28/11/2025
من قلبي… لكل قلب وقف جنبي في مدينة نصر ومصر الجديدة والنزهة.
شكرًا لكل حد نزل وادّاني صوته… لكل حد اختارني من بين ناس كتير… ولكل حد شاف فيا أمل أو تغيير أو فرصة إن صوت الدائرة يتسمع بجد.
أنا مش بس بشكركم… أنا متأثرة بيكم.
كل مرة شفت حد بيقولي: “إحنا وراكي”… أو حد نزل مخصوص علشاني… أو أم ماسكة إيد ابنها وجاية تنتخب… أو حد دعالي من بعيد… المواقف دي خلت قلبي يتأكد إنّي مش ماشيـة لوحدي.
إن في ضهر… وفي ناس… وفي حب صادق أنا عمري ما هنساه.
أنتم صنعتوا لحظة جوّا قلبي مش هتتكرر… لحظة حسّيت فيها إن ربنا بيفتح باب جديد، وإن أهل الدائرة بيحضنوني بمحبتهم وثقتهم.
أنا مدينة لكم بكل لحظة دفعتوني فيها لقدّام… بكل كلمة شجعتوني بيها… بكل نظرة أمل شُفتها في عيونكم.
وعد…
وعد بجد…
إن صوتكم مش هيكون رقم… ولا صفحة في ملف.
صوتكم هيكون نبض شغلي… وأمانة عمري… ومركز قراري في كل خطوة جاية.
أنا هافضل عند عهدكم… وهاكون موجودة في الشارع، وفي البيوت، وفي المواقف اللي محتاجنّي فيها… وهاشتغل بقلبكم قبل عقلي.
أنتم أهلي… أنتم سندي… أنتم القوة اللي بتمشّيني مهما الطريق كان صعب.
ربنا يقدّرني وأكون قد كل لحظة حب وثقة إدّتوها لي.
من مدينتكم… ومن قلب أم لبنت كبيرة…
شكرًا لكل بيت احتضني.
#النزهة
25/11/2025
17/11/2025