30/09/2026
የኢሬቻ በዓል የሰላም፣ የአንድነትና የመቻቻል እሴቱን በጠበቀ ሁኔታ እንዲከበር፣ ፎሌዎች ሚናቸውን እንዲወጡ ተገለፀ።
**************************
መስከረም 20- 2019 ዓ.ም
የአዲስ ከተማ ክ/ከተማ የኢሬቻ ክብረ በዓል በሰላም፣ በሥርዓትና በመተባበር እንዲከበር ፎሌዎችና ቀሬዎች ከፀጥታ አካላትና ከሌሎች ተቋማት ጋር በቅንጅት በመስራት የተሰጣቸውን ኃላፊነትና ተግባር በብቃት እንዲወጡ የሥራ ስምሪት ተሰጥቷል።
መድረኩን የመሩት የአዲስ ከተማ ክ/ከተማ ብልፅግና ፓርቲ ምክትልና የፖለቲካ ዘርፍ ኃላፊ ወ/ሮ ፋኪያ ሸሪፍ የኢሬቻ በዓል ሰላማዊና ስኬታማ ሆኖ እንዲከበር የሁሉም አካላት ተሳትፎ ወሳኝ መሆኑን ጠቅሰው፣ የፎሌና ቀሬ አባላት በበዓሉ ወቅት የህዝብን ሰላምና ደህንነት ከማስጠበቅ ባለፈ፣ ለታዳሚዎች ትክክለኛ አቅጣጫና መረጃ መስጠት፣ ህጻናትን፣ አረጋውያንንና እርዳታ የሚፈልጉ ታዳሚዎችን ማገዝ፣ የበዓሉን ሥነ-ሥርዓት ማስከበርና የተረጋጋ የበዓል ድባብ እንዲኖር በትጋት መስራት እንዳለባቸው አስገንዝበዋል።
የአዲስ ከተማ ክፍለ ከተማ ዋና ሥራ አስፈፃሚ ጽ/ቤት ኃላፊ አቶ ፍቅሩ ሐጂ በበኩላቸው የኢሬቻን ባህላዊና ማህበራዊ እሴቶች በማክበር፣ የሰላም፣ የመቻቻል፣ የአንድነትና የመከባበር መልዕክቶችን በማጠናከር ለበዓሉ ታዳሚዎች አርአያ እንዲሆኑ በመጥቀስ፣ የፎሌ አባላት በበዓሉ ወቅት የሚኖረውን የህዝብ ብዛትና የተለያዩ የበዓል እንቅስቃሴዎች ታሳቢ በማድረግ፣ በትዕግስት፣ በትህትናና በኃላፊነት መስራት እንዳለባቸው ገልፀዋል።
የክፍለ ከተማው የሰላምና ፀጥታ አስተዳደር ኃላፊ ዶ/ር ጥበቡ ደጀኔ በበኩላቸው የፎሌ አባላት ከፀጥታ አካላት ጋር በቅንጅትና በመረጃ ላይ በተመሠረተ መንገድ መስራት እንዳለባቸው ገልፀው፤ በተለይ አጠራጣሪ ወይም አሳሳቢ እንቅስቃሴ ሲያዩ በራሳቸው ጉዳዩን ከመያዝ ይልቅ በፍጥነት ለሚመለከተው የፀጥታ አካል ማሳወቅ፣ የህዝብ ፍሰትን በሥርዓት ማስተካከል፣ የጠፉ ሰዎችን በተለይም ህጻናትንና አረጋውያንን ለማገዝ መተባበር እንዲሁም በአደጋ ወይም በአስቸኳይ ሁኔታ ተገቢውን አካል በአፋጣኝ ማሳወቅ ከፎሌ አባላት የሚጠበቁ ዋና ተግባራት መሆናቸውን አመልክተዋል።
የውይይት ተሳታፊ ፎሌዎችና ቀሬዎች በበዓሉ ወቅት ከሚመጡ ማንኛውም ሁኔታዎች በፊት በመከላከል፣ ከህብረተሰቡና ከፀጥታ አካላት ጋር በመቀናጀት የኢሬቻ በዓል የሰላም፣ የፍቅር፣ የአንድነትና የመከባበር በዓል ሆኖ እንዲከበር በንቃት እንደሚሰሩ ገልጸዋል።
#ኢሬቻ #ፎሌ
