16/10/2026
📑✨ 𝘏𝘪𝘴𝘵𝘰𝘳𝘪 𝘴𝘶𝘬𝘴𝘦𝘴𝘪 - 𝘉𝘦𝘯𝘢𝘳𝘥 𝘝𝘦𝘭𝘪𝘶
⚽ 𝐁𝐞𝐧𝐚𝐫𝐝 𝐕𝐞𝐥𝐢𝐮 - 𝐧𝐣𝐞̈ 𝐦𝐢𝐬𝐢𝐨𝐧 𝐪𝐞̈ 𝐛𝐚𝐬𝐡𝐤𝐨𝐧 𝐬𝐡𝐪𝐢𝐩𝐭𝐚𝐫𝐞̈𝐭 𝐩𝐞̈𝐫𝐦𝐞𝐬 𝐟𝐮𝐭𝐛𝐨𝐥𝐥𝐢𝐭 🇦🇱
📄 Që në vegjëli, futbolli ka qenë pjesë e emocioneve dhe ëndrrave të shumë shqiptarëve. Për disa, ky pasion mbeti një kujtim fëmijërie, për të tjerë, u kthye në një mision. Një prej tyre është Benard Veliu, i cili prej vitesh punon për të bashkuar komunitetin shqiptar në Greqi përmes futbollit dhe ngjyrave kuqezi, që na bëjnë bashkë e na japin ndjenjën e përkatësisë.
Benardi u dashurua që në moshë të vogël me futbollin, pasion të cilin e vijoi edhe gjatë studimeve në Institutin “Vojo Kushi”. Viti 1999 e gjeti në Greqi, në kërkim të një jete më të mirë dhe me ëndrrën për t'u bërë futbollist profesionist. Për disa vite luajti në ekipe të ndryshme të Athinës, "Moskato", "Agios Dhimitrio", si dhe te "Panionios Kesarianis". Një dëmtim fizik e largoi nga fushat e futbollit, por jo nga sporti. Përkundrazi, kjo pengesë u bë shtysë për një sfidë të re. Gjatë viteve të angazhimit në futboll, njohu të rinj shqiptarë të talentuar, të cilët luftonin të realizonin ëndrrën e tyre. Shumë arritën të luanin edhe në skuadra me emër. Por mungonte një hapësirë ku talenti shqiptar të bashkohej nën një emër, një fanellë dhe ngjyrat kuqezi. Kështu lindi ideja për të krijuar një ekip shqiptar në Athinë. Në vitin 2013, kjo ëndërr u bë realitet. Bernardi krijoi së bashku me miqtë e tij ekipin "Apolonia FC Athina", ku ai mori rolin e trajnerit dhe, në raste të veçanta, edhe të lojtarit.
Me kalimin e viteve, "Apolonia FC Athina" u rrit dhe ndërtoi identitetin e saj. U krijua skuadra, u mblodhën tifozët, u promovuan talente dhe erdhën sukseset në stadiumet e Athinës. Skuadra u shpall kampione për katër vite radhazi, madje fitoi edhe Kupën e Pavarësisë të Athinës. Fitoret dhe trofetë u kthyen në momente krenarie për komunitetin shqiptar, duke dëshmuar se futbolli mund të jetë një mënyrë e fuqishme për të ruajtur identitetin dhe përkatësinë. Megjithatë, Bernardi suksesin nuk e mat vetëm me trofe; ai është gjithmonë në kërkim të bashkëpunimeve dhe mundësive të reja. Sot, Apolonia FC Athina bashkëpunon me FSHF-në si vëzhguese për talentet shqiptare në Greqi. Nga kjo skuadër kanë dalë edhe talente që janë pjesë e Kombëtares Kuqezi. Për të promovuar sportin dhe talentet shqiptare, në vitin 2020, iu bashkua TV Tribunës me emisionin sportiv “Gol nga Tribuna” dhe prej vitit 2024 vijon me emisionin “Gol Bet…”.
👉 Historia e Benard Veliut është historia e një njeriu që nuk u dorëzua kur një dëmtim i ndërpreu ëndrrën. Përkundrazi, ai e ktheu atë ëndërr në një mision më të madh: të bashkojë të rinjtë shqiptarë përmes futbollit, të krijojë hapësira për talentet dhe të mbajë gjallë ngjyrat kuqezi në Greqi. Nga një ëndërr personale te një pasion që u kthye në histori për shumë të tjerë, rrugëtimi i Bernardit dhe i "Apolonia FC Athina" është një histori pasioni, këmbënguljeje, suksesi dhe përkushtimi ndaj komunitetit shqiptar.
Ministria për Evropën dhe Punët e Jashtme - Republika e Shqipërisë
👏🏻 ✨
