Abdelrhman B Gad

كلام مصطفى بكري على المقابلة اللي عملها نجيب ساويرس
عن ازاي الجيش بيشتغل ف حاجات ليست من اختصاصه و أولوياته ف الوقت الراهن و اتهامه بأنه اخواااني (مع انه مسيحي ) .
رد gork بيكدبه 🤫

>> السجل تجاري>>> نشاطك التجاري لازم يكون مُسجل لحماية نفسك و محلك او مشروعك.
و تابعني عشان لسه هقولك أنواعه 😬❤️

في وسط زحمة العقود والمعاملات الورقية، ممكن توقيع بسيط يكون سبب في ضياع حقك أو حفظه!
عشان كده لازم تعرف عن دعوى صحة التوقيع… الدعوى اللي بتأمّن بيها نفسك وتحمي مستقبلك القانوني.
تعالى نفهم سوا :::
إيه هي؟؟؟

دعوى صحة التوقيع هي دعوى بيقيمها الشخص علشان يثبت إن التوقيع الموجود على ورقة أو عقد معين هو توقيع صحيح ومنسوب للطرف اللي موقع عليه.

طيب إيه أهم النقاط عن الدعوى دي؟

الدعوى دي مش بتثبت صحة مضمون العقد، يعني المحكمة مش بتشوف العقد فيه إيه… هي بس بتثبت صحة التوقيع.

بتفيدك لو معاك عقد عرفي وعايز تأمن نفسك، علشان اللي موقع معاك ميقدرش ينكر التوقيع بعد كده.

الدعوى دي بتحميك من الإنكار أو الطعن بالتزوير مستقبلاً.

بتترفع أمام المحكمة المدنية المختصة حسب قيمة العقد.

مفيش مدة محددة لرفعها، ممكن ترفعها في أي وقت طالما العقد ساري.

في حياتنا اليومية بنحتاجها إمتى؟

لما تشتري شقة بعقد عرفي.

لما تعمل عقد بيع عربية أو قطعة أرض.

أو أي معاملة مالية فيها توقيعات وعايز تأمن نفسك.

نصيحة مهمة جدا 🫡
قبل ما تمضي أي عقد، لو مش هتعمل تسجيل في الشهر العقاري، اعمل دعوى صحة توقيع… بتحفظ حقك وتمنع أي طعن على التوقيع.

هل مهنة المحاماة حراام 🫠

مهنة المحاماة في أصلها مش حرام…
هي زي أي مهنة، بتكون حلال لو كانت نيتك سليمة، وبتشتغل فيها بما يرضي الله، وبتبعد عن الحرام والظلم.

و من ناحية الدين ودي الأهم بالنسبة لي و لناس كتير 👌
النبي صلى الله عليه وسلم قال:
"القضاة ثلاثة: قاضيان في النار، وقاضٍ في الجنة"
وده مش معناه إن المهنة حرام، لأ… معناه إن اللي بيحكم أو بيدافع عن باطل أو بيظلم الناس عن قصد — حسابه كبير.
لكن اللي بيشتغل بالحق وبيقف جنب المظلوم وبيمنع الظلم — ده عمل صالح وعظيم.

إمتى بقى ي صديقي تبقى المحاماة تبقى حرام؟؟؟؟

لما تدافع عن ظالم عارف إنه ظالم

أو تجيب حق مش من حق صاحبه

أو تستخدم حيل باطلة عشان توصل لفلوس حرام

أو تخون أمانة موكلك
ساعتها بيبقى كسبك حرام وموقفك عند ربنا صعب.

وإمتى تبقى حلال؟؟؟
أللهم اكفنا بحلالك عن حرامك.

لما تدافع عن مظلوم

أو توقف باطل

أو تنصح صاحبك إنه يتصالح ويترك الظلم

أو تحقّق عدل بين الناس

وتحافظ على أمانة القضية

حتى لو جالك ظالم… تبعد عنه

وفي ميزان الدين: إنك تكون سبب في رفع ظلم عن حد… ده من أعظم الأعمال
وإنك تكون سبب في نصرة حق… ده أجر كبير
وحتى لو مالكش في قضايا… إنك تعلم الناس حقوقهم وتحميهم من الوقوع في الحرام — ده جهاد في سبيل الله.

الخلاصة:
مهنة المحاماة مش حرام، الحرام في كيف بتستخدمها.
فلو ناوي تبقى محامي بضمير… وتخاف ربك… وتحاول على قد ما تقدر تشتغل بالحق — توكل على الله.

أللهم اهدني و سددني ❤️❤️

وفي السُنّة النبوية:

قال النبي صلى الله عليه وسلم:

> "ليس منا من لم يوقر كبيرنا، ويرحم صغيرنا"
— رواه الترمذي.

والإسلام حرّم الاعتداء على النفس والعِرض، واعتبر حماية الطفل وستر عورته وصون كرامته من أعظم الواجبات.
وده من الناحية الدينية اللي هي الأهم طبعا، نخش بقى ع الناحية القانونية.

في القانون المصري، سواء كان المجني عليه ذكر أو أنثى، جريمة الاغ**اب في الأساس بحسب نص المادة 267 من قانون العقوبات "مواقعة ( تعدي) أنثى بغير رضاها".

فلو الجريمة حصلت على طفل او طفلة (أقل من 18 سنة):

فا لو كان فيه مواقعة طبيعية أو غير طبيعية (اغ**اب):
بيعاقب الجاني (المغتصب ) بالسجن المؤبد أو الإعدام لو كان فيه ظرف مشدد (زي السن أقل من 18 سنة، أو علاقة قرابة، أو تهديد بالسلاح، أو تعذيب).

بحسب المادة 268 من قانون العقوبات:

> "كل من هتك عرض شخص بالقوة أو بالتهديد يُعاقب بالسجن المشدد من 3 سنوات إلى 15 سنة،
وتكون العقوبة السجن المؤبد إذا كان المجني عليه لم يبلغ 18 سنة

المشرّع هنا بيعتبر أي اعتداء جنسي على طفل — سواء ذكر أو أنثى — جريمة شديدة الخطورة، وبيدّي فيها أقصى العقوبات.

رسالتنا:
جريمة اغ**اب الأطفال جريمة ضد الإنسانية والدين والقانون.
واجِبنا جميعًا نرفضها ونحمي أولادنا ونبلّغ عن أي شخص يفكر يمس طفل بأذى.

ما يحدث الآن في غزة ليس مجرد حرب…
بل إبادة جماعية مكتملة الأركان بكل ما تحمله الكلمة من معنى، ووفقًا لمبادئ القانون الدولي ومواثيق حقوق الإنسان، فإن استهداف المدنيين، الأطفال، النساء، المستشفيات، والمدارس هو جريمة حرب يعاقب عليها القانون الدولي وأغلب تشريعات دول العالم.

والسكوت عن الحق جريمة تانية.

قال رسول الله ﷺ:
"من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه وذلك أضعف الإيمان."
[رواه مسلم]

وقال تعالى:
"وما لكم لا تقاتلون في سبيل الله والمستضعفين من الرجال والنساء والولدان..."
[النساء: 75]

دورك مش بالضرورة بالسلاح
دورك إنك توصل صوت المظلوم
إنك تدعم، تتكلم، توعي، تنشر الحقيقة
لأن لو سكتنا النهارده…
بكره ممكن يبقى الدور علينا ، وهو أكيد هيبقى علينا .

ادعموا غزة بكل وسيلة ممكنة
وادعولهم في كل صلاة.

》》》العقد 《《《
●○● وأهميته في حياتنا

من أول ما بنصحى لحد ما ننام، حياتنا عبارة عن اتفاقات.. من أول ما بتشترى حاجة من السوبر ماركت، لحد ما تمضي عقد شقة أو عربية.
وعشان كده القانون التجاري وغيره اهتموا جدًا بتنظيم فكرة "العقد".

فيه قاعدة قانونية دايمًا بنسمعها:
"العقد شريعة المتعاقدين"
يعني إيه؟
يعني اللي اتفق عليه الطرفين في العقد بيبقى كأنه قانون خاص بينهم، ولازم كل طرف يحترم اللي وافق عليه طالما ما فيش حاجة مخالفة للنظام العام أو الآداب.

والجميل إن المعنى ده كان موجود في الإسلام من زمان جدًا..
النبي محمد صلى الله عليه وسلم قال:
"المسلمون عند شروطهم"
رواه أبو داود.

يعني المسلم لازم يلتزم بالاتفاق اللي بينه وبين غيره طالما الشرط ده حلال ومشروع.

عشان كده يا صديقي متستهونش بأي اتفاق — حتى لو كان شفهي — لأنه ممكن يكون ليه قيمة قانونية!

في البوستات الجاية هنفهم سوا:

إزاي نكتب عقد بشكل صح

وإيه أهم أركان العقد

وإمتى العقد بيبقى باطل أو قابل للإبطال

تابعونا..
وإفهم حقك دايمًا!

قال الله تعالى:
"وَلَا تَعْتَدُوا ۚ إِنَّ اللَّهَ لَا يُحِبُّ الْمُعْتَدِينَ"
(سورة البقرة - آية 190)

س / سؤال ؟؟؟
إيه هو الاستيقاف؟ وإمتى الظابط يقدر يفتشني في الشارع؟

ج / جواب >>
الاستيقاف هو إن ظابط الشرطة يوقفك ويسألك عن هويتك أو تحركاتك لو فيه تصرف غير معتاد منك بيثير الشك . ( يعني لو شك في شكلك أو وجودك في منطقة مشبوهة أو الوقت متأخر أو باين عليك متوتر أو مخبي حاجه ) .

لكن لكن لكن ( عشان تبقى فاهم 🤫)

ما ينفعش يفتشك إلا لو في حالة تلبس أو معاه إذن من النيابة.

التفتيش الشخصي من غير سبب قانوني يعتبر باطل، وممكن ترفضه بكل أدب . ( بص بيني و بينك يعني بلاش ترفض اتفتش و انت مبسوط كده و مفرفش عشان لو حسك أتضايقت من التفتيش هياخدك يشرب كنتالوب في القسم😉 🙃 )

نصيحة:
لو اتعرضت لاستيقاف من غير سبب، اسأل عن هويته، وخليك هادي، ولو تم تفتيشك من غير إذن أو حالة تلبس — ده انتهاك لحقوقك. ( أو سامح المسامح كريم برضوو) 😇

فيه لحظة في حياة كل واحد فينا بيقرر فيها يا يعيش زي ما هو… يا يبدأ يغيّر واقعه بإيده.
"معلومة واحدة ممكن تغيّر مصيرك!"
و لازم تبقى عارف ان في وسط دوشة الحياة، ممكن تقع في موقف تدفع فيه تمن جهل بسيط.
عشان كده إحنا هنا… علشان نديك المعلومة اللي تحميك، تفيدك، وتخليك دايمًا فاهم حقوقك.

من هنا هتتعلم:

إزاي تحافظ على حقك.

تعرف القانون بشكل بسيط.

تتجنب مشاكل كتير قبل ما تبدأ.

ولو بتدور على وعي قانوني … تابع الصفحة وخليك مستني البوست الجاي.
لأن كل كلمة هنا هتفرق معاك!

قال رسول الله صلى الله عليه وسلم:
"رحم الله عبدًا سمحًا إذا باع، وإذا اشترى، وإذا اقتضى"
– رواه البخاري.
صلوا على خير البشر ❤️

الحديث بيشجع على حسن التعامل في المعاملات المالية: سواء بتبيع، أو بتشتري، أو بتطلب حقك… كن إنسان رحيم وسهل .

إتكلمنا عن القانون التجاري نخش على الاقتصاد 😁

يعني إيه اقتصاد؟ وليه بنسمع الكلمة دي كتير؟

الاقتصاد ببساطة هو كل حاجة ليها علاقة بالفلوس…
البيع والشراء، الإنتاج والاستهلاك، الشغل والمرتبات، الأسعار والسلع… كل ده اسمه اقتصاد.

يعني لما حد يفتح محل يبيع فيه منتجات → ده اقتصاد
لما الحكومة تعمل مشروع كبير يوفر شغل للناس → برضه اقتصاد
لما الأسعار تعلى أو تنزل في السوق → ده جزء من حركة الاقتصاد

طيب الاقتصاد مهم في إيه؟
لأنه هو اللي بيأثر على حياتنا اليومية:
– أسعار الأكل والشرب
– فرص الشغل
– الجنيه بيقوى ولا بيضعف ( بيغرق ي بيه 🫠)
– البلد بتكسب ولا بتخسر ( سيبك مالفلوس احب حاجه حب الناس 😁)

مثال بسيط:
لو مصر بتنتج سكر كتير وبتبيعه لدول تانية، يبقى دخل لنا عملة صعبة، وده يقوّي الاقتصاد.
لكن لو بنستورد سكر غالي من برّه، والجنيه ضعيف، هنضطر نشتريه بسعر أعلى… وده يضغط على الاقتصاد.

الاقتصاد مش مصطلح معقد، هو ببساطة حياة الناس وتحركات الفلوس داخل أي بلد.


#الاقتصاد
#توعيه

بسم الله توكلنا على الله ❤️
عن جابر بن عبد الله رضي الله عنه قال : قال رسول الله صلى الله عليه وسلم : ( المؤمن يألف ويؤلف ولا خير فيمن لا يألف ولا يؤلف وخير الناس أنفعهم للناس) رواه الطبراني في الأوسط .

---

أهلاً بيكم في صفحتي القانونية 👨‍⚖️
النهاردة أول بوست ليا، وحبيت ابدأ بحاجة مهمة جداً لكل حد بيتعامل في السوق أو بيحلم يفتح مشروع خاص، وهي: القانون التجاري المصري.

يعني إيه قانون تجاري؟؟ 🤔
القانون التجاري هو اللي بينظم المعاملات بين الناس في التجارة، سواء بيع وشراء، شركات، شحن، بورصة، أو حتى الشيكات والكمبيالات. يعني لو فتحت محل، أو بعت بالجملة، أو وقّعت عقد مع شركة، إنت كده دخلت تحت مظلة القانون التجاري.

طيب القانون التجاري بيتكوّن من إيه؟ يعني إيه أركانه؟
علشان نقول إن في "تصرف تجاري"، لازم يتوفر فيه ٣ حاجات أساسية:

1. الصفة التجارية للعمل
يعني يكون العمل نفسه من طبيعة تجارية، زي بيع منتجات بالجملة أو تأسيس شركة.

2. نية الربح
لازم يكون هدف الشخص اللي بيقوم بالعمل إنه يحقق مكسب. يعني لو واحد بيبيع عصير على الرصيف علشان يكسب، ده تصرف تجاري. لكن لو بيوزعه ببلاش، يبقى مش تجاري.

3. الاحتراف أو التكرار
لو العمل ده بيتكرر أو صاحبه بيشتغل فيه بشكل دائم، زي واحد فاتح محل، ده بيعتبر تاجر. إنما لو حصل مرة واحدة، زي ما واحد باع عربيته، يبقى مش بالضرورة تجاري.

مثال بسيط:
تخيل عبدالرحمن بدوي فتح محل موبايلات ( بقولك تخيل 😁 ) ، بيشتري من الموردين ويبيع للناس عشان يربح. هنا:

النشاط نفسه تجاري (بيع وشراء).

هدفه الربح.

وبيكرر العملية دي كل يوم.
يبقى كده عبدالرحمن بدوي بيقوم بتصرف تجاري، وبيخضع لأحكام القانون التجاري.

تابعونا في بوستات جاية هنشرح فيها مفاهيم قانونية مهمة بطريقة سهلة وبلُغة الناس، علشان القانون يبقى سلاح في إيدك مش صداع في دماغك!