07/10/2026
የሐይቅ ከተማ ምክር ቤት የ2019 በጀት አመትረቂቅ በጀት መርምሮ 435 ሚሊዮን 217 ብር አጸደቀ ።
መስከረም 25/2019 ዓ.ም
በጉባኤው የሐይቅ ከተማ ምክር ቤት የ2019 በጀት ዓመት እቅድ፣ የአስፈፃሚዉ እቅድ እና የማስፈጸሚያ ረቂቅ በጀት ቀርቦ በምክር ቤቱ ጸድቋል ፡፡
የ2019 በጀት ዓመት እቅዱ የከተማዋን አሻጋሪ እድገት ለማረጋገጥ የኢኮኖሚ እንቅስቃሴን ከማሳደግ ጀምሮ የመሠረተ ልማት፣ የኢንዱስትሪና ኢንቨስትመንት፣ የአገልግሎት አሰጣጥ፣ በገቢ ፣በገበያ ማረጋጋት፣የከተማ ውበትና ጽዳት እንዲሁም ሌሎች የልማት ዘርፎችን በተቀናጀ መልኩ ለማስኬድ አቅጣጫ የሚያስቀምጥ መሆኑ በምክር ቤት አባሉ ተመላክቷል።
የሐይቅ ከተማ ተቀዳሚ ም/ከንቲባ አቶ ከድር መሃመድ ባለፈው በጀት አመት የ5 አመት አሻጋሪ እቅድ ታቅዶ ወደ ስራ በመግባት እጅግ በርካታ ስኬቶች የተመዘገቡ መሆኑን አንስተው ፤ በተያዘው በጀት አመትም ሰፊና አሳታፊ የሆኑ የከተማዋን እድገት ሊያረጋግጡ የሚችሉ የልማት ስራዎች ለመስራት ጥረት እየተደረገ መሆኑን አብራርተዋል።
የታቀዱትን የስራ አቅዶች በተሳካ ሁኔታ ለመፈጸም ገቢ መሰብሰብ ዋነኛው ተግባር በመሆኑ ለተፈጻሚነቱ ሁሉም ባለድርሻ አካላት በርብረብና በቁርጠኝነት ሊሰራ ይገባል ሲሉ አቶ ከድር አክለዋል።
አያይዘውም ከተማን ለማሳደግ የሚያስችል ገቢ ለማመንጨት የሀብት ፈጠራ ስራ ከፍተኛውን ድርሻ የሚይዝ በመሆኑ የግብርናውን ክፍለ ኢኮኖሚ ወደ ኢንዱስትሪ መር በማሸጋገርና ባለሀብቶችን በመሳብ ኢንዱስትሪና ኢንቨስትመንትን በከፍተኛ ትኩረት አጠናክሮ መስራትና የከተማውን እድገት ማረጋገጥ እንደሚገባም ተናግረዋል።
አቶ ከድር በማጠቃለያቸው የ2019 በጀት ዓመት የአሻጋሪ እድገትና ዘላቂ ልማት እቅዱ በምክር ቤቱ በጥልቀት በመመርመር ተግባራዊ ሲሆን፣ የሐይቅ ከተማን የበለጠ የተሻለች፣ የተደራጀችና ለነዋሪዎቿ የተሻለ የኑሮ አካባቢ የምትሆንበትን የልማት መሠረት ለማጠናከር የሚያግዝ መሆኑን ገልጸዋል።
በመጨረሻም በመደበኛ በጀት ለስራ ማስኬጃ 34 ሚሊዮን 836ሺህ 598ብር እና ለደመወዝ 117ሚሊዮን 573ሺህ 606 ብር በድምሩ 152ሚሊዮን 410ሺህ 204ብር እንዲሁም ለከተማ አስተዳደሩ የልማት ስራዎች ማስፈጸሚያ የሚሆን የካፒታል በጀት 282ሚሊዮን 590 ሺህ 013ብር ሲሆን ምክር ቤቱ የቀረበውን ረቂቅ በጀት መርምሮ 435ሚሊዮን 217ብር በሙሉ ድምጽ አጽድቋል።
