មន្ទីរសាធារណការ និងដឹកជញ្ជូនខេត្តកំពង់ធំ

កមវិធីផ្សព្វផ្សាយ អប់រំ មេរោគអេដស៍ និងជំងឺអេដស៍ និងសកម្មភាពចូលរួមយុទ្ធនាការប្រយុទ្ធប្រឆាំងគ្រឿងញៀនខុសច្បាប់

--------------------------

ព្រឹកថ្ងៃព្រហស្បតិ៍ ៤រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៤ ខែមិថុនា ឆ្នាំ២០២៦ នៅសាលប្រជុំមន្ទីរសាធាំរណការ និងដឹកជញ្ជូនខេត្តកំពង់ធំ មានកមវិធីផ្សព្វផ្សាយ អប់រំ មេរោគអេដស៍ និងជំងឺអេដស៍ និងសកម្មភាពចូលរួមយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ ។

គណៈប្រតិភូក្រសួងសាធារណការ និងដឹកជញ្ជូន ចូលរួមវេទិកាខួបលើកទី១០ នៃកិច្ចសហប្រតិបត្តិការកំពង់ផែផ្លូវសូត្រសមុទ្រ នៅប្រទេសចិន

ប្រទេសចិន៖ នាថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានដឹកនាំគណៈប្រតិភូក្រសួងសាធារណការ និងដឹកជញ្ជូន អញ្ជើញចូលរួមវេទិកាខួបលើកទី១០ នៃកិច្ចសហប្រតិបត្តិការកំពង់ផែផ្លូវសូត្រសមុទ្រ (10th Maritime Silk Road Port Cooperation Forum) ដែលប្រារព្ធធ្វើឡើងនៅទីក្រុងណីងបូ សាធារណរដ្ឋប្រជាមានិតចិន ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធផងដែរ។

ក្នុងឱកាសនោះ ឯកឧត្តមអគ្គនាយក បានអញ្ជើញថ្លែងសន្ទរកថាគន្លឹះក្រោមប្រធានបទ៖ «និន្នាការអភិវឌ្ឍន៍វិស័យកំពង់ផែ និងនាវាចរណ៍នៅកម្ពុជា ក្នុងបរិបទនៃកិច្ចសហប្រតិបត្តិការខ្សែក្រវ៉ាត់ និងផ្លូវ» ដោយបានបង្ហាញពីចក្ខុវិស័យរបស់កម្ពុជា ក្នុងការអភិវឌ្ឍវិស័យដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ ឱ្យក្លាយជាប្រព័ន្ធដឹកជញ្ជូនទំនើប មានប្រសិទ្ធភាព ប្រកួតប្រជែងខ្ពស់ និងប្រកបដោយចីរភាព ដើម្បីគាំទ្រការតភ្ជាប់ភស្តុភារកម្មក្នុងតំបន់មហាអនុតំបន់ទន្លេមេគង្គ និងសហគមន៍អាស៊ាន។

ឯកឧត្តមបានគូសបញ្ជាក់ថា កម្ពុជាមានសក្តានុពលខ្ពស់លើវិស័យដឹកជញ្ជូនតាមផ្លូវទឹក និងផ្លូវសមុទ្រ ដោយស្ថិតនៅតាមដងទន្លេមេគង្គ និងមានបណ្តាញដឹកជញ្ជូនផ្លូវសមុទ្រដែលអាចជំរុញការតភ្ជាប់ពាណិជ្ជកម្មក្នុងតំបន់បានយ៉ាងមានប្រសិទ្ធភាព។

ជាមួយគ្នានេះ កម្ពុជាបានដាក់ឱ្យអនុវត្តច្បាប់ស្តីពីដឹកជញ្ជូនតាមផ្លូវទឹក ឆ្នាំ២០២៤ និងលិខិតបទដ្ឋានគតិយុត្តពាក់ព័ន្ធ ដើម្បីពង្រឹងប្រសិទ្ធភាពនៃការគ្រប់គ្រង និងបង្កើនទំនុកចិត្តដល់វិនិយោគិនក្នុងវិស័យដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ។

ឯកឧត្តមក៏បានលើកឡើងថា បរិមាណដឹកជញ្ជូនទំនិញតាមផ្លូវទឹក និងផ្លូវសមុទ្រនៅកម្ពុជា កំពុងកើនឡើងជាបន្តបន្ទាប់ ដែលជំរុញឱ្យមានតម្រូវការអភិវឌ្ឍហេដ្ឋារចនាសម្ព័ន្ធ និងការវិនិយោគកាន់តែទូលំទូលាយ។ ក្នុងនោះ រាជរដ្ឋាភិបាលកម្ពុជា បាននិងកំពុងអនុវត្តគម្រោងសំខាន់ៗជាច្រើន រួមមាន គម្រោងគ្រប់គ្រងធនធានទឹកចម្រុះហ្វូណនតេជោ (ព្រែកជីកហ្វូណនតេជោ) ដែលជាគម្រោងសហប្រតិបត្តិការកម្ពុជា–ចិន ក្រោមក្របខណ្ឌគំនិតផ្តួចផ្តើមខ្សែក្រវ៉ាត់ និងផ្លូវ។ គម្រោងនេះនឹងជួយតភ្ជាប់ប្រព័ន្ធទឹកក្នុងប្រទេសទៅកាន់ផ្លូវសមុទ្រអន្តរជាតិ និងបង្កើនប្រសិទ្ធភាពដឹកជញ្ជូនតាមផ្លូវទឹក។

ទន្ទឹមនឹងនេះ កម្ពុជាក៏កំពុងអនុវត្តគម្រោងបូមស្តារ និងលើកកម្ពស់សមត្ថភាពផ្លូវទឹកតាមដងទន្លេមេគង្គ និងបណ្តាញផ្លូវទឹកសំខាន់ៗ ដើម្បីពង្រឹងការដឹកជញ្ជូនឆ្លងកាត់ព្រំដែនជាមួយឡាវ និងវៀតណាម។ ចំណែកវិស័យសមុទ្រ កម្ពុជាកំពុងពង្រីកសមត្ថភាពកំពង់ផែស្វយ័តព្រះសីហនុ ដើម្បីទទួលនាវាធំៗ បង្កើនសមត្ថភាពដឹកទំនិញ និងអភិវឌ្ឍកំពង់ផែនេះឱ្យក្លាយជាមជ្ឈមណ្ឌលតភ្ជាប់ក្នុងតំបន់។

ឯកឧត្តមអគ្គនាយក ក៏បានបង្ហាញពីផែនការយុទ្ធសាស្ត្រអភិវឌ្ឍន៍វិស័យដឹកជញ្ជូនតាមផ្លូវទឹក និងកំពង់ផែ ឆ្នាំ២០២៦-២០៣៥ ដែលផ្តោតលើការកែលម្អសមត្ថភាពដឹកជញ្ជូន ការតភ្ជាប់ពហុមធ្យោបាយ ការធ្វើទំនើបកម្មហេដ្ឋារចនាសម្ព័ន្ធ និងការលើកកម្ពស់សន្តិសុខ សុវត្ថិភាព និងកិច្ចការពារបរិស្ថានក្នុងវិស័យដឹកជញ្ជូនតាមផ្លូវទឹក និងផ្លូវសមុទ្រ។ ផែនការនេះក៏នឹងជួយទាក់ទាញការវិនិយោគជាតិ និងអន្តរជាតិ តាមរយៈយន្តការសហប្រតិបត្តិការផ្សេងៗ រួមមាន G2G, PPP និង P2P។

ជាទីបញ្ចប់ ឯកឧត្តមអគ្គនាយក បានបញ្ជាក់ពីការប្តេជ្ញារបស់កម្ពុជា ក្នុងការបន្តពង្រឹងកិច្ចសហប្រតិបត្តិការ ចែករំលែកបច្ចេកវិទ្យា និងគាំទ្រគ្នាទៅវិញទៅមក ដើម្បីពង្រឹងខ្សែសង្វាក់ផ្គត់ផ្គង់ បង្កើតបរិយាកាសពាណិជ្ជកម្មប្រកបដោយស្ថិរភាព សុវត្ថិភាព និងជំរុញកំណើនសេដ្ឋកិច្ចរួមក្នុងតំបន់៕

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ស្តីពីការគ្រប់គ្រងក្រុមហ៊ុនដឹកជញ្ជូនអ្នកដំណើរក្នុងក្រុង (តាក់ស៊ី)

ទីស្តីការក្រសួងសេដ្ឋកិច្ច និងហិរញ្ញវត្ថុ៖ រសៀលថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ស្តីពីការគ្រប់គ្រងក្រុមហ៊ុនដឹកជញ្ជូនអ្នកដំណើរក្នុងក្រុង (តាក់ស៊ី) ក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង និងក្រសួង-ស្ថាប័ន្ធពាក់ព័ន្ធ។

កិច្ចប្រជុំនេះ មានគោលបំណងពិនិត្យ និងពិភាក្សាលើបទដ្ឋានគតិយុត្តពាក់ព័ន្ធអាជីវកម្មដឹកជញ្ជូនតាមប្រព័ន្ធបច្ចេកវិទ្យាឌីជីថល ហើយប្រកាសនេះគឺដើម្បីគ្រប់គ្រងក្រុមហ៊ុនធ្វើអាជីវកម្មផ្ដល់សេវាតាមប្រព័ន្ធបច្ចេកវិទ្យាឌីជីថលសម្រាប់មធ្យោបាយដឹកជញ្ជូនផ្លូវគោកក្នុងព្រះរាជាណាចក្រកម្ពុជា។ ក្រុមហ៊ុនផ្ដល់សេវាតាមប្រព័ន្ធបច្ចេកវិទ្យាឌីជីថល សំដៅដល់ក្រុមហ៊ុនដែលបានបង្កើត App ផ្ទាល់ខ្លួន ដើម្បីផ្គូរផ្គង/ស្វែងរកអ្នកបើកបរយានយន្តដែលមានបំណងចង់ចូលរួមជាសមាជិករបស់ក្រុមហ៊ុនដើម្បីផ្ដល់សេវាដឹកជញ្ជូនអ្នកដំណើរតាមផ្លូវគោក ក្រុមហ៊ុនផ្ដល់សេវាតាមប្រព័ន្ធបច្ចេកវិទ្យាឌីជីថល ពុំមានមធ្យោបាយដឹកជញ្ជូនផ្ទាល់ខ្លួនរបស់ក្រុមហ៊ុនទេ ដោយពឹងផ្អែកទាំងស្រុងទៅលើសមាជិករបស់ក្រុមហ៊ុន អតិថិជនដែលមានតម្រូវការក្នុងការធ្វើដំណើរ អាចស្វែងរកមធ្យោបាយធ្វើដំណើរតាមរយៈការកក់ (Booking) ប្រើប្រាស់ App របស់ក្រុមហ៊ុន៕

ពិធីប្រគល់-ទទួលសម្ភារៈផ្សព្វផ្សាយអប់រំសម្រាប់ការលើកកម្ពស់សុវត្ថិភាពចរាចរណ៍ផ្លូវគោក ពីតំណាងអង្គការមូលនិធិបង្ការរបួសអាស៊ីប្រចាំកម្ពុជា និងក្រុមហ៊ុន ព្រូដិនសលកម្ពុជា

ទីស្តីការក្រសួង ៖ នាថ្ងៃពុធ ទី២៧ ខែឧសភា ឆ្នាំ២០២៦ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ចរាចរណ៍ផ្លូវគោក បានអញ្ជើញជាអធិបតីក្នុងពិធីប្រគល់-ទទួលសម្ភារៈផ្សព្វផ្សាយអប់រំសម្រាប់ការលើកកម្ពស់សុវត្ថិភាពចរាចរណ៍ផ្លូវគោក ពីតំណាងអង្គការមូលនិធិបង្ការរបួសអាស៊ីប្រចាំកម្ពុជា និងក្រុមហ៊ុន ព្រូដិនសលកម្ពុជា។

ពិធីនេះ ក៏មានការអញ្ជើញចូលរួមពី ឯកឧត្តម ម៉ា ស៊ុនហ៊ួត អនុរដ្ឋលេខាធិការ ក្រសួងសាធារណការ និងដឹកជញ្ជូន លោកអគ្គនាយករង នៃអគ្គនាយកដ្ឋានដឹកជញ្ជូនផ្លូវគោក លោកប្រធាននាយកដ្ឋានសុវត្ថិភាពចរាចរណ៍ផ្លូវគោក លោកប្រធានមន្ទីរសាធារការ និងដឹកជញ្ជូនខេត្តកណ្តាល លោកអនុប្រធានមន្ទីរសាធារការ និងដឹកជញ្ជូនរាជធានីភ្នំពេញ មន្ត្រីអគ្គលេខាធិការដ្ឋាន គ.ស.ច.គ. បុគ្គលិកអង្គការមូលនិធិបង្ការរបួសអាស៊ីប្រចាំកម្ពុជា និងក្រុមហ៊ុន ព្រូដិនសលកម្ពុជា សរុប១៦នាក់។

លោកជំទាវអគ្គលេខាធិការ បានសម្តែងការកោតសរសើរ និងថ្លែងអំណរគុណយ៉ាងជ្រាលជ្រៅដល់អង្គការមូលនិធិបង្ការរបួសអាស៊ី និងក្រុមហ៊ុន ព្រូដិនសល ដែលបានឧបត្ថម្ភសម្ភារៈសុវត្ថិភាពនូវមួកសុវត្ថិភាពចំនួន២០០មួក និងបដារសារសុវត្ថិភាពចំនួន ១២០បដារ សម្រាប់ការងារអប់រំផ្សព្វផ្សាយសុវត្ថិភាពចរាចរណ៍។ តំណាងអង្គការ និងក្រុមហ៊ុន បានប្តេជ្ញាចិត្តក្នុងការកៀរគរដៃគូរពាក់ព័ន្ធឱ្យចូលរួមឧបត្ថម្ភគាំទ្រសម្ភារៈសុវត្ថិភាពបន្ថែម ដើម្បីជំរុញលើកកម្ពស់សុវត្ថិភាពចរាចរណ៍នៅតាមគោលដៅសំខាន់ៗទូទាំងរាជធានី-ខេត្ត៕

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោកជំទាវ អញ្ជើញចូលរួមពិធីបើកយុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦ និងពិធីសំណេះសំណាលជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជា

រាជធានីភ្នំពេញ៖ ព្រឹកថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោកជំទាវ អញ្ជើញចូលរួមពិធីបើកយុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦ និងពិធីសំណេះសំណាលជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជា ក្រោមអធិបតីភាព លោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា។

កិច្ចប្រជុំពិនិត្យ និងពិភាក្សាលើផែនទីបង្ហាញផ្លូវ នៃកិច្ចសហប្រតិបត្តិការរវាងក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដឹកជញ្ជូន និងហេដ្ឋារចនាសម្ព័ន្ធ នៃសាធារណរដ្ឋតួកគី

ទីស្ដីការក្រសួង៖ នាថ្ងៃពុធ ថ្ងៃទី២៧ ខែឧសភា ឆ្នាំ២០២៦ ឯកឧត្ដម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំក្រុមការងារសម្រាប់អនុវត្តអនុស្សរណៈនៃការយោគយល់គ្នា រវាងក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដឹកជញ្ជូន និងហេដ្ឋារចនាសម្ព័ន្ធ នៃសាធារណរដ្ឋតួកគី ស្ដីពីកិច្ចសហប្រតិបត្តិការក្នុងការប្រើប្រាស់របៀងដឹកជញ្ជូនអន្តរជាតិ (MOU)។

កិច្ចប្រជុំនេះមានគោលបំណងពិនិត្យ និងពិភាក្សាលើសេចក្ដីព្រាងផែនទីបង្ហាញផ្លូវ (Roadmap) នៃកិច្ចសហប្រតិបត្តិការរវាងក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដឹកជញ្ជូន និងហេដ្ឋារចនាសម្ព័ន្ធនៃសាធារណរដ្ឋតួកគី ក្រោមក្របខណ្ឌ MOU ដែលត្រូវបានចុះហត្ថលេខាកាលពីឆ្នាំ២០២៥ កន្លងទៅ។

តាមរយៈកិច្ចប្រជុំនេះ ឯកឧត្តមរដ្ឋលេខាធិការ បានណែនាំដល់អង្គភាពពាក់ព័ន្ធទាំងអស់ឱ្យពិនិត្យនូវសេចក្តីព្រាង Roadmap ហើយត្រូវរៀបចំស្នើសុំកែសម្រួលក្នុងករណីមានសំណូមពរបន្ថែមនូវសកម្មភាពក្នុងការពង្រឹងកិច្ចសហប្រតិបត្តិការក្នុងវិស័យរបស់ខ្លួនជាមួយភាគីតួកគី។

សូមបញ្ជាក់ជូនផងដែរថា តាមការគ្រោងទុក ក្រសួងសាធារណការ និងដឹកជញ្ជូនកម្ពុជា នឹងរៀបចំធ្វើជាម្ចាស់ផ្ទះប្តូរវេន សម្រាប់រៀបចំកិច្ចប្រជុំលើកទី២ នៃក្រុមការងារចម្រុះ កម្ពុជា-គួកគី សម្រាប់អនុវត្ត MOU ខាងលើ នៅអំឡុងខែកក្កដា ឆ្នាំ២០២៦ ខាងមុខនេះ៕

សកម្មភាពការងារថ្ងៃទី២៥ - ២៦ ឧសភា ២០២៦ របស់ក្រុមការងារមន្ទីរសាធារណការ និងដឹកជញ្ជូន រាជធានី-ខេត្តបានចុះជួសជុលថែទាំកំណាត់ផ្លូវជាតិ តាមបណ្ដាខេត្ត

នៅថ្ងៃទី២៥ - ២៦ ឧសភា ២០២៦ ក្រុមការងារមន្ទីរសាធារណការ និងដឹកជញ្ជូន ខេត្តស្ទឹងត្រែង សៀមរាប បន្ទាយមានជ័យ ឧត្តរមានជ័យ ក្រចេះ រតនគិរី មណ្ឌលគិរី កំពង់ឆ្នាំង កំពង់ធំ ពោធិ៍សាត់ បាត់ដំបង ប៉ៃលិន កំពត កែប កំពង់ស្ពឺ ព្រះសីហនុ កោះកុង កណ្តាល តាកែវ ត្បូងឃ្មុំ កំពង់ចាម ស្វាយរៀង ព្រៃវែង និងខេត្តព្រះវិហារ បានចុះជួសជុលថែទាំលើផ្លូវជាតិសំខាន់ៗ នៅតាមបណ្ដាខេត្តរបស់ខ្លួន។
សកម្មភាពជួសជុលថែទាំជាប្រចាំនេះ ធ្វើនៅលើកំណាត់ផ្លូវទាំងឡាយណា ដែលបានខូចខាត និងមានជង្ហុកសំបុកមាន់ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ឱ្យកាន់តែមានភាពងាយស្រួល និងការដឹកជញ្ជូនទំនិញឆ្លងកាត់ បានចំណេញពេលវេលា ចំណេញថវិកា ព្រមទាំងបង្កើននូវសោភ័ណភាពតាមដងផ្លូវផងដែរ៕
:: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT)
- Facebook: https://www.facebook.com/mpwt.gov.kh
- Telegram: https://t.me/mpwtnews
- TikTok: https://www.tiktok.com/.tiktok

កិច្ចប្រជុំពិភាក្សាអន្តរក្រសួងស្តីពី បណ្ណបើកបរទម្រង់ឌីជីថល និង DG Super App

ទីស្ដីការក្រសួង៖ នាព្រឹកថ្ងៃពុធ ទី២៧ ខែឧសភា ឆ្នាំ២០២៦ ឯកឧត្ដម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញដឹកនាំកិច្ចប្រជុំអន្តរក្រសួងពិភាក្សាស្តីពី បណ្ណបើកបរទម្រង់ឌីជីថល និង DG Super App ដោយមានការអញ្ជើញចូលរួមពីថ្នាក់ដឹកនាំ និងមន្ត្រីជំនាញ នៃអគ្គនាយកដ្ឋានដឹកជញ្ជូនផ្លូវគោក និងអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន តំណាងគណៈកម្មាធិការរដ្ឋាភិបាលឌីជីថល នៃក្រសួងប្រៃសណីយ៍ និងទូរគមនាគមន៍ និងតំណាងអគ្គស្នងការដ្ឋាននគរបាលជាតិ នៃក្រសួងមហាផ្ទៃ ផងដែរ។

ពិធីសំណេះសំណាលជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជា ក្រោមអធិបតីភាព លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា នឹងប្រព្រឹត្តទៅនៅថ្ងៃទី២៨ ខែឧសភា ឆ្នាំ២០២៦ ខាងមុខនេះ។

ឯកឧត្តម-លោកជំទាវ លោក-លោកស្រី ដែលមានបំណងចូលរួមក្នុងយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ សម្រាប់កុមារកម្ពុជា របស់មូលនិធិគន្ធបុប្ផាកម្ពុជា សូមធ្វើការបរិច្ចាគថវិកាតាមរយៈ QR Code ដូចមានគោរពជូនភ្ជាប់មកជាមួយ។