គណបក្សប្រជាជនកម្ពុជា ឃុំប្រាសាទ

ថ្ងៃសៅរ៍ ៣កើត ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី២១ ខែមីនា ឆ្នាំ២០២៦ សមាជិកក្រុមការងារគណបក្សនៃនាយកដ្ឋានសេវាធនាគារ នៃធនាគារជាតិនៃកម្ពុជា ចុះមូលដ្ឋានឃុំប្រាសាទ បានចុះសួរសុខទុក្ខគ្រួសារ អ្នកស្រី ភៀង ណន ស្រ្តីមេម៉ាយមានជីវភាពខ្វះខាត ដែលធ្លាប់រងគ្រោះថ្នាក់ចរាចរធ្ងន់ធ្ងរ និងមានកូនស្រីម្នាក់ក្នុងបន្ទុក និងគ្រួសារដែលរងគ្រោះដោយភ្លើងឆេះផ្ទះចំនួន ៣គ្រួសារ កាលពីថ្ងៃទី៦ ខែមីនា ឆ្នាំ២០២៦ នៅភូមិស៊ីវុត្ថា ឃុំប្រាសាទ ស្រុកសន្ទុក ខេត្តកំពង់ធំ។

នាព្រឹកថ្ងៃអាទិត្យ ១៥ រោច ខែបុស្ស ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៨ ខែមករា ឆ្នាំ២០២៦ លោក ប្រាក់ សុសេរីវុធ អនុប្រធាននាយកដ្ឋានសេវាធនាគារ នៃអគ្គនាយកដ្ឋានប្រតិបត្តិការ ធនាគារជាតិនៃកម្ពុជា និងជាសមាជិកក្រុមការងារធនាគារជាតិនៃកម្ពុជា ចុះមូលដ្ឋានឃុំប្រាសាទ ស្រុកសន្ទុក ខេត្តកំពង់ធំ បានចុះជួបសំណេះសំណាល សួរសុខទុក្ខ និងពាំនាំអំណោយមួយចំនួន ដល់សមាជិក-សមាជិកា គណបក្សឃុំ និងចូលរួមកិច្ចប្រជុំជីវភាពបូកសរុបប្រចាំខែធ្នូ ឆ្នាំ២០២៥ និងទិសដៅការងារខែមករា ឆ្នាំ២០២៦ របស់គណៈកម្មាធិការគណបក្សប្រជាជនកម្ពុជា ឃុំប្រាសាទ ដែលមានសមាជិក-សមាជិកាចូលរួមសរុបចំនួន ៣០ រូប។

សាររបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ប្រធានគណបក្សប្រជាជនកម្ពុជា ក្នុងឱកាសរំឭកខួបទី៤៧ នៃទិវាជ័យជម្នះ ៧មករា

Message from Samdech Akka Moha Sena Padei Techo Hun Sen President of the Senate of the Kingdom of Cambodia, President of the Cambodian People’s Party On the Occasion of the 47th Anniversary of the 7 January Victory Day

នាព្រឹកថ្ងៃសៅរ៍ ១កើត ខែបុស្ស ឆ្នាំម្សាញ់ សប្តស័ក ព.ស. ២៥៦៩ត្រូវនឹងថ្ងៃទី២០ ខែធ្នូ ឆ្នាំ២០២៥ លោក អេង សុភា ប្រធាននាយកដ្ឋានសេវាធនាគារ នៃអគ្គនាយកដ្ឋានប្រតិបត្តិការ ធនាគារជាតិនៃកម្ពុជា និងជាអនុប្រធានក្រុមការងារចុះមូលដ្ឋានឃុំប្រាសាទ និងសហការី តំណាងដ៏ខ្ពង់ខ្ពស់របស់លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា បានអញ្ជើញចុះសួរសុខទុក្ខគ្រួសារកងទ័ពចំនួន ១១ គ្រួសារ និងគ្រួសារភៀសសឹកចំនួន៥៤គ្រួសារ ដោយបាននាំយកគ្រឿងឧបភោគនិងបរិភោគ ដែលរួមមាន អង្ករ មី ទឹកត្រី ទឹកស៊ីអ៊ីវ ស្ករស អំបិល និងថវិកាមួយចំនួន ដែលជាអំណោយដ៏ថ្លៃថ្លារបស់លោកជំទាវបណ្ឌិត ជា សិរី។

នាព្រឹកថ្ងៃអង្គារ ១២កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី០២ ខែធ្នូ ឆ្នាំ២០២៥ លោក អ៊ុក សារ៉ាត អគ្គនាយករងនៃអគ្គនាយកដ្ឋានប្រតិបត្តិការ ធនាគារជាតិនៃកម្ពុជា និងជាអនុប្រធានក្រុមការងារចុះមូលដ្ឋានឃុំប្រាសាទ ស្រុកសន្ទុក ខេត្តកំពង់ធំ បានអញ្ជើញចូលរួមជាអធិបតីភាព ក្នុងពិធីមិទ្ទីញអបអរសាទរខួបអនុស្សាវរីយ៍លើកទី ៤៧ (២ ធ្នូ ១៩៧៨ - ២ ធ្នូ ២០២៥) ទិវាកំណើត "រណសិរ្សសាមគ្គី សង្រ្គោះជាតិកម្ពុជា” ដែលបច្ចុប្បន្នត្រូវបានប្តូរឈ្មោះជា “រណសិរ្សសាមគ្គី អភិវឌ្ឍន៍មាតុភូមិកម្ពុជា” ដោយមានការចូលរួមពីសមាជិក-សមាជិកា ក្រុមការងារគណបក្ស ស្រុក ឃុំ ប្រជាពលរដ្ឋ និងសិស្សានុ- សិស្សសរុបចំនួន ២០០ នាក់ ។ ២ ធ្នូជាថ្ងៃប្រវត្តិសាស្រ្ត ដែលកម្លាំងអ្នកសេ្នហាជាតិមកពីគ្រប់ទិសទី ទាំងក្នុង និងក្រៅប្រទេស រួបរួមគ្នាក្រោកឈរឡើងប្រកាសបង្កើតរណសិរ្ស ដែលបានដឹកនាំការតស៊ូ រំដោះជាតិ មាតុភូមិ និងប្រជាជនកម្ពុជា ពីគ្រោះមហន្តរាយ និងការកាប់សម្លាប់ នៃរបបកម្ពុជាប្រជាធិតេយ្យ របស់បនប្រល័យពូជសាសន៍ ប៉ុល ពត រហូតទទួលបានជ័យជម្នះជាប្រវត្តិសាស្រ្ត នៅថ្ងៃទី៧ ខែមករា ឆ្នាំ១៩៧៩។ ២ធ្នូ គឺជាមរតកជាអមតៈតជំនាន់ នៃស្មារតីពួតដៃគ្នាបញ្ចប់សង្រ្គាម បង្រួបបង្រួមជាតិ ផ្សះផ្សារជាតិ ឯកភាពជាតិ សម្រាប់មាគ៌ាឆ្ពោះទៅការកសាង និងអភិវឌ្ឍកម្ពុជារុងរឿង ។

នាព្រឹកថ្ងៃអាទិត្យ ៥រោច ខែអស្សុជ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី១២ ខែតុលា ឆ្នាំ២០២៥ សមាជិកក្រុមការងារគណបក្សចុះមូលដ្ឋានឃុំប្រាសាទ នៃនាយកដ្ឋានសេវាធនាគារ ធនាគារជាតិនៃកម្ពុជា ចំនួន ៤រូប ដឹកនាំដោយលោកស្រី ហោ កន្នីកា បានជួបប្រជុំជីវភាពប្រចាំខែជាមួយគណបក្សឃុំប្រាសាទដឹកនាំដោយលោក យេត ហុន អំពីរបាយការណ៍បូកសរុបការងារត្រួតពិនិត្យគណបក្សឃុំប្រសាទ ប្រចាំខែកញ្ញា និងទិសដៅបន្តខែតុលា ឆ្នាំ២០២៥។

កាលពីរសៀលថ្ងៃសៅរ៍ ១៥កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ត្រូវនឹងថ្ងៃទី៩ ខែសីហា ឆ្នាំ២០២៥ ក្រុមការងារធនាគារជាតិនៃកម្ពុជា ដឹកនាំដោយ ឯកឧត្តម គីមទី កោមលី តំណាងដ៏ខ្ពង់ខ្ពស់លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា បានអញ្ជើញចូលរួមជាអធិបតី ពិធីបញ្ចុះបឋមសិលាសាងសង់អគារសិក្សា នៅសាលាបឋមសិក្សាត្បែងសង្រ្គោះ ស្ថិតនៅភូមិត្បែងសង្រ្គោះ ឃុំប្រាសាទ ស្រុកសន្ទុក ខេត្តកំពង់ធំ។

អគារសិក្សាថ្មី ១ ខ្នងមាន ៥បន្ទប់នេះ ជាអំណោយដ៏ថ្លៃថ្លារបស់លោកជំទាវបណ្ឌិត ជា សិរី អគ្គទេសាភិបាល ធនាគារជាតិនៃកម្ពុជា។ ក្នុងឱកាសនោះ ឯកឧត្តម គីមទី កោមលី និងក្រុមការងារ ក៏បាននាំយកអំណោយនិងថវិកាដ៏ថ្លៃថ្លារបស់លោកជំទាវបណ្ឌិត ជា សិរី សម្រាប់ជូនសិស្សានុសិស្ស លោកគ្រូ អ្នកគ្រូ និងប្រជាពលរដ្ឋ សរុបចំនួន ១០០នាក់។

នាព្រឹកថ្ងៃសៅរ៍ ១៥កើត ខែស្រាពណ៍ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី៩ ខែសីហា ឆ្នាំ២០២៥ លោកស្រី កែ សុឃឿន សមាជិកក្រុមការងារគណបក្សចុះមូលដ្ឋានឃុំប្រាសាទ បានចុះជួបសំណេះសំណាល និងចែករំលែកចំណេះដឹងអំពីសេវាហិរញ្ញវត្ថុផ្លូវការ និងពន្យល់អំពីហានិភ័យនៃការប្រើប្រាស់កម្ចីក្រៅផ្លូវការជូនប្រជាពលរដ្ឋក្នុងភូមិស្រែតាកោ ចំនួន៤៥ គ្រួសារ។

លោកជំទាវ ជា សិរី អគ្គទេសាភិបាលធនាគារជាតិនៃកម្ពុជា នៅថ្ងៃទី២៩ ខែកក្កដា ឆ្នាំ២០២៥ នេះ អញ្ជើញចុះសួសុខទុក្ខ និងយកអំណោយចែកជូនគ្រួសារពលករ និងជនភៀសសឹកមកពីតំបន់មានជម្លោះចំនួន ៣២៧ គ្រួសារ នៅស្រុកសន្ទុក ខេត្តកំពង់ធំ។ ក្នុងជំនួបសំណេះសំណាលនោះ លោកជំទាវ បានលើកឡើងថា ថ្ងៃនេះប្រទេសជាតិយើងបានបញ្ចប់សង្គ្រាមហើយ ដោយសារការ ខិតខំពីរាជរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត ពិសេសសម្ដេចសម្ដេចអគ្គមហាធិបតីសេនាតេជោ ហ៊ុន សែន និងការលះបង់ខ្ពស់ ប្រកបដោយភាពអង់អាចក្លាហាន តស៊ូ របស់វិរៈយុទ្ធជនកម្ពុជា នៅតាមបន្ទាត់ព្រំដែនកម្ពុជា-ថៃ។

លោកជំទាវបានបន្តថា នៅចំពោះមុខនេះ បងប្អូនត្រូវជឿជាក់លើការដឹកនាំរបស់រាជរដ្ឋាបាល ដែលកំពុងបន្តធ្វើនិងការគិតគូរ ការរស់នៅរបស់ប្រជាជនភៀសសឹក នៅតាមទីសុវត្ថិភាព។ បញ្ហានេះយើងត្រូវចងចាំថា សន្តិភាពពិតមានតម្លៃមិនអាចកាត់ថ្លៃបាន ដែលយើងត្រូវរួមគ្នាថែរក្សា ការពារឲ្យបានដាច់ខាត និងដឹកគុណចំពោះស្ថាបនិកឯកសន្តិភាពយើង គឺសម្ដេចតេជោសែន។ ក្នុងពិធីនោះ លោកជំទាវ បានស្នើដល់ពលករឲ្យពិនិត្យមើលលទ្ធភាពការងារនៅស្រុក បើគិតថាការងារមួយណាស្របតាមជំនាញរបស់ខ្លួន គួរចៀសវាងការធ្វើចំណាកស្រុក ខណៈបច្ចុប្បន្នកម្ពុជាកំពុងមានតម្រូវការការងារជាច្រើនកន្លែង។

លោកជំទាវបណ្ឌិត ជា សិរី បានបញ្ជាក់ដែរថា អំណោយដែលបាននាំយកចែកជូននាពេលនេះ ទោះបីមានភាពស្តូចស្តើង តែបានបង្ហាញ និងកើតចេញពីបេះដួងខ្មែរពិតៗ ខ្មែរជួយខ្មែរនៅក្នុងគ្រាជួបការលំបាក, យើងពិតជាអរគុណសន្តិភាព អរគុណរាជរដ្ឋា ភិបាល ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងការបញ្ចប់សង្គ្រាមជាមួយប្រទេសជិតខាង។ សូមបញ្ជាក់ថា អំណោយដែលយកទៅចែកជូនដល់គ្រួសារពលករ និងភៀសឹកទាំង​ ៣២៧គ្រួសាររួមមាន អង្ករ, ទឹកស៊ីអីវ, ទឹកត្រី, អំបិល, ស្ករស ពងមាន់ និងថវិកាមួយចំនួនផងដែរ៕