https://www.youtube.com/channel/UC53PYVFeDtRG17jtPeg1mgA

Holy Graves - Mazar Mubarak, Mumbai (2026)

07/10/2026

Hazrat Khwaja Abu Sulaimān, Daawūd al-Taai rahmatullāhi alaihi :
♦♦♦♦♦♦♦♦♦♦♦♦♦♦♦ ♦♦♦♦♦♦♦♦♦

Aap ke waalid ka naam Nusair hai.

****************
Aap tabe taabi'i han.
Aap ne Imaame aazam Abu Haneefa rahmatullāhi alaihi ki sohbat me rehkar 20 saal tak ta’aleem haasil ki.
Aap ne Hazrat Khwaja Habeeb Raa'ee, Hazrat Khwaja Fuzail bin Ayaaz, aur Hazrat Khwaja Ibrāheem bin Ad'ham se bhi faiz haasil kiya.

****************
Ek baar Aap ne ek shakhs ko ek sher padhte hue suna. Jis ka mafhoom yeh tha “Kaun sa chehra hai jo jhukkar khaak par aata nahi? Kaun si aankhen hain jin me se aansoo nikal kar zameen par aate nahi?” Aap yeh sunkar bahot be-chain ho gaye. Aur Imaame aazam Abu Haneefa ki baargaah me aakar yeh baat sunaai aur arz kiya “Main ab dunya se ukta gaya hu aur ek anjaan shay qalb ko muztarib kiye hue hai.”
Aur phir Imaame aazam Abu Haneefa ke mashware par aap ne tanhai me mujaahida kiya. Kuchh din ba’ad Imaame aazam Abu Haneefa ne aap ko tanhaai chhodkar soofiya e kiraam ki sohbat me rehkar faiz haasil karne ke liye farmaaya.
Is ke ba’ad Hazrat Khwaja Habeeb al-Ajami rahmatullāhi alaihi ki khidmat me tashreef le gaye.

****************
Aap Uloom e haqaa'iq ke Shanaasa, Raahe Tareeqat ke aamil aur Saalikeen o Aarifeen ke Peshwa aur Muqtada the.
Aap hamesha saadgi pasand farmaate the.

Aap roz paani me roti bhigokar namak lagaakar khaate the.
Aur khaane ke dauraan Aap Qur'ān majeed ki 50 aayate tilaawat farmaate the.

Ek baar Aap ke khaadim ne achha lazeez khaana banaakar diya to Aap ne us se farmaaya “Yeh khaana falaan yateemo khila do. Kyun ki agar main use khaaunga to woh ba’ad me nikalkar kude me chala jaayega aur khatm (bekaar) ho jaayega. Magar wo yateem use khaayenge to woh mere liye aakhirat ki jama punji banega.”

Ek baar ek shakhs ne Aap ke yaha paani ka ghada dhoop me rakha hua dekh kar arz kiya ke “Is ko saaye me kyun nahi rakha?” Farmaaya “Jab maine ise yaha rakha us waqt saaya tha lekin ab dhoop me se uthaate hue nadaamat hoti hai ke mahaz apni raahat ke liye tasi'a auqaat karte hue Zikre Ilāhi se ghaafil rahu.’

Aap sirf namaaz ke liye ghar se baahar aate aur ba-jama’at namaaz ada karke foran apne ghar me waapas chale jaate.

Aap ke makaan ka ek hissa munhadim ho gaya (gir gaya) to Aap dusre hisse me muntaqil ho gaye aur jab woh bhi munhadim ho gaya to darwaaze me muntaqil ho gaye lekin us ki chhat bhi bahot bosida thi. Jab chhat ka kuchh hissa toot gaya aur logo ne chhat theek karaane ke liye kaha to farmaaya ke “Main ALLĀH ta’ala se yeh ahad kar chuka hu ke Dunya me ta’ameer ka kaam nahi karaaunga.” Aap ke wisaal ke ba’ad woh chhat bhi munhadim ho g*i.

****************
Ek baar Hazrat Abu Rabi'a ne kuchh naseehat ke liye kaha to Aap ne farmaaya :
(1) Duniya se parhez karna ALLĀH ta’ala se qareeb karta hai. Tarq e Duniya se banda Khuda tak rasaai haasil kar leta hai.

(2) Deen ko dunya par tarjeeh do aur apne dil ko dunyadaar logo ke khayaalo se paak rakho. Dunya me jo kuchh halaal mile agarche thoda hi ho us se khush raho agar deen ki hifaazat hoti ho.

(3) Fahash-kalaami aur bad-zabaani se bacho aur logo se alaahida raho.

(4) Dunya me roza rakhoge to aakhirat me Iftaar milega.

(5) Murde tumhara intazaar kar rahe hain (ya’ani ek roz tumhe bhi marna hai), is liye waha ki tayyaari karo.

****************
Ek baar Khalifa Hāroon Rasheed Imaam Abu Yousuf ke saath Aap ki mulaaqaat ke liye aaya. Aap ne milne se inkaar kiya aur farmaaya ke “Main dunyadaar aur zaalim logo se milna pasand nahi karta.” Aap ki waalida ki guzaarish par Aap ne khalifa ko andar aane ki ijaazat di magar shart rakhi ke woh chand lamhe rookkar waapas chala jaayega. Khalifa ne jaate waqt Aap ko chand sone ki ashrafiya bataure hadiya dena chaahi magar aap ne use lene se inkaar kiya aur farmaaya “Maine apna ghar bech diya hai aur us ke badle me jo halaal raqam mili hai usi me se kharch karta hu aur maine ALLĀH ta’ala se dua ki hai ki jab yeh raqam khatm ho jaaye tab mujhe dunya se utha lena.”
Ba’ad me Imaam Abu Yousuf ko Hazrat ke shaagird se pata chala ke “Ab us raqam me se sirf 10 dirham se kam bache hain.” Yeh sunkar unho ne kaha ke “Ab chand din me hi Hazrat duniya se inteqaal farmaane waale hain.” Aur us ke chand din ba’ad Aap ka wisaal hua.

****************
Wisaal ke agle din ek buzurg ne Aap ko tez dhoop me tilaawat e Qur’an karte dekha to aap ko saaye me aa jaane ke liye kaha. Aap ne farmaaya “Main apne nafs ki mukhaalifat karke us ko aur kamzor karna chaahta hu.”

Wisaal se pehle Aap ne puri raat ibaadat e Ilāhi me guzaari aur aakhir me haalat e sajda me Aap ka wisaal hua.

Inteqaal ke waqt ghaib se nida aai ke “Daawūd Tai apni muraad ko pahunch gaya aur ALLĀH ta’ala us se raazi hai.”

Aap ke wisaal se waqt ek nek shakhs ne khwaab me dekha ke Aap bhaag rahe hain. Us ne aap se puchha “Aap kyun bhaag rahe hain?” Aap ne farmaaya “Maine qaid se aazaad hua hu.” Subah ko use pata chala ke raat ko Hazrat ka inteqaal hua hai.

****************
Aap Hazrat Khwaja Habeeb al-Ajami rahmatullāhi alaihi ke mureed aur khalifa hain.

Aap ke khalifa Hazrat Khwaja Ma’aroof al-Karkhi rahmatullāhi alaihi hain.

****************
Aap ka wisaal 27 Rabi-uṡ-ṡaani 165 Hijri (783 A.D.) ko hua.

****************
Aap ka mazaar Kufa (Iraq) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Daawūd al-Taai rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko duniya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

07/10/2026

Hazrat Sayyed Shaah Aulaade Rasool Barkaati Marehrawi rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

Aap ki wilaadat 15 Sha’abaan 1212 Hijri (February 1798 A.D.) me Marehra me hui.

Aap ke waalid ka naam Hazrat Sayyed Shaah Aale Barkaat urfe Suthre miyan bin Shaah Hamza Barkaati rahmatullāhi alaihi aur waalida ka naam Fazle Faatima binte Qaazi Sayyed Shaah Ghulaam Husain Baadawi hai.

Aap Husaini saadaat hai.
Aur Hazrat Sayyed Zaid bin Imaam Zain-ul-Aabideen radiy-Allāhu anhu ki nasl se hain.

***************
Aap ne apne waalid se ta’aleem haasil ki.

Aur apne waalid aur chacha se Ilm e Tibb (Medicine) ki ta’aleem haasil ki.

***************
Aap ka nikaah Qudrat Faatima binte Sayyed Sa’adat Ali Bilgrami se hua.

Aap ke 4 saahabzaade aur 4 saahabzaadiya hain.

Saahabzaade :
(1) Shaah Muhammad Saadiq,
(2) Shaah Muhammad Ja’afar,
(3) Shaah Muhammad Baaqar,
(4) Shaah Muhammad Askari.

Saahabzaadiya :
(1) Aulaad Faatima,
(2) Ghanimat Faatima,
(3) Muhib Faatima,
(4) Khaatoon Faatima.

***************
Hazrat Sayyed Shaah Aale Barkaat Suthre Miya ke wisaal ke baad Aap apne bhai Hazrat Aale Rasool Ahmadi aur Hazrat Ghulaam Mohiy-ud-deen Ameer-e-Aalam ke saath Khaanqaah-e-Barkaatiya ke sajjaada nasheen bane.

***************
Tonk ke Nawaab Aap ke mureed aur moataqid the. Aap akṡar waqt Tonk me guzaarte the.

***************
Aap (apne chacha) Hazrat Shaah Aale Ahmad urfe Achhe miyan Barkaati rahmatullāhi alaihi ke mureed aur khalifa hain.
Aap ko (aap ke waalid) Hazrat Sayyed Shaah Aale Barkaat urfe Suthre miyan Barkaati rahmatullāhi alaihi ne bhi ‘Qaadri Barkaati’ silsila ki Khilaafat ata farmai hai.

***********
Aap ka wisaal 26 Rabi-uṡ-Ṡaani 1268 Hijri (18 February 1852 A.D.) ko hua.

Aap ka mazaar Marehra (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Aulaade Rasool Barkaati Marehrawi rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farme.
Aameen.

07/10/2026

Hazrat Sayyed Shaah Dost Muhammad Abul Ulai Burhanpuri rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦

Aap silsila e Aaliya Naqshbandi ke buzurg aur sahib-e-wilayat the.
Aap ka shumaar Deccan aur Burhanpur ke un mashhoor mashaaikh me hota hai. jinhon ne zikr-e-khafi, shariat-pasandi aur tasawwuf ki roshni aam ki.

Aap ne apne shaikh Hazrat Khwaja Sayyed Ameer Abul Ula Naqshbandi rahmatullāhi alaihi ki sohbat me zikr-e-Naqshbandiya, mujahida-e-nafs
aur paabandi-e-shariat ka kamal haasil kiya.

****************
Aap apne daur me zuhd, taqwa, khamoshi aur istiqamat ke liye mashhoor the.
Aap kam guftagu aur zyada zikr pasand farmaate the.

Aap ka irshaad hai:
“banda jitna Allah ke qareeb hota hai
utna hi khalq ke liye narm aur rehmat wala hota hai.”

****************
Aap ne apni zindagi ka aksar hissa ibaadat, muraqaba, zikr-e-khafi aur mureedon ki islah me guzaara.

Aap ke paas jo bhi aata use pehle shariat par mazbooti se chalne ki talqeen farmaate aur phir tareeqat ke asraar batate.

Aap ki majlis me baithne se dil par sakoon aur khauf-e-Khuda taari ho jaata tha.

Bahut se log sirf dekh kar hi duniya se be-raghbat aur Allah ki taraf mail ho jaate the.

****************
Aap Hazrat Khwaja Sayyed Ameer Abul Ula Naqshbandi rahmatullāhi alaihi ke mureed aur khalifa hain.

Aap ke khalifa Hazrat Shaah Farhaad (Bagichi Peerji, Delhi) rahmatullāhi alaihi hain.

****************
Aap ka wisaal 26 Rabi uṡ Ṡaani 1090 Hijri (June 1679 A.D.) ko hua.

Aap ka mazaar Aurangabad (Maharashtra) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaah Dost Muhammad Abul Ulai rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

06/10/2026

Hazrat Meeran Rukn-ud-deen Misri rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦

Aap Misr se Hindustan tashreef laaye aur Phaphunda (Zila Meerut) me sukoonat pazeer heu.

****************
Aapki masjid ki ta’ameer ka kaam chal raha tha tab koi mazdoor ya koi aadmi aakar paise maangta to Aap apne musalle ke neeche se nikal kar use paise de dete. Ek martaba mazdooro ne socha ke jab raat me Hazrat aaraam kar rahe ho tab hum unke musalle ki jagah ko khod kar sara maal nikal lenge. Raat hone par wo Aapke musalle par gaye aur Musalle ko hatakar zameen khodna shuru kiya. Lekin bahut zyada khodne par bhi kuchh na mila to phir se usko sahi kiya aur musalla bichha kar chale gaye. Agle roz jab wo mazdoor Aapki baargaah me kaam karne ke liye aaye. Kaam khatm hone par Aapne unhe dugni mazdoori di. Mazdooro ne arz kiya “Huzoor! Rozaana Aap ek din ki mazdoori dete hain. Aaj Aapne dugni mazdoori kyun di?” Aap ne farmaya “Ek mazdoori tumahre aaj ke kaam ki hai aur ek mazdoori raat me tum ne hamare musalle ki jagah par zameen khodne ka aur phir usko sahi karne ka jo kaam kiya hai uski hai.” Yeh sunkar mazdoor khaamosh reh gaye kyun ki un mazdooro ke ilaawa kisi ko is baat ka pata na tha.

****************
Aap ka urs 24 Rabi-uṡ-Ṡaani ko manaaya jaata hai.

****************
Aap ka mazaar Ruknuddinpur Misri Urf Phaphun (Zila Meerut, Uttar Pradesh) me hai.

****************
Wisaal ke baad Aap ne 22 saal tak apne mazaar se baahar tashreef laakar Janaab Laala Gaddi naami khaadim ke saath Tahajjud ki namaaz padhi. Ek martaba Laala saahab ne ek shakhs se is baat ka zikr kar diya. Usi roz se Hazrat mazaar se tashreef nahi laaye aur 3 roz ke baad Laala saahab ka bhi inteqaal ho gaya.

****************
Is ilaaqe me Aap ki hayaate zaahiri me aur wisaal ke baad bhi koi khinjir nahi paalta. Agar koi koshish karta to wo barbaad ho jaata.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Meeran Rukn-ud-deen Misri rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

06/10/2026

Hazrat Shaikh Abu Saeed Majd-ud-deen Ahmad Baghdadi rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦

Alqaab :
‾‾‾‾‾‾‾‾‾‾‾
Shaikh-ul-Asfiya, Mujaahid-e-Kabeer.

****************
Aap ki wilaadat 544 Hijri (1149 A.D.) me Baghdad me hui.

Aap ke waalid ka naam Umar hai.

Aap ke Waalid aur Waalida dono maahir Tabeeb the.
Ek martaba jab Shaahe Khwarzam ne Khalifa e Baghdaad se apne liye koi tabeeb maanga to unho ne Aap ke waalid ko bhej diya.

****************
Aap ne apne waalid se ibtedaai ta’aleem haasil ki.
Phir Baghdaad ke ulama se majeed ta’aleem haasil ki.

****************
Phir Aap Hazrat Shaikh Najm-ud-deen Ahmad Kubra rahmatullāhi alaihi ki khidmat me rehkar ta’aleem haasil karne lage. Hazrat ne Aap ko wuzu ka paani bharne ki khidmat par zimmedaari ata ki.
Aap ki waalida ko pata chala to unho ne ko paighaam bheja ke ‘Mera farzand naazuk hai. Yeh kaam us se mushkil hoga. Agar Aap ki ijaazat ho to me 10 gulaam Turki bhej deti hu ke wo paani ki khidmat karenge. Aap mere farzand ko kisi dusri khidmat par muqarrar farma len.’
Hazrat ne farmaaya ke ‘Un se jaa kar kaho ke ye to ajeeb baat he. Tum to Ilm e Tibb jaanti ho. Tumhe ma’aloom hona chaahiye ke agar tumhara Beta beemaar ho aur us ki dawa Turki Gulaam ko du to tumhara beta kaise tandurust hoga? Hum uski Roohaani tarbiyat kar rahe hain. Us ki nazaakat khatm kar ke use Mujaahid banaana hain.’

****************
Ek martaba Aap Baghdaad se Shaam ki taraf jaa rahe the aur waha se Rum jaane ka iraada tha. Jab Mosul tak pahunche to raat Jaame masjid me guzaari.
Jab raat ko soye to khwaab me dekha ke koi shakhs keh raha hai ke ‘Waha kyun nahi jaate ho jaha faa'ida haasil ho.’ Aap ne dekha to ek jama’at halqa laga kar baithi hui hai aur un ke darmiyaan ek Hazrat baithe hue hain jin ka Noor un ke sar mubarak se aasmaan tak pahuncha hua hai. Wo naseehat kar rahe hain aur sab sun rahe hain.
Aap ne logo se un Hazrat ke baare me puchha to pata chala ke woh ALLĀH ke Habeeb Sarware kaa'inaat Mohammad Mustafa sallallāhu alaihi wa sallam hain. Aap aage badhe aur Salaam arz kiya. Huzoor sallallāhu alaihi wa sallam ne salaam ka jawaab diya aur Aap ko halqe me jagah di.
Aap ne Huzoor sallallāhu alaihi wa sallam se Bu Ali Sina aur us ke shaagird Shahaab-ud-deen Maqtool ke baare me puchha to farmaaya ke ‘Ye aise log hain jo ilm ke ba-wajood gumraah ho gaye.’
Phir Aap ne Imaam Muhammad al-Ghazaali, Imaam-ul-Haramain, aur Imaam Abul Hasan Ash'ari ke muta’alliq puchha to Huzoor sallallāhu alaihi wa sallam ne irshaad farmaaya ‘Ye aise log hain jinho ne mere Deen ki himaayat ki hai.’
Us ke baad nazdik baithe hue ek shakhs ne kaha ke ‘Ye sawaalaat karne ke bajaay Dua ke liye darkhwaast karo jis se tumhara faaida ho.’ Aap ne arz kiya ‘Ya Rasool-Allāh sallallāhu alaihi wa sallam! Mujhe koi Dua sikhaaiye.’ Farmaaya ke ‘Aye Parwar-digaar! Meri taraf nazre rahmat farma yaha tak ke main Tauba karu aur mujh ko bacha le yaha tak ke phir Gunaah na karu, mujhe Ibaadat se mohabbat aur gunaaho se karaahat ata farma.’
Phir Huzoor sallallāhu alaihi wa sallam ne puchha ke ‘Kaha jaa rahe ho?’ Aap ne arz kiya ‘Rum ki taraf.’ Farmaaya ke ‘Rum me maasoom daakhil nahi hota.’

****************
Aap ne ‘Tohfatul barara fee ajwaabat al-Masa'il al-Ashara’ naami risaala likha hai.

****************
Aap Hazrat Shaikh Najm-ud-deen Ahmad al- Kubra rahmatullāhi alaihi ke mureed aur khalifa hain.

Aap ke khulfa :
(1) Hazrat Khwaja Sayyed Fareed-ud-deen Mohammad Attaar rahmatullāhi alaihi,
(2) Hazrat Shaikh Ahmad al-Rudbari rahmatullāhi alaihi.

****************
Aap ka wisaal 23 Rabi uṡ Ṡaani 617 Hijri (June 1220 A.D.) ko hua.

Aap ka mazaar Urgench, Khwarazm (Turkmenistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Majd-ud-deen Ahmad Baghdadi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

04/10/2026

Hazrat Dr. Muhammad Mas'ood Ahmad rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦

Alqaab :
‾‾‾‾‾‾‾‾
Mas'ood-e-Millat, Maahir-e-Razawiyaat.

****************
Aap ki wilaadat 1349 Hijri (1930 A.D.) me Delhi me hui.

****************
Aap ke waalid ka naam Hazrat Mufti Shaah Muhammad Mazharullāh hai.

Aap ke waalid Fatehpuri Masjid, Delhi ke Khateeb aur Mufti e aazam the.

****************
Aap ne apne waalid Hazrat Mufti Shaah Muhammad Mazharullāh se ta’aleem haasil ki.
Phir Madarsa Aalia, Delhi me Arabi aur Faarsi ki aur Oriental College, Delhi me ta’aleem haasil ki.

Taqseem-e-Mulk ke baad 1367 Hijri (1948 A.D.) me tashreef le gaye. Aur Punjab University (Lahore) se 1370 Hijri (1951 A.D.) me Matric aur 1375 Hijri (1956 A.D.) me B.A. aur Sindh University, Jamshoro (Hyderabad) se 1377 Hijri (1958 A.D.) me M.A. kiya. Aap M.A. aur M.Ed. ke har imtihaan me awwal aaye aur Silver aur Gold medal haasil kiye.
Phir Sindh University, Jamshoro (Hyderabad) me Professior Dr. Ghulaam Mustafa Khan ki nigraani me ‘Urdu me Qur'āni Taraajim aur Tafasir’ ke mauzu par Ph.D. kiya.

****************
Aap Karachi University aur Khairpur University (Khairpur Mirs, Sindh) me Ph.D. ke talba ke nigraan [guide] aur Naazim [Director] rahe.
Government Degree College aur Post-Graduate Studies Center, Sukkur (Sindh) me Sadr [Principal] rehne ke baad 1413 Hijri (1992 A.D.) me faarigh hue.

Aap ke shaagirdo me Professor Dr. Majeedullāh Qaadri [Karachi University (Pakistan)], Dr. Usha Sanyal [Columbia University (U.S.A.)], Dr. Babra Midcaf [Berkeley University (U.S.A.)], Professor Ghayaaṡ-ud-deen [Birmingham University (U.K.)], aur Dr. J.M.S. Baljon [Liedin University (Holland)] shaamil hain.

****************
Aap ne Idaara Mas'oodiya ki ta’ameer ki. Yeh idaara Arabi, Faarsi, Urdu, Sindhi, Pushto, Hindi, Gujarati, Bengali, Angrezi, French, Dutch, English wag*irah zabaan me kitaaben, tahqeeai maqaalaat aur tarjuma shaaye karke khidmate deen ka kaam anjaam deta hai.

****************
Tasannif :
‾‾‾‾‾‾‾‾‾‾‾‾

Aap ne A’ala Hazrat Imaam Ahmad Raza Khan Bareilwi rahmatullāhi alaihi ki shaan me taqreeban 30 kitaaben aur 120 Risaale likhe hain :
(1) Faazil-e-Bareilwi aur Tark-e-Mawaalaat (Lahore , 1971)
(2) Faazil-e-Bareilwi Ulama-e-Hijaz ki nazar me (Lahore, 1973 )
(3) Neglected Genius of the East (Karachi, Lahore, South Africa, 1978)
(4) Hayaat-e-Maulana Imaam Ahmad Raza Khan Bareilwi (Sialkot, 1981)
(5) The Reformer of the Muslim World (English translation) (Tamil Nadu, India, 1995)
(6) Hayaat-e-Imaam Ahl-e-Sunnat (Lahore, Karachi,1981)
(7) Ikraam-e-Imaam Ahmad Raza (Lahore, 1981)
(8) Daa'ira Ma’arif-e-Imaam Ahmad Raza (Karachi, 1982)
(9) Imaam Ahmad Raza aur Aalam-i-Islaam (Karachi, 1983)
(10) Rahbar-o-Rahnuma (Lahore, Karachi, 1986)
(11) The Saviniar guide and Guidance (English translation) (Durban, 1969)
(12) Tanqidaat-o-Ta'aqubaat Imaam Ahmad Raza (Lahore, 1988)
(13) Aa'ina-e-Razwiyat (3 hisse) (Karachi, 1989, 1993, 1996)
(14) Imaam Ahmad Raza aur Aalam-e-Jami'at (Sadiqabad, 1990)
(15) Imaam Ahmad Raza aur Uloom-e-Jadeeda-o-Qadeema (Lahore, 1990)
(16) Muhaddeeṡ-e-Bareilwi (Karachi, Lahore,1993)
(17) Intikhaab-e-Hadaa'iq-e-Bakhshish (Karachi, 1995)
(18) Khulfa-e-Aala Hazrat (Lahore, 1996).

Hazrat Mujaddid Alf-e-Ṡaani Imaam Ahmad Sirhindi rahmatullāhi alaihi ki shaan me :
(1) Seerat-e-Mujaddid e Alf-e-Ṡaani
(2) Hazrat Mujaddid e Alf-i-Ṡaani Haalat-o-Afkar-o-Khidmat
(3) Mujaddid e Haazara-e-Doam
(4) Influence of Shaikh Mujaddid e Alf-e-Ṡaani on Dr. Muhammad Iqbal

Hazrat Mufti Shaah Muhammad Mazharullāh Dehlawi rahmatullāhi alaihi ki shaan me :
(1) Hayaat-e-Mazhari
(2) Mawaa'iz-e-Mazhari
(3) Fataawa-e-Mazhari
(4) Makaateeb-e-Mazhari.

Aap ki likhi hui deegar mash'hoor kitaaben :
(1) Zia-ul-Islaam
(2) Rooh-e-Islaam
(3) Muraad-e-Rasool
(4) Taqleed
(5) Mauj-e-Khayaal
(6) Parwaaz-e-Khayaal
(7) Rawadaari
(8) Mohabbat ki Nishaani
(9) Adab o Be-adabi
(10) Ta’zeem-e-Kitaabullāh
(11) Hajj o Umrah
(12) Aakhri Paighaam
(13) Jashn-e-Bahaaran
(14) Jaan-e-Eimaan
(15) Jaan-e-Jaan
(16) Qayaamat
(17) Aurat aur Parda
(18) Siraat-e-Mustaqeem
(19) Eid of Eids
(20) The Supreme Festival
(21) Hazrat Shaah Muhammad Ghauṡ Gawaliori
(22) Maktubaat-e-Qaazi Ahmad
(23) Ujala
(24) Tahreek-e- Aazadi-ei-Hind Aur Al-Sawaad-ul-Aazam
(25) Tasawwur-e-Pakistan.

****************
1412 Hijri (1991 A.D.) me Imaam Ahmad Raza Research Institute, Karachi ne aur 1413 Hijri (1992 A.D.) me Pakistan Intellectual Forum ne Aizaaz [award] diya aur 1413 Hijri (1992 A.D.) me Pakistani hukoomat ne ‘Aizaaz-e-Fazeelat’ diya.

****************
Aap (apne waalid) Hazrat Mufti Shaah Muhammad Mazharullāh Dehlawi rahmatullāhi alaihi ke mureed aur khalifa hain.
Hazrat Muhammad Mahmood Naqshbandi Alwari rahmatullāhi alaihi (Hyderabad / Pakistan) aur Hazrat Sayyed Zain-ul-Aabideen Shah Qaadri rahmatullāhi alaihi (Nurai Shareef, Sindh / Pakistan) ne bhi Aap ko khilaafat ata farmai hai.

****************
Aap ka wisaal 22 Rabi-uṡ-Ṡaani ko hua.

Aap ka mazaar Karachi (Pakistan) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Dr. Muhammad Mas'ood Ahmad rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

04/10/2026

Hazrat Sayyed Shaah Abdur Razzaaq Qaadri rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦

Aap ki wilaadat Baghdad (Iraq) me hui.

****************
Aap ke waalid ka naam Sayyed Sharf-ud-deen bin Ahmad hai.

Aap Hasani saadaat hain
Aur Hazrat Ghauṡ-ul-aazam Shaikh Sayyed Muhiy-ud-deen Abdul Qaadir Jilani rahmatullāhi alaihi ki nasl se hain.

****************
Aap Sultaan Muhammad Aadil Shaah ke zamaane me Bijapur tashreef laaye.

Ek martaba Aap Hazrat Sayyed Haashim Peer Dastageer rahmatullāhi alaihi ke saath baithe the. Sultaan Muhammad Aadil Shaah Haashim Peer Dastageer se milne ke liye waha aaya. Kuchh der ba’ad Haashim Peer Dastageer ne Aap ke pichhe ki deewaar par ek nazar daali to deewaar me ek khidki ban g*i. Baadshaah us jagah se andar daakhil hua to us ne dekha dusri taraf ek anjaan magar khubsurat shaher hai. Baadshaah shaher ka khubsurat bagicha aur naher wag*irah dekhte dekhte ek aalishaan mahel ke paas pahuncha. Woh mahel ke andar daakhil hua to us ne zumrud ke do dher dekhe. Us ne apni mutthi me zumrud lena chaha to chokidaar ne use roka aur kaha “Is ke maalik ki ijaazat ke baghair hum ise uthane nahi de sakte.” Usne puchha to chokidaar ne bataya ke “Is ke maalik Hazrat Sayyed Abdur Razzaaq Qaadri hain aur Jinnat ke baadshaah ne yeh sab unko bator tohfa diya hai.” Baadshaah palatkar waapas aaya aur deewaar ke is taraf aaya. Dekha to mahel aur shaher sab gaayab ho gaya tha aur Sayyed Abdur Razzaaq Qaadri Sayyed Haashim Peer Dastageer ke saath baithe hue hain. Us ne muafi maangi aur aap ka moataqid ho gaya.

****************
Aap ke khulfa :

(1) Hazrat Sayyed Abdul Qaadir Shaah Qaadri rahmatullāhi alaihi
(2) Hazrat Shaah Muraad Qaadri rahmatullāhi alaihi
(3) Hazrat Khan Muhammad bin Dilawar Khan rahmatullāhi alaihi
(4) Hazrat Muzaffar-ud-deen Khawas Khan Qaadri rahmatullāhi alaihi
(5) Hazrat Shaikh Ibrāheem Baghdadi rahmatullāhi alaihi.

****************
Aap ka wisaal 22 Rabi-uṡ-ṡaani 1051 Hijri (1641 AD) ko hua.

****************
Aap ka mazaar Bijapur (Karnataka) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Shaah Abdur Razzaaq Qaadri rahmatullāhi alaihi aur tamaam Auliya Allāh aur Ahle bait ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko ikhlaas ke saath nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

04/10/2026

Hazrat Shaikh Abu Abdullāh Mohiy-ud-deen Muhammad ibn Ali ibn Arabi rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦

Laqab :
‾‾‾‾‾‾‾‾
Shaikh-ul-Akbar.

****************
Aap ki wilaadat 17 Ramazaan 560 Hijri (25 July 1165 A.D.) ko Itwaar raat ko Murcia (Spain) me hui.

Aap ke waalid ka naam Shaikh Ali ibn Muhammad hai.
Aap Arab ke Banu Taai qabeele se ta’alluq rakhte hain.

****************
Shaikh Ali ibn Arabi ke yaha ek bacha paida hua magar woh khansa (eu**ch) tha. Kisi ne mashwara diya ke Hazrat Ghauṡe aazam Abdul Qaadir Jilani ki baargaah me jaao aur dua ke liye kaho. Shaikh Ali ibn Arabi Ghauṡe aazam ki baargaah me aaye aur dua ke liye darkhaast ki. Unho ne farmaaya “Tumhari qismat me ab beta nahi hai.” Shaikh Ali ibn Arabi ne kaha “To phir main Aap ki baargaah me kyun aata” Unho ne farmaaya “Theek hai. Main apne naseeb ka beta tumhe ata farmaata hu.”
Is tarah Ghauṡe aazam ki dua se Aap ki wilaaadat hui aur ‘Muhiy-ud-deen’ ke laqab se mash'hoor hue.

****************
578 Hijri me Aap ne Seville (Spain) me ibtidaai ta’aleem haasil ki. Aap ne bahot saare ulama se ta’aleem haasil ki. Phir waha Asfiya aur buzurgaane deen se faiz haasil karte rahe.
595 Hijri (1198 A.D.) me Aap waha se rawaana hue.
597 Hijri (1200 A.D.) tak Sale (Morocco) me thehre aur phir Hazrat Yousuf bin Yukhlaf al-Kumi se ijaazat lekar waha se rawaana hua.
598 Hijri (1202 A.D.) me Aap ne Hajj e baitullāh kiya.

Is ke baad Aap ne Makka me 3 saal guzaare.
Aur is dauraan Aap ne apni kitaab ‘Futooḥaat-ul-Makkiya’ likhna shuru kiya.
Is ke baad Aap ne Shaam (Syria), Falistin (Palestine), Iraq, Misr (Egypt) aur Anatolia (Turkey) ka safar kiya.
600 Hijri me Madeena me Aap ki mulaaqaat Shaikh Majd-ud-deen Is'hāq ibn Yousuf se hui aur is ke baad 601 Hijri me Baghdad me un se phir se mulaaqaat hui.
Baghdad me Aap 12 din thehre aur Hazrat Shaikh Abdul Qaadir Jeelaani radiy-Allāhu ta’ala anhu ke mureedo se mulaaqaat ki aur Hazrat Shaikh Mohammad Younus Qaadri rahmatullāhi alaihi se ta’aleem haasil ki aur khirqa e khilaafat haasil kiya.
Is ke baad Mosul gaye aur apne dost Hazrat Ali ibn Abdullāh ibn Jaami rahmatullāhi alaihi ke ghar par thehre aur maahe Ramazaan wahi guzaara aur un se ta’aleem haasil ki aur khirqa e khilaafat haasil kiya.
602 Hijri me Aap ne Jerusalem, Makka aur Misr (Egypt) ka safar kiya.
Aur Halab (Aleppo) aur Damishq (Damascus) bhi gaye.
604 (1207 A.D.) Hijri me Aap Makka waapas aaye aur Abu Shuja Zaeer bin Rustam ke ghar par qayaam karke majeed taaleem haasil ki aur kitaaben likhna jaari rakha. 4 saal waha rookne ke baad phir se dusre mulko ki safar karte rahe.
608 Hijri (1211 A.D.) me Aap Baghdad aaye tab Aap ki mulaaqaat Hazrat Shahaab-ud-deen Umar Suharwardi se hui. Jab Aap waha se rawaana hue to logo ne Hazrat se Aap ke baare me daryaaft kiya to Hazrat ne farmaaya “Wo Haqaaiq ke aise samandar he jin ki koi intiha nahi.”

620 Hijri (1223 A.D.) me Aap Damishq waapas aaye aur yahi par qayaam farmakar ta’aleem e deen ka kaam jaari rakha.

Aap ne Hazrat Hasan ibn Huzail, Muhammad ibn Khalaf al-Lakhmi, Ibn Zarqun, Abul Waleed al-Hadrami, al-Silafi, Abdul Haq al-Ishbili, Ibne Asaakir, Ibne Jawzi, aur Ibne Bushkuwal se Hadeeṡ ki ta’aleem haasil ki.

Aap ne Hazrat Abu Madyan Shuaib ibn Husain al-Maghribi, Jamaal-ud-deen Younus ibn Yahyā al-Qassar, Abu Abdullāh al-Tameemi al-Fasi aur Abul Hasan ibn Jaami se Tasawwuf ki ta’aleem haasil ki.

Aap Ilm e Nahaw, Tafseer, Hadeeṡ, Fiq'h, Kalaam, Falsafa aur Tasawwuf ke maahir hue.

****************
Aap 7wi sadi ke Mujaddid e Islaam hain.
Jab log sunnat e rasool ko bhul rahe the aur shariat se door ho rahe the tab Aap ne logo ko Islaam ki sahi ta’aleem dekar islaam ke qareeb kiya.
Aap ke faiz se bahot saare logo ko hidaayat haasil hui.

****************
Aap ne taqreeban 350 kitaaben likhi hain.

Aap ki mash'hoor kitaaben :

(1) Fusoos-ul-Hikam
(2) Futoohaat-ul-Makkiya
(3) Tanazzulaat-ul-Mawsiliyya
(4) Al-Jalaal wal-Jamaal
(5) At-Tadbidraat al-ilahiyyah fi islah al-mamlakaat al-insaniyyah
(6) Mashaahid al-Asraar
(7) Fanaa fil-Mushaahada
(8) Mishkaat-ul-Anwaar
(9) Risaalat-ul-Anwaar
(10) Hilyat-ul-Abdaal
(11) Mahaziraat-ul-Abraar
(12) Rooh-ul-quds
(13) Mawaaiq-ul-Nujum
(14) Ayyāaam al-Sha'n
(15) Unqaa Mughrib
(16) Ittihaad-ul-Kawni
(17) Tanazul-ul-Imlaak
(18) Jaami-ul-Ahkaam
(19) Kitaab-ul-Aqaa'id
(20) Al-Aqd-ul-Manzoom
(22) Insha-ul-dawaair
(23) Uqlat-ul-mustawfiz
(24) Risaalat-ul-Khalwa
(25) Risaalat-ul-Wasaya
(26) Kitaab-ul-Abadilaāh
(27) Al-Durrat-ul-Fakhirah
(28) Awraad (Devotional Prayers)
(29) Al-Dawr al-A’ala
(30) Kunh maa laa Budda lil-Mureed Minhu
(31) Diwaan e Ibn Arabi (Arabi Qaseeda ka majmua)
(32) Tarjumaan-ul-Ashwaaq (Arabi Qaseeda ka majmua)

*************
Aqwaal :
‾‾‾‾‾‾‾‾‾‾‾
Aap irshaad farmaate hain ki
(1) Jaahil apni jahaalat ko nahi jaan sakta kyun ki woh us ke andhere me hota hai aur Ilm waala apne ilm ko nahi jaan sakta kyun ki woh us ki roshni me hota hai.

(2) ALLĀH ki wahadaaniyat ka ṡaboot maangne waale se ek gadhe ka ilm zyada hota hai.

****************
Karaamat :
‾‾‾‾‾‾‾‾‾‾‾‾
Aap ki majlis me ek shakhs aaya karta tha jo Falsafiyo ke mazhab par tha aur Karaamate Aulia aur Mo’ajizaate Ambiya ka bhi munkir tha.
Ittefaaq se woh sardi ka mausam tha aur aag jalaai jaati thi.

Ek martaba us Falsafi ne kaha ke “Log kehte he ke Hazrat Ibrāheem alaihis salaam ko aag me daala gaya aur woh na jale. Lekin h Muhaal hai kyun ki aag ka kaam jalne ke qaabil cheezo ko jalaana hi. Pas us ne us Aayate paak ki taawil karte hue kaha ke wo aag jis ka zikr Qur’an me hai us se muraad Namrud ka Ghussa hai aur Hazrat Ibrāheem alaihis salaam ko aag me daalne ka matlab yeh hai ke Aap ko Namrud ke saamne laaya gaya aur woh aap par ghazabnaak hua lekin Aap dalaa'il aur baraahin ke zariye us par ghaalib aa gaye.”
Hazrat Shaikh Ibn Arabi ne us se farmaaya “Yeh jo Haq ta’ala ne Qur’an me farmaaya hai ke Hazrat Ibrāheem alaihis salaam par aag thandi ho g*i aur Aap sahi salaamat baahar aa gaye, kya is cheez ka tumhe Mushaahida kara du? Lekin is se meri garz izhaare Karaamat nahi balke Mo’ajiza e Ambiya ke inkaar ko dafa karna hai.” Falsafi ne kaha ke “Yeh na mumkin hai.”
Aap ne farmaaya ke “Yeh Aag jo is angithi me jal rahi hai kya wahi aag nahi jo tumhare qaul ke mutaabiq jalaane waali hai?” Us ne kaha ‘Wohi hai.” Aap ne angithi uthaai aur aag us ke daaman me daal di. Aag kaafi der us ke daaman me padi rahi aur woh apne haath se angaaro ko idhar udhar karta raha lekin kapda na jala.
Us ke baad Aap ne Aag ko waapas angithi me daal diya aur Falsafi se kaha “Ab ise haath lagaao.” Us ne jaise hi haath badhaaya foran jal gaya. Aap ne farmaaya “Ab to ṡaabit ho gaya ke jalaana na jalaana ALLĀH ke hukm se hai.” Yeh dekh kar Falsafi foran eimaan le aaya.

****************
Ek ba Aap 500 deenaar lekar hajj ke liye zaroori saamaan khareedne ke liye bazaar ki taraf jaa rahe the. Ek aurat ne aap ko rokar kaha “ALLĀH tum par raham farmae. Main sayyedzaadi hu. Meri bachiyo ke tan dhaankne ke liye kapde nahi hai aur aaj chotha din hai hum ne kuchh khaaya nahi hai.” Aap ne foran wo 500 deenaar us sayyedzaadi ko de diye aur kaha “Aap apne ghar jaaiye aur is se apni zaroorat puri kijiye.” Aap ne ghar waapas aakar ALLĀH ka shukr ada kiya aur is saal Hajj karne ka mauqoof rakha.
Jab log hajj karke waapas aaye to Aap unhe Mubarak baad dene ke liye unse milne gaye to logo ne kaha ke “Aap ko hajj Mubarak ho.” Aap ko hairat hui ke “Main to hajj ke liye gaya hi nahi to yeh kya baat hai?”
Jab Aap ghar aakar soye to qismat ka sitaara chamka aur khwaab me Huzoor sallallāhu alaihi wa sallam tashreef laaye aur farmaaya “Aye Ibne Arabi! Logo ke mubarakbaad pesh karne par ta’ajjub na karo. Tum hajj ke liye nahi gaye lekin tum ne meri aal ki madad ke liye saari raqam de di to ALLĀH ne khush hokar tumhari shakl ka ek farishta banaaya jis ne is saal tumhare badle hajj ada kiya aur qayaamat tak woh hajj ada karta rahega jiska ṡawaab tumhe milega.”

****************
Pariwaar :
‾‾‾‾‾‾‾‾‾‾‾‾
Aap ki 3 biwiya aur 2 saahabzaade hain.

Biwiya :
(1) Maryam binte Muhammad ibn Abdun (Seville me)
(2) Faatimah (Makka me)
(3) Binte Qaazi-ul-Qaza (Damishq me).

Saahabzaade :
(1) Sa’ad-ud-deen Muhammad
(2) Imaad-ud-deen Muhammad.

****************
Aap Hazrat Mohammad ibn Qaasim al-Tameemi rahmatullāhi alaihi ke mureed aur khalifa hain.
Aap ko Hazrat Shaikh Mohammad Younus Qaadri rahmatullāhi alaihi aur Hazrat Shaikh Ali bin Abdullāh ibn Jaami rahmatullāhi alaihi ne bhi Khilaafat ata farmai hai.

Aap se ‘(Maghribi) Akbari’ silsila jaari hai.
Aap ke khalifa Hazrat Sadr-ud-deen al-Qunawi rahmatullāhi alaihi hain.

****************
Aap ka wisaal 22 Rabi uṡ ṡaani 638 Hijri (8 November 1240 A.D.) ko hua.

Aap ka mazaar Damascus (Syria) me Jable Qasiyun ke qareeb hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Muhiy-ud-deen Muhammad ibn Arabi rahmatullāhi alaihi aur tamaam Auliya Allāh ke waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

Holy Graves - Mazar Mubarak

07/10/2026

07/10/2026

07/10/2026

06/10/2026

06/10/2026

04/10/2026

04/10/2026

04/10/2026

Address

Telephone

Website

Alerts

Shortcuts

Share

Listing takedown request