Кемин райондук мамлекеттик администрациясы

Кемин районунда жарандардын социалдык укуктарын коргоо багытында прокурордук көзөмөл күчөтүлүүдө

Кемин районунун прокуратурасы тарабынан 2026-жылдын I кварталында жарандардын социалдык укуктарын коргоо багытында жүргүзүлгөн текшерүүлөрдүн жыйынтыгында 12 мыйзам бузуу аныкталды.

Аларды жоюу максатында 5 сунуштама жана 1 талап келтирилип, 9 кызмат адамы тартиптик жоопкерчиликке тартылды.

Текшерүүлөрдүн жүрүшүндө эмгек мыйзамдарынын, үй-бүлөлүк зомбулуктун алдын алуу жана жарандардын кайрылууларын кароо боюнча мыйзамдардын талаптарын бузуу фактылары аныкталып, тиешелүү чаралар көрүлдү.

Ошондой эле Башкы прокуратуранын тапшырмасынын негизинде жүргүзүлгөн иштердин натыйжасында жалпы баасы 10 млн 849 миң сомду түзгөн мурдагы мектеп имараты жана бала бакча мыйзамсыз жеке менчиктен мамлекеттик жана муниципалдык менчикке кайтарылды.

Кемин районунун прокуратурасы жарандардын укуктарын коргоо жана мыйзамдуулукту камсыз кылуу багытындагы иштерди мындан ары да улантат.

Балдарды коргоонун эл аралык күнү Кемин районунда белгиленди

1-июнь – Балдарды коргоонун эл аралык күнүнө карата Кемин районунда майрамдык иш-чара өткөрүлдү.

Майрамдык иш-чарага Кемин райондук мамлекеттик администрациясынын башчысынын орун басары А. Джуманалиева катышып, балдарды куттуктап, ар бир баланын бактылуу балалыкка, сапаттуу билимге жана жаркын келечекке татыктуу экенин белгиледи.

Иш-чаранын жүрүшүндө балдар үчүн кызыктуу оюн-зоок программалары, жомок каармандарынын катышуусундагы көрсөтүүлөр уюштурулуп, таттуу белектер жана балмуздактар таратылды. Таланттуу балдардын ыр-бийлери майрамга өзгөчө көрк берип, бөбөктөргө кубаныч тартуулады.

Ошондой эле майрамдын алкагында «Алтынкен» ишканасы тарабынан 100 аз камсыз болгон үй-бүлөгө азык-түлүк жана белектер тапшырылды. Бул кайрымдуулук иш-чарасы муктаж үй-бүлөлөргө колдоо көрсөтүп, майрамдык маанай тартуулоого багытталды.

Балдардын күлкүсү — биздин келечегибиздин жаркын жүзү. Бардык балдарга бекем ден соолук, бактылуу балалык жана кең келечек каалайбыз!

Комиссия көтөрүлгөн маселелерди жеринде карады

Кыргыз Республикасынын Президентинин тапшырмасына ылайык, Кыргыз Республикасынын Президентинин Чүй облусундагы ыйгарым укуктуу өкүлүнүн айыл аймактарынын жашоочулары менен болгон жолугушууларында көтөрүлгөн маселелердин негизинде түзүлгөн атайын комиссия графикке ылайык Кичи-Кемин, Кызыл-Октябрь жана Чым-Коргон айыл аймактарына жеринен чыгып, жарандардын көйгөйлүү маселелери менен таанышты.

Жеринде сугат суу, каналдар, жер тилкелери жана башка көйгөйлөр боюнча тиешелүү мекеме-ишканалардын өкүлдөрү менен биргеликте иштер жүргүзүлүп, ар бир маселе боюнча түшүндүрмөлөр берилди.

Калктын көйгөйлөрүн ыкчам чечүү жана жеринде көзөмөлдөө иштери мындан ары да улантылат.

“Нурмээайса” үй-бүлө жана балдарды колдоо борборунда Балдарды коргоо күнүнө арналган майрамдык иш-чара өттү

Кемин районундагы «Нурмээайса» үй-бүлө жана балдарды колдоо борборунда Эл аралык балдарды коргоо күнүнө карата майрамдык иш-чара уюштурулду.

Иш-чарага Кемин райондук мамлекеттик администрациясынын башчысынын орун басары А. Джуманалиева, ошондой эле тиешелүү мекеме-уюмдардын жетекчилери катышып, борбордун тарбиялануучуларын майрамы менен куттуктап, ак тилектерин билдиришти.

Майрамдык иш-чара балдар үчүн кызыктуу оюн-зооктор, чыгармачылык көрсөтүүлөр жана жагымдуу маанай менен коштолду. Балдарга көңүл бурулуп, майрамдык белектер тапшырылды.

Балдардын жаркын келечеги үчүн көрүлүп жаткан мындай иш-чаралар алардын коомдо өз ордун табуусуна жана бактылуу балалыкты сезүүсүнө өбөлгө түзөт.