19/07/2026
நெல்லை மாவட்டத்தில் உள்ள மாஞ்சோலை எஸ்டேட் நிலங்கள் அனைத்தும் உச்சநீதிமன்ற உத்தரவின் அடிப்படையில் தமிழ்நாடு வனத்துறையிடம் முழுமையாக ஒப்படைக்கப்பட்டுள்ளன. இதன்மூலம் களக்காடு–முண்டந்துறை புலிகள் காப்பகத்திற்குட்பட்ட மாஞ்சோலை, காக்காச்சி, நாலுமுக்கு மற்றும் ஊத்து பகுதிகள் முழுவதும் வனத்துறையின் நேரடி நிர்வாகக் கட்டுப்பாட்டிற்கு வந்துள்ளன.
சிங்கம்பட்டி ஜமீன் மூலம் பாம்பே பர்மா டிரேடிங் கார்ப்பரேஷன் லிமிடெட் நிறுவனத்திற்கு கடந்த 1929ஆம் ஆண்டு 99 ஆண்டுகள் குத்தகை அடிப்படையில் மொத்தம் 8,373.57 ஏக்கர் நிலம் வழங்கப்பட்டிருந்தது. குத்தகைக் காலம் நிறைவடைந்ததைத் தொடர்ந்து நிலங்களை வனத்துறையிடம் மீள ஒப்படைக்கும் நடவடிக்கைகள் மேற்கொள்ளப்பட்டு வந்தன.
இதன் ஒரு பகுதியாக, 2025ஆம் ஆண்டு மே மாதத்தில் 8,152.13 ஏக்கர் நிலம் வனத்துறையிடம் ஒப்படைக்கப்பட்டது. மீதமிருந்த 221.44 ஏக்கர் பரப்பில் தொழிலாளர் குடியிருப்புகள், தேயிலைத் தொழிற்சாலைகள் மற்றும் பிற கட்டுமானங்கள் இருந்ததால் அந்தப் பகுதி மட்டும் நிறுவனத்தின் கட்டுப்பாட்டில் இருந்து வந்தது.
இந்நிலையில், கடந்த மே 29ஆம் தேதி உச்சநீதிமன்றம் பிறப்பித்த உத்தரவின் அடிப்படையில், மீதமிருந்த 221.44 ஏக்கர் நிலத்தையும் 15 நாட்களுக்குள் வனத்துறையிடம் ஒப்படைக்க அம்பாசமுத்திரம் துணை இயக்குநரும் வனஉயிரினக் காப்பாளரும் நோட்டீஸ் வழங்கினர்.
அதனைத் தொடர்ந்து, ஜூலை 11ஆம் தேதி அம்பாசமுத்திரம் துணை இயக்குநர் முன்னிலையில், நோட்டரி பப்ளிக் சாட்சியத்துடன் ஒப்படைப்பு ஒப்பந்தம் கையெழுத்தானது. இதில் பிபிடிசிஎல் நிறுவனத்தின் சட்ட மேலாளரும் அம்பாசமுத்திரம் வனச்சரக அலுவலரும் கையெழுத்திட்டனர். இதன் மூலம் எஞ்சிய 221.44 ஏக்கர் நிலமும் தமிழ்நாடு வனத்துறையிடம் முறைப்படி ஒப்படைக்கப்பட்டது.
இதனால் கடந்த ஒரு நூற்றாண்டுக்கும் மேலாக பிபிடிசிஎல் நிறுவனத்தின் குத்தகையில் இருந்த மொத்த 8,373.57 ஏக்கர் மாஞ்சோலை எஸ்டேட் நிலப்பரப்பும் முழுமையாக தமிழ்நாடு வனத்துறையின் நேரடி கட்டுப்பாட்டிற்குள் வந்துள்ளது.
மேற்குத் தொடர்ச்சி மலையின் முக்கிய நீர்ப்பிடிப்பு மற்றும் பல்லுயிர் வளமிக்க பகுதியாக விளங்கும் மாஞ்சோலை, தென்னிந்தியாவில் அதிக மழைப்பொழிவு பெறும் பகுதிகளில் ஒன்றாகும். மேலும், கேரள வனப்பகுதிகளில் இருந்து யானைகள் இயற்கையான இடம்பெயர்வின் ஒரு பகுதியாக இப்பகுதிக்கு வருவது வழக்கமாக உள்ளது.
மாஞ்சோலை நிலங்கள் முழுமையாக வனத்துறையின் கட்டுப்பாட்டிற்குள் வந்திருப்பது, களக்காடு–முண்டந்துறை புலிகள் காப்பகத்தின் நீண்டகால வனப் பாதுகாப்பு, உயிரியல் இணைப்பிற்கு முன்னேற்றமாக கருதபடுகிறது.
Credits: Tirunelveli Pasanga La
