Hawa After 40

فييرا لما عملت النقلة دى فى حياتها كانت واثقه من نفسها .. عندها خبرات غير مستغلة .. عندها رؤية للحياة .. والاهم عندها أمل وطاقة انها تتعلم وتكمل حياتها ... وده اللى احنا هنا فى صفحة حواء بعد الاربعين بنأكد عليه ... احنا لسه عندنا كتير اوى .. عندنا ايمان بنفسنا وقدراتنا وحسن ظن بربنا اننا هنحقق كل اللى بنتمناه ... محتاجين نسعى بس .. نسعى فى العلم والعمل ... الصفحة دى مش عشان نتكلم ونتسلى ونحكى حواديت تعيشنا فى احلام واوهام خيالية ...

الصفحة دى لكل امراه و بنت و ست سواء متجوزه او منفصله ... لكن الجادين فقط فى انهم يعيدوا اكتشان نفسهم حتى لو كان بعد عمر الاربعين ... او حتى قبل الاربعين ... اللى فاكرين انهم خلاص معندهمش حاجه يقدموها للمجتمع وان سوق العمل بقى رافضهم ... احنا فى مبادرة حواء بعد الاربعين هنقدم حلول جديده و اشكال مختلفة لتاهيل المرأه للعمل باكتر من اسلوب و بطريقة تتوافق مع متطلبات سوق العمل الحديث ...

المواضيع والكورسات و ورش العمل اللى هنقدمها هيتم اختيارها بعناية فائقة لدعم وتطوير و تهيئة من هم فوق الاربعين (او من ترغب فى الانضمام معانا من اى مرحلة عمرية) من الناحية العلمية والتطبيقية والنفسية ...

الاستاذة "عبير ضيف" اللى بدات فى اطلاق المبادرة دى .. مش مجرد صاحبة الفكرة .. عبير ضيف من نفس النسيج ..مرت بظروف و تحديات كبيرة فى حياتها خلتها تفكر ازاى تساعد وتقدم حلول للى واقع فى نفس المعضلة دى ... معضلة كل امراة فى البحث عن عمل من اجل نفسها و اولادها او اسرتها ولاستكمال دورها فى الحياة سواء بالعمل الحر من البيت او تعلم مهارات جديدة للنزول لسوق العمل وتكملة المشوار دون اللجوء لشركات خاصة او حكومية لتسمع كلمة مؤهلاتك فوق طاقة العمل .

أتمنى مع قراءة الكلمات دى انك متأجليش القرار .. قرار التغيير ... ابداى دلوقتى .. تواصلى معانا واعرفى ازاى تاخدى أول خطوة .. احنا دايما موجودين وبنرحب بيكى وباسئلتك واستفساراتك وهنبقى دايما جنبك بنشجعك ونسندك ... وافتكرى دايما ان الوقت لسه معداش ... لسه بدرى اوى ... العمر اللى عدى ده زودنا قوة وصلابة و قدرة على الانتاج ... زى النخل اللى كل ما عمرة يطول كل ما يبقى اقوى و اكثر ثباتا واقرب الى طرح الثمار ... استعينى بالله ... ومنتظرين تواصلك معانا ...

فريق حواء بعد الأربعين ....