11/05/2026
മുസ്ലിം യൂത്ത് ലീഗ് "പ്രയാണം - സംഘടന ഹൃദയങ്ങളിലൂടെ"
ആനക്കര പഞ്ചായത്തിൽ മുസ്ലിം ലീഗ് പ്രസ്ഥാനം കെട്ടിപ്പടുക്കുന്നതിനുവേണ്ടി ജീവിതം സമർപ്പിച്ച മുൻകാല നേതാക്കളെയും അവരുടെ കുടുംബങ്ങളെയും നേരിട്ട് സന്ദർശിക്കുകയും അവരുമായി പഴയകാല അനുഭവങ്ങൾ പങ്കുവെക്കുകയും ചെയ്യുന്നതിനായി മുസ്ലീം യൂത്ത് ലീഗ് "പ്രയാണം - സംഘടന ഹൃദയങ്ങളിലൂടെ" എന്ന ക്യാമ്പയിൻ സംഘടിപ്പിക്കുകയാണ്. ആനക്കരയുടെ മണ്ണിൽ ഹരിത പതാക പാറിക്കാൻ വിയർപ്പൊഴുക്കിയ പൂർവ്വികരുടെ അനുഭവങ്ങൾ പുതിയ തലമുറയ്ക്ക് പകർന്നുനൽകുന്ന ക്യാമ്പയിൻ ആനക്കര പഞ്ചായത്തിലെ മുസ്ലീം ലീഗിന്റെ സമുന്നതനായ നേതാവ് സി. അബ്ദുസാഹിബിന്റെ വസതിയിൽനിന്നും അദ്ദേഹത്തോടൊപ്പം ഏതാനും മണിക്കൂറുകൾ ചെലവഴിച്ചുകൊണ്ട് ആരംഭിക്കുകയാണ്.
അഞ്ചു പതിറ്റാണ്ടിലേറെയായി സംഘടനാ രംഗത്ത് സജീവമായ അബ്ദു സാഹിബ്, ആനക്കര പഞ്ചായത്തിലെ കൂടല്ലൂർ കേന്ദ്രീകരിച്ച് രാഷ്ട്രീയ പ്രവർത്തനം ആരംഭിച്, ആനക്കര പഞ്ചായത്ത് മുസ്ലീം ലീഗ് പ്രസിഡന്റും ജനറൽ സെക്രട്ടറിയുമായിരുന്നു. തൃത്താല നിയോജക മണ്ഡലം മുസ്ലീം ലീഗിന്റെ ട്രഷറർ, ജനറൽ സെക്രട്ടറി, പ്രസിഡന്റ് എന്നീ നിലകളിൽ സംഘടനക്ക് നേതൃത്വം നൽകിയ അദ്ദേഹം, മുസ്ലീം ലീഗ് സംസ്ഥാന കൗൺസിലർ എന്ന നിലയിലും തന്റെ സാന്നിധ്യം അറിയിച്ചു. പ്രവാസി ലീഗ് സംസ്ഥാന കൺവീനർ, എസ്.ടി.യു നിയോജക മണ്ഡലം പ്രസിഡന്റ്, കർഷക സംഘം ജില്ലാ-നിയോജക മണ്ഡലം നേതൃത്വം തുടങ്ങിയ ഉത്തരവാദിത്തങ്ങളിലൂടെ പ്രസ്ഥാനത്തെ നയിക്കാൻ അദ്ദേഹത്തിന് സാധിച്ചു. ആനക്കര ഗ്രാമപഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ എന്ന നിലയിൽ തദ്ദേശ സ്വയംഭരണ രംഗത്തും അദ്ദേഹത്തിന് നിർണ്ണായക പങ്കുവഹിക്കാൻ കഴിഞ്ഞു.
ആശയവിനിമയ സംവിധാനങ്ങളോ വാഹനസൗകര്യങ്ങളോ സുലഭമല്ലാതിരുന്ന കാലഘട്ടത്തിൽ പ്രതിസന്ധികളിൽ തളരാതെ, വെല്ലുവിളികളെ ധീരമായി അതിജീവിച്ച്‌ തളരാത്ത മനക്കരുത്തുമായി ഹരിതപതാക നെഞ്ചോടു ചേർത്ത് മുന്നേറി ആനക്കരയിൽ മുസ്ലിം ലീഗിന്റെ അടിത്തറ ഭദ്രമാക്കുന്നതിൽ നിർണ്ണായക പങ്കുവഹിച്ച അബ്ദു സാഹിബിന്റെ വസതിയിൽ നിന്നും "പ്രയാണം" ആരംഭിക്കുകയാണ്. അദ്ദേഹം പകർന്നുനൽകിയ ആദർശത്തിൽ ഉറച്ചു നിന്ന് മക്കളും പേരക്കുട്ടികളും ഈ പ്രസ്ഥാനത്തെ ഹൃദയവായ്പ്പോടെ ചേർത്തുപിടിക്കുന്നു എന്നത് മുസ്ലിം ലീഗിനെ സംബന്ധിച്ചിടത്തോളം വലിയൊരു കരുത്തും അഭിമാനവുമാണ്.
കുടുംബവേരുകളിൽ പടർന്നുകിടക്കുന്ന ഈ സംഘടനാനുഭാവം വരുംതലമുറകൾക്കും മാതൃകയാണ്. കാറ്റിലും കോളിലും ഉലയാതെ പ്രസ്ഥാനത്തെ ചേർത്തുപിടിച്ച ആനക്കരയിലെ അനേകം പൂർവ്വികരുടെ വീടുകളിലേക്കും അവരുടെ ഹൃദയങ്ങളിലേക്കും ഒരു ചരിത്രനിയോഗത്തിന്റെ ഹൃദ്യമായ പുനർവായനക്കായി "പ്രയാണം - സംഘടന ഹൃദയങ്ങളിലൂടെ" തുടങ്ങുകയാണ്.
