06/10/2026
मेरठ, कंकड़खेड़ा -'गढ़वाळि किताब 'तर्पण' (दिवंगत साहित्यकारों दगड़ा संस्मरण) लोकार्पित'
आप सब्यूं तैं सादर सेवा सौंळि।🙏🙏आप सब्यूं तैं यो बतौण मा खुसि होणी छ कि आप सब्यूं कि शुभकामनाओं से ब्याळि मेरि आठवीं गढ़वाळि किताब अर संस्मरण संग्रै 'तर्पण'(दिवंगत साहित्यकारों दगड़ा संस्मरण)लोकार्पित' ह्वे।यो लोकार्पण कार्यक्रम मेरठ, कंकरखेड़ा मा 'उत्कर्ष प्रकाशन,मेरठ' द्वारा आयोजित कर्ये ग्ये ।
लोकार्पण कार्यक्रम मा मुख्य अतिथि का रूप मा 'मासिक साहित्यिक संगोष्ठी दिल्ली' अर गढ़वाळि का पैला पजलकार आदरणीय श्री जगमोहन सिंह रावत जगमोरा जि, कार्यक्रमा अध्यक्ष कवि अर फिल्म निर्माता आदरणीय श्री गिरीश त्यागी जि, उत्तर प्रदेश रत्न से सम्मानित श्री यशपाल जि, गजलकार मंगल सिंह 'मंगल' जि, गढ़वाळि व्यंग्यकार अर कवि संदीप घनशाला गढ़वळि जि,समाज सेवी श्री महेंद्र रस्तोगी जि, श्री शीतल खंतवाल जि,प्रकाशक अर उत्कर्ष प्रकाशन का निदेशक श्री हेमन्त शर्मा जि अर वूं कि टीम का सदस्य,श्रीमती प्रीति शर्मा जि, अक्षय शर्मा जि,लेखक अर गीतकार श्री मोहन सिंह नेगी जि,सुनील रावत,मेरठ मा रौण वळा गढ़वाळि भै-बन्द शामिल ह्वेनि।
यो मेरु सौभाग्य छ कि लोकार्पण कार्यक्रमा दौरान मि तैं अपणि मातृभाषा गढ़वाळि मा साहित्यिक योगदान देणा वास्ता अर 'तर्पण 'पुस्तक का वास्ता उत्कर्ष प्रकाशन द्वारा ' गढ़वाली गौरव सम्मान-2026' से बि सम्मानित कर्ये ग्ये।
ये अवसर परैं मुख्य अतिथि आदरणीय श्री जगमोहन सिंह रावत जगमोरा जिन बोलि कि - 'संदीप रावत भौत पैलि बटि गढ़वाळि मा निरंतर काम कन्ना छन। गढ़वाळा दिवंगत साहित्यकारों परैं वूंको 'तर्पण' संस्मरण संग्रै सराहनीय, सफल अर ऐतिहासिक प्रयास छ। यीं किताब्या माध्यम से वूंन दिवंगत साहित्यकारों तैं सच्चि श्रद्धांजलि अर्पित करि।'
कार्यक्रमा अध्यक्ष अर कवि,फिल्म निर्माता आदरणीय श्री गिरीश त्यागी जिन बोलि कि- 'आजकल जब श्राद्ध पक्ष चलणू छ त ये टैम परैं अपणा दिवंगत साहित्यकारों तैं याद कैरिक लोकर्पित कन्न से ये संस्मरण संग्रै 'तर्पण' कि अर कार्यक्रमै सार्थकता हौरि बि बढ़ि जांद।'
दिल्ली बटि अयां संदीप घनशाला गढ़वळि जिन बोलि कि-'आजकल जब सब अपणि- अपणि सोचणा छन अर व्यक्तिगत स्वार्थ मा लग्यां छन त इना टैम परैं अपणा दिवंगत साहित्यकारों तैं याद कन्न अर वूं दगड़ा का संस्मरणों तैं संग्रै का रूप मा प्रकाशित कन्न बड़ि बात छ।अब्बि तक गढ़वाळि मा संस्मरणों परैं भौत हि कम काम होयूं छ।'तर्पण' संस्मरण संग्रै मा वूं को संस्मरणों दगड़ा-दगड़ि दिवंगत साहित्यकारों से सम्बंधित महत्वपूर्ण जानकारि बि देयीं छन।'
एक बातौ जिक्र मि जरूर यख मा जरूर कन्न चाणू छौं। हिन्दी मा त भौत लेखक ह्वेनि जौंन संस्मरण लिखनि,छपैनि अर वूंका संस्मरण किताब्या रूप मा ऐनि। गढ़वाळि मा बि छुटपुट संस्मरण पत्र-पत्रिकौं मा छपेणा रैनि अर छप्येंदन। गढ़वाळि गद्य साहित्य मा संस्मरण लिखणै अर वूं तैं एक संग्रै का रूप मा छपौणै मेरु यो एक प्रयास अर पहल छ। यीं पोथि 'तर्पण' मा गढ़वाळा 13 दिवंगत साहित्यकारों से जुड्यां मेरा अनमोल संस्मरण छन।
'उत्कर्ष प्रकाशन,मेरठ प्रकाशन' का श्री हेमन्त शर्मा जि अर वूंकि सैर्या टीमौ अर कार्यक्रम मा उपस्थित सब्बि सम्मानित अतिथियों भौत-भौत आभार अर धन्यवाद।
माँ सरस्वती कि कृपा, पित्रों अर गुरुजनों आशीर्वाद,सुधीजनों,आप सब्यूं शुभकामना इन्नि बणी रौवु। दिवंगत साहित्यकारों तैं सादर नमन 🙏विनम्र श्रद्धांजलि।
संदीप रावत,आखर ट्रस्ट
