04/11/2026
ഓർച്ച പുഴയോര റോഡിൽ സുരക്ഷയൊരുങ്ങുന്നു
ക്രാഷ് ബാരിയർ നിർമ്മാണം ഉടൻ ആരംഭിക്കും
നീലേശ്വരം നഗരസഭയിലെ ഓർച്ച പുഴയോര റോഡിൽ യാത്രക്കാരുടെ സുരക്ഷ ഉറപ്പാക്കുന്നതിനായി ക്രാഷ് ബാരിയർ നിർമ്മിക്കുന്നു. നഗരസഭയുടെ 2026-27 വാർഷിക പദ്ധതിയിൽ 4 ലക്ഷം രൂപവകയിരുത്തിയാണ് നിർമ്മാണം നടത്തുന്നത്.
ഓർച്ച പാലം മുതൽ പുഴയോരത്തെ പ്രധാന വളവുകൾ ഉൾപ്പെടുന്ന ഭാഗങ്ങളിലാണ് ക്രാഷ് ബാരിയർ നിർമ്മിക്കുക. റോഡിന് തൊട്ടടുത്തായി പുഴ സ്ഥിതി ചെയ്യുന്നതിനാൽ രാത്രികാലങ്ങളിലും മഴക്കാലത്തും ഈ വഴിയിലൂടെയുള്ള യാത്ര അപകടം നിറഞ്ഞതായിരുന്നു. മുൻപ് ഈ ഭാഗങ്ങളിൽ അപകടങ്ങൾ നടന്നിട്ടുള്ളതും വാഹനങ്ങൾ പുഴയിലേക്ക് മറിയുന്ന സാഹചര്യമുൾപ്പെടെ ഉണ്ടായതിന്റെ അടിസ്ഥാനത്തിലാണ് സുരക്ഷാ മാനദണ്ഡങ്ങൾ മുൻനിർത്തി ഫണ്ട് അനുവദിച്ചിട്ടുള്ളത്.
ആധുനിക രീതിയിലുള്ള മെറ്റൽ ക്രാഷ് ബാരിയറുകളാണ് ഇവിടെ സ്ഥാപിക്കുക. അതോടൊപ്പം പ്രസ്തുത റോഡ് റീ ടാർ ചെയ്യുന്നതിനും നഗരസഭ പണം അനുവദിച്ചിട്ടുണ്ട്. പദ്ധതിയുടെ ടെൻഡർ നടപടികൾ വേഗത്തിൽ പൂർത്തിയാക്കി നിർമ്മാണ പ്രവർത്തനങ്ങളിലേക്ക് കടക്കുമെന്ന് നഗരസഭാ ചെയർമാൻ പി.പി.മുഹമ്മദ് റാഫി അറിയിച്ചു. ക്രാഷ് ബാരിയർ യാഥാർത്ഥ്യമാകുന്നതോടെ പ്രദേശത്തെ യാത്രാക്ലേശത്തിനും അപകടഭീതിക്കും വലിയൊരു പരിഹാരമാകും.
നീലേശ്വരം നഗരസഭാ ചെയർമാൻ പി.പി.മുഹമ്മദ് റാഫി, വൈസ് ചെയർമാൻ പി.എം.സന്ധ്യ, അസിസ്റ്റന്റ് എക്സിക്യൂട്ടീവ് എഞ്ചിനീയർ ബി.കെ.രാജേഷ്, നഗരസഭാ ഓവർസിയർമാരായ കിരൺ, അശ്വതി എന്നിവർ സ്ഥലം സന്ദർശിച്ചു.
Mohammed Rafi
Kerala Government
゚viralシ
