10/10/2026
రోటరీ క్లబ్ ఆఫ్ గుడివాడ సేవా కార్యక్రమాలు అభినందనీయం జిల్లా గవర్నర్ గుత్తికొండ శ్రీరామ్....
గుడివాడ: రోటరీ క్లబ్ ఆఫ్ గుడివాడ ఆధ్వర్యంలో పట్టణంలో నిర్వహిస్తున్న శాశ్వత సేవా కార్యక్రమాలు అభినందనీయమని రోటరీ ఇంటర్నేషనల్ డిస్ట్రిక్ట్ 3020 జిల్లా గవర్నర్ ఆర్‌టీఎన్. గుత్తికొండ శ్రీరామ్ అన్నారు.
గుడివాడ రోటరీ క్లబ్ ఆధ్వర్యంలో శనివారం నిర్వహించిన జిల్లా గవర్నర్ అధికారిక పర్యటన (గవర్నర్ అఫీషియల్ విజిట్) కార్యక్రమంలో ఆయన పాల్గొన్నారు. ఈ సందర్భంగా రోటరీ క్లబ్ చేపట్టిన వివిధ శాశ్వత సేవా ప్రాజెక్టులను ఆయన పరిశీలించారు. అనంతరం మీడియాతో మాట్లాడుతూ రోటరీ క్లబ్ ఆఫ్ గుడివాడ సభ్యులు సేవా కార్యక్రమాలకు ప్రాధాన్యతనిస్తూ పట్టణంలో వివిధ రంగాల్లో అనేక కార్యక్రమాలు నిర్వహిస్తున్నారని తెలిపారు.
రోటరీ క్లబ్ ఆధ్వర్యంలో ఏర్పాటు చేసిన శాశ్వత సేవా ప్రాజెక్టులతో పాటు పట్టణంలో చేపడుతున్న సామాజిక సేవా కార్యక్రమాలు ప్రజలకు ఉపయోగకరంగా ఉన్నాయని శ్రీరామ్ పేర్కొన్నారు. పర్యావరణ పరిరక్షణలో భాగంగా మొక్కలు నాటడం, యువతను ప్రోత్సహించే కార్యక్రమాలు, విద్యార్థుల్లో ప్రతిభను వెలికితీసే కార్యక్రమాలు నిర్వహించడం అభినందనీయమన్నారు.
వివిధ సాంస్కృతిక కార్యక్రమాలు, క్రీడా పోటీల్లో ఉత్తమ ప్రతిభ కనబరిచిన చిన్నారులకు ప్రతిభా పురస్కారాలు అందజేసి ప్రోత్సహించడం ద్వారా వారిలో మరింత ఉత్సాహాన్ని నింపుతున్నారని తెలిపారు. సేవా కార్యక్రమాలతో పాటు విద్య, పర్యావరణం, యువత అభివృద్ధి వంటి అంశాలకు రోటరీ క్లబ్ ప్రాధాన్యత ఇవ్వడం సంతోషకరమన్నారు.
ఈ సందర్భంగా మొక్కలు నాటే కార్యక్రమం నిర్వహించి పర్యావరణ పరిరక్షణపై ప్రజలకు అవగాహన కల్పించారు. రోటరీ క్లబ్ సభ్యులు సమాజ సేవలో మరింత విస్తృతంగా భాగస్వాములు కావాలని జిల్లా గవర్నర్ ఆకాంక్షించారు.
కార్యక్రమంలో రోటరీ క్లబ్ ఆఫ్ గుడివాడ అధ్యక్షులు ఆర్‌టీఎన్. జి. కిరణ్ బాబు, కార్యదర్శి ఆర్‌టీఎన్. జి. నరేష్, అసిస్టెంట్ గవర్నర్ టి.ఎన్. రాజశేఖర్తో పాటు రోటరీ క్లబ్ సభ్యులు, విద్యార్థులు తదితరులు పాల్గొన్నారు.
