22/08/2026
قاع الهامور هو مكان حقيقي تاريخيا لكن وراه حقيقة مظلمة وراها امريكا ..
كلمة "قاع الهامور" هو تعريب للكلمة الاصلية "بيكيني بوتوم" او قاع البيكيني، وهو المفروض تحت جزيرة مرجانية حقيقية اسمها جزيرة "بيكيني" وهي واحدة من جزر المارشال ومنطقة ما يسمى "ميكرونيزيا" في المحيط الهادي، جزيرة صغيرة فيها ١٦٧ ساكن عايشين على زراعة جوز الهند والسمك عبارة عن ١١ عيلة.
بعد الحرب بشهر سنة ١٩٤٥م، امريكا حبت تعمل تجارب نووية عشان تختبر تأثير الاشعاعات على السفن اللي بتعدي في المحيط، وعشان الامم المتحدة خلت امريكا هي الحاكم للمنطقة دي، الرئيس "هاري ترومان" اختار الجزيرة دي عشان يجربوا فيها، وراحوا اجتمعوا بالشعب وبالملك بتاعهم "الملك يهوذا" بعد القداس، واقنعهم انهم يمشوا فترة مؤقتة بهدف الخير للبشرية وانهاء الحروب العالمية، والسكان وافقوا طالما فيها خير.
لموهم ونقلوهم لجزيرة بعيدة اسمها "رونجريك" سدس مساحة جزيرتهم، كانت جزيرة مفيهاش لا اكل ولا مية ومسكونة وفقا للمعتقدات هناك، وحطوا معاهم شوية اكل وشرب ومشيوا، واخدوا الجزيرة حطوا فيها ٥٤٠٠ فار ومعزة وخنزير وسنجاب للتجربة، مئات السفن والطائرات واجهزة التسجيل، وبدأوا يجربوا ٢٣ تفجير عالجزيرة وفي البحر والشعب المرجانية على مدار ١٠ سنين، وتحولت الى مكان مستحيل الرجوع ليه.
طب والسكان؟ بدأوا يجوعوا ويضعفوا، ولما الحال اتدحدر حبوا ينقلوهم لجزيرة تانية احسن اسمها "اوجيلانج"، لكن بعد ما بنوا مساكن ومزارع وكدة قررت امريكا تجرب في جزيرة تانية اسمها "انيوتاك" وتنقل سكانها لجزيرة اوجيلانج، طب والسكان اللي بنوا المساكن؟ لا خليكم انتو شوية، وعلى مدار سنين، بدأوا ينقلوا من جزيرة لجزيرة آخرهم جزيرة "كيلي"، وحاولت امريكا تنقل شحنة جوز هند للسكان لكن الشفينة جنحت بسبب الشعب المرجانية، واضطروا يعملوا اسقاط جوي لحصص الغذاء.
في الوقت ده امريكا كانت بتجرب الهيدروجينية، اقوى واحدة في المجموعة كلها وفي التاريخ، العملية "برافو" اللي الرياح هتنقل الاشعاع للجزر المأهولة سنة ١٩٥٤م، جزيرة زي رونجيلاب شافوا شمسين بيشرقوا، الحقيقية والتجربة، ومية الشرب اتحولت للون الاصفر، وكل عيال الجزيرة شعرهم وقع، ومحدش حذرهم، والاراضي اتلوثت.
قامت امريكا ممضية سكان بيكيني على اتفاق انهم يتنازلوا عن اي مطالبات مستقبلية في الجزيرة مقابل حق انتفاع في جزيرة كيلي وصندوق يدي لكل فرد فيهم ١٥ دولار سنويا، وعاشوا للستينات في الجزيرة دي معتمدين على استيراد الرز من امريكا، لحد ما سنة ١٩٦٧م الحكومة الامريكية عملت دراسة بتقول ان السكان ممكن يرجعوا جزيرة بيكيني تاني ويعتمدوا على الآبار في الشرب.
المهم سنة ١٩٧٢م فيه مجموعة رجعت ومعاهم شوية عمال، ودول شربوا اشعاع لحد ما شبعوا، واضطروا يمشوهم تاني سنة ١٩٧٨م، وحاليا اهلها عايشين في جزر متفرقة، ممنوع يرجعوها، او ان حد يزورها الا في سفينة سكنية او بإذن من الحكومة لو كان عالم فيزيائي.
اما "قاع البيكيني" او "قاع الهامور" فالنظرية بتقول انه المسلسل قائم على فكرة انهم عبارة عن طفرات جينية بسبب التجارب دي، وانهم بيتكلموا وبيمشوا وبيتصرفوا زي البشر للسبب ده، منطقية مش كدة؟
شكرا ✌️
