دکتۆر - شاڵاو مەلا ئەمین _ Dr - Shalaw Mala Amen

..دەنگی هەموومان بۆ لیستی 275..

بەمۆڵەتی دیموکراسی ،ئەگەر حزبەکان نیگەران نەبن ، پێم باشە هەموو کوردان دەنگ بە پارتی بدەن لەبەر ئەم هۆکارانە :

✹ چونکە گەلی کوردستان نەگەیشتۆتە ئامانجی باڵای سەربەخۆیی ، لەقۆناخی ڕزگاری نیشتیمانیدا ، یەک هێزی بەهێزوتۆکمەو یەکڕیز و یەکڕێگە بەیەک سەرکردایەتی هۆشیار وبەرپرس باشترە لە بێ سەروبەری و پاشاگەردانی فرەحزبی .

✹ مەترسی گەورە لەسەر عیراق هەیە ، ئاراستەی سیاسەتی ئەمریکا بەو ئاقارەیە کەلە داهاتووی نزیکدا، دەستێک لەو وڵاتە وەردەدات ، باشترین هێزبۆ پاراستنی هەرێم وگەرەنتی کردنی سەلامەتی لەناو باهۆزی پێشهاتە هەنووکەییەکان دانایی سەرۆک بارزانیە .

✹ پارتی تاکە حیزبە لە ڕۆژهەڵاتی ناوەڕاست ، کە هەشتا ساڵه لە خەبات دایەو لە دەسەڵات ماوەتەوە ، تەحەدای تەحەدیەکانی زەمەن وتەمەن دەکات ، وێڕای بەرگەگرتنی سەختیەکان،نەش ونماو گەشەش دەکات،ڕۆژ دوای ڕۆژ خەڵک دێتە ناو ڕیزەکانی .

✹ بەتەکبیر وبەرنامەی تۆکمەی پارتی ، کابینەی نۆیەمی حکومەتی هەرێم بە سەرۆکایەتی کاک مەسرور بارزانی . سەرکەوتوو بوو له دروست کردنی دەیان و سەدان پڕۆژەی ستراتیژی کەدەبنە ژێرخانی بونیات نانی وڵاتێکی مۆدرێن وبەهێز .

✹'حزبەکان پاشەکشەیەکی گەورەیان کردوە ، ئۆپۆزسیۆن بەگشتی لە دۆخێکی خراپ دایە ،ئیسلامیەکان لەبازنەیەکی داخراوی بچوک قەتیس بوونە ، گۆڕان لە گیانە اڵڵە دایە ، نەوەی نوێ هەر بەمنداڵی خەریکە پیرئەبێت ، بەرەی گەل بەمردوویی لە دایک بوو . هەڵوێست بەس هەڵوێست نیە وەکو هەردوو ئەزموونی (گۆڕان) و (نەوەی نوێ )خولێکی دیکە باو ومۆدێلی نامێنێت.

یەکێتی لەقەیران دایه ، لەدەسەڵاتە و بە گوتاری موعارەزە قسەدەکات ، پارتی کار دەکات و یەکێتی قسەدەکات ، پارتی شانازی دەکات و یەکێتی شەرم دەکات ، پارتی بۆ داهاتوو پلان دادەنێت ویەکێتی لەسەر رابردوو ئەژێیت ،پارتی دەڵێت ڕەوش باشە و ئیش کراوە ، یەکێتی دەڵێت دۆخ خراپە و هیچ نەکراوە.

بۆیە سێ شت یەکلابۆتەوە
پارتی باشترینی سەر گۆڕەپانەکەیە.
پارتی ڕکابەرەکانی لاوازن .
پارتی گەشەدەکات ئەوانی تر پاشەکشە.
بەهیوای دەنگدان بە لیستی 275.

.....شاڵاو مامۆستا امین. ....
20 مانگی گەلاڕێزان 2725

ئەمڕۆ سەرپەرشتی کۆبوونەوەیەکمان کرد لەگەڵ جەماوەری و ئەندامانی پارتیمان لە لیژنەی ناوچەی کەسنەزان . هاوکات لە کۆڕ و کۆبونەوەکە باس لە هەڵـمەتی بانگەشەی هەڵبژاردن کرا بۆسەرخستنی لیستی جەنابی سەرۆک بارزانی ژمارە 275 ..

........ بانگی ئاشتی !!! ........

مایەی خۆشحاڵیە ، جێگەی ئومێدە ، ئەو باهۆزە بەهێزەی گۆڕانکاری کە لەناوچەکە دا هەڵیکردوە و خەریکە هێزە شەڕانگێزە داگیرکەرەکانی ناوچەکە یەک لە دوای یەک ڕادەماڵێت . لەبەرژەوەندی کوردە و پشتیوان بەخودا و بە ژیری داناکانمان ، دەبێتە شەماڵێکی فێنکی حەسانەوەی سەرفرازی و خەونی سەدان ساڵە لەگەڵ خۆی ئەهێنێت .

مەخابن ، کورد نەیتوانیوە و نازانێت وەکو دەرفەتێکی ستراتیژی مامەڵەی لەگەڵدا بکات ، لەچەند ڕوێکەوە :

- پەرتەوازەیی هێزە سیاسیەکان و درک نەکرن بە گەورەیی دەرفەتەکە ، نەبوونی تێگەیشتن وستراتیژێکی کوردانەی یەکگرتوو لەبەرامبەر تەحەدیاتەکان .

- لەبەر ڕۆناکی فیکری ستراتیژی پەکەکە ،بانگەوازی تاک لایەنەی (بەڕێز ئۆجەلان) چەند خەلەلێکی گەورەی تێدایە، وەکو :

- خۆهەڵوەشاندنەوە وچەکدانانی تاک لایەنەی کورد ، بەبێ ڕاگرتنی شەڕ لەلایەن تورک ، بەبێ دەسپێکردنی گفتوگۆی بەرامبەر (حوار متکافئ ) ، بەبێ گەرەنتی نێودەوڵەتی .

- ڕەت کردنەوەی( بەڕێز ئۆجەلان) بۆ مافی سیاسی کورد وەکو لامەرکەزی و ئۆتۆنۆمی وفیدڕاڵ و تەئکید کردنەوە لەسەر کۆمەڵگەی دیموکراتیک بۆ تورکیا .

- گەڕاندنەوەی هۆکاری هەڵومەرجی سەد ساڵی ڕابردووی ناوچەکە وستەم لەکورد تەنها بۆ کەپیتالیزمی نێودەوڵەتی .

دیارە دەوڵەتی تورکیا شەڕی ڕانەگرتوە ، پڕۆسەکەی ناوناوە (قۆناخی کۆتایی هێنانی تیڕۆر )، نیازیانە پڕۆسەکە لە وتووێژی سیاسی بکەنە خۆبەدەستەوەدان .

بەرمەبنای هەمان فیکر وسیاسەت وستراتیژ ومێتۆد ، ڕێکەوتنەکەی ڕۆژئاڤا لەگەڵ دیمشق هیج مافێکی سیاسی بۆ دۆزی کورد تێدانیە ، بەندەکانی تەنها بریتیە لە مافی مواتەنە و ئیندیماجی ڕۆژئاوا لە ناو دامەزراوەکانی دەوڵەتی سوریای جۆلانی ، بەبێ لەبەرچاوگرتنی تایبەت مەندی کوردستانی ڕۆژئاڤا.

لەبەر ئەوەی بزوتنەوەی سیاسی کودایەتی لە باشوری کوردستان بەتایبەت ( پارتی دیموکراتی کوردستان ) هەر لەسەرەتاوە خاوەن ستراتیژێکی نەتەوەیی ڕوون وگشتگیربووە .

بۆیە (ڕێکەوتنامەی١١ ئازار) پەنجا ساڵ لەمەوبەر ، بەشێوەی بەرامبەر وهاتا وهاوسەنگ مامەڵەی لەگەڵ مەرکەزدا کردوە و مافی ئۆتۆنۆمی بۆ کورد دابین کردوە ، بەهاکەی وەکو دیکۆمێنتی داننان بە مافی گەلێک ،لەگەڵ ئەم بانگ وڕێکەوتنەی ئێستا هەر بەراورد ناکرێت .

ڕەوتی گڤتوگۆ لە نێوان بزوتنەوەی کوردایەتی باشور ( بەهەموو حیزبەکانەوە ) و ڕژێمەکانی عیراق ، هەر لە هەڕەتی هێز و توندوتیژی عیراق لە شەستەکان (جگە لە چەکدارەکانی ٦٦ کە دۆخێکی شەرمهێنە) و هەفتاکان و ناوەڕاستی هەشتاکان ، تا قۆناخی لاوازی عیراق لە دوای ڕاپەڕین و چ لە عیراقی نوی .

هیچ کاتێک شۆڕشی باشور سازشی لەسەر ئامانجی ستراتیژیی پرسی دۆزی ڕەوای کورد نەکردوە ، لە دژوارترین هەڵومەرج و لەلاوازترین دۆخدا وەکو نسکۆی شۆڕشی ئەیلول و قۆناخی ئەنفال و جینۆساید وکیمیا باران ، بەڵکو حەکیمانە و بەنەفەسی شۆڕگێڕانە دۆزەکەیان بۆ هەڵومەڕجێکی لەبار وقۆناخێکی گونجاوتر هەڵدەگرت .

......شاڵاو.......

هەرچەندە ڕێکەوتنی عەبدی و جۆڵانی پەلە پەلی پێوەدیارە ، بەڵام بۆ هەردوولا سودی هەیە ، چونکە پێوستیەکی هەنوکەییە بۆ هەردووکیان .

هەسەدە بۆ وەڵام دانەوەی بانگی (بەڕێز ئۆجەلان) بۆ ڕێکەوتن لەگەڵ شام لەلایەک ، بۆ دۆزینەوەی دەرچەیەک بۆ سوککردنی گوشارەکان لەسەری لە لاکەی تر ، سودی لەو هەڵومەرجە زۆر خراپە وەرگرتوە کە ئیدارەی نوێی سوریا بەهۆی کۆمەڵکوژیەکانی عەلەویەکان تێی کەوتوە .

ئیدارەی سوریاش لەژێر گوشاری ئەمریکا بۆ ڕێکەوتن لەگەڵ کورد لەلایەک و بۆ ڕەواندنەوەی بەشێک لەوهەڵمەتە گەورەیی کە نەفەسی توندکردوە بەهۆی ئەو قەسابخانەی کە دژبە عەلەویەکان کردویانە لەلایەکیدی ، چۆتە ژێر باری ڕێکەوتنەکە .

بەندەکانی ڕێکەوتنەکە باسی هێشتنەوەی کیانی ڕۆژئاوای تێدانیە ، بەڵکو زیاتر بەئاراستەی مافی هاوڵاتی و جێکردنەوە و ئیندیماجی ئۆڕگانەکانی هەسەدەیە لە چوارچێوەی دەوڵه ت .

سودی بۆ سوریا هەیە وەکو (گێڕانەوەی ڕۆژ ئاوا بۆ سه ر ناوەند ، یەکێتی سوریا ، ڕەتکردنەوەی دابەش بوون ، جەنگ دژی دوژمنەکانی ، لابردنی ڕوناکی لەسەر کۆمەڵکوژی تایەفی ) .

دەسکەوتی بۆ ڕۆژئاواش بریتیە لە ( دەسکەوتنی کات ، دواخستنی جەنگ ، هێورکردنەوەی تورکیا و دەرهێنانی هەسەد لە ژێر تایتلی پەکەکە ) .

بەڵام تڕاژیدیای قەتل وعامی عەلەویەکان ، ڕوداوێکی گەورەیە ، پێم وابێت وەرچەرخان دروست دەکات لە سوریادا ، ڕوانگەو ڕوئیای جیهان گۆڕاوە ، جۆلانی پێناچێت دەرەقەتی پینەکردنی تاوانەکە و دەربازبوون بێت لەو ئابڕوچوونەی کەتێی که وتوە .

تێبینی : له زنجیرە وتارێک لەسێ مانگی ڕابڕدوودا ، پێشبینی شکستی جۆلانی وشەڕی ناۆخۆ و داهاتوێکی تاریکم بۆ سوریا کردوە ، بەهیوای ئیستیقلالی کوردستان و پێکەوە ژیان و خۆشبەختی بۆ گەلانی ناوچەکە .

شاڵاو مامۆستا ئەمین

هۆشیاری تاراوگەیە ،غوربەتە ، نامۆییە ، بەڵام جەهل نیشتیمانە ، ڕەحەتی ڕۆح و ئاڕامی دەرونیە . هۆشیاری لەمەیدانی سەروەتی مەعنەوی دا مرۆڤ بەرز ئەکاتەوە ، بەڵام لە بازاڕی ژیاندا ئەیکوژێت .

..... به‌ ناوی خودای مەزن و دلۆڤان .....

ڕەمەزان مانگی دەسپێکی ئیسلام و دابەزینی قورئان و نەش ونمای ئیمان ، ڕەمەزان مەیدانی موحەبەت و عیبادەت وعیرفان ، مانگی نۆژەنکردنەوەی پەیوەندی و ئاشتی کردنە لەگەڵ پەروەرێنی دلۆڤان .

ڕەمەزان مانگی خۆشەویستی ، برایەتی ، بەخشین ، گەردن ئازادی و کۆکردنەوەی خێزان ، ڕاهێنانێکی قوڕسە لەسەر قوڵکردنەوەی جوانیی مەعنەوی و بەها بەرزەکانی ئیمان .

کرانەوەی پەنجەرەی میهرەبانی خالقە بەڕووی بەندەکان ، وێستگەی گەڕانەوەو لێخۆشبوونە بۆ هەڵەی خەتاکاران ، ڕەمەزان دەرفەتە بۆ کۆنتڕۆل کردنی چاوچنۆکی جەستەو جڵەوکردنی ئارەزوەکان ، مەحەکە بۆ پاککردنەوەی جەستە و شوشتنی ناخ و ڕۆح لە پیسیەکەڵەکەبوەکانی ژیان .

دوای ساڵێكی پڕ له‌ ڕاكه‌ڕاك و ماندوبوون ، ڕه‌مه‌زان گەڕانەوەیە بۆ خودای دلۆڤان ، خه‌نده‌یه‌كه‌ بۆ مه‌له‌كوتی ئاسمان ، وێستگه‌یه‌كه‌ بۆ حه‌سانه‌وه‌ی دڵ وقایم كردنه‌وه‌ی ڕایه‌ڵه‌ جوان و سودبه‌خشه‌كانی ئیمان ، چانسێكه‌ بۆ مشت و ماڵ كردنه‌وه‌ی ئیڕاده‌ی دژە چڵێسی و داكۆكی كردن له‌ پێداویستی مه‌حروم و هه‌ژاران ..

ئومێد دەکەین بەرەکەتی ڕەمەزان خێری گشتی لەگەڵ خۆی بهێنێت و ببێتە وەرچەرخانی ئیسلاح لەقەناعەت و ئەخلاق وسلوک ویژدانی هەموومان ، نزادەکەین خودای مەزن بیکاتە سەرفرازی یەکجاری گەلەکەمان و خێری سەرجه م موسڵمانان وخۆشی بۆ تەواوی مرۆڤایەتی و جیهان .

...شاڵاومامۆستا ئەمین ...
دەسپێکی ڕەمەزان ١ / ٩/ ١٤٤٦

فاشیست کێیە؟ بزوتنەوەی فاشیزم چیە ؟

گەلێک جار تۆمەتی فاشیەت وەکو سوکایەتی وجنێوی سیاسی (دکتاتۆر و دژە دیموکراسی ) ئاراستەی کەسایەتی و حزب و دەوڵەتان دەکرێت ، بۆ ناسین ودروست به کارهێنانی ئەم زاراوەیە ڕوناکی دەخەینە سەر (پێناسەی چەمکی فاشیزم ، مێژووی سەرهەڵدانی ، دەوڵەت و بزوتنەوە فاشیەکانی دونیا ، جەنگ ومەرگ و وێرانکاریەکانی بۆ مرۆڤایەتی ).

فاشیزم ڕەوتێکی فیکری سیاسی جەماهیری سوڵتەویە ، هەڵگری ئایدیۆلۆژیای نەتەوەیی نەژادپەرستی ڕاستڕەوی توندگیرە، لەسەرەتای سەدەی بیست لە ئەوڕوپا دا سەری هەڵدا ، باوەڕی بە( ئازادی ، یه کسانی ، برایەتی ) نەبوو ، تەمجیدی دەوڵەت و سەرکردەی کاریزمای دەکرد تا ئاستی تەقدیس .

ڕەگی بزوتنەوەی فاشیزم دەگەڕێتەوە بۆ مێژووی هەڵومەرجی گۆڕان کاریەکانی سەدەی نۆزدەی ئەوروپا وەکو (سەرهەڵدانی دەوڵەتی نیشتمانی ، جەنگی یەکگرتنەوەی ئیتاڵیاو بوونی ڕۆما بە پایتەخت ، بەرەو کۆتایی هاتنی قۆناخی ئیستیعماری ).

ڕەخسانی زەمینەی سەرهەڵدانی ڕەوتی فاشیزم دەگەڕێتەوە بۆ (ناڵاندنی ئیتاڵیا بە دەست هەڵومەرجی سەختی سیاسی و ئابوری وکۆمەڵایەتی ودەروونی ، بەهۆی دۆڕانی جەنگ و دابەشبوونی ئەوڕوپا بۆ دۆڕاو براوەی شەڕی یەکەمی جیهانی ، بێبەشکردنی ئیتاڵیا لە دەسکەوتەکانی جەنگ لە کۆنگرەی ڤێرسای،ڕکودی ئابوری وکەڵەکەبوونی قەیرانەکان ، پەککەوتەیی حکومەتی لیبڕالی مەلەکی لەچارەسەرکردنیان ، ترس لە کشانی تەوژمی هەژموونی باوی کۆمۆنیزم ) .

لە ژێر کاریگەری ئەم هۆکارانەو بەئامانجی گێڕانەوەی شکۆی شکاو و هەڵساندنەوەی ئیتاڵیا، بینیتۆ مۆسۆلینی لەگۆنکرەی فاشیزم ، لە ٧ تا ١٠ نۆڤەمبەری ١٩٢١ حزبی نیشتمانی فاشی( Partito Nazionale Fascista)‏ دامەزراند.
ئامانجی ئەم حزبە گێڕانەوەی ئەمجاد وسەروەریەکانی ئیمبڕاتۆڕیەتی ڕۆم(Empire Rome) بوو ، بەهەردوو بەش کەماوەی ٢٠٠٠ ساڵ حوکمی نزیکەی نیوەی جیهانی کۆنی کرد ، ( ئ . ڕ. ڕۆژئاوا ) لە ساڵی ٧٥٠ پ.ز هەتا ٤٧٦ ز ، ( ئ. ڕ. ڕۆژ هەڵاتی بێزەنتی ) لە ساڵی ٣٩٥پ.ز هەتا ساڵی ١٥٥٤ زاینی .

زاراوەی فاشی لە ڕووی زمانەوانی لە وشەی ( Fasces ) ڕۆمانی لاتینی هاتوە ، کە ماناکەی دەکاتە (پاکێچی دار) پاکەتێک داری پێکەوەگرێ دراو لەگەڵ چەکوش ، دارەکان ڕەمزە بۆ یەکگرتن و چەکۆشیش هێمایە بۆ هێز.

بنەما فیکریەکانی فاشیزم پێک دێت لە ناسیۆنالیستی ڕەگەزپەڕستانە ، دژایەتی کردنی دیموکراسی لیبڕالی پەرلەمانی و فرەیی سیاسی بەبیانووی دژایەتیان بۆ دەوڵەت ، ڕەتکردنەوەی کۆمۆنیزم و چەپ گەرایی وجیاوازی چینایەتی بەپاساوی دژایەتی کردنیان بۆ نەتەوە .
هەڵوەشاندنەوەی سەندیکاکان و ڕێکخستنی کرێکار وسەرمایەدار لە ناو یەک ئۆڕگانی سەر بەدەوڵەت ، ترساندنی جەماوەر لە ڕێگەی دروست کردنی دوژمنی وەهمی ناوخۆ و دەرەکی ، تۆقاندنی خەڵک لە ڕێگەی ئیڕهابی میلیشیای حزبیی چەکدار ،کە ناسراوبوون بە( سكوادريستي ).

لەسیاسەتی دەرەوەدا پیادەکردنی توندوتیژی سیاسی و هەڵگیرسانی جەنگ و داگیرکردنی دەوڵەتان ،چونکە بەپێی پڕانسیپی فراوان خوازی فاشیزم نەتەوەی بەهێز بۆی هەیە نەتەوەی لاواز داگیربکات ، چونکە ئەفزەلیەت بۆ نەتەوەی بەهێز و خوێنی پاک و نەژادی باڵایە .

کانیاوی ئیلهام بەخشی مۆسۆلینی بۆ ئایدیۆلۆژیاکەی بریتی بوو لە (شانازیەکانی ڕۆمی کۆن ، شۆڕشی فەرەنسا ، شۆڕشی ئۆکتۆبەر ، کتێبی کۆماری ئەفلاتۆن ،کتێبی میری میکافیلی ، بیرۆکە ڕەجعیەکانی شای فەڕەنسا تشارل موراس ، تێزە سەندیکایە شۆڕشگیڕیەکانی جۆرج سۆریل ، سایکۆلۆژیای جەماهیری گوستاف لۆبۆن ، ڕەگەزپەرستی دی غۆبینۆ ، داریونیزمی کۆمەڵایەتی واتا باڵایی بۆ نەژادی باڵاو و مانەوە بۆ خوێنی باش ، البقاء للاصلح ) .

پاش شکستی سەربازی و داڕوخانی ئابوری و فەوزای کۆمەڵایەتی و مانگرتنی کرێکاران ، کە بوە هۆی شلەژانی نیزامی دەوڵەت ، مۆسۆلینی بەچارەسەرکردنی بەشێک لە ئاڕیشەکان و گێڕانەوەی سەقام گیری فرسەتەکەی قۆستەوە ، لەساڵی ١٩٢٢ ڕێپوانێکی گەورەی جەماهیری ڕێکخست لە شاری میلانۆ بەرەو ڕۆما ، بەیاوەری زەحفی ئاپۆڕای هەزاران چاڵاکوانی کراس ڕەشی فاشیستی داربەدەست کە پێک هاتبوون لە (جەنگاوەری دێرین ،تاونبارانی زیندان ، خاوەن پێشینەی تاوان ، بێکارەکان)،لەڕێگەی هێزەوە دەستیان بەسەر دەسەڵات دا گرت و سیستەمی پاشایەتیان سڕکرد و دەوڵەتی شمولی ئێستیبدادی فاشیستیان ڕاگەیاند ، مۆسۆلینی خۆی کردە سە رۆکی بەهیز و کاریمزای دەوڵەتی ئیتاڵیا .

لە دەوڵەتی فاشیدا ، پڕۆسەی حکومەت کردن پشت دەبەستێت بە چەمکی هێز ،نەوەک ئیڕادەی خەڵک ،چونکە دەوڵەت ئامانجە و تاک ئامرازە ، ئازادی ماف نیە ، بەڵکو لوتفێکەو دەوڵەت دەیبەخشێته گەل ،ئەرکی خەلک جێبەجێکردنی ئیلتیزامە نەوەک داواکاری ماف ، دەسەڵاتی تەنفیزی سوڵتەو توانای ڕهای هەیە و دەسەڵاتەکانی تر
ڕادەگرێت .

سەر کردە دیارەکانی ڕەوتی فاشیزم لە وڵاتانی دونیا بریتی بوون لە (مۆسۆلینی لەئیتاڵیا ، هیتلەر لە ئەلمانیا ، فڕانکۆ لە ئیسپانیا ، جەنرال لاونيس متاكزاس لە یۆنان ، أوليفيه دي سان لازار لە پورتوگال ، ويلهلم مايكلس لە Ständestaat ی دەوڵەتی فیدڕالی نه مسا ) .

لە ئیتاڵیا حزبی فاشی لە ڕێگەی هێز هاتە سەرکار ، بەڕەزامەندی ناچاریانەی شا ، بەڵام لە ئەڵمانیا حزبی نازی لەڕێگەی هەلبژاردنەوە گەیشتە سەر تەخت ، دوای گرتنە دەسەڵات ، کۆدەتایان بەسەر دیموکراسیدا کرد ، ئازادی مەدەنی و سیاسی و ئاڵوگۆڕی ئاشتیانەی دەسەڵات و پڕۆسەی هەڵبژاردنیان ڕاگرت ، سەرجەم حزب و ڕێکخراوە مەدەنی و سەندیکاکانیان هەڵوەشاندەوە .

فاشیستەکان لەگەڵ پیڕۆزکردنی دەوڵەت و تواندنەوەی مافی تاک وپێشێلکردنی ئازادیەکانی بوون ، وەکو قەدەغەکردنی ئازادی بیرکردنەوە ، ئازادی نووسین ، ئازادی قسەکردن ، ئازادی ڕۆژنامەوانی ، توندکردنی سانسۆر لەسەر ڕاگەیاندن ، ئازادی گەشت بۆ ڕێگری لەتێکەڵبوون ، سەرکوت کردنی جیاوازی سیاسی لەڕێگەی پۆلیسی نهێنی ، شوشتنەوەی مێشک لەڕێگەی پڕوپاگەندەی فاشیانە ، بەشداری ئیلزامی منداڵ لە ڕێکخراوی منداڵان ( طلائع ) بە ئامانجی پەروەردە کردنی نەوەیەکی فاشیستانە .

فاشیست لە دکتاتۆر ترسناک ترە ، بەوپێیەی دکتاتۆریەت ئالیەتێکە بۆ سەپاندنی تاک ڕەوی و قۆرخکاری دەسەڵات ، بەڵام فاشیزم مەزهەبێکی سیاسی نەژاد پەرستی شمولی سەوریە ، وەکو ئاین مامەڵە دەکات ، پێی وایە هەڵگری ڕاستی ڕەهایەو هەڵەناکات ، دەیەوێت بەپێی ڕوئیای خۆی جیهان دابڕێژێتەوە .

دەوڵەتی فاشی ئیتاڵیا باوەڕی وابوو بنەچەی خوێنی مرۆڤی ئیتاڵی دەگەڕێتەوە بۆ ڕۆمی کۆن و خوێنێکی ڕەسەنی پاکە و دەبێت لەسەرووی نەتەوەکانی دیکە بێت ، ئادۆلف هیتلەڕیش قەناعەتی وابوو ڕەگەزی ئاری ئەڵمانی ڕەگەزێکی باڵایە و دەبێت هەموو نەتەوەکانی تر ملکەچی بن و دان بە سەروەری عرقی ئاری دابنێن .

لە ڕوانگەی فراوان خوازی سەربازیی فاشیزم ، ئیتاڵیا وئەڵمانیا بەر لە (جەنگی کەونی دووەم ) چەند وڵاتێکیان داگیرکرد وەکو نەمسا و پۆڵەند و لیبیا و ئەسوپیا .
پاشان هیتلەر ومۆسۆلینی بڕیاری داگیر کردنی تەواوی ئەوڕوپایان دا ، دەرەنجامی ئەم سیاستە ، جەنگی جیهانی دووەم دەستی پێکرد ، بەشێک لە وڵاتانی ڕۆژ ئاواو و ڕۆژهەڵاتی ئەوروپایان داگیرکرد وەکو فەڕەنسا و نەمسا و پۆڵەندا وچیک و سلۆفاک و بەشێک له وڵاتانی سکەندەنافی و هەندێک لە سۆڤیەت و وڵاتانی سۆسیالیستی .

سیاسەتی شەڕانگێزانەی فاشیەکان و هەڵگیرسانی جەنگی گەورەی دووەم بوە هۆکاری وێران بوونی ئەوڕوپا ، دەیان ملیۆن سەرباز لە بەرەکانی شەڕ کوژران ، دەیان ملیۆن سڤیل لەئەنجامی برسیەتی و گرانی و بۆردومانی شارەکان گیانیان لەدەست دا ، ملیۆنان مرۆڤی بێ تاوانیش وەکو (کۆمۆنیست و چەپ و سۆسیالیست و لیبڕاڵ و دیموکرات و شۆڕشگێڕ و ئازادی خواز و سلاڤی و قەرەج و جوەکان ) لە سەربازگەو زیندان و تەنوری غاز و کورەی ئاگرینی ئەشکەنجە خانەکانی فاشیەت لە پڕۆسەی هۆڵۆکۆست جینۆساید کران .

ڕۆژئاوا بەسەرکردایەتی ئەمریکا و ئینگلیز و بەهاوپەیمانی یەکێتی شۆرەوی( سۆفیەت) ڕووبەڕووی فاشیزم بوونەوە ، هەردوو ڕژێمیان ڕوخاند ، مۆسۆلۆنی وسەرانی دەوڵەتیان ڵە شاری میلانۆی زێدی فاشیەت لەسێدارەدا ، تەرمەکانیان سەراوبن لەشەقامدا هەڵ واسین .
دوای خۆکوشتنی هیتلەر و بەشێک لە سەرانی نازیش ، ئەوانی تر لەدادگا سزای مەرگ و حەپسی ئەبەدی و زیندانی قوڕسیان بەسەردا سەپاندن .

ئێستا هیچ حزبێک بەفەڕمی بەم ناوە نیە ،چونکە بەپێی یاسا قەدەغەیە ، هەرکەس و گڕوپێک هەڵگری ئەم پڕانسیپ و خەسڵەتانە بێت بە فاشیست ناوزەد دەکرێت ، لە سەد ساڵی ڕابردوودا ، هەر چوار دەوڵەتی داگیرکەری کوردسان ، ڕژێمە فاشیەکانی عیراق وسوریا و تورک و ئێران ، بەپیێی سیاسەتی ڕەگەزپەرستانەی فاشیزم کە نەتەوەی بەهێز دەتوانێت سەرکوتی نەتەوەی لاواز بکات و خاکی داگیڕبکات ، بێ ویژدان و نائەخلاقیانە ستەمی گەورەی مێژووییان لە گەلێکی ڕەسەنی ناوچەکە کردوە ،کوردستانیان داگیر کردوە ونەتەوەی کوردیان چەوساندۆتەوە ، بەداخەوە لە زەمەنی گلوبالیزم و نوێی دونیادا ،تاوەکو ئێستا سیاسەتی قێزەوەن و دژەئینسانی و وەحشیانەی فاشیزم دژی گەلی کوردستان پیادەدەکرێت .

.....شاڵاو مامۆستا ئەمین .....
١٩ی شوبات ی ٢٠٢٥

شەڕە لابەلا کان یان نەزیفی تواناکان !!

سەرکەوتنی گەورە لەوساتەدا دەست پێدەکات کە مرۆڤ :

شەڕە بچوکەکان بۆ کەسە بچوکەکان جێبهێڵێت .

فەرامۆشی ئەوکەسانە بکات کە بێ هودە و لەپاشمله غەیبەتی دەکەن .

دەست بەرداری ئەو شەڕانە بێت کە بۆ ڕاکێشانی سەرنجی خەڵک ، تووشیان دەبێت .

ئەو جەنگانە ڕابگرێت کە ئامانج تیایاندا تێرکردنی تەوەقوع و چاوەڕوانی جمهوربێت .

خۆ دورگرتن لە ململانێ لەگەڵ گەمژە و ئەحمەق ئەگەر خاوەن هەقیش بین ، چونک تێچووی گێڕانەوەکە لە خودی هەقەکە گرانتر ئەوەستێت ، لە ڕێسای زۆرانبازی پیس و پاک دا ، بەئەگەری بردەنەوەش هەر پاک زەرەر دیدەیه ،چونکە لەکۆتایی ئەویش پیس ئەبێت .

جەنگە پوچگەرا و بێبەهاو عەبەسیەکان ، پیرۆزی ئەهلی خۆی بێت ، ئەوانەی شتێکی تریان نیە شەڕی بۆبکەن .

پێدڤیە خەبات بکەین لە پێناوی ( هەق ، ڕێگەی ڕاست ، پیرۆزیەکان ئیمان ، ئامانجە گەورەکان ، ڕوئیای جوان ، خەونی گەورە ، ئایدیای بەسود ، خزمەتی گشتی ، بەهای باڵا ، قەدر و قەدەری خۆمان ) .

هەندێک شتی پڕوپوچ ئەوە ناهێنێت کاتی بۆ تەوزیف بکەین ، بۆیە پێوێستە ورد و ژیر و دانایانە ئەو ئامانج و مەیدانانە هەڵبژێرین کە شەڕی بۆ ، یان لێ دەکەین ، لەپێناویدا فیداکاری بە باڵاترین و پڕبەهاترین جەوهەرەکانی خۆمان ئەدەین .

......شاڵاو مامۆستا ئەمین ........
١٣ی شوبات ی ٢٠٢٥

ئاسەواری بەعس کۆتایی دێت ؟

لەم هەفتەیەدا ، ئیدارەی نوێی دەوڵه تی سوریا بەفەرمی حزبی بەعسی عەرەبی ئیشتراکی هەڵوەشاندەوە ، چاڵاکی تەنزیمی وسیاسی لێ قەدەغەکرد ، بەم بۆنەیەوە و لەم وتارەدا ڕوناکی دەخەینە سەر مێژووی سەرهەڵدان وگەشەی حزبەکەو چۆنیەتی حوکمڕانی و دەرەنجامی سیاسەت و سلوکی لەماوەی نزیکەی سەدەیەکی تەمەنیدا.

بەعس هەڵگری شوناسێکی فیکری تێکەڵ و تەسکەرەیەکی پڕلە جیاوازی و دژبەری بوو ، بنەما فیکریەکانی پێکدەهات لە(شۆفێنیزمی نەتەوەیی ، وەحدەی عەرەبی ، ئیشتراکیەت بە تایبەتمەندی عەرەبی ، دژایەتی ئیمپریالیزم ، عینادی سیاسی ، تاکڕەوی و تۆتالیتاریزم "شمولیەت " ).

کەواتە بەعس حزبێکی نەتەوەیی وەحدەوی سۆسیالیستی ، ڕاست ڕەوی فاشی ، مەزهەب گەرایی ( سوننی لەعیڕاق و عەلەوی لە شام ) ، سیکیۆلاریستی عەسکەرتاری لادینی ،بە قەولی هەولێری خۆمان لە (شیوی حەمەشێت )ٚ دەچوو .
حزبێک بۆ ماوەی ٨٠ ساڵ ، كۆی دەڤەرەکە و جیهانی بەخۆیەوە سەرقاڵ کرد و چەندان جەنگی هەڵگیرساند و دوو وڵاتی وێران کرد و ملیۆنان مرۆڤی کوشت .

لە نیوەی یەکەمی سەدەی بیست ، دامەزرێنەرانی حزبی بەعس دەستەیەک گەنجی نوخبەی خوێندەوار بوون ، کەوتبوونە ژێر کاریگەری فیکری جولانەوەی فاشیزمی ئەوڕوپایی ، سەرسامبوون بە سومبول و سیاسەتە ڕەگەزپەرستیەکانی هەردوو حیزبی فاشی و ونازی ، لەهەردوو بواری فیکر و مومارەسەدا .

لە ڕووی تێوری دا، پڕۆگرام وفیکری ستراتیژی وئامانج ودروشمی بەعس لەسەر بنەمای عونسوریەتی فاشیانە دامەزرابوو ، وەکو ( یەکێتی نەتەوەی عەرەب و نەمری پەیامەکەی ، ئینکاری نەتەوەکانی تر و بەمیوان دانان و بەسوک سەیرکردنیان ، تەفزیل کردنی عەرەب بەسەریان دا) .

لە مومارەسەدا ، هەوڵی فراوان خوازی و پێشێلکردنی مافی نەتەوەکانی تر و هەڵگیرسانی زنجیرەیەک جەنگ لە دژی کورد و جەنگی هەشت ساڵەی ئێران و داگیرکردنی کوێت ، حزبی بەعسی عیراق ، سیاسەتی جینۆساید و ژەهرباران و سڕینەوەی نەتەوەی کورد و سوتماک کردنی خاکی کوردستان و ڕوخانی هەزاران گوند و ئەنفالکردنی سەدان هەزار کەسی سڤیل و ڕاگواستنی زۆرەملێی بەکۆمەڵی پەیڕەو دەکرد .

حزبی بەعسی سوریایی نکوڵی لە بوونی کورد و مافە سیاسی ومەدەنیەکانی دەکرد تا ئاستی بێبەش کردنیان لە مافی هاوڵاتی و ڕەگەزنامەی دەوڵەتی ، هەردوو دوانەی بەعس دژی مافی پێکهاتەکان بوون لە تورکمان و مەسیحی و دروز و ئیتنۆس و گروپە بچوکەکان .حزبی بەعس وێڕای ڕەگەزپەرستی قەومی ، هەڵگری خه سڵەتی فاشیزمی مەزهەبیش بوو ، هەمان حزب لەسەر جیاوازی مەزهەبی لە عیراق دا سەدان هەزاران عەرەبی شیعە و لە سوریاش بێ شومار عەرەبی سوننەی قەتل و عام کردوە .

ئاشی خوێنینی بەعس جەستەو ڕوحی سەدان کادر وسەرکردەی خۆشی هاڕیوە ، بۆ نمونە (حافظ الأسد) میشێل عەفلەق و سەرکردایەتی شەرعی حزبەکەی خۆی بەسواری تانکەوە ڕاونا و سەدانی گرت و کوشت .
سەدام حوسێن لە ساڵی ١٩٧٩ ، لە مەڕاسیمی دەست بەکاربوونی سەرۆکایەتی ( تتویج ) ، لە تڕاژیدیای (هۆڵی خلد ) لە کۆبوونەوەی فراوانی حزب ،نزیکەی سێیەکی سەرکردایەتی و دەیان کادری حزبی دەسگیرکرد و بە ئەحکامی عورفی بەفیشەک باران (رمی بالرصاص) عیدامی کردن ، وەکو ( عبدالخالق السامرائی (ئەمین سڕی قیادەی عیراق ) ، محی المشهدی ، غانم عبدالجلیل ، محمد عایش ، ولید محمود سیرت ، عبدالستار السامرائی ، محمد محجوب ، عدنان الحمدانی .... )

حزبی بەعس لە ٧ ی نیسانی ١٩٤٧ لەلایەن بیرمەندی ناسیۆنالیستی عەرەبی مەسیحی (میشێل عەفلەق ) و چەند کەسایەتیەکی تری نەتەوەەیی خەڵکی وڵاتی شام دامەزرا ، وەکو ( صڵاح البیطار ، زەکی الارسوزی ، ئەکرەم الحورانی ، مونیف البزاز ) ،
ئەم بەڵایە دوای پێچ ساڵ دەپەڕێته وە عیراق ، له ساڵی ١٩٥١ (فؤاد الر کابی) دەبێتە دامەزرێنەر و یەکەم بەرپرسی لقی ( قطری عیراقی ) حزبەکە .

مەکتەبی عه سکەری حزبی بەعس لەماوەی مانگێک دا ، لە زستانی ساڵی ١٩٦٣ ، دوو کۆدەتای سەربازی ئەنجام دەدات ، لە دوو وڵات دێتە سەر کار و دەسەڵات وەردەگرێت .

- لە عیراق دا، لە ٨ ی شوبات ی ١٩٦٣ کە ناسراوە بە(کۆدەتای١٤ی ڕەمەزان ) بەعس بەسەرپەرشتی ژەنەراڵ (ئەحمەد حسن ئەلبەکر ) بەهاوبەشی لەگەڵ هێڵی نەتەوەیی ناسری بە ڕێبەری(عبدالسلام عارف ) کۆدەتای سەربازی دەکەن و دێنە سەر تەخت ، پاش ٨ مانگ (ژەنەڕاڵ عارف) ی شەریکە ئینقلابیان ،ئینقلابی ناوخۆیی بەسەر هەڤاڵەکانی دا دەکاتەوە ، کەلە ئەدەبیاتی بەعس به هەڵگەڕانەوەی (ردة تشرین) ناسراوه . لە ١٧ تەموزی ١٩٦٨ جارێکی دیکە دێنەوە سەر کار هەتا ساڵی ٢٠٠٣ ، کە ئەمریکا بەهێزی سەربازی ، ڕژێمی عیراق دەگۆڕێت و حزبی بەعس قەدەغە دەکرێت .

- لە سوریاش ، لە٨ ی ئاداری ١٩٦٣ ، لەڕێگەی کۆدەتای سەربازی دێنە سەر دەسەڵات ، پاشان تەسفیاتی ناوخۆ دەست پێ دەکات ، لە ساڵی ١٩٦٦ باڵی سەربازی حزب (صڵاح جدید و حافظ الاسد) ئینقلابی دووەم بەسەر سەرکردایەتی ڕەسمی و دەستەی دامەزرێنەری حزب دەکەن ، (عەفلەق وبەیتار و بەزاز) لەسوریا دەردەپەڕێنن ، (زەکی الارسوزی عەلەوی) وەکو باوکی ڕۆحی بەعسی سوری جێگەی عەفلەق دەگرێتەوە ،

لەساڵی ١٩٧١ (حافظ الاسد) کۆدەتای سێیەم بەسەر(نورالدین ئەتاسی سەرۆک) دا دەکات ، ڕەفیقی ڕێگاو هاومەزهەبی عەلەوی و هاوڕێی ئینقلاب(صلاح جدید ) بۆماوەی دەیان ساڵ دەخاتە زیندانەوە تا مردنی لە ساڵی ١٩٩٥ .

دوای کۆدەتای (حافظ الاسد ) میشێل عەفلەق دەچێتە بەرازیل و ژیانێکی سەخت و کۆڵەمەرگی بەڕێدەکات تا ئاستی سوال کردن ، دوای کۆدەتای ١٧ تەموزی عیراق ، لەسەر داواکاری حزب دەگەڕێتەوە وەکو چەتری شەرعی حزبی بەعسی عیراقی .

پێشتریش عەفلەق هەر لە کەرتبوونی حزبەوە دەچێتە پاڵ باڵی عیراق ، وەکو مونەزیر و دامەزرێنەر و باوکی ڕۆحی بەعس لەعیراق دا مایەوە تا لەساڵی ١٩٨٩کۆچی دوایی کرد ، دوای مردنی ، قیادەی بەعس ڕای گەیاند کە عەفلەق بویتە موسولمان ، هەفتەیەک لە ئێستگەو تەلەفزیۆنی فەرمی دەوڵەت لەپرسەکەیدا قورئانیان بۆ خوێند و واعیزەکانی سوڵتان نزای موسولمانەیان بۆ کرد .
لەسالی٢٠٠٣ عەفلەق لەلایەن شیعەی عیراقەوە گۆڕ بەدەرکرا ، قەبرەکەیان هەڵتەکاند ، چونکە هەڵدانەوەی گۆڕ و دەرهێنانی مردوو لە کەڵتوری عەرەب دا ڕەگێکی قوڵی هەیە .

لە کۆدەتا ناوخۆییەکەی(حافظ الاسد) حزبی به عس ده بێت بە دوو باڵ یان ورتربڵێن دوو حزبی جمک بە :
- هەمان ناو : (حزب البعث العربی الاشتراكی).
- هه مان دروشم : (امة عربیة واحدة ، ذات رسالة خالدة ) .
- هه مان ئامانج : (وحدة ، حریة ، اشتراكیة ) .
- هەمان مێتۆدی گرتنە دەسەڵات : (ئینقیلابی سەربازی لە ڕێگەی مه کتە بی عەسکەری حزب و ئەفسەرەکانی ناو سوپا ) .
- هەمان هەیکەلی ڕێکخستن : (القیادة القومیة ، القیادة القطریة ، المكاتب المركزیة ، فروع المحافظات ، الشعبة ، الفرقة، المنظمة)
ٓ- هەمان چارەنووس (دەست بەسەر داگرتنی لەلایەن هەردوو بنەماڵەی دواکەوتووی عەلەوی وعۆجەییەکان و لەکۆتایش دا خۆکوژی سیاسی )

سەدام و تكریتیە بەعس چیەکان ماوەی ٣٥ ساڵ ، هەردوو ئەسەد (باوک و کوڕ) و عەلەوەیەکان ماوەی ٦١ ساڵ بەئاگر و ئاسن و ژەهر وخوێن و مەرگ حوکمی عیراق و سوریایان کرد ، دوو ڕژێمی دڵ ڕەق و جەڵاد و جینایەت کار و وەحشیگەر بوون ، قۆناخی حوکمڕانیەکانیان بە یەکێک لە تاریک ترین و سامناکترین دەورانی مێژوو دادەنرێت.

ڕۆژی ٨ دیسەمبەری ٢٠٢٤ ( لقی قطری سوری حزبی بەعس ) وەکو دوا سەنگەری ناسێۆنالیستی شۆفێنزمی عەرەبی ، بەشۆڕشی جەماوەری و پاڵپشتی نێودەوڵەتی کەوت ، هاوشێوەی عەفلەق(حافظ الاسد) لەگۆڕەکەی دەرهێنراو مەزارەکەی له زێدی خۆی لەشاری (قەڕداحەی لازقیة) وەکو نەریتێکی قێزەوەنی جاهیلی سوتێنرا.

به ڵام سەدەیەک نەهجی خوێناوی ئاگر و ئاسن و زیندان و ئەشکەنجە و تۆقاندن وکەبت و سەرکوت و ژەهرو مەرگ بوویتە ماکێکی قوڵ لە ڕوحی تاکەکان ، ڕووچۆتە کۆنەست (لاشعور) و عەقلی نهێنی خەڵکەوە .کاریگەری خراپ و وێرانکەرانەی لە ڕووی فیکری کۆمەڵایەتی و کەلتوری ڕەنگە دەیان دەیەی(ساڵان ) دیکە بەردەوام بێت .

بەداخەوە دەرەنجامی نزمی ئاستی هۆشیاری و تەوژمی پۆپۆلیستی بێ بەهاکردنی بەها باڵاکان و هەژموونی هیچوپوچی جیهانی و خەلەلی حوکڕانی خۆماڵی، نەوەیەکی تازە هاتۆتە پێش ، درود بۆ سەدام و نزا بۆگۆڕەکەی دەنێرێت ، خۆزگەی گەڕانەوەی بەعس دەخوازێت ،کە ئاماژەیەکی مەترسیدارە لەسەر داهاتووی کورد و ئاسایشی نەتەوەیی وڵاتەکەمان .

حزبی بەعس زادەی فیکری پۆلێک لەنوخبەی خوێندەوار و بیرمەند و مونەزیری ئەوسای عەرەب بوو ، مەخابن هەندێک جار فیکری نوخبەش شتی عەجایەب و توڕەهات و تراژیدیای قێزەون بەرهەم دەهێنێت ٠
وەحشی گەری و فاشیەت و سلوکی جینایەتکارانەی بەعس و موساهەمەو بێدەنگی ڕای ڕەسمی ومیللی عەرەبی لەبەرامبەر تاوانەکانی دا ، عەقلی جەماعی و فیکری کۆمەڵایەتی و ڕەهەندی ئینسانی و ویژدانی عەرەبی دەخاتە ژێر پرسیارەوە .

.....شاڵاو مامۆستا ئەمین .....

بە یاوەری لەگەڵ براکانم سەردانی
بەڕێز کاك (حسێن حسك ناوەندەی)مان کرد بۆ هەواڵ پرسین و دۆستایەتی ، کاک حسێن کادیرێکی شۆرەشگێر و ماندوو نەناسە و هەڤـاڵـێـکی خۆشـەویستە و ئەزیزی ئێمەیە..
2 \ 2 \ 2025
سوهەیب ملا ئەمین

پشتتێکردن ...بێ هیوا کردن
( خذلان )

بێ هیوا کردن ، برینێکی بە ئازارە و دەخرێتە ڕۆحی نەتەوە ، شۆڕش ، تاک ، کۆمەل ، تا مردن یان تا ئەبەد لەیاد ناکرێت ، بەڵام ئەنجامدەر بێباک و بێ چاووڕوانە ، وەک ئەوەی مێشی میوان نەبوبێت قۆشمەچیانە تێدەپەڕێت .

پشت تێکردنی ناپاکانە لەدۆست ، لە لێقەومان و لەکاتی پێویست ، وەکو ئەو شەقە وایە کە دایک لە منداڵی گریاوی دەدات لەوساتەی چاوەڕوانی لەباوەشگرتنی لێ دەکات .

زیادەڕۆیی لە متمانە ،خۆشەویستی ، گرنگی پێدان ، فیداکاری ، موبالەغە لە وەفاو ئەمەک و دۆستداری باش نیە .

چونکە مەخابن ، جێگەی داخە ، لەپشت هەموو زێدەڕەویەک ، خیانەتێکی ناجوامێرانە خۆی مەلاس داوە .

گەلی کورد بویتە قوربانی پشت تێکردنی جیهان، بەڵام وەکو لاسایی کردنەوەی جەلادەکانی ، خۆشمان پشت لەیەک دەکەین ، یەکدی شەرمەزار و بێ هیوا و دڕدۆنگ دەکەین .

.....شاڵاو مامۆستا ئەمین ....

........ قەیرانی ژوژکەکان ......... (Hedgehogs dilemma)

(ژیژکەکان) لەكولانەكانیاندا ، بۆ بەرەنگابوونەوەی ساردی سەختی زستان لە یەکدی نزک دەبنەوە ، تاگەرمی بەیەک ببەخشن .

بەڵام لەدەمی نزیک کەوتنەوە ، بەسەرە نوکی تیژی دڕکەکانی سەر پێست یەکدی ئازار دەدەن ، ناچار دەبن لەیەک دوربکەونەوە .

ئەم پڕۆسەیە چەندان کەڕەت و زەمەنێکی دڕێژ دووبارە بوەوە ، تا ژوژکەکان گەیشتنە دۆزینەوەی ڕێسایەک بۆ دیاری کردنی مەودای دوری نێوانیان ، کە لەسەرما نەمرن و بەقەلەمە تیژەکانیش (spines) یەکتر ئازار نەدەن .

(شۆبنهاوەر) ئەم حاڵەتەی بەپەیوەندیە سۆسیۆلۆژیەکانی (کۆمەڵایەتی) مرۆڤ شوبهاندوە ، مرۆڤ پێویستی بەگەرمی(دفء) نزیکی و خۆشەویستی و پێکەوەیی لەگەڵ مرۆڤ دا هەیە ، چونکە کائینێکی کۆمەڵایەتیە ، دوری و دابڕان و پەراوێز تواناکانی دەکوژێت .

بەڵام لەکاتی نزیکی کۆمەڵایەتی ، مرۆڤەکان زیان بەیەک دەگەێنن ، (هاوشێوەی ژوژکەکان ) بە نوکی تیژی تیخی ( درۆ ، بۆختان ، غەدر ، نیفاق ، ناپاکی ، ساختەکاری وقۆشمچیەتی ) ڕۆح و شکۆی یەکتر بریندار ئەکەن . به ڵام بەلەبەرچاوگرتنی ( بەڕائەتی ژوژکەکان ) و ( خەباسەتی مەبەست داری مرۆڤەکان) .

- بۆ بەردەوام بوونی ژیان پێویستە تەوافوق لەنێوان هەردوو حاڵەت دا بکەین ، درێژە بەپەیوەندیەکان بدەین ، بەڵام لەدووریەک گەرەنتی ئەمانی تێدابێت( فاسیلەی ئەمان سنوری هەرێمی تایبەت مەندیە شەخسیەکانمان لەیەک جیا بکاتەوە) .

هاوکێشەیەک پیادەبکەین هەم پێداویستیە سەرەتاییە ڕوحی ومەعنەوی وئەخلاقی و ئینسانیەکانمان تێر بکات و هەم لەپڕیشکی ئازاربەخش و زەبرە تاقەت پڕوکێنەکانی حەشاماتی کۆمەڵایەتی بمانپارێزێت .

...شاڵاو مامۆستا ئەمین ....