوان عقيلة بني هاشم أم العواجز السيدة زينب رضي الله عنها وأرضاها لقطات من شعائر صلاة الجمعة اليوم وسط أجواء تملؤها السكينة والروحانيات والقلوب المحبة. 🤍
اللهم تقبل منا ومنكم صالح الأعمال واجعل أيامنا كلها بركة وطمأنينة.
جمعة مباركة عليكم جميعاً من جوار المشهد الزينبي
#القاهرة #روحانيات مصر

شعب السيدة زينب احتفالاً بعيد الاضحي المبارك ❤️🕋

من قلب التاريخ وعراقة القاهرة صلاة العيد من مسجد أحمد بن طولون 🕌
روح المكان وهيبة الصحن الواسع مع التكبيرات بتخلي للعيد طعم تاني خالص وسط أجدع ناس في السيدة زينب.
كل عام وأنتم بخير وصحة وسعادة وعيد سعيد علينا وعليكم وعلى حبايبكم جميعاً ربنا يتقبل منا ومنكم صالح الأعمال ❤️ عيدكم مبارك

يا أهل السيدة.. عيد الأضحى على الأبواب كل سنه وأنتم طيبين وبخير وعايزين نعمل دليل كامل هنا في الكومنتات لرجالة السيدة الشقيانة في العيد .
اكتبولنا ترشيحاتكم لأحسن وأضمن جزارين وأشطر سنانين سكاكين في المنطقة عشان اللي محتاج يظبط حاله يلاقيهم بسهولة.
ابن المنطقة أولى بخيرها وكل سنة وأنتم طيبين 🙏❤️

هو ليه الأماكن القديمة ريحتها لسة عايشة فينا حتى لو الأماكن دي نفسها مابقتش موجودة؟🤔
ساعات الواحد وهو ماشي ورا شارع خيرت في الشارع الهادي اللي كان بيضمنا وإحنا شباب صغيرة بيحس إن رجله بتسحبه لوحدها لمكان اسمه "سينما نيو ستار".🫶
المكان ده ماكنش مجرد شاشة وسقف معزول ده كان الحتة اللي بنهرب ليها من المذاكرة ومن هموم الدنيا اللي كنا فاكرينها وقتها كبيرة وهي طلعت تافهة كان المكان الي العيلة بتخرج فيه وتهرب من دوشة الحياة .🥰
فاكر ريحة المكان أول ما تدخله؟
الفشار وصوت شباك التذاكر الصغير؟ فاكر لما النور كان يطفي والوشوش كلها بتبص لفوق والضحكة تطلع من قلوبنا بجد من غير حسابات؟
كنا بندخل نشوف فيلم لعادل إمام أو ننبهر بحركات الكاراتيه او فيلم لفريد شوقي او المليجي ونطلع الشارع وإحنا حاسين إننا أبطال وبنقدر نطير.
يوم ما كانت التذكرة بكام قرش وكانت الخروجة كلها تمنها ساندوتش طعمية سخن بنقسمه مع صاحب عمرنا كنا بنحس إننا ملوك الدنيا ومعانا كل حاجة.
السينما قفلت ويافطتها دبلت والزمن هد ملامحها بس الغريبة إن كل ما السنين بتعدي وبتسرقنا بنكتشف إن حتة من طفولتنا وذكرياتنا لسة محبوسة جوة المكان الجميل ده .
يا ترى مين لسة فاكر ذكريات "سينما نيو ستار"؟ ومين أول حد جه في بالك لما قريت الكلام ده ونفسك ترجع تقعد جنبه على نفس الكرسي؟ ❤

في يوم الجمعة ومن ساحة أم العواجز نسألك يا رب جبراً لقلوبنا وتيسيراً لأمورنا واستجابة لدعائنا. 🤲🌹
‎جمعة مباركة ومبهجة على كل أهل السيدة الكرام

اخيييرررررررررا شوفنا شارع السد بيتسفلت 🙏❤️

تم السفلته من كوبري أبو الريش حتي مسجد الحبيبي حتي الان 😍

مطلوب متبرعين بالدم 🙏

مطلوب ٣ متبرعين بالدم عدد ٣ أكياس شرط يكونوا فصيلة A+.
الحالة موجودة في بنك الدم بمستشفي احمد ماهر بأسم (اعتماد منير عبد المقصود) وده رقم تليفون الموافق للحالة : 01037125612
شرط الي هيتبرع يكون فصيلة A+.