Abhith Ashokan M V

പെരുമ്പടവം ശ്രീധരൻ 'ഒരു സങ്കീർത്തനം പോലെ' മലയാള നോവൽ സാഹിത്യത്തിലെ ക്ലാസിക് കൃതികളിലൊന്നാണ്.
1993-ൽ പുറത്തിറങ്ങിയ ഈ കൃതി, വിശ്വപ്രസിദ്ധ റഷ്യൻ എഴുത്തുകാരൻ ഫിയോദോർ ദസ്തയേവ്‌സ്കിയുടെ ജീവിതത്തിലെ ഒരു ചെറിയ കാലഘട്ടത്തെ ആസ്പദമാക്കി രചിച്ചതാണ്.മലയാളത്തിൽ ഏറ്റവും കൂടുതൽ വിറ്റഴിക്കപ്പെട്ട പുസ്തകങ്ങളിൽ ഒന്നാണിത്.
"കുറച്ച് നാൾ മുൻപാണ് ഞാനെൻ്റെ ഹൃദയം പൂട്ടി താക്കോൽ എവിടെയോ വലിച്ചെറിഞ്ഞു. ഇപ്പോൾ ഓർക്കുന്നില്ല അത് എവിടെയാണെന്ന്.എവിടെ നിന്നെങ്കിലും നിനക്ക് അത് കിട്ടിയോ?
എൻ്റെ ഹൃദയത്തിൻ്റെ താക്കോലും കൊണ്ടാണോ നീ വന്നിരിക്കുന്നത്.....?
ദസ്തയേവ്‌സ്കി തന്റെ പ്രശസ്തമായ 'ചൂതാട്ടക്കാരൻ' (The Gambler) എന്ന നോവൽ എഴുതിത്തീർക്കാൻ അന്ന ഗ്രിഗോറിയേവ്ന എന്ന സ്റ്റെനോഗ്രാഫറെ നിയമിക്കുന്നതും,അവർക്കിടയിൽ ഗാഢവും പരിശുദ്ധവുമായ പ്രണയം ഉടലെടുക്കുന്നു.
ജീവിതത്തിലുണ്ടായ കയ്പേറിയ അനുഭവങ്ങൾ,ദാരിദ്ര്യം, ജയിൽവാസം, പ്രിയപ്പെട്ടവരുടെ മരണം,രോഗം ഇതെല്ലാം ദസ്തയേവ്‌സ്കിയെ ഒരു അന്തർമുഖനാക്കി മാറ്റിയിരുന്നു.ലോകത്തിന് മുന്നിൽ തന്റെ വികാരങ്ങൾ പ്രകടിപ്പിക്കാൻ അദ്ദേഹം ഭയപ്പെട്ടു.മറ്റാരും തന്നെ സ്നേഹിക്കില്ലെന്നും, തന്റെ ഹൃദയം ഇനി ആർക്കും തുറന്നുകൊടുക്കില്ലെന്നും ഉറപ്പിച്ചാണ് അദ്ദേഹം അത് "പൂട്ടി താക്കോൽ ദൂരേക്ക് എറിഞ്ഞത്".അത് ഒരുതരം ആത്മരക്ഷാതന്ത്രമായിരുന്നു.
തനിക്ക് പോലും തുറക്കാൻ കഴിയാത്ത തന്റെ മനസ്സിന്റെ വാതിലുകൾ അന്നയുടെ സാമീപ്യം കൊണ്ട് താനേ തുറക്കപ്പെടുന്നു.താൻ പൂട്ടിവെച്ച ലോകത്തേക്ക് അന്നയെ അദ്ദേഹം ക്ഷണിക്കുകയാണ്.ആ താക്കോൽ അവളുടെ സ്നേഹവും കരുണയുമാണ്.
ദസ്തയേവ്‌സ്കി നേരിട്ട് തന്റെ പ്രണയം പ്രകടിപ്പിക്കാൻ മടിക്കുന്ന ഒരു രംഗമുണ്ട്. അദ്ദേഹം ഒരു കഥ പറയുന്ന രൂപത്തിലാണ് അന്നയോട് തന്റെ ഇഷ്ടം ചോദിക്കുന്നത്.
"വൃദ്ധനും രോഗിയുമായ ഒരു ചിത്രകാരന് ചെറുപ്പക്കാരിയായ ഒരു പെൺകുട്ടിയോട് പ്രണയം തോന്നിയാൽ അവൾ എന്തു മറുപടി പറയും?"
ഇതായിരുന്നു അദ്ദേഹത്തിന്റെ ചോദ്യം. ഇതിന് അന്ന നൽകുന്ന മറുപടി വളരെ ലളിതവും എന്നാൽ അർത്ഥവത്തുമാണ്:
"അവൾ അയാളെ സ്നേഹിക്കും, ജീവിതകാലം മുഴുവൻ." ഈ മറുപടിയിലൂടെ അവൾ ദസ്തയേവ്‌സ്കിയുടെ ജീവിതത്തിലെ എല്ലാ ഇരുട്ടിനെയും മായ്ച്ചുകളയുന്നു.

"വേണ്ടപ്പെട്ട മനുഷ്യർ കൂടെ ഉണ്ടാകുമ്പോഴാണ് ഒരാൾ രാജാവാകുക,ഒറ്റപ്പെട്ടു പോയ മനുഷ്യൻ ചക്രവർത്തിയാണെങ്കിലും യാചകനാണ്...."
"പ്രണയത്തിൻ്റെയും തിരസ്‌കരത്തിൻ്റെയുമിടയിൽ ധർമ്മം തോറ്റുപോകുന്നതിൽ കുറ്റബോധം കൊണ്ടു നീറുന്നത് മനുഷ്യത്വവും അനുതാപവും നൈതികതയും ഉള്ളിൽ സൂക്ഷിക്കുന്ന നിരമിത്രനെപോലുള്ളവർ മാത്രമാണ്"

ആത്രേയകം ഈ പേര് തന്നെ വ്യത്യസ്തമായ ഒന്നാണ്.അറിഞ്ഞ മാത്രയിൽ മനസ്സിലേക്ക് ആഴ്ന്നിറങ്ങിയ മനോഹരമായ പേര്.പേരിൻ്റെ
പുതുമ പോലെ തന്നെയാണ് ഉള്ളടക്കവും.
മഹാഭാരത കഥയിലെ കഥാപാത്രങ്ങളെ ഇതിനുമുൻപും എഴുത്തുകാർ അവരുടെ മനോഭാവനകളിലൂടെ കഥകളായി എഴുതിയിട്ടുണ്ട്.
രണ്ടാമൂഴത്തിലൂടെ ഭീമനെ എം ടി യും, ഇനി ഞാൻ ഉറങ്ങട്ടെ യിലൂടെ പി.കെ. ബാലകൃഷ്ണൻ കർണനെയും മഹാഭാരത കഥ പശ്ചാത്തലത്തിൽ കൂടുതൽ ഭംഗിയായി അവതരിപ്പിച്ചപ്പോൾ മലയാള സാഹിത്യത്തിന് ലഭിച്ചത് അമൂല്ല്യങ്ങളായ രണ്ട് കൃതികളായിരുന്നു.അതുപോലെ നിരമിത്രനെന്ന കഥാപാത്രത്തെയും മനോഹരമായി ആത്രേയകത്തിൽ വരച്ചുകാട്ടാൻ കഥാകൃത്തിന് കഴിഞ്ഞു.
ജീവിതയാത്രയിൽ വിജയിച്ചവരുടെയും
തോറ്റുപോയവരുടെയും കഥകൾ ഒരുപാട് നമ്മളറിഞ്ഞിട്ടുണ്ട്.എന്നാൽ രണ്ടിലും പെടാതെ
ഒരാളുടെ കഥയിലോ ഓർമ്മയിലോ എന്തിന്
ഒരു നോട്ടത്തിൽ പോലും പെടാത്ത ചില മനുഷ്യരുണ്ടാവില്ലേ?അത്തരത്തിൽ ആരാലും പറയപ്പെടാതപോയ നിരമിത്രൻ്റെ കഥയാണ് ആത്രേയകം.
ആത്രേയകത്തിൻ്റെ പച്ചമണം
നമ്മളേവരെയും ആകർഷിക്കും.ആ മണം
നിങ്ങളിലേക്ക് കൂടി പരത്തുക എന്നതാണ്
ഈ റിവ്യൂയിലൂടെ എൻ്റെ ലക്ഷ്യം.
40-ാം പതിപ്പിലെത്തി നിൽക്കുമ്പോഴും മാതൃഭൂമി ബുക്സിൻ്റെ Top Seller
പട്ടികയിൽ ഇന്നും ഇടം നിലനിർത്തുന്നു.
എൻ്റെ നാട്ടിലെ ശ്രീ കാഞ്ഞിലശ്ശേരി
മഹാദേവ ശിവരാത്രി മഹോൽസവത്തിൻ്റെ
ഭാഗമായുള്ള മൃത്യുഞ്ജയ പുരസ്കാരം ആത്രേയകത്തിൻ്റെ കഥാകൃത്ത് ശ്രീമതി ആർ രാജശ്രീ ടീച്ചർക്ക് ലഭിച്ചിരുന്നു.ഇനിയും ഒരുപാട് വായനക്കാരാൽ
വായിക്കപ്പെടട്ടെ എന്നാശംസിക്കുന്നു.

മലയാളത്തിലെ പുതിയ കാലത്തെ
എഴുത്തുകാരിൽ ശ്രദ്ധേയയായ
ശ്രീ ജിസ്മ ഫൈസിൻ്റെ വളരെ
വികാരനിർഭരമായ ഒരു കൃതിയാണ്
DC ബുക്സ് പ്രസിദ്ധീകരിച്ച
എൻ്റെ അരുമയായ പക്ഷിക്ക് എന്ന നോവൽ.
വായനക്കാരെ പെട്ടെന്ന് സ്വാധീനിക്കുന്ന
തരത്തിൽ ലളിതവും എന്നാൽ ആഴവുമുള്ള
ഭാഷയാണ് ഈ പുസ്തകത്തിൻ്റെ പ്രത്യേകത.
ഓരോ താളുകളിലെയും കഥാസന്ദർഭങ്ങൾ ഹൃദയത്തിലേക്ക് ചേക്കേറുന്നു.ചിലപ്പോൾ വേദനയായി,ചിലപ്പോൾ മധുരമുള്ള ഒരോർമ്മയായി.
ഇത് ഒരു പ്രണയകഥ മാത്രമല്ല,
ഒരാളെ മനസിൽ എത്ര ആഴത്തിൽ
സൂക്ഷിക്കാമെന്ന് മനസ്സിലാക്കി
തരുന്ന ഒരു യാത്രയാണ്.
പ്രണയത്തിന്റെയും ബന്ധങ്ങളുടെയും തീവ്രത ആഗ്രഹിക്കുന്ന വായനക്കാർക്ക് ഹൃദ്യമായ ഒരു വായനാനുഭവമായിരിക്കും ജിസ്മ ഫൈസിന്റെ
"എന്റെ അരുമയായ പക്ഷിക്ക്" എന്ന പുസ്തകം.

"എല്ലാവർക്കും ഭക്ഷണവും വെള്ളവുംപോലെ
ചിലർക്ക് ഒരു അത്യാവശ്യവസ്‌തുവാണ് സ്നേഹം.ആരെങ്കിലും ഒരാൾ സ്നേഹിക്കാനില്ലാതെ വന്നാൽ അത്തരക്കാർ ആകെ കഷ്ടത്തിലാകുന്നു."

പ്രകൃതിയുടെ മാറ്റങ്ങളെയും മനുഷ്യന്റെ ആത്മബന്ധങ്ങളെയും മനോഹരമായി ആവിഷ്കരിക്കുന്ന മലയാള സാഹിത്യത്തിലെ ഗന്ധർവ്വനായിരുന്ന ശ്രീ പി.പത്മരാജൻ്റെ
മനോഹരമായ കൃതിയാണിത്.
1971 ലാണ് ഋതു ഭേദങ്ങളുടെ പാരിതോഷികം
പ്രസിദ്ധീകരിക്കുന്നത്,വർഷങ്ങൾക്കിപ്പുറവും കാലാതിവർത്തിയായി അദ്ദേഹത്തിൻ്റെ മറ്റ് കൃതികളെ പോലെത്തന്നെ പുതിയ കാലത്തും വായനയെ ആഘോഷമാക്കാൻ ഈ നോവലിന് കഴിയുന്നു.

'തമ്മിൽ പിണങ്ങുവാൻ,
പിന്നെയുമിണങ്ങുവാൻ,
പാടുവാൻ,പഞ്ചാര കയ്പ്പ്
ഏറെയിഷ്‌ടമെന്നോതുവാൻ,
കരയുവാൻ,പൊരുതുവാൻ,
ചേരുവാൻ ചുണ്ടത്തിരുന്ന്
ചൂണ്ടിത്തന്ന നന്മയാണ്
അമ്മമലയാളം,ജന്മമലയാളം...✨

മാതൃഭാഷാ ദിനം