24/09/2026
የፌደራሊዝም አስተሳሰብ ማሳደግ ለሀገራዊ አንድነት ወሳኝ ነው፡- ዶ/ር ኃይለየሱስ ታዬ
የፌደራሊዝም አስተሳሰብ ማሳደግ ለሀገራዊ አንድነት ወሳኝ መሆኑን የኢፌዲሪ ያህገ መንግስትና ፌደራሊዝም አስተምህሮ ማዕከል ዋና ዳይሬክተር ዶ/ር ኃይለየሱስ ታዬ ገለፁ፡፡
በፌደራላዊ የመንግሥት አወቃቀር ውስጥ በፌደራል እና በክልል መንግሥታት እንዲሁም በክልሎች መካከል የሚደረጉ ግንኙነቶች፣ ውይይቶች እና የምክክር መድረኮች ለሥርዓቱ ጥንካሬ እና ውጤታማነት ወሳኝ ሚና እንደሚጫወቱ ዶ/ር ኃይለየሱስ ታዬ በስልጠናው ወቅት ገለጹ።
ዶ/ር ኃይለየሱስ ለፌደራል እና ለክልሎች የሲቪል ሰርቪስ ተቋማት ሰራተኞች በተሰጠው የስልጠና ማብራሪያ፤ በፌደራል ሥርዓት ውስጥ መንግሥታት በተበታተነ እና ባልተገናኘ ሁኔታ ከሚሰሩ ይልቅ መደበኛ እና ህጋዊ በሆኑ የመገናኛ መድረኮች አማካኝነት በጋራ መምከራቸው አስፈላጊ መሆኑን አስረድተዋል።
የፌደራል መንግሥት ህገ-መንግሥታዊ ስልጣን እና ሃላፊነት ያለው ቢሆንም፣ ፖሊሲዎችን እና ህጎችን በተግባር ላይ ለማዋል የክልሎች ዝግጁነት እና ትብብር ወሳኝ በመሆኑ የመንግሥታት ግንኙነት መኖር የማይቀረው ጉዳይ መሆኑን አብራርተዋል።
ከፋሲካል ፌደራሊዝም አንጻርም፣ የገቢ እና የወጪ ሚዛን አለመጣጠን በሁሉም የፌደራል ሀገራት የሚያጋጥም ተፈጥሯዊ ፈተና መሆኑን ዋና ዳይሬክተሩ ጠቁመዋል።
በክልሎች መካከል የሚታዩ የገቢ መሰብሰብ አቅም እና የአገልግሎት አሰጣጥ ልዩነቶችን ለማመጣጠን በፌደራል እና በክልሎች መካከል ግልጽ የሆነ የምክክር እና የማስተካከያ ስልት ሊኖር ይገባል ብለዋል።
አክለውም በህገ-መንግሥት ማሻሻያ፣ በጋራ የልማት ፕሮጀክቶች እና በድንበር አካባቢ በሚከሰቱ አለመግባባቶች ዙሪያ በውይይትና በድርድር መፍትሄ መፈለግ ለሀገራዊ አንድነት እና ለስርዓቱ ዘላቂነት ያለው ጠቀሜታ ከፍተኛ እንደሆነ ተናግረዋል።
በመጨረሻም ዶ/ር ኃይለየሱስ ታዬ የመንግሥታት ግንኙነት በባለሙያዎች የተደገፈ፣ ህጋዊ አሰራርን የተከተለ እና ቀጣይነት ያለው እንዲሆን በማድረግ የፌደራሊዝም አስተሳሰብን ማሳደግ ለአገራዊ አንድነት ወሳኝ መሆኑን አብራርተዋል።
