MEF Private Sector Development Working Group

MEF Private Sector Development Working Group ទំព័រផ្លូវការរបស់ក្រុមការងារអភិវឌ្ឍវិស័យឯកជននៃក្រសួងសេដ្ឋកិច្ច និង ហិរញ្ញវត្ថុ

ក្រសួងសេដ្ឋកិច្ច និង ហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ រៀបចំពិធីនមស្ការព្រះរតនត្រ័យ សមាទានសីល និមន្តព្រះស...
07/10/2026

ក្រសួងសេដ្ឋកិច្ច និង ហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ រៀបចំពិធីនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និង សម្តែងព្រះធម៌ទេសនា ក្នុងឱកាសពិធីបុណ្យកាន់បិណ្ឌវេនទី ១២ នៅវត្តបុទុមវតីរាជវរារាម
----------

នារសៀល ថ្ងៃពុធ ១១ រោច ខែ ភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី ៧ ខែតុលា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ តំណាងដ៏ខ្ពង់ខ្ពស់ ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្រ្ដី រដ្ឋមន្រ្ដីក្រសួងសេដ្ឋកិច្ច និង ហិរញ្ញវត្ថុ និងជាប្រធានឧត្តមក្រុមប្រឹក្សាសេដ្ឋកិច្ចជាតិ, បានអញ្ជើញជាអធិបតីក្នុងពិធីនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និង សម្តែងព្រះធម៌ទេសនា ក្នុងឱកាសពិធីបុណ្យកាន់បិណ្ឌវេនទី ១២ នៅវត្តបុទុមវតីរាជវរារាម ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ និង មន្ត្រីរាជការ ក្រោមឱវាទក្រសួងសេដ្ឋកិច្ច និងហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ ព្រមទាំងភ្ញៀវកិត្តិយសជាពុទ្ធបរិស័ទមកពីទីជិតឆ្ងាយ ។

ពិធីបុណ្យភ្ជុំបិណ្ឌ ជាពិធីបុណ្យបែបព្រះពុទ្ធសាសនា និង ជាពិធីបុណ្យមួយក្នុងចំណោមពិធីបុណ្យធំៗនានា ដែលប្រជាជនខ្មែរតែងតែប្រារព្ធឡើងជារៀងរាល់ឆ្នាំតាំងពីបរមបុរាណ ហើយជារៀងរាល់ឆ្នាំនារដូវបុណ្យភ្ជុំ, ក្រសួងសេដ្ឋកិច្ច និងហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ តែងទទួលកាន់បិណ្ឌវេនទី ១២ នៅវត្តបទុមវតីរាជវរារាម ដើម្បីនាំយកបច្ច័យបុណ្យ និង គ្រឿងបរិក្ខារមួយចំនួនទៀត វេរប្រគេនថ្វាយដល់ព្រះសង្ឃ ដែលជាសទ្ធាជ្រះថ្លារបស់ថ្នាក់ដឹកនាំ និង មន្ត្រីរាជការ នៃគ្រប់អង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ ក្នុងគោលបំណងបន្តចូលរួមប្រតិបត្តិនូវ ជំនឿប្រពៃណី និង ទំនៀមទម្លាប់ជាតិ ក្នុងការឧទ្ទិសកុសល និង ផលបុណ្យ ជូនចំពោះដូនតា បុព្វការីជន និង ញាតិសន្តាន ដែលបានចែកឋានទៅកាន់បរលោក ព្រមទាំងយុទ្ធជន យុទ្ធនារី ដែលបានពលីជីវិតក្នុងបុព្វហេតុជាតិមាតុភូមិ ។

នាវេលាដ៏នក្ខត្តឫក្សនេះ, ឯកឧត្តមបណ្ឌិតសភាចារ្យ បានប្រគេនថ្វាយថវិកាបច្ច័យព្រះធម្មទេសនា ដែលជាសទ្ធាជ្រះថ្លារបស់ថ្នាក់ដឹកនាំ និង មន្ត្រីរាជការនៃគ្រប់អង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ និង ឧត្តមក្រុមប្រឹក្សាសេដ្ឋកិច្ចជាតិ ដែលជាការចូលរួមចំណែកក្នុងការទ្រទ្រង់ព្រះពុទ្ធសាសនា តាមគន្លងប្រពៃណីទំនៀមទម្លាប់ជាតិ ៕

ក្រសួងសេដ្ឋកិច្ច និងហិរញ្ញវត្ថុ រៀបចំសិក្ខាសាលាស្តីពី «ការវាយតម្លៃក្របខណ្ឌគ្រប់គ្រង និងអភិវឌ្ឍន៍ធនធានមនុស្ស ឆ្នាំ២០២៤-២០...
07/10/2026

ក្រសួងសេដ្ឋកិច្ច និងហិរញ្ញវត្ថុ រៀបចំសិក្ខាសាលាស្តីពី «ការវាយតម្លៃក្របខណ្ឌគ្រប់គ្រង និងអភិវឌ្ឍន៍ធនធានមនុស្ស ឆ្នាំ២០២៤-២០២៨ របស់ក្រសួងសេដ្ឋកិច្ចនិងហិរញ្ញវត្ថុ សម្រាប់ការអនុវត្តពាក់កណ្តាលអាណត្តិ ផ្សារភ្ជាប់ជាមួយវិធានការគន្លឹះនៃកម្មវិធីកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា»
----------

នារសៀលថ្ងៃទី ៦ ខែតុលា ឆ្នាំ ២០២៦ នៅសណ្ឋាគារសុខាភ្នំពេញ, ក្រសួងសេដ្ឋកិច្ច និងហិរញ្ញវត្ថុ បានបន្តរៀបចំសិក្ខាសាលាស្តីពី «ការវាយតម្លៃក្របខណ្ឌគ្រប់គ្រង និងអភិវឌ្ឍន៍ធនធានមនុស្ស ឆ្នាំ២០២៤-២០២៨ របស់ក្រសួងសេដ្ឋកិច្ចនិងហិរញ្ញវត្ថុ សម្រាប់ការអនុវត្តពាក់កណ្តាលអាណត្តិផ្សារភ្ជាប់ជាមួយវិធានការគន្លឹះនៃកម្មវិធីកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា» ។

ពិធីបិទសិក្ខាសាលានេះ បានប្រព្រឹត្តទៅក្រោមអធិបតីភាព ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាតំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ដែលជាថ្នាក់ដឹកនាំ មន្ត្រីរាជការ និង តំណាងមកពីគ្រប់អង្គភាពក្រោមឱវាទ និង ក្រោមអាណាព្យាបាលក្រសួងសេដ្ឋកិច្ច និងហិរញ្ញវត្ថុ សរុបប្រមាណ ៤០០ នាក់ ។

ឯកឧត្តមបណ្ឌិតសភាចារ្យ បានគូសរំលេចថា សិក្ខាសាលារយៈពេលពីរថ្ងៃនេះ បានបង្កើតជាវេទិកាដ៏មានសារៈសំខាន់ សម្រាប់ការជជែក ពិភាក្សា និង ផ្លាស់ប្តូរយោបល់ ដើម្បីស្វែងយល់ឱ្យកាន់តែស៊ីជម្រៅអំពី ខ្លឹមសារ យន្តការអនុវត្ត និង យន្តការតាមដាន និង វាយតម្លៃ ការអនុវត្តក្របខណ្ឌគ្រប់គ្រង និង អភិវឌ្ឍន៍ធនធានមនុស្សឆ្នាំ ២០២៤-២០២៨ របស់ក្រសួងសេដ្ឋកិច្ច និងហិរញ្ញវត្ថុ ដោយភាពប្រទាក់ក្រឡាជាមួយនឹងវិធានការគន្លឹះ នៃកម្មវិធីកែទម្រង់រដ្ឋបាលសាធារណៈ របស់រាជរដ្ឋាភិបាល ។

ជាមួយគ្នានេះ, ឯកឧត្តមបណ្ឌិតសភាចារ្យ បានស្នើឱ្យគ្រប់អង្គភាពក្រោមឱវាទ និង ក្រោមអាណាព្យាបាលក្រសួង ត្រូវបន្ដយកចិត្តទុកដាក់ចូលរួមសហការឱ្យបានពេញលេញ ជាមួយក្រុមការងារកែទម្រង់រដ្ឋបាលសាធារណៈប្រចាំក្រសួង លើការងារពិនិត្យឡើងវិញ និង វិភាគមុខងាររបស់ក្រសួង តាមរយៈការធ្វើបច្ចុប្បន្នភាពរចនាសម្ព័ន្ធជាក់ស្ដែង និង ការធ្វើជំរឿនមន្ត្រីតាមរចនាសម្ព័ន្ធ និង ការរៀបចំការកំណត់និងការពិពណ៌នាមុខតំណែងវិជ្ជាជីវៈជាដើម ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា ដើម្បីឱ្យការអនុវត្តនីតិវិធីការងារគ្រប់គ្រងបុគ្គលិក ក៏ដូចជាសកម្មភាពគាំទ្រវិធានការគន្លឹះ ក្នុងការកែទម្រង់របស់រាជរដ្ឋាភិបាល អាចប្រព្រឹត្តទៅបានត្រឹមត្រូវ ប្រកបដោយសង្គតិភាព តម្លាភាព និង ប្រសិទ្ធភាព ចាំបាច់ត្រូវមានការចូលរួមពីបណ្ដាអង្គភាពទាំងអស់ ប្រកបដោយភាពស្មោះត្រង់ និង ការហ៊ានលះបង់ ។ ស្របតាមស្មារតីនេះ, ឯកឧត្តមបណ្ឌិតសភាចារ្យ បានស្នើឱ្យគ្រប់អង្គភាព បន្តចូលរួមសហការអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី និង ខ្លឹមសារដែលបានផ្សព្វផ្សាយក្នុងសិក្ខាសាលានេះ ប្រកបដោយភាពម្ចាស់ការ និង ស្មារតីទទួលខុសត្រូវខ្ពស់, ជាពិសេស ត្រូវតម្កល់ស្មារតី «ឧត្តមនិយម» នៃផលប្រយោជន៍រួម ដោយទុកដោយឡែកនូវប្រយោជន៍បុគ្គល ក្នុងពេលបំពេញការងារ ៕

ផ្សារមូលបត្រកម្ពុជា រៀបចំកិច្ចប្រជុំក្រុមប្រឹក្សាភិបាល លើកទី៣០ នៃអាណត្តិទី២----------នារសៀលថ្ងៃទី ៦ ខែតុលា ឆ្នាំ ២០២៦ នៅ...
07/10/2026

ផ្សារមូលបត្រកម្ពុជា រៀបចំកិច្ចប្រជុំក្រុមប្រឹក្សាភិបាល លើកទី៣០ នៃអាណត្តិទី២
----------

នារសៀលថ្ងៃទី ៦ ខែតុលា ឆ្នាំ ២០២៦ នៅអគារផ្សារមូលបត្រកម្ពុជា, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា (ផមក) បានដឹកនាំកិច្ចប្រជុំលើកទី៣០ នៃអាណត្តិទី២ របស់ក្រុមប្រឹក្សាភិបាលនៃ ផមក ដោយមានការអញ្ជើញចូលរួមពី ឯកឧត្តមប្រតិភូរាជរដ្ឋាភិបាលទទួលបន្ទុកជាអគ្គនាយក, សមាជិកក្រុមប្រឹក្សាភិបាល និង មន្រ្តីត្រួតពិនិត្យរដ្ឋ ព្រមទាំងថ្នាក់ដឹកនាំ និង មន្ត្រីជំនាញពាក់ព័ន្ធនៃ ផមក មួយចំនួន ។

អង្គប្រជុំ បានពិនិត្យពិភាក្សាលើរបៀបវារៈសំខាន់ៗមួយចំនួន រួមមាន៖
១. ការពិនិត្យអនុម័តលើការពិនិត្យលទ្ធភាពអាចចុះបញ្ជីលក់មូលបត្របំណុលរបស់ គ្រឹះស្ថាន មីក្រូហិរញ្ញវត្ថុ ហ្វឺស ហ្វាយនែន ភីអិលស៊ី,
២. ការពិនិត្យអនុម័តលើគម្រោងថវិកាប្រចាំឆ្នាំ២០២៧ របស់ ផមក និង
៣. របៀបរវារៈសំខាន់ផ្សេងៗ ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំកិច្ចប្រជុំអន្តរក្រសួង-ស្ថាប័ន ដើម្បីកំណត់ជំហររួមលើការផ្តល់កិច្ចគាំទ្រពិសេស ដល់គ...
02/10/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំកិច្ចប្រជុំអន្តរក្រសួង-ស្ថាប័ន ដើម្បីកំណត់ជំហររួមលើការផ្តល់កិច្ចគាំទ្រពិសេស ដល់គម្រោងពង្រីកការវិនិយោគបច្ចេកវិទ្យាស្នូល ក្នុងវិស័យកម្មន្តសាលបច្ចេកវិទ្យាខ្ពស់
----------

នាព្រឹកថ្ងៃទី ២ ខែតុលា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារអភិវឌ្ឍវិស័យឯកជន បានដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យបូកសរុបធាតុចូល និង កំណត់ជំហររួមលើកញ្ចប់វិធានការគាំទ្រពិសេស សម្រាប់គម្រោងពង្រីកការវិនិយោគផលិតកម្មបច្ចេកវិទ្យាស្នូល ក្នុងវិស័យកម្មន្តសាលបច្ចេកវិទ្យាខ្ពស់ ។

អញ្ជើញចូលរួមក្នុងកិច្ចប្រជុំនេះ រួមមាន ឯកឧត្តម លោកជំទាវ ជាថ្នាក់ដឹកនាំ និង តំណាងជាន់ខ្ពស់នៃក្រសួង-ស្ថាប័នពាក់ព័ន្ធ រួមមាន ក្រុមប្រឹក្សាអភិវឌ្ឍន៍កម្ពុជា, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍, ក្រសួងរ៉ែ និង ថាមពល, អាជ្ញាធរអគ្គិសនីកម្ពុជា, អគ្គនាយកដ្ឋានពន្ធដារ, អគ្គនាយកដ្ឋានគយ និង រដ្ឋាករកម្ពុជា, អគ្គនាយកដ្ឋានគោលនយោបាយ និង លេខាធិការដ្ឋានក្រុមការងារអភិវឌ្ឍវិស័យឯកជន ព្រមទាំងមន្រ្តីជំនាញពាក់ព័ន្ធ ។

ឯកឧត្តមបណ្ឌិតសភាចារ្យប្រធានអង្គប្រជុំ បានគូសបញ្ជាក់អំពីសារៈសំខាន់នៃការកៀរគរ និង ថែរក្សាវិនិយោគិនប្រកបដោយគុណភាព ដែលមានប្រវត្តិប្រតិបត្តិការល្អយូរអង្វែងនៅកម្ពុជា ។ ឯកឧត្តមបណ្ឌិតសភាចារ្យ បានសង្កត់ធ្ងន់ថា ការពិនិត្យផ្តល់កិច្ចគាំទ្រដល់គម្រោងពង្រីកផលិតកម្មបច្ចេកវិទ្យាស្នូល (Core Technology) នាពេលនេះ ត្រូវបានធ្វើឡើងដោយឈរលើគោលការណ៍ថ្លឹងថ្លែងគ្រប់ជ្រុងជ្រោយ សំដៅធានាឱ្យបាននូវឧត្តមភាពប្រកួតប្រជែងរបស់កម្ពុជា ក្នុងការទាក់ទាញទុនវិនិយោគខ្នាតធំ ទន្ទឹមនឹងការទាញយកផលប្រយោជន៍ជូនសង្គម-សេដ្ឋកិច្ចជាអតិបរមាសម្រាប់ប្រទេសជាតិ ។

តាមរយៈការពិនិត្យគ្រប់ជ្រុងជ្រោយលើទិដ្ឋភាពបច្ចេកទេស និង គតិយុត្ត, តំណាងក្រសួង-ស្ថាប័នពាក់ព័ន្ធ បានបង្ហាញការគាំទ្រ និង ផ្តល់កិច្ចសហការ ប្រកបដោយភាពទន់ភ្លន់ និង ភាពបត់បែនខ្ពស់ ដើម្បីជួយសម្របសម្រួល និង ដោះស្រាយសំណូមពរនានារបស់ក្រុមហ៊ុន ទាំងផ្នែកនីតិវិធីរដ្ឋបាល, ការផ្គត់ផ្គង់ហេដ្ឋារចនាសម្ព័ន្ធទឹក-អគ្គិសនី, កិច្ចសម្រួលពាណិជ្ជកម្ម និង ការលើកទឹកចិត្តផ្នែកសារពើពន្ធ ។ ជំហរគាំទ្រធុរកិច្ច (Pro-business) ដ៏មុតមាំនេះ មានគោលដៅផ្តល់ទំនុកចិត្តខ្ពស់ដល់វិនិយោគិន ក្នុងការសម្រេចចិត្តជ្រើសរើសកម្ពុជាជាមូលដ្ឋានយុទ្ធសាស្ត្រ សម្រាប់ផលិតគ្រឿងបង្គុំបច្ចេកវិទ្យាស្នូល ដែលមានកម្រិតភាពជាក់លាក់ខ្ពស់ សម្រាប់ផ្គត់ផ្គង់ទៅកាន់ទីផ្សារសកល ។

ទន្ទឹមនឹងការផ្តល់កិច្ចគាំទ្រ និង ការអនុគ្រោះជាពិសេសខាងលើ, អង្គប្រជុំ បានឯកភាពជាគោលការណ៍លើការស្នើសុំកញ្ចប់គាំទ្រពិសេសនេះជូនក្រុមហ៊ុន ដោយភ្ជាប់ជាមួយនឹងលក្ខខណ្ឌ និង កាតព្វកិច្ចជាក់លាក់មួយចំនួន រួមមាន៖ ការបណ្តាក់ទុនវិនិយោគជាក់ស្តែងតាមផែនការកំណត់, ការបណ្តុះបណ្តាលជំនាញបច្ចេកវិទ្យាខ្ពស់ ដល់កម្លាំងពលកម្ម និង វិស្វករខ្មែរទាំងក្នុង និង ក្រៅប្រទេស, ការផ្ទេរបច្ចេកវិទ្យា និង ការបង្កើតមន្ទីរពិសោធន៍ស្រាវជ្រាវ និង អភិវឌ្ឍន៍ (R&D), ការប្រើប្រាស់ធាតុចូលផលិតកម្មក្នុងស្រុក (Local Content) ព្រមទាំងការជួយទាក់ទាញឧស្សាហកម្មគាំដល់
ដល់ខ្សែច្រវាក់ផលិតកម្ម ឱ្យមកបោះទុនវិនិយោគនៅកម្ពុជា ។

កិច្ចប្រជុំនេះ បានបញ្ចប់ទៅដោយទទួលបាននូវលទ្ធផលជាផ្លែផ្កា និង ការឯកភាពលើជំហររួម សំដៅជំរុញឱ្យគម្រោងវិនិយោគបច្ចេកវិទ្យាខ្ពស់នេះ អាចលេចចេញជារូបរាងឡើង និង រួមចំណែកដល់ការធ្វើពិពិធកម្មឧស្សាហកម្ម ព្រមទាំងការលើកកម្ពស់កំណើនសេដ្ឋកិច្ចជាតិប្រកបដោយចីរភាព ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសមាគមឧស្សាហកម្មស៊ីម៉ងត៍កម្ពុជា----------នារសៀលថ្ងៃ...
29/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសមាគមឧស្សាហកម្មស៊ីម៉ងត៍កម្ពុជា
----------

នារសៀលថ្ងៃទី ២៩ ខែកញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារអភិវឌ្ឍវិស័យឯកជន បានទទួលជួបពិភាក្សាការងារជាមួយគណៈប្រតិភូសមាគមឧស្សាហកម្មស៊ីម៉ងត៍កម្ពុជា ដែលដឹកនាំដោយឯកឧត្តម ពុត ចន្តារិទ្ធ អគ្គលេខាធិការ នៃសមាគមឧស្សាហកម្មស៊ីម៉ងត៍កម្ពុជា ដោយបានពិភាក្សាអំពីវឌ្ឍនភាព និង ស្ថានភាពបច្ចុប្បន្ននៃឧស្សាហកម្មស៊ីម៉ងត៍កម្ពុជា ។

ជាកិច្ចចាប់ផ្តើម, ឯកឧត្តម ពុត ចន្តារិទ្ធ អគ្គលេខាធិការ នៃសមាគមឧស្សាហកម្មស៊ីម៉ងត៍កម្ពុជា បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ជាពិសេស ក្រសួងសេដ្ឋកិច្ច និង ហិរញ្ញវត្ថុ ដែលតែងបានគាំទ្រ និង ជំរុញឧស្សាហកម្មស៊ីម៉ងត៍ នៅព្រះរាជាណាចក្រកម្ពុជា ។ ទន្ទឹមនេះ, ឯកឧត្តមអគ្គលេខាធិការ បានគោរពរាយការណ៍ជូនអង្គជំនួបពិភាក្សា អំពីវឌ្ឍនភាព និង ស្ថានភាពបច្ចុប្បន្ននៃឧស្សាហកម្មស៊ីម៉ងត៍កម្ពុជា រួមទាំង បញ្ហាប្រឈមនានា ។

ឆ្លៀតក្នុងឱកាសនៃជំនួបនេះ, ឯកឧត្តមអគ្គលេខាធិការ នៃសមាគមឧស្សាហកម្មស៊ីម៉ងត៍កម្ពុជា បានណែនាំជូនឯកឧត្តមបណ្ឌិតសភាចារ្យ និង ក្រុមការងារអភិវឌ្ឍវិស័យឯកជន នូវសមាសភាពគណៈប្រតិភូក្រុមហ៊ុនឯកទេសខាងផលិតកំទេចឈើ និង បន្ទះឈើតូចៗ (Woodchips and Wood Pallets) ដែលមានចំណាប់អារម្មណ៍ក្នុងការស្វែងរកកាលានុវត្តភាពវិនិយោគ លើផលិតផលឈើដាំ និង ការកែច្នៃនៅព្រះរាជាណាចក្រកម្ពុជា ។

ឯកឧត្តមបណ្ឌិតសភាចារ្យ បានសម្តែងការស្វាគមន៍ចំពោះគណៈប្រតិភូនៃសមាគមឧស្សាហកម្មស៊ីម៉ងត៍កម្ពុជា និង គណៈប្រតិភូក្រុមហ៊ុន ព្រមទាំងបានបង្ហាញគោលជំហរក្នុងការចូលរួមផ្តល់ការសម្របសម្រួល និង លើកទឹកចិត្តពិសេសជូនក្រុមហ៊ុន ។ ទន្ទឹមនេះ, ឯកឧត្តមបណ្ឌិតសភាចារ្យ បានលើកទឹកចិត្តដល់ក្រុមហ៊ុន ក្នុងការបន្តពិភាក្សា និង សិក្សាស៊ីជម្រៅជាមួយភាគីពាក់ព័ន្ធ ដើម្បីស្វែងរកឱកាសសមស្របសម្រាប់កិច្ចសហប្រតិបត្តិការវិនិយោគ ក្នុងវិស័យកែច្នៃឈើដាំ និង កសិ-ឧស្សាហកម្មនៅកម្ពុជា ។

ជាចុងក្រោយ, ឯកឧត្តមបណ្ឌិតសភាចារ្យ បានថ្លែងអំណរគុណចំពោះគណៈប្រតិភូក្រុមហ៊ុនដែលមានចំណាប់អារម្មណ៍ ក្នុងការចាប់យកកាលានុវត្តភាពវិនិយោគ និង កិច្ចសហប្រតិបត្តិការ នៅព្រះរាជាណាចក្រកម្ពុជា និង ទន្ទឹងរង់ចាំការពង្រឹងភាពជាដៃគូកាន់តែរឹងមាំ ព្រមទាំងការប្រែក្លាយកិច្ចជំនួបនេះ ទៅជាគម្រោងវិនិយោគជាក់ស្តែង នាពេលអនាគត ៕

ក្រសួងសេដ្ឋកិច្ច និងហិរញ្ញវត្ថុ រៀបចំកិច្ចប្រជុំត្រួតពិនិត្យការអនុវត្តថវិកាពាក់កណ្ដាលឆ្នាំ ២០២៦ របស់ក្រសួងសេដ្ឋកិច្ច និង...
29/09/2026

ក្រសួងសេដ្ឋកិច្ច និងហិរញ្ញវត្ថុ រៀបចំកិច្ចប្រជុំត្រួតពិនិត្យការអនុវត្តថវិកាពាក់កណ្ដាលឆ្នាំ ២០២៦ របស់ក្រសួងសេដ្ឋកិច្ច និងហិរញ្ញវត្ថុ
----------

នាព្រឹកថ្ងៃទី ២៨ ខែកញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារថវិកាកម្រិតថ្នាក់ដឹកនាំអង្គភាពថវិកា នៃក្រសួងសេដ្ឋកិច្ចនិងហិរញ្ញវត្ថុ, តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្រ្តី បានដឹកនាំកិច្ចប្រជុំត្រួតពិនិត្យការអនុវត្តថវិកាពាក់កណ្ដាលឆ្នាំ ២០២៦ របស់ក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ ជាថ្នាក់ដឹកនាំសម្របសម្រួល និងគាំទ្រប្រធានកម្មវិធី, ឯកឧត្តម លោកជំទាវ លោក លោកស្រី ជាប្រធាន ឬ តំណាងនៃអង្គភាពថវិកានៃ កសហវ. សរុបប្រមាណ ១៧០ រូប ។

កិច្ចប្រជុំត្រួតពិនិត្យការអនុវត្តថវិកាពាក់កណ្តាលឆ្នាំ ត្រូវបានរៀបចំឡើងក្នុងគោលបំណង៖
១. តាមដាន និង វាយតម្លៃសមិទ្ធកម្ម និង លទ្ធផលនៃការអនុវត្តថវិកាប្រចាំឆមាសទី ១ ដែលអង្គភាពថវិកានៃ កសហវ. សម្រេចបាន, និង សមិទ្ធកម្មជារួមរបស់ក្រសួង
២. កំណត់បញ្ហាប្រឈម និង ស្នើដំណោះស្រាយ ដើម្បីជំរុញការអនុវត្តបន្តនៅឆមាសទី ២ ឱ្យកាន់តែមានប្រសិទ្ធភាព
៣. បំពេញតាមលក្ខខណ្ឌតម្រូវនៃបទដ្ឋានគតិយុត្ត ដែលពាក់ព័ន្ធនឹងថវិកាកម្មវិធី និង ថវិកាសមិទ្ធកម្មជាធរមាន ។

គោលដៅនៃការត្រួតពិនិត្យការអនុវត្តថវិកាពាក់កណ្តាលឆ្នាំ ២០២៦ របស់ កសហវ. គឺបន្តពង្រឹងការអនុវត្តថវិកាផ្ទៃក្នុងក្រសួងសេដ្ឋកិច្ចនិងហិរញ្ញវត្ថុ, ជំរុញអង្គភាពថវិកាឱ្យសម្រេចគោលដៅសមិទ្ធកម្មដែលបានព្រមព្រៀង និង រួមចំណែកផ្ដល់បទពិសោធន៍ជូនកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ពាក់ព័ន្ធនឹងការអនុវត្តថវិកាសមិទ្ធកម្ម ។

អង្គប្រជុំបានវាយតម្លៃខ្ពស់ ចំពោះលទ្ធផលនៃការអនុវត្តថវិកាក្នុងឆមាសទី ១ ឆ្នាំ ២០២៦ របស់ កសហវ. ដោយបានពិនិត្យឃើញថា អង្គភាពថវិកាទាំងអស់ កាន់តែមានការទទួលខុសត្រូវខ្ពស់ចំពោះសមិទ្ធកម្ម និង មានគណនេយ្យភាពចំពោះឥណទានថវិការៀងៗខ្លួន ដោយទទួលបានលទ្ធផលល្អ ទាំងលើទិដ្ឋភាពសមិទ្ធកម្ម និង ទិដ្ឋភាពហិរញ្ញវត្ថុ, និង សម្រេចបានភាពជាម្ចាស់របស់អង្គភាពថវិកាផ្ទាល់ ដោយមានការតម្រង់ទិសពីថ្នាក់ដឹកនាំក្រសួងដែលជាប្រធានកម្មវិធី និង ថ្នាក់ដឹកនាំជួយសម្របសម្រួល និង គាំទ្រប្រធានកម្មវិធីទាំង ៥ ផងដែរ ។

ជាមួយគ្នានេះ, អង្គប្រជុំ បានពិភាក្សា និង ដោះស្រាយបញ្ហាប្រឈមមួយចំនួន ក្នុងគោលដៅពង្រឹងប្រសិទ្ធភាពការងារថវិការបស់ក្រសួង ឱ្យកាន់តែប្រសើរ និង ទាន់ពេល ។ ជាចុងក្រោយ, ឯកឧត្តមបណ្ឌិតសភាចារ្យរដ្ឋលេខាធិការ បានបូកសរុប និង ផ្តល់អនុសាសន៍ ជូនដល់គ្រប់អង្គភាពពាក់ព័ន្ធ បន្តចូលរួមតាមសមត្ថកិច្ចរៀងៗខ្លួន ប្រកបដោយស្មារតីសកម្ម និង បុរេសកម្ម សំដៅពង្រឹងប្រសិទ្ធភាពការងារថវិការបស់ក្រសួង និង រក្សាបាននូវភាពគំរូជូនដល់ក្រសួង-ស្ថាប័នដទៃ ដោយត្រូវបន្តពង្រឹងការប្រើប្រាស់ប្រព័ន្ធបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ (FMIS) ស្របតាមគោលដៅនៃការកែទម្រង់ការគ្រប់គ្រង់ហិរញ្ញវត្ថុសាធារណៈ ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើការស្នើសុំកិច្ចគាំទ្រជាពិស...
29/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើការស្នើសុំកិច្ចគាំទ្រជាពិសេស សម្រាប់គម្រោងវិនិយោគការពង្រីកគម្រោងវិនិយោគបច្ចេកវិទ្យាស្នូលរបស់ក្រុមហ៊ុនអន្តរជាតិ ក្នុងវិស័យកម្មន្តសាលបច្ចេកវិទ្យា
----------

នារសៀល ថ្ងៃទី ២៨ ខែកញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារអភិវឌ្ឍវិស័យឯកជន បានអញ្ជើញដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើការស្នើសុំកិច្ចគាំទ្រជាពិសេស សម្រាប់គម្រោងវិនិយោគការពង្រីកគម្រោងវិនិយោគបច្ចេកវិទ្យាស្នូលរបស់ក្រុមហ៊ុនអន្តរជាតិ ក្នុងវិស័យកម្មន្តសាលបច្ចេកវិទ្យា ។

កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ ជាថ្នាក់ដឹកនាំ និង តំណាងជាន់ខ្ពស់មកពី ក្រុមប្រឹក្សាអភិវឌ្ឍន៍កម្ពុជា, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍, ក្រសួងរ៉ែ និង ថាមពល, អាជ្ញារធរអគ្គិសនីកម្ពុជា, អគ្គនាយកដ្ឋានពន្ធដារ, អគ្គនាយកដ្ឋានគយ និង រដ្ឋាករកម្ពុជា, អគ្គនាយកដ្ឋានគោលនយោបាយ និង លេខាធិការដ្ឋានក្រុមការងារអភិវឌ្ឍវិស័យឯកជន អមដោយមន្រ្តីជំនាញពាក់ព័ន្ធ ។

ជាកិច្ចចាប់ផ្តើម, ឯកឧត្តមបណ្ឌិតសភាចារ្យ ហ៊ាន សាហ៊ីប បានគូសរំលេចថា រាជរដ្ឋាភិបាលកម្ពុជាតែងយកចិត្តទុកដាក់ខ្ពស់ ក្នុងការថែរក្សាបរិយាកាសវិនិយោគ និង បន្តគាំទ្រដល់ប្រតិបត្តិការអាជីវកម្មរបស់ក្រុមហ៊ុន រហូតឱ្យឈានទៅសម្រេចការពង្រីកទុនវិនិយោគបន្ថែមរបស់ក្រុមហ៊ុន ។ ការណ៍នេះ គឺជាសក្ខីភាពបញ្ជាក់យ៉ាងច្បាស់អំពីទំនុកចិត្តដ៏មុតមាំរបស់ក្រុមហ៊ុននេះ មកលើស្ថិរភាពនយោបាយ និង ភាពប្រកួតប្រជែងនៃសេដ្ឋកិច្ចកម្ពុជា ។

អង្គប្រជុំបានវាយតម្លៃខ្ពស់ចំពោះគម្រោងវិនិយោគថ្មីនេះ ដែលត្រូវបានចាត់ទុកជា «បច្ចេកវិទ្យាស្នូល (Core Technology)» និង ជាការបោះជំហានជាប្រវត្តិសាស្ត្រថ្មីមួយទៀត ក្នុងការអភិវឌ្ឍវិស័យឧស្សាហកម្មកម្ពុជា ។ គម្រោងនេះ នឹងចូលរួមចំណែកយ៉ាងធំធេងក្នុងការជំរុញការអភិវឌ្ឍសេដ្ឋកិច្ចតំបន់, ការបង្កើតការងារជំនាញរាប់ពាន់កន្លែង, ការផ្ទេរបច្ចេកវិទ្យាទំនើប និង ការធ្វើសមាហរណកម្មខ្សែច្រវាក់ផលិតកម្មរបស់កម្ពុជា ទៅក្នុងខ្សែច្រវាក់តម្លៃសកល (Global Value Chain) ឱ្យកាន់តែមានភាពប្រកួតប្រជែងនៅក្នុងតំបន់ ។

តំណាងក្រសួង-ស្ថាប័នពាក់ព័ន្ធ បានធ្វើការពិភាក្សាយ៉ាងផុសផុល ទៅលើសំណូមពរ និង ការស្នើសុំកិច្ចគាំទ្រនានារបស់ក្រុមហ៊ុន ដែលទាមទារឱ្យមានការសម្របសម្រួលផ្នែកនីតិវិធីរដ្ឋបាល ហេដ្ឋារចនាសម្ព័ន្ធ និង ការផ្តល់កញ្ចប់លើកទឹកចិត្តវិនិយោគ ។ ឈរលើស្មារតីគាំទ្រធុរកិច្ច (Pro-business), អង្គប្រជុំបានបង្ហាញនូវជំហរទន់ភ្លន់ និង ត្រៀមខ្លួនជាស្រេចក្នុងការស្វែងរកដំណោះស្រាយប្រកបដោយភាពបត់បែន ដើម្បីផ្តល់នូវការធានា និង ទំនុកចិត្តកម្រិតអតិបរមាជូនក្រុមហ៊ុន ក្នុងការសម្រេចចិត្តបោះទុនវិនិយោគនៅកម្ពុជាដោយក្តីជឿជាក់ ។

កិច្ចប្រជុំនេះបានបញ្ចប់ទៅក្នុងបរិយាកាសស្និទ្ធស្នាល និង ប្រកបដោយផ្លែផ្កា ដោយតំណាងអន្តរក្រសួង-ស្ថាប័ន បានបញ្ជាក់ជាថ្មីនូវការប្តេជ្ញាចិត្ត ក្នុងការបន្តពង្រឹងកិច្ចសហប្រតិបត្តិការស្ថាប័ន សំដៅធានាថាការស្រូបយកខ្សែច្រវាក់ផលិតកម្មបច្ចេកវិទ្យាទំនើបពីក្រុមហ៊ុនអន្តរជាតិ អាចប្រព្រឹត្តទៅដោយរលូន ដែលនឹងក្លាយជាចលករក្នុងការជំរុញឱ្យកម្ពុជាអាចធ្វើសមាហរណកម្មកាន់តែប្រសើរ ទៅក្នុងខ្សែច្រវាក់តម្លៃតំបន់ និង សកល សំដៅរួមចំណែកដល់ការអភិវឌ្ឍវិស័យឧស្សាហកម្ម និង សេដ្ឋកិច្ចកម្ពុជា ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំគណៈប្រតិភូក្រសួងសេដ្ឋកិច្ច និង ហិរញ្ញវត្ថុ ចូលរួមក្នុង “ពិធីដាក់ក្រពុំបិណ្ឌផ្កាឈ...
25/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំគណៈប្រតិភូក្រសួងសេដ្ឋកិច្ច និង ហិរញ្ញវត្ថុ ចូលរួមក្នុង “ពិធីដាក់ក្រពុំបិណ្ឌផ្កាឈូកគោរពរដ្ឋធម្មនុញ្ញ នៃព្រះរាជាណាចក្រកម្ពុជា” ដើម្បីរំលឹកខួប ៣៣ ឆ្នាំ “ទិវាប្រកាសរដ្ឋធម្មនុញ្ញ”
----------

នាព្រឹកថ្ងៃទី ២៤ ខែ កញ្ញា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំគណៈប្រតិភូក្រសួងសេដ្ឋកិច្ច និង ហិរញ្ញវត្ថុ ចូលរួមក្នុង “ពិធីដាក់ក្រពុំបិណ្ឌផ្កាឈូកគោរពរដ្ឋធម្មនុញ្ញ នៃព្រះរាជាណាចក្រកម្ពុជា” ដើម្បីរំលឹកខួប ៣៣ ឆ្នាំ “ទិវាប្រកាសរដ្ឋធម្មនុញ្ញ”, នៅនីតិបូជនីយដ្ឋាន វិមានរដ្ឋធម្មនុញ្ញ នាសួនច្បារខាងលិចវិមានឯករាជ្យ ៕

ឧត្តមក្រុមប្រឹក្សាសេដ្ឋកិច្ចជាតិ រៀបចំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ...
19/09/2026

ឧត្តមក្រុមប្រឹក្សាសេដ្ឋកិច្ចជាតិ រៀបចំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥»
----------

នារសៀលថ្ងៃទី១៨ ខែ កញ្ញា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប អនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ (កបស) និង ជាប្រធានក្រុមការងារគោលនយោបាយអភិវឌ្ឍន៍វិស័យឧស្សាហកម្មកម្ពុជា (IDP) បានដឹកនាំកិច្ចប្រជុំអន្តរក្រសួង-ស្ថាប័ន ដើម្បីពិនិត្យពិភាក្សាលើសេចក្តីព្រាង «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥» ដោយមានការអញ្ជើញចូលរួមពី ឯកឧត្តម លោកជំទាវ សមាជិក-សមាជិកា នៃឧត្តមក្រុមប្រឹក្សាសេដ្ឋកិច្ចជាតិ និង សមាជិក-សមាជិកានៃក្រុមការងារ IDP នៃ កបស ព្រមទាំងមន្រ្តីជំនាញពាក់ព័ន្ធ ។

ជាកិច្ចចាប់ផ្ដើម, ឯកឧត្តមបណ្ឌិតសភាចារ្យ បានគូសរំលេចអំពីសាវតារនៃការរៀបចំគោលនយោបាយ IDP ដែលត្រូវបានចាប់ផ្ដើមដំបូងនៅខែ ឧសភា ឆ្នាំ ២០២៥ និង បន្តបន្ទាប់មកទៀត មានការប្រជុំពិគ្រោះយោបល់ជាមួយក្រសួង-ស្ថាប័នពាក់ព័ន្ធ, ដៃគូអភិវឌ្ឍន៍, និង វិស័យឯកជន ព្រមទាំងបានធ្វើការសិក្សាពីបទពិសោធន៍អន្តរជាតិ ដើម្បីប្រមូលធាតុចូល សំដៅដាក់ចេញនូវវិធានការគោលនយោបាយជាក់លាក់ និង ប្រាកដនិយម សម្រាប់ការអភិវឌ្ឍន៍វិស័យឧស្សាហកម្មកម្ពុជា ។

ឯកឧត្តមបណ្ឌិតសភាចារ្យ បានសង្កត់ធ្ងន់អំពីភាពចាំបាច់នៃការរៀបចំគោលនយោបាយ IDP ដែលមានចក្ខុវិស័យក្នុងការធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម និង ជំនាញទាប ទៅឧស្សាហកម្មដែលផ្អែកលើជំនាញ និង បច្ចេកវិទ្យាខ្ពស់ ព្រមទាំងដាក់ចេញនូវគោលបំណងចម្បងចំនួន ៤ ដែលរួមមាន ៖ ទី១. បង្កើនការវិនិយោគដែលមានគុណភាព និង បង្កើតការងារដែលមានជំនាញ, បច្ចេកវិទ្យា, ផលិតភាពខ្ពស់ជាងមុខ និង ប្រាក់ចំណូលប្រសើរ, ទី២. រក្សា និង ជំរុញការចាក់ឫសឱ្យកាន់តែស៊ីជម្រៅ នូវរចនាសម្ព័ន្ធឧស្សាហកម្មកម្ពុជា ដើម្បីទ្រទ្រង់កំណើនសេដ្ឋកិច្ចសម្រាប់រយៈពេលវែង, ទី៣. កសាងវិស័យដែលគាំទ្រដល់ការបង្កើនផលិតភាព នៃវិស័យឧស្សាហកម្មផ្សេងៗទៀត, និង ទី៤. តម្រង់ទិសគ្រប់វិស័យពាក់ព័ន្ធ ឱ្យមានភាពត្រៀមខ្លួនរួចរាល់សម្រាប់និន្នាការអនាគត, មានភាពធន់នឹងបរិស្ថាន និង ការគ្រប់គ្រងផលប៉ះពាល់បរិស្ថានឧស្សាហកម្ម ។

គោលនយោបាយ IDP ២០២៦-២០៣៥ បានកំណត់យកឧស្សាហកម្មយុទ្ធសាស្រ្ត ក្នុងវិស័យអាទិភាពចំនួន ៤ ក្រុម គឺ៖ ១). វិស័យឧស្សាហកម្មដែលមានស្រាប់, ២). វិស័យឧស្សាហកម្មកំពុងលូតលាស់, ៣). វិស័យឧស្សាហកម្មយុទ្ធសាស្រ្តរយៈពេលវែង, និង ៤). វិស័យឧស្សាហកម្មគាំទ្រ និង សេដ្ឋកិច្ចចក្រា ដោយបានដាក់ចេញនូវវិធានការគោលនយោបាយជាក់លាក់ និង អាចអនុវត្តបានភ្លាម សម្រាប់ការអភិវឌ្ឍន៍វិស័យឧស្សាហកម្ម ។ វិធានការទាំងនោះ ត្រូវបានរៀបចំដោយឈរលើសសរស្តម្ភចំនួន ៧ រួមមាន៖ ១). ការលើកកម្ពស់ និង សម្របសម្រួលការវិនិយោគ, ២). ការពង្រីក និង ពិពិធកម្មទីផ្សារនាំចេញ, ៣). ការពង្រឹងការតភ្ជាប់ និង ការធ្វើមូលដ្ឋានីយកម្មឧស្សាហកម្ម, ៤). ការកែលម្អបរិយាកាសធុរកិច្ច, ៥). ការអភិវឌ្ឍហេដ្ឋារចនាសម្ព័ន្ធផ្នែករឹង និង ទន់, ៦). ការពង្រឹងការអភិវឌ្ឍជំនាញ បច្ចេកវិទ្យា និង ទីផ្សារការងារ និង ៧). ការបង្កើនហិរញ្ញប្បទាន ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា គោលនយោបាយ IDP នេះ គឺជាត្រីវិស័យសម្រាប់តម្រង់ទិសឧស្សាហកម្មកម្ពុជា សម្រាប់ទសវត្សរ៍ខាងមុខ តាមរយៈការដោះស្រាយរាល់បញ្ហាប្រឈមជារចនាសម្ព័ន្ធ, កសាងមូលដ្ឋានឧស្សាហកម្មប្រកួតប្រជែង, ធ្វើពិពិធកម្មមុខទំនិញនាំចេញ និង ពង្រឹងការតភ្ជាប់រវាងការវិនិយោគបរទេស ជាមួយសហគ្រាសក្នុងស្រុក ។ បន្ថែមពីនេះ, ការជំរុញការអភិវឌ្ឍវិស័យឧស្សាហកម្ម នឹងកាន់តែមានភាពមុតស្រួច និង ជាក់លាក់ តាមរយៈការកំណត់ឱ្យបានលម្អិតនូវវិស័យឧស្សាហកម្មគន្លឹះ ដែលមានឧត្តមភាព និង ផ្ដោតលើការជំរុញការអភិវឌ្ឍសកម្មភាពឧស្សាហកម្មជាជំហានៗ ទៅតាមដំណាក់កាល ស្របទៅតាមភាពប្រកួតប្រជែងជាក់ស្តែងរបស់កម្ពុជា ។

ជាមួយនេះ, អង្គប្រជុំ បានធ្វើការពិភាក្សាយ៉ាងផុសផុល និង បានផ្ដល់មតិយោបល់កែលម្អបន្ថែមសេចក្ដីព្រាងគោលនយោបាយ IDP នេះ សំដៅធ្វើឱ្យ វិធានការគោលនយោបាយដែលនឹងដាក់ចេញ កាន់តែមុតស្រួច ជាក់លាក់ និង អាចអនុវត្តបានភ្លាម, ការរៀបចំយន្តការស្ថាប័នអាចអនុវត្តបាន ស្របតាមអភិក្រម «ជវភាពនៃប្រព័ន្ធតួអង្គតែមួយ», ការផ្ទេរបច្ចេកវិទ្យា និង ការអភិវឌ្ឍជំនាញ គឺជាស្ពានចម្លងដ៏សំខាន់ដើម្បីភ្ជាប់ការស្រាវជ្រាវ នវានុវត្តន៍ និង ចំណេះដឹងថ្មីៗ ទៅកាន់ការអនុវត្តជាក់ស្តែងក្នុងវិស័យឧស្សាហកម្ម និង ទីផ្សារការងារ ។

ឯកឧត្តមបណ្ឌិតសភាចារ្យ បានគូសបញ្ជាក់បន្ថែមថា ការរៀបចំគោលនយោបាយ IDP នេះ បានដាក់ចេញនូវវិធានការគោលនយោបាយជាក់លាក់ សម្រាប់កសាងវិស័យឧស្សាហកម្មកម្ពុជា ឱ្យកាន់តែមានពិពិធកម្ម, ភាពធន់ និង សមត្ថភាពប្រកួតប្រជែងខ្ពស់ សំដៅរួមចំណែករុញច្រានកំណើនសេដ្ឋកិច្ច និង សម្រេចឱ្យបាននូវចក្ខុវិស័យប្រែក្លាយកម្ពុជា ឱ្យទៅជាប្រទេសមានប្រាក់ចំណូលខ្ពស់នៅឆ្នាំ២០៥០ ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដើម្បីស...
15/09/2026

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដើម្បីស្វែងយល់អំពីកាលានុវត្តភាពវិនិយោគនៅកម្ពុជា
----------

នារសៀលថ្ងៃទី ១៥ ខែកញ្ញា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី រដ្ឋលេខាធិការ និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ និង ក្រុមការងារជំរុញការវិនិយោគក្នុងភូមិភាគឦសាន, តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារជាមួយគណៈប្រតិភូសម្ព័ន្ធសភាពាណិជ្ជកម្ម និងសមាគមសកល (GCCAA) ដែលដឹកនាំដោយលោក យ៉ាវ ហៃថោ (Yao Haitao) ប្រធានសម្ព័ន្ធ GCCAA ដើម្បីជួបសម្តែងការគួរសម និង ស្វែងយល់អំពីកាលានុវត្តភាពវិនិយោគ នៅព្រះរាជាណាចក្រកម្ពុជា ។

ជាកិច្ចចាប់ផ្តើម, ឯកឧត្តមបណ្ឌិតសភាចារ្យ បានស្វាគមន៍យ៉ាងកក់ក្តៅចំពោះគណៈប្រតិភូសម្ព័ន្ធ GCCAA មកកាន់ព្រះរាជាណាចក្រកម្ពុជា ដោយបានគូសបញ្ជាក់ថា រាជរដ្ឋាភិបាលកម្ពុជា បន្តប្តេជ្ញាចិត្តក្នុងការពង្រឹងបរិយាកាសវិនិយោគ ឱ្យកាន់តែមានតម្លាភាព អាចព្យាករបាន និង ផ្តល់ភាពអំណោយផលខ្ពស់ សម្រាប់វិស័យឯកជន តាមរយៈការដាក់ចេញនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុ» និង «កម្មវិធីពិសេសនៅភូមិភាគឦសាន (SPIN)» ដែលផ្តោតការយកចិត្តទុកដាក់ជាពិសេសលើ «សេវាថែទាំវិនិយោគ (Aftercare Service)» ក្រោយពេលអនុម័តគម្រោង ។

ឯកឧត្តមបណ្ឌិតសភាចារ្យ បានមានប្រសាសន៍បន្ថែមអំពីភាពធន់នៃសេដ្ឋកិច្ចកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈការរក្សាស្ថិរភាពម៉ាក្រូសេដ្ឋកិច្ច និង ការកែលម្អបរិយាកាសធុរកិច្ចឥតឈប់ឈរ សំដៅជំរុញ និង គាំទ្រវិស័យឯកជន (Pro-Business Government) ។

លោក Yao Haitao ប្រធានសម្ព័ន្ធ GCCAA បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិតសភាចារ្យ ដែលបានចែករំលែកព័ត៌មានអំពីស្ថានភាពសេដ្ឋកិច្ច ការលើកទឹកចិត្តវិនិយោគ និង សក្តានុពលវិនិយោគនៅកម្ពុជា ។ ជាមួយនេះ, លោក Yao Haitao បានជម្រាបជូនអំពីសក្តានុពលរបស់ GCCAA ដែលត្រូវបានបង្កើតឡើងតាំងពីឆ្នាំ ២ ០០០ និង មានបណ្តាញសហគ្រាសចិន និង អន្តរជាតិជាង ៦ ០០០ ក្រុមហ៊ុន ព្រមទាំងមានវត្តមាននៅ ៥០ ប្រទេសជុំវិញពិភពលោក, ហើយគណៈប្រតិភូដែលអញ្ជើញមកទស្សនកិច្ចនៅព្រះរាជាណាចក្រកម្ពុជា នាពេលនេះ គឺមកពីពហុវិស័យ រួមមាន វិស័យសុខាភិបាល សម្ភារៈសំណង់ បច្ចេកវិទ្យាកសិកម្ម បរិក្ខារវេជ្ជសាស្ត្រ និង ទេសចរណ៍ ដើម្បីស្វែងរកកាលានុវត្តភាពវិនិយោគ និង/ឬ កិច្ចសហប្រតិបត្តិការ នៅព្រះរាជាណាចក្រកម្ពុជា ។

ឆ្លៀតក្នុងឱកាសនៃជំនួបនោះ, លោក Yao Haitao រួមទាំងតំណាងសហគ្រាស បានជម្រាបជូនបន្ថែមអំពីផែនការស្វែងរកកាលានុវត្តភាពវិនិយោគ ដែលនឹងជួយពង្រឹងតួនាទីរបស់កម្ពុជា ក្នុងខ្សែច្រវាក់តម្លៃសកល ព្រមទាំងបានលើកឡើងនូវសំណូមពរ ក៏ដូចជាការស្វែងយល់បន្ថែម អំពីកាលានុវត្តភាពវិនិយោគ ក្នុងវិស័យ និង/ឬ តំបន់អាទិភាព របស់រាជរដ្ឋាភិបាលកម្ពុជា ។

ជាការឆ្លើយតប, ឯកឧត្តមបណ្ឌិតសភាចារ្យ បានប្តេជ្ញាចូលរួមផ្តល់ការសម្របសម្រួល ឱ្យបានជាអតិបរមា រហ័ស និង មានប្រសិទ្ធភាព តាមរយៈយន្តការ «ច្រកចេញចូលតែមួយ» ស្របតាមអភិក្រម «ជវភាពនៃប្រព័ន្ធតួអង្គតែមួយ» ដើម្បីបង្កលក្ខណៈងាយស្រួលដល់ធុរកិច្ច និង វិនិយោគរបស់សហគ្រាសចិន ។ ជាមួយគ្នានេះ, ឯកឧត្តមបណ្ឌិតសភាចារ្យ បានលើកទឹកចិត្តឱ្យសម្ព័ន្ធ GCCAA ផ្តោតអាទិភាពចូលរួមក្នុងការអភិវឌ្ឍវិស័យកសិកម្ម, កសិ-ឧស្សាហកម្ម ទេសចរណ៍ និង វិស័យបច្ចេកវិទ្យាឌីជីថលនៅកម្ពុជា សំដៅពង្រឹងការប្រើប្រាស់វត្ថុធាតុដើមក្នុងស្រុក និង ការផ្តល់ការងារជំនាញ ដែលមានសារៈសំខាន់សម្រាប់ការលើកកម្ពស់ការប្រកួតប្រជែង និង ការអភិវឌ្ឍសេដ្ឋកិច្ច រយៈពេលវែង ។

ជំនួបនេះបានបញ្ចប់ក្នុងបរិយាកាសស្និទ្ធស្នាល និង ប្រកបដោយផ្លែផ្កា ដោយភាគីទាំងពីរបានបញ្ជាក់ជាថ្មីនូវការប្តេជ្ញាចិត្ត ក្នុងការបន្តពង្រឹងកិច្ចសហប្រតិបត្តិការ និង ការសន្ទនា ប្រកបដោយស្ថាបនា ។ ភាគីសម្ព័ន្ធ GCCAA បានសន្យានឹងរៀបចំដឹកនាំគណៈប្រតិភូមួយក្រុមទៀតមកកម្ពុជា នៅចុងខែតុលា ឆ្នាំ ២០២៦ ខាងមុខនេះ ។

ឯកឧត្តមបណ្ឌិតសភាចារ្យ បានថ្លែងអំណរគុណចំពោះចំណាប់អារម្មណ៍របស់សម្ព័ន្ធ GCCAA មកលើកាលានុវត្តភាពវិនិយោគ និង កិច្ចសហប្រតិបត្តិការ នៅព្រះរាជាណាចក្រកម្ពុជា និង ទន្ទឹងរង់ចាំការពង្រឹងភាពជាដៃគូកាន់តែរឹងមាំ ព្រមទាំងការប្រែក្លាយកិច្ចជំនួបនេះ ទៅជាគម្រោងវិនិយោគជាក់ស្តែង នាពេលអនាគត ៕

Address

St. 92, Sangkat Wat Phnom, Khan Daun Penh
Phnom Penh

Opening Hours

Monday 07:30 - 17:30
Tuesday 07:30 - 17:30
Wednesday 07:30 - 17:30
Thursday 07:30 - 17:30
Friday 07:30 - 17:30

Website

Alerts

Be the first to know and let us send you an email when MEF Private Sector Development Working Group posts news and promotions. Your email address will not be used for any other purpose, and you can unsubscribe at any time.

Shortcuts

Share

Category