06/10/2026
የአዋሬ ወረዳ ጤና ጣቢያ የህክምና ቁሳቁስ ድጋፍ ተበረከተለት
#ጅግጅጋ:-ኑሮአቸውን በተለያየ የዓለም ክፍል ያደረጉ የሶማሊ ክልል አዋሬ ወረዳ ተወላጅ የሆኑ ዲያስፖራዎች ከዓለም አቀፉ የረድኤት ድርጅት ግሎባል ሜዲካል ኤይድ (Global Medical Aid) ጋር በመተባበር ለአዋሬ ወረዳ ጤና ጣቢያ የህክምና ቁሳቁስ ድጋፍ አደረጉ።
የወረዳዋ ተወላጅ የሆኑት ዲያስፖራዎች ከግሎባል ሜዲካል ኤይድ ጋር በመተባበር የኤክስሬይ ማሽን፣ዘመናዊ ማይክሮስኮፕ ፣ የአይን ቀዶ ጥገና ማይክሮስኮፕ፣ የህክምና እቃዎች ማፅጃ ፣ የላቦራቶሪ ጠረጴዛ ፣ የሕመምተኛ አልጋዎችና ሌሎች አስፈላጊ የሆኑ የህክምና ቁሳቁሶችን አበርክተዋል።
የህክምና ቁሳቁሶቹን በዛሬው ዕለት ባስረከቡበት ስነስርዓት የሶማሊ ክልል ፕሬዝዳንት ፅህፈት ቤት ምክትል ቢሮ ሃላፊ አቶ መሀመድ ዩሱፍ ሮብሌ፣ የክልሉ ጤና ቢሮ ምክትል ሃላፊ አቶ መሀመድ አያንሌ ሀሰን፣ የጃራር ዞን አስተዳዳሪ አቶ አህመድ ሁሴን፣ እንዲሁም የወረዳው ከፍተኛ አመራሮች እና የዳያስፖራው ተወካዮች ተገኝተዋል።
በወቅቱ ንግግር ያደረጉት የፕሬዝደንት ፅ/ቤት ምክትል ሀላፊ አቶ መሀመድ ዩሱፍና የክልሉ ጤና ቢሮ ምክትል ሀላፊ አቶመሀመድ አያንሌ ለዳያስፖራ አባላቱና ለግሎባል ሜዲካል ኤይድ ድርጅት ልባዊ የሆነ ምስጋናቸውን አቅርበው ይህ ድጋፍ በወረዳው የሚሰጠውን የህክምና አገልግሎት ጥራት ደረጃ በከፍተኛ ሁኔታ እንደሚያሻሽለው አመልክተዋል።
በርክክብ ስነ ስርአቱ የተገኙ የአዋሬ ነዋሪዎች ለተደረገው ድጋፍ ከልብ አመስግነው ለዲያስፖራ አባላቱ የሶማሊ ባህላዊ አልባሳትና ጌጣጌጥ በማስታወሻነት አበርክተዋል።
