28/09/2026
मांगी तलाव परिसरातील वीज पुरवठा महावितरणने अचानक खंडित केल्याच्या निषेधार्थ वडगाव (दक्षिण), वडगाव (उत्तर), मांगी, वरवाडी, जातेगाव, रायगाव आदी गावांतील शेतकरी बांधवांनी करमाळा तहसील कार्यालयासमोर आमरण उपोषण सुरू केले आहे. या आंदोलनास भाजप जिल्हा युवा नेते मा. दिग्विजय बागल यांनी भेट देऊन उपोषणकर्त्या शेतकऱ्यांशी चर्चा केली व त्यांच्या समस्या जाणून घेतल्या.
यावेळी करमाळ्याच्या तहसीलदार शिल्पा ठोकडे तसेच महावितरणचे अधिकारी उपस्थित होते. मांगी तलावातील पाणी पिण्यासाठी राखीव ठेवण्यास शेतकऱ्यांचा कोणताही विरोध नाही, मात्र ज्या शेतकऱ्यांच्या स्वतःच्या विहिरी किंवा बोअरवेल आहेत, त्यांचा वीज पुरवठा तरी चालू ठेवावा अशी आग्रही मागणी यावेळी उपोषणकर्त्यांनी केली. वीज पुरवठा बंद केल्यामुळे शेतातील उभ्या पिकांचे अतोनात नुकसान होत असल्याची खंत शेतकऱ्यांनी व्यक्त केली.
शेतकऱ्यांच्या या समस्येवर बोलताना दिग्विजय बागल म्हणाले की, "महावितरणच्या अशा धोरणामुळे शेतकऱ्यांचे मोठे नुकसान होत आहे. याप्रश्नी मी स्वतः जातीने लक्ष घालून मा. जिल्हाधिकारी व मंत्रालय पातळीवर तातडीने पाठपुरावा करेन आणि शेतकऱ्यांना न्याय मिळवून देण्यासाठी सर्वतोपरी प्रयत्न करेन."
#नेता #करमाळा
