07/09/2026
நெல் கொள்முதல் நிலையங்களில் விவசாயிகள் அலைக்கழிப்பு! விவசாயிகளின் கண்ணீரைத் துடைக்க SDPI கட்சி வேண்டுகோள்!
இது குறித்து SDPI கட்சி மயிலாடுதுறை மாவட்டத் தலைவர் முஹம்மது ரஃபி அவர்கள் கூறுவதாவது...!
மயிலாடுதுறை மாவட்டத்தில் ஏறத்தாழ ஒரு லட்சத்து 70 ஆயிரம் ஏக்கர் பரப்பளவில் தங்களது வாழ்வாதாரத்தை பணயம் வைத்து, கடுமையாக உழைத்து நெல் விவசாயம் செய்து வருகின்றனர் விவசாயிகள். இந்நிலையில் விவசாயத்திற்காக விதை, உரம், பூச்சிக்கொல்லி மருந்து, கூலி உள்ளிட்ட பல்வேறு செலவுகளுக்கு தங்களது ஒட்டுமொத்த முதலீட்டையும் செலவழித்து, விளைவித்த நெல்லை விற்பனை செய்வதற்காக நெல் கொள்முதல் நிலையங்களை நாடுகின்றனர். ஆனால்,நெல் கொள்முதல் நிலையங்களில் விவசாயிகளின் நெல்லை உரிய நேரத்தில் கொள்முதல் செய்யாமல் இழுத்தடிப்பதாகவும், பல்வேறு காரணங்களைக் கூறி காலதாமதம் செய்வதாகவும் விவசாயிகள் வேதனை தெரிவிக்கின்றனர். மேலும், பல கொள்முதல் நிலையங்கள் காலதாமதமாக திறக்கப்படுவதால், விவசாயிகள் தங்களது நெல்லை கொள்முதல் நிலையங்களில் நாள் கணக்கில் குவியலாக வைத்துக் கொண்டு காத்திருக்கும் கால நிலையும், தற்போது பெய்து வரும் மழையால் விவசாயிகள் பெரும் பாதிப்பை சந்தித்து வருகின்றனர்.
கொள்முதல் நிலையங்களில் போதிய பாதுகாப்பு வசதிகள் இல்லாததால், திறந்தவெளியில் குவித்து வைக்கப்பட்டுள்ள நெல் மழையில் நனைந்து,நெல் மணிகள் ஈரப்பதம் அடைந்து, முளைத்துவிடும் நிலைக்கு செல்வதால், விவசாயிகள் தங்களது பல மாத கால உழைப்பையும் முதலீட்டையும் இழக்கும் அபாயம் ஏற்பட்டுள்ளது.
விவசாயிகள் தங்களது விளைபொருளை பாதுகாப்பாக வைத்திருக்க முடியாமல், ஒருபுறம் கொள்முதல் நிலையங்கள் திறக்கப்படுவதற்காகவும், மறுபுறம் மழையிலிருந்து நெல்லை பாதுகாப்பதற்காகவும் போராட வேண்டிய நிலை ஏற்பட்டுள்ளது. மழையில் நனைந்து நெல் முளைத்துவிட்டால், அதனை கொள்முதல் செய்ய மறுக்கும் நிலையும் ஏற்படலாம் என்பதால், விவசாயிகள் மிகுந்த அச்சத்திலும் வேதனையிலும் உள்ளனர்.
இதனிடையே, நெல் மூட்டைக்கு ரூ.25 முதல் ரூ.40 வரை லஞ்சம் கேட்பதாகவும் விவசாயிகள் வேதனையுடன் குற்றம்சாட்டுகின்றனர். ஏற்கனவே உற்பத்திச் செலவு அதிகரிப்பு உள்ளிட்ட பல்வேறு பொருளாதார நெருக்கடிகளுக்கு மத்தியில் சிக்கித் தவிக்கும் விவசாயிகளிடம், தங்களது உழைப்புக்கான நியாயமான தொகையைப் பெறுவதற்கே லஞ்சம் கேட்கப்படுவதாக கூறப்படுவது மிகவும் கவலைக்குரியதும் கண்டிக்கத்தக்கதுமாகும்.
விவசாயிகள் தங்களது ஒட்டுமொத்த மூலதனத்தையும் செலவழித்து உற்பத்தி செய்யும் நெல்லுக்கு உரிய விலை கிடைக்காததுடன், அதை விற்பனை செய்வதற்காகவும் நாட்கணக்கில் காத்திருக்க வேண்டிய நிலை ஏற்பட்டுள்ளது. இதுபோன்ற தொடர் நெருக்கடிகளுக்கு மத்தியில் விவசாயம் செய்து வரும் விவசாயிகளின் எதிர்காலமும், அவர்களின் வாழ்வாதாரமும் நாளுக்கு நாள் கேள்விக்குறியாகி வருகிறது.
எனவே, விவசாயிகளின் வேதனையை தமிழக அரசும், மயிலாடுதுறை மாவட்ட நிர்வாகமும் உடனடியாகக் கவனத்தில் கொண்டு மயிலாடுதுறை மாவட்டத்தில் செயல்பட வேண்டிய அனைத்து நெல் கொள்முதல் நிலையங்களையும் தாமதமின்றி திறந்து, விவசாயிகளிடமிருந்து நெல்லை உடனுக்குடன் கொள்முதல் செய்ய நடவடிக்கை எடுக்க வேண்டும்.
மேலும், நெல் கொள்முதல் நிலையங்களில் விவசாயிகளிடம் லஞ்சம் கேட்பதாக கூறப்படும் புகார்கள் குறித்து உரிய விசாரணை நடத்தி, லஞ்சம் பெறும் நடைமுறையை முற்றிலும் தடுத்து நிறுத்த வேண்டும். விவசாயிகள் எந்தவித அலைக்கழிப்பும், இடைத்தரகர் நெருக்கடியும், லஞ்சக் கொடுமையும் இல்லாமல் தங்களது நெல்லை விற்பனை செய்யும் வகையில் வெளிப்படையான கொள்முதல் நடைமுறையை உறுதி செய்ய வேண்டும்.
விவசாயிகளின் உழைப்பை மதித்து, அவர்களின் வாழ்வாதாரத்தை பாதுகாக்க தமிழக அரசும் மயிலாடுதுறை மாவட்ட நிர்வாகமும் இனியும் காலம் தாழ்த்தாமல் போர்க்கால அடிப்படையில் நடவடிக்கை எடுக்க வேண்டும் என SDPI கட்சி மயிலாடுதுறை மாவட்டம் சார்பாக வலியுறுத்திக் கேட்டுக்கொள்கிறோம்.
இவ்வாறு அவர் அந்த அறிக்கைகள் தெரிவித்துள்ளார்.
வெளியீடு :-
SDPI கட்சி
தகவல் தொழில்நுட்ப அணி IT WING
மயிலாடுதுறை மாவட்டம்
