Preah Sihanouk Province Investment Promotion Working Group

ក្រសួងសេដ្ឋកិច្ច និងហិរញ្ញវត្ថុ រៀបចំកិច្ចប្រជុំតម្រង់ទិសសម្រាប់ការរៀបចំថវិកាឆ្នាំ២០២៧ សម្រាប់ផ្ទៃក្នុងក្រសួង
----------

នាព្រឹកថ្ងៃទី ៣ ខែ មិថុនា ឆ្នាំ ២០២៦ នៅសណ្ឋាគាររ៉េស៊ីដង់ សុខាភ្នំពេញ, ក្រសួងសេដ្ឋកិច្ច និងហិរញ្ញវត្ថុ បានរៀបចំកិច្ចប្រជុំតម្រង់ទិសសម្រាប់ការរៀបចំថវិកាឆ្នាំ២០២៧ របស់ក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំសម្របសម្រួលដោយ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារថវិកាកម្រិតថ្នាក់ដឹកនាំអង្គភាពថវិកា ដោយមានការអញ្ជើញចូលរួមពី ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ ដែលជាប្រធានកម្មវិធី, ថ្នាក់ដឹកនាំគាំទ្រ និងសម្របសម្រួលប្រធានកម្មវិធី, ថ្នាក់ដឹកនាំអង្គភាពថវិកា របស់ កសហវ. និង សហការីពាក់ព័ន្ធ សរុបប្រមាណ ៣០០ រូប ។

ឯកឧត្តមបណ្ឌិតសភាចារ្យ បានជម្រាបជូនអង្គពិធីថា កិច្ចប្រជុំនាថ្ងៃនេះ ជាវេទិកាទូលាយដែលប្រធានកម្មវិធីទាំង ៥, ថ្នាក់ដឹកនាំជួយគាំទ្រ និងសម្របសម្រួលកម្មវិធី ព្រមទាំងអង្គភាពថវិកាចំណុះកម្មវិធីនីមួយៗ អាចជួបពិភាក្សា និង កំណត់គោលបំណងកម្មវិធី, សូចនាករ និងគោលដៅកម្រិតកម្មវិធី និង ទិសដៅអាទិភាពនានា ដោយផ្អែកលើការអនុវត្តឆ្នាំកន្លងមក ដើម្បីជាមូលដ្ឋានសម្រាប់អង្គភាពថវិកា រៀបចំផែនការយុទ្ធសាស្ត្រថវិកា ឆ្នាំ២០២៧-២០២៩, គម្រោងថវិកាឆ្នាំ២០២៧ និង គម្រោងសមិទ្ធកម្មឆ្នាំ២០២៧ ។

ឯកឧត្តមបណ្ឌិតសភាចារ្យ ប្រធានអង្គប្រជុំ បានគូសរំលេចអំពីភាពចាំបាច់នៃការបន្តពង្រឹងប្រសិទ្ធភាព និង តម្លាភាពថវិកាសមិទ្ធកម្មរបស់ កសហវ. តាមរយៈការកំណត់នូវគោលបំណងកម្មវិធីច្បាស់លាស់, សូចនាករសមិទ្ធកម្មគន្លឹះ និង គោលដៅតាមឆ្នាំជាក់លាក់ នៅកម្រិតកម្មវិធីនីមួយៗ ដែលជាវិញ្ញាសាថ្មីមួយ ក្នុងដំណើរការផ្លាស់ប្តូរឆ្ពោះទៅ «គណនេយ្យភាពសមិទ្ធកម្ម» ។

ជាមួយនេះ, អគ្គលេខាធិការដ្ឋានក្រសួង បានធ្វើការបង្ហាញពិតានចំណាយគោលតាមអង្គភាព និង ការណែនាំបច្ចេកទេសគ្រោងថវិកាឆ្នាំ២០២៧ របស់ក្រសួងសេដ្ឋកិច្ចនិងហិរញ្ញវត្ថុ ជូនអង្គភាពថវិកានៃ កសហវ. ដើម្បីជាមូលដ្ឋានសម្រាប់អង្គភាពថវិកា ក្នុងការរៀបចំផែនការយុទ្ធសាស្ត្រថវិកា និង គម្រោងថវិកាសមិទ្ធកម្មរបស់ក្រសួង ៕

ក្រុមការងារអភិវឌ្ឍវិស័យឯកជន ពិភាក្សាលើវិធានការគាំទ្រឧស្សាហកម្មផលិតស៊ីម៉ងត៍ក្នុងស្រុក
----------

នារសៀលថ្ងៃទី ២ ខែ មិថុនា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និង ជាប្រធានក្រុមការងារអភិវឌ្ឍវិស័យឯកជន បានដឹកនាំកិច្ចប្រជុំពិភាក្សាលើវិធានការគាំទ្រឧស្សាហកម្មផលិតស៊ីម៉ងត៍ក្នុងស្រុក ។

កិច្ចប្រជុំនេះ មានការអញ្ជើញចូលរួមពីតំណាង ក្រសួងបរិស្ថាន, ក្រសួងរ៉ែ និង ថាមពល, ព្រមទាំងតំណាង អគ្គនាយកដ្ឋានពន្ធដារ, អគ្គនាយកដ្ឋានគយ និង រដ្ឋាករកម្ពុជា, អគ្គនាយកដ្ឋានគោលនយោបាយ, និង អគ្គនាយកដ្ឋានទ្រព្យសម្បត្តិរដ្ឋ និង ចំណូលមិនមែនសារពើរពន្ធ នៃក្រសួងសេដ្ឋកិច្ច និង ហិរញ្ញវត្ថុ ។

អង្គប្រជុំ បានពិនិត្យលើសាវតារនៃការដាក់ឱ្យអនុវត្តវិធានការរបស់រាជរដ្ឋាភិបាល, ស្ថានភាពឧស្សាហកម្មផលិតស៊ីម៉ងត៍ក្នុងស្រុក និង ការវិវត្តថ្មីៗ នៃស្ថានភាពសេដ្ឋកិច្ចសកល ព្រមទាំងលក្ខខណ្ឌតម្រូវនានា របស់រាជរដ្ឋាភិបាលទៅលើក្រុមហ៊ុនផលិតស៊ីម៉ងត៍ ដូចជា ការបង់មូលនិធិបរិស្ថាន, ការបង់សួយសាររ៉ែ, ការផ្ទេរជំនាញ និង ការបណ្តុះបណ្តាលនិយោជិត, និង ការប្រើប្រាស់ធាតុផ្សំក្នុងស្រុក ជាដើម ។

ជាមួយនេះ, អង្គប្រជុំបានផ្តល់ធាតុចូលសំខាន់ៗ សម្រាប់ការពិចារណា និង វាយតម្លៃលើការអនុវត្តវិធានការ និង លទ្ធភាពនៃការដាក់ចេញវិធានការ និង/ឬ លក្ខខណ្ឌនានា ទៅលើក្រុមហ៊ុនស៊ីម៉ងត៍ក្នុងស្រុក ។

មុននឹងបញ្ចប់, ឯកឧត្តមបណ្ឌិតសភាចារ្យ បានផ្តល់អនុសាសន៍ណែនាំឱ្យលេខាធិការដ្ឋានក្រុមការងារ ធ្វើការសម្របសម្រួល និង សហការជាមួយក្រសួង-ស្ថាប័នពាក់ព័ន្ធ ដើម្បីសិក្សាស៊ីជម្រៅ ប្រមូលធាតុចូល និង រៀបចំជារបាយការណ៍ជូនរាជរដ្ឋាភិបាល ឱ្យបានច្បាស់លាស់ និង គ្រប់ជ្រុងជ្រោយ ។ ឯកឧត្តមបណ្ឌិតសភាចារ្យ បានថ្លែងអំណរគុណដល់តំណាងក្រសួង-ស្ថាប័នពាក់ព័ន្ធ និង អង្គភាពក្រោមឱវាទក្រសួង ដែលបានចូលរួម និង ផ្តល់ធាតុចូលសម្រាប់ការសិក្សា និង វាយតម្លៃនេះ ៕

គណៈកម្មការលើកទឹកចិត្ត និង ជំរុញផលិតកម្មអំបិល ពិភាក្សាលើការស្នើគម្រោងបង្កើតរោងចក្រផលិតអំបិល និង ការសិក្សាសក្តានុពលវិស័យអំបិលនៅកម្ពុជា
----------

នាព្រឹកថ្ងៃទី ២៧ ខែ ឧសភា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និង ជាប្រធានគណៈកម្មការលើកទឹកចិត្ត និង ជំរុញផលិតកម្មអំបិល បានដឹកនាំកិច្ចប្រជុំពិភាក្សាលើការស្នើគម្រោងបង្កើតរោងចក្រផលិតអំបិល និង ការសិក្សាសក្តានុពលផលិត និងប្រើប្រាស់អំបិលនៅកម្ពុជា របស់ក្រុមហ៊ុន ចេនឡា ហ្វ៊ូដ អិចប្រេស ឯ.ក (CHENLA FOOD EXPRESS CO., LTD.) ដោយមានការចូលរួមពី ឯកឧត្តមអនុរដ្ឋលេខាធិការ, តំណាងគណៈកម្មការអន្តរក្រសួងគ្រប់គ្រងការអភិរក្ស និង ការអភិវឌ្ឍដីស្រែអំបិល នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍, អគ្គនាយកដ្ឋានគោលនយោបាយ, អគ្គនាយកដ្ឋានពន្ធដារ, អគ្គនាយកដ្ឋានគយ និង រដ្ឋាករកម្ពុជា, អគ្គនាយកដ្ឋានទ្រព្យសម្បត្តិរដ្ឋ និង ចំណូលមិនមែនសារពើពន្ធ, លេខាធិការដ្ឋានក្រុមការងារអភិវឌ្ឍវិស័យឯកជន និង តំណាងក្រុមហ៊ុន ។

កិច្ចប្រជុំនេះ ត្រូវបានរៀបចំឡើងក្នុងគោលបំណងសិក្សាស្វែងយល់ អំពីទស្សនៈគម្រោង, សក្តានុពលផលិតកម្ម, ការកែច្នៃ និងការប្រើប្រាស់អំបិលក្នុងស្រុក, ក៏ដូចជាការពិនិត្យលទ្ធភាពនៃការចូលរួមរបស់វិស័យឯកជន ក្នុងការគាំទ្រការអភិវឌ្ឍវិស័យអំបិលកម្ពុជា ។

អង្គប្រជុំ បានផ្លាស់ប្តូរយោបល់លើទិដ្ឋភាពគោលនយោបាយ, បច្ចេកទេស, ហិរញ្ញវត្ថុ និងការសម្របសម្រួលពាក់ព័ន្ធ ដើម្បីធានាថា គម្រោងនេះអាចអនុវត្តទៅមុខបាន និងស្របតាមនីតិវិធីជាធរមាន ដោយឆ្លើយតបទៅនឹងផលប្រយោជន៍សង្គម-សេដ្ឋកិច្ចជាតិ ។

ក្នុងកិច្ចប្រជុំនេះ, អង្គប្រជុំបានពិភាក្សាអំពីស្ថានភាពទូទៅនៃវិស័យអំបិលកម្ពុជា ដែលជាវិស័យមានសារៈសំខាន់ចំពោះជីវភាពប្រចាំថ្ងៃ កសិកម្ម ឧស្សាហកម្ម សន្តិសុខស្បៀង និងសុខភាពសាធារណៈ ។ វិស័យនេះ ក៏នៅមានចំណុចដែលត្រូវបន្តពង្រឹងបន្ថែម ដូចជា ការធ្វើទំនើបកម្មបច្ចេកទេសផលិត, ការលើកកម្ពស់គុណភាព និង ស្តង់ដារ, ការរៀបចំឃ្លាំងស្តុក, ការគាំទ្រផលិតករ និង សហគមន៍អំបិល, ជាពិសេស ការប្រើប្រាស់ដីស្រែអំបិល ឱ្យមានប្រសិទ្ធភាព និង ការពង្រឹងសមត្ថភាពប្រកួតប្រជែងរបស់ផលិតកម្មអំបិលក្នុងស្រុក ។

ឯកឧត្តមបណ្ឌិតសភាចារ្យ បានលើកឡើងថា ការចូលរួមរបស់វិស័យឯកជនក្នុងការអភិវឌ្ឍវិស័យអំបិល គួរត្រូវបានស្វាគមន៍ ប្រសិនបើគម្រោងមានភាពច្បាស់លាស់ អាចអនុវត្តបានជាក់ស្តែង និង ចូលរួមដោះស្រាយតម្រូវការរបស់វិស័យមួយនេះ ។ ជាមួយគ្នានេះ, ការពិចារណាលើការស្នើសុំវិនិយោគ និង ការលើកទឹកចិត្តណាមួយ ត្រូវផ្អែកលើក្របខណ្ឌច្បាប់ និង គោលនយោបាយជាធរមាន, ភាពច្បាស់លាស់នៃប្រភពទុន, សមត្ថភាពបច្ចេកទេស, ផលប៉ះពាល់បរិស្ថាន-សង្គម, ការចូលរួមជាមួយផលិតករអំបិលក្នុងស្រុក និង ផលប្រយោជន៍សាធារណៈ ។

ជាលទ្ធផល, អង្គប្រជុំ បានផ្តល់ជាមតិយោបល់ និង ធាតុចូលល្អៗ ដើម្បីឱ្យក្រុមហ៊ុនអាចបន្តសិក្សា និង រៀបចំការស្នើសុំឱ្យបានលម្អិតបន្ថែម រួមមាន ផែនការវិនិយោគ, គំរូអាជីវកម្ម, ប្រភពទុន, បច្ចេកវិទ្យាផលិត និងកែច្នៃ, ផែនការសហការជាមួយកសិករ និង សហគមន៍អំបិល, ការវាយតម្លៃផលប៉ះពាល់បរិស្ថាន-សង្គម និង ចំណុចស្នើសុំការលើកទឹកចិត្តដែលក្រុមហ៊ុនចង់បាន ដើម្បីឱ្យក្រសួង-ស្ថាប័នពាក់ព័ន្ធ អាចពិនិត្យបន្តតាមនីតិវិធីជាធរមាន និង ស្របតាមអភិក្រម “ជីវភាពនៃប្រព័ន្ធតួអង្គតែមួយ” ក្នុងការជំរុញការអភិវឌ្ឍវិស័យអំបិល ឱ្យមានភាពប្រទាក់ក្រឡា និង មានចីរភាព ៕

មន្ត្រីរាជការក្របខណ្ឌថ្មី នៃក្រសួងសេដ្ឋកិច្ច និងហិរញ្ញវត្ថុ ចំនួន ៤៥៧ នាក់ ទទួលការបណ្តុះបណ្តាលតម្រង់ទិស លើការគ្រប់គ្រងសេដ្ឋកិច្ច និងហិរញ្ញវត្ថុ
----------

នាព្រឹកថ្ងៃទី ២៥ ខែ ឧសភា ឆ្នាំ ២០២៦ នៅវិទ្យាស្ថានសេដ្ឋកិច្ច និងហិរញ្ញវត្ថុ, ក្រសួងសេដ្ឋកិច្ច និងហិរញ្ញវត្ថុ បានបើកវគ្គបណ្តុះបណ្តាលតម្រង់ទិសជាស៊េរីស្តីពី «ការគ្រប់គ្រងសេដ្ឋកិច្ច និងហិរញ្ញវត្ថុ» ជូនមន្ត្រីរាជការក្របខណ្ឌថ្មី ឆ្នាំ ២០២៣ និង ឆ្នាំ ២០២៤ របស់អង្គភាពថ្នាក់កណ្ដាល និង ថ្នាក់មូលដ្ឋាន នៃក្រសួងសេដ្ឋកិច្ច និងហិរញ្ញវត្ថុ ចំនួន ៤៥៧ នាក់ សម្រាប់រួមចំណែកគាំទ្រ និង អនុវត្តការគ្រប់គ្រងហិរញ្ញវត្ថុសាធារណៈ ប្រកបដោយប្រសិទ្ធភាព និង ចីរភាព ។

ពិធីបើកវគ្គនេះ បានប្រព្រឹត្តទៅក្រោមការដឹកនាំរបស់ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និង ជាប្រធានក្រុមការងារកសាងសមត្ថភាពនៃក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី ឯកឧត្តម លោកជំទាវ ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ, វិទ្យាស្ថានសេដ្ឋកិច្ច និងហិរញ្ញវត្ថុ និង អគ្គលេខាធិការដ្ឋាននៃក្រសួងសេដ្ឋកិច្ច និងហិរញ្ញវត្ថុ ព្រមទាំងមន្រ្តីរាជការ ឧទ្ទេសាចារ្យ និង សិក្ខាកាម ។

ថ្លែងនៅក្នុងពិធីនោះ, ឯកឧត្តមបណ្ឌិតសភាចារ្យ បានគូសរំលេចថា រាជរដ្ឋាភិបាល ក្រោមការដឹកនាំប្រកបដោយថាមពល វៃឈ្លាស និង ប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវ “យុទ្ធសាស្ត្របញ្ចកោណ-ដំណាក់កាលទី ១” ដោយផ្តល់អាទិភាពខ្ពស់បំផុត លើការអភិវឌ្ឍមូលធនមនុស្ស សម្រាប់ការអភិវឌ្ឍសង្គម-សេដ្ឋកិច្ច និង ឆ្ពោះទៅសម្រេចចក្ខុវិស័យកម្ពុជា ឆ្នាំ ២០៥០ ។

ឯកឧត្តមបណ្ឌិតសភាចារ្យ បានលើកឡើងបន្ថែមថា ក្រសួងសេដ្ឋកិច្ច និងហិរញ្ញវត្ថុ តែងយកចិត្តទុកដាក់ជាប្រចាំ លើការកសាង និង ការអភិវឌ្ឍសមត្ថភាពមន្ត្រីរាជការ ដោយបានដាក់ឱ្យអនុវត្តនូវ “ក្របខណ្ឌគ្រប់គ្រង និង អភិវឌ្ឍធនធានមនុស្សឆ្នាំ ២០២៤-២០២៨” ក្នុងក្របខណ្ឌផ្ទៃក្នុងក្រសួងសេដ្ឋកិច្ច និងហិរញ្ញវត្ថុ សំដៅកសាងមូលធនមនុស្ស ប្រកបដោយគុណវុឌ្ឍិវិជ្ជាជីវៈ ។

ទន្ទឹមនេះ ក្នុងក្របខណ្ឌកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ, ក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវផែនការយុទ្ធសាស្ត្រកសាង និង អភិវឌ្ឍសមត្ថភាព សម្រាប់តម្រង់ទិសការបណ្ដុះបណ្ដាល និង វិក្រឹតការសមត្ថភាព ដែលមានលក្ខណៈប្រមូលផ្តុំ ជាប្រព័ន្ធ និង គ្រប់ជ្រុងជ្រោយ ជូនមន្ត្រីអនុវត្តការងារហិរញ្ញវត្ថុសាធារណៈ របស់ក្រសួង ស្ថាប័ន និង មន្ទីរអង្គភាពជំនាញពាក់ព័ន្ធក្រោមឱវាទ រួមនឹងរដ្ឋបាលថ្នាក់ក្រោមជាតិ ដើម្បីចូលរួមចំណែកគាំទ្រ និង អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ឱ្យសម្រេចតាមគោលដៅ ប្រកបដោយភាពជោគជ័យ និង ប្រសិទ្ធភាពខ្ពស់ ។

ឯកឧត្តមបណ្ឌិតសភាចារ្យ បានគូសរំលេចជូនអង្គពិធីថា ក្នុងគោលដៅពង្រឹងការអនុវត្តមុខងារ និង ភារកិច្ច របស់ថ្នាក់ដឹកនាំ និង មន្ត្រីរាជការគ្រប់លំដាប់ថ្នាក់, ក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំប្រកបដោយចក្ខុវិស័យរបស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដាក់ឱ្យអនុវត្តនូវអភិក្រមការងារ ចំនួន ៤ គឺ៖ ១). អនុវត្តការងារប្រកបដោយវិជ្ជាជីវៈ និង គោរពក្រមសីលធម៌វិជ្ជាជីវៈ, ២). អនុវត្តការងារជាក្រុម, ៣). អនុវត្តការងារដោយប្រកាន់ខ្ជាប់ស្មារតីបុរេសកម្ម និង គោលការណ៍ប្រសិទ្ធភាពថវិកា, និង ៤). មិនត្រូវមើលរំលងកំហុសខ្លួនឯង ។

វគ្គបណ្តុះបណ្តាលតម្រង់ទិសលើការគ្រប់គ្រងសេដ្ឋកិច្ច និងហិរញ្ញវត្ថុ ដែលមានរយៈពេល ៥ ថ្ងៃនេះ គឺពិតជាមានសារៈសំខាន់ណាស់ ក្នុងការតម្រង់ទិសជំនាញវិជ្ជាជីវៈ និង បំពាក់នូវចំណេះជំនាញពាក់ព័ន្ធ សម្រាប់ការងារគ្រប់គ្រងសេដ្ឋកិច្ច និងហិរញ្ញវត្ថុ ជូនមន្ដ្រីរាជការ ដែលនឹងចូលរួមចំណែកដល់ ការលើកកម្ពស់សមត្ថភាព ចំណេះដឹង, ការបង្កើនការយល់ដឹង និង ជំនាញជាមូលដ្ឋាន សម្រាប់ការអនុវត្តការងារ តួនាទីភារកិច្ចប្រចាំថ្ងៃ ជូនអង្គភាព និង ដើម្បីធ្វើជាស្ពាន សម្រាប់មន្ត្រីរាជការក្របខណ្ឌថ្មី ក្នុងការអភិវឌ្ឍសមត្ថភាព និង ជំនាញ ឱ្យកាន់តែប្រសើរថែមទៀត នៅពេលអនាគត ៕

ក្រសួងសេដ្ឋកិច្ច និង ហិរញ្ញវត្ថុ រៀបចំកម្មវិធីបញ្ជ្រាបការយល់ដឹង ស្តីពី "ការអនុវត្តចំណាយវិនិយោគថវិកាថ្នាក់ជាតិហិរញ្ញប្បទានក្នុងប្រទេស និង ការកត់ត្រាទិន្នន័យចំណាយគម្រោងវិនិយោគសាធារណៈដោយហិរញ្ញប្បទានក្រៅប្រទេស ក្នុង FMIS" ដើម្បីលើកកម្ពស់ការគ្រប់គ្រងថវិកាវិនិយោគ ឱ្យកាន់តែមានតម្លាភាព គណនេយ្យភាព និង ប្រសិទ្ធភាព
----------

ក្នុងគោលបំណងពង្រឹងការយល់ដឹង និង ជំរុញការអនុវត្តនីតិវិធីគ្រប់គ្រងចំណាយវិនិយោគសាធារណៈ ឱ្យកាន់តែមានតម្លាភាព គណនេយ្យភាព និង ប្រសិទ្ធភាព, ក្រសួងសេដ្ឋកិច្ច និងហិរញ្ញវត្ថុ បានរៀបចំកម្មវិធី “បញ្ជ្រាបការយល់ដឹងស្តីពី ការអនុវត្តចំណាយវិនិយោគថវិកាថ្នាក់ជាតិហិរញ្ញប្បទានក្នុងប្រទេស និង ការកត់ត្រាទិន្នន័យចំណាយគម្រោងវិនិយោគសាធារណៈដោយហិរញ្ញប្បទានក្រៅប្រទេស ក្នុង FMIS” នាព្រឹកថ្ងៃទី ២១ ខែ ឧសភា ឆ្នាំ ២០២៦ នៅសណ្ឋាគាររ៉ាហ្វ៊ល ឡឺ រ៉ូយ៉ាល់ ។

កម្មវិធីនេះត្រូវបានដឹកនាំដោយ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារគ្រប់គ្រងគម្រោង FMIS, តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី ថ្នាក់ដឹកនាំ និង តំណាងក្រសួង-ស្ថាប័នពាក់ព័ន្ធ ព្រមទាំងអគ្គនាយកដ្ឋានសំខាន់ៗ នៃក្រសួងសេដ្ឋកិច្ច និងហិរញ្ញវត្ថុ ។

ថ្លែងក្នុងឱកាសនោះ, ឯកឧត្តមបណ្ឌិតសភាចារ្យ បានជម្រាបជូនអង្គពិធីថា កម្មវិធីនេះជាផ្នែកមួយនៃផែនការអនុវត្តគម្រោង FMIS ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលជាកម្មវិធីគោលនយោបាយអាទិភាពរបស់រាជរដ្ឋាភិបាល ដោយបានចែងច្បាស់ នូវចក្ខុវិស័យ ក្នុងការប្រែក្លាយប្រព័ន្ធហិរញ្ញវត្ថុសាធារណៈកម្ពុជា ឱ្យក្លាយជាប្រព័ន្ធមួយ ដែលផ្តោតលើលទ្ធផល ឬ សមិទ្ធកម្ម និង មានលក្ខណៈវិមជ្ឈការ ស្របតាមស្តង់ដា និង ឧត្តមានុវត្តន៍ ។

ឯកឧត្តមបណ្ឌិតសភាចារ្យ បានគូសបញ្ជាក់ថា ក្នុងដំណាក់កាលនេះ ការអនុវត្តចំណាយវិនិយោគថវិកាថ្នាក់ជាតិហិរញ្ញប្បទានក្នុងប្រទេស ត្រូវបានដាក់ឱ្យអនុវត្តបន្ថែមទៅក្រសួង ចំនួន ៨ រួមមាន៖ ១). ក្រសួងមហាផ្ទៃ, ២). ក្រសួងសេដ្ឋកិច្ច និងហិរញ្ញវត្ថុ, ៣). ក្រសួងសុខាភិបាល, ៤). ក្រសួងកសិកម្ម រុក្ខាប្រមាញ់ និងនេសាទ, ៥). ក្រសួងប្រៃសណីយ៍ និងទូរគមនាគមន៍, ៦). ក្រសួងធនធានទឹក និងឧតុនិយម, ៧). ក្រសួងការងារ និងបណ្តុះបណ្តាលវិជ្ជាជីវៈ និង ៨). ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។ តាមរយៈ FMIS, ក្រសួង-ស្ថាប័នអាចស្នើសុំធានាចំណាយ អនុវត្តកិច្ចលទ្ធកម្ម និង ទូទាត់ចំណាយ តាមរំហូរអនុម័ត ដែលមានភាពច្បាស់លាស់ និង អាចតាមដានបាន ។

ជាមួយគ្នានេះ, ការកត់ត្រាទិន្នន័យចំណាយគម្រោងវិនិយោគសាធារណៈ ដោយហិរញ្ញប្បទានក្រៅប្រទេស នឹងត្រូវដាក់ឱ្យអនុវត្តបន្ថែមទៅក្រសួង ចំនួន ៣ គឺ ១). ក្រសួងអប់រំ យុវជន និង កីឡា, ២). ក្រសួងសុខាភិបាល និង ៣). ក្រសួងធនធានទឹក និង ឧតុនិយម ។ ការដាក់ឱ្យប្រើប្រាស់ FMIS ក្នុងកិច្ចការនេះ នឹងជួយបញ្ចប់នូវការកត់ត្រាទិន្នន័យបែបដាច់ដោយឡែក តាមឯកសារ ឬ តារាងក្រៅប្រព័ន្ធ និង ផ្តល់នូវទិន្នន័យចំណាយពេញលេញ ស្របតាមគតិយុត្ត និង ងាយស្រួលសម្រាប់ការរៀបចំរបាយការណ៍ និង ការសម្រេចចិត្ត បានឆាប់រហ័ស និង មានភាពសុក្រឹតខ្ពស់ ។

ឯកឧត្តមបណ្ឌិតសភាចារ្យ មានប្រសាសន៍បន្ថែមទៀតថា ការអនុវត្ត FMIS នឹងចូលរួមលើកកម្ពស់ការគ្រប់គ្រងថវិកាវិនិយោគ ឱ្យកាន់តែមានប្រសិទ្ធភាព តម្លាភាព និង គណនេយ្យភាព ដោយអនុញ្ញាតឱ្យមានការតាមដានរំហូរអនុម័តតាមដំណាក់កាល, ការទទួលបានទិន្នន័យចំណាយ និង ស្ថានភាពសាច់ប្រាក់ ទាន់ពេលវេលា ព្រមទាំងកាត់បន្ថយនីតិវិធីក្រៅប្រព័ន្ធ និង ការប្រើប្រាស់ឯកសារក្រដាស ។ ហើយការចូលរួមអនុវត្តការងារនេះ ក៏ជាមូលដ្ឋានសំខាន់សម្រាប់ការបន្តអភិវឌ្ឍ ឆ្ពោះទៅរកប្រព័ន្ធថវិកាឌីជីថលពេញលេញ និង ការរួមចំណែកក្នុងការពង្រឹងឱ្យបាននូវ តម្លាភាព គណនេយ្យភាព ប្រសិទ្ធភាព, ជាពិសេស ការធ្វើឱ្យមានអភិបាលកិច្ចល្អ ក្នុងការគ្រប់គ្រងថវិកា សម្រាប់ការវិនិយោគសាធារណៈនៅកម្ពុជា ។

ជាចុងបញ្ចប់, ឯកឧត្តមបណ្ឌិតសភាចារ្យ បានអំពាវនាវឱ្យក្រសួង-ស្ថាប័ន និង គ្រប់អង្គភាពពាក់ព័ន្ធ បន្តពង្រឹងភាពជាម្ចាស់ និង សមត្ថភាពជូនមន្ត្រីទទួលបន្ទុក តាមរយៈការចាត់មន្ត្រីទទួលបន្ទុកឱ្យចូលរួមវគ្គបណ្តុះបណ្តាល កិច្ចសហការផ្តល់ធាតុចូល និង រួមគ្នាអនុវត្តការងារ ក្នុងស្មារតីតម្កល់ “ឧត្តមនិយម” នៃផលប្រយោជន៍ជាតិ ដើម្បីជំរុញការដាក់ឱ្យប្រើប្រាស់ FMIS ទទួលបានជោគជ័យតាមផែនការ ក្នុងគោលដៅចូលរួមចំណែកធានាឱ្យបាននូវការវិនិយោគសាធារណៈ ដែលនាំមកនូវការអភិវឌ្ឍជាតិ ប្រកបដោយចីរភាព និង ផ្ដល់ផលប្រយោជន៍ជាក់ស្តែងដល់ប្រជាជន ៕

ថ្នាក់ដឹកនាំជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ចុះសួរសុខទុក្ខ និង នាំយកអំណោយជូនវីរៈកងទ័ព ដែលកំពុងឈរជើងនៅសមរភូមិមុខនៅតាមបណ្តោយព្រំដែននៃ ខេត្តព្រះវិហារ, ខេត្តឧត្តរមានជ័យ និង ខេត្តបន្ទាយមានជ័យ
----------

ឆ្លៀតឱកាសនៃការអញ្ជើញជាអធិបតីក្នុងពិធីបើកវគ្គបណ្តុះបណ្តាល និងវិក្រឹតការស្តីពី "គណនេយ្យសាធារណៈ" ជូនមន្ត្រីទទួលបន្ទុកហិរញ្ញវត្ថុសាធារណៈ នៃរដ្ឋបាលក្រុង ស្រុក នៃខេត្តសៀមរាប ខេត្តកំពង់ធំ ខេត្តកំពង់ចាម ខេត្តឧត្តរមានជ័យ និងខេត្តព្រះវិហារ, នាថ្ងៃទី ១៧ និង ១៨ ខែ ឧសភា ឆ្នាំ ២០២៦, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាអនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ (កបស), តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង ប្រធានឧត្តមក្រុមប្រឹក្សាសេដ្ឋកិច្ចជាតិ បានចុះសួរសុខទុក្ខ និង នាំយកអំណោយជូនវីរៈកងទ័ព ដែលកំពុងឈរជើងនៅសមរភូមិមុខនៅតាមបណ្តោយព្រំដែននៃ ខេត្តព្រះវិហារ, ខេត្តឧត្តរមានជ័យ និង ខេត្តបន្ទាយមានជ័យ, ដោយមានការអញ្ជើញចូលរួមពី ថ្នាក់ដឹកនាំក្រសួង, ឧត្តមក្រុមប្រឹក្សាសេដ្ឋកិច្ចជាតិ, តំណាងអគ្គនាយកដ្ឋានពាក់ព័ន្ធ, លោក លោកស្រី ប្រធានមន្ទីរសេដ្ឋកិច្ច និង ហិរញ្ញវត្ថុ ព្រមទាំងសហការីជាច្រើនរូប ។

ឯកឧត្តមបណ្ឌិតសភាចារ្យ បានសម្ដែងនូវសេចក្ដីគោរព ការដឹងគុណ និង ការកោតសរសើរ ចំពោះវីរៈភាពរបស់វីរៈកងទ័ពជួរមុខ ដែលកំពុងបំពេញភារកិច្ចយ៉ាងអង់អាចក្លាហាន មោះមុតការពារបូរណភាពទឹកដី ប្រឆាំងនឹងសត្រូវឈ្លានពានមកលើដែនអធិបតេយ្យ, ហើយការបំពេញភារកិច្ចដ៏ឧដុង្គឧត្តមរបស់វីរៈកងទ័ព ដើម្បីបុព្វហេតុការពារជាតិ និង សេចក្ដីសុខសាន្តរបស់ប្រជាជន នឹងត្រូវបានកត់ត្រាជាប្រវត្តិសាស្ត្រ និង ចងចាំជារៀងរហូត ។

អំណោយដែលបានយកជូនវីរៈកងទ័ព ដែលកំពុងឈរជើងនៅសមរភូមិមុខ រួមមាន៖ ទោចក្រយានយន្ត, ធុងចម្រោះទឹក, ស៊ីទែនទឹក, គ្រឿងឧបភោគបរិភោគ (រួមមាន អង្ករ, មី/គុយទាវកញ្ចប់, ទឹកត្រី, ទឹកស៊ីអ៊ីវ, ទឹកក្រូច, ទឹកសុទ្ធ, នំទាហាន ។ល។) ព្រមទាំងសម្ភារៈបរិក្ខារចាំបាច់មួយចំនួនទៀត ។

បន្ថែមលើនេះ ក៏មានថវិកាមួយចំនួនត្រូវបានប្រគល់ជូនតំណាងវីរៈកងទ័ព ដែលកំពុងឈរជើងនៅសមរភូមិមុខនៅតាមបណ្តោយព្រំដែននៃខេត្តព្រះវិហារ (ចំនួន ៤ អង្គភាព), ខេត្តឧត្តរមានជ័យ (ចំនួន ៤ ទីតាំងប្រាសាទ) និង ខេត្តបន្ទាយមានជ័យ (ចំនួន ២ អង្គភាព) ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ទទួលជួបពិភាក្សាការងារជាមួយថ្នាក់ដឹកនាំជាន់ខ្ពស់នៃ ក្រុមហ៊ុន Toyota Tsusho Manufacturing (Cambodia) Co., Ltd.
----------

នារសៀលថ្ងៃទី ១៥ ខែ ឧសភា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារអភិវឌ្ឍវិស័យឯកជន បានទទួលជួបពិភាក្សាការងារជាមួយលោក Takuma Hayashi នាយករងគ្រប់គ្រងក្រុមហ៊ុន Toyota Tsusho Manufacturing (Cambodia) Co., Ltd. ។

ជាកិច្ចចាប់ផ្តើម, លោក Takuma Hayashi បានថ្លែងអំណរគុណចំពោះឯកឧត្តមបណ្ឌិតសភាចារ្យ ប្រធានក្រុមការងារ ដែលតែងយកចិត្តទុកដាក់ក្នុងការជួយជ្រោមជ្រែងដល់ក្រុមហ៊ុន Toyota Tsusho Corporation រហូតឈានដល់ការវិនិយោគរោងចក្រដំឡើងរថយន្តនៅព្រះរាជាណាចក្រកម្ពុជា ក្រោមក្រុមហ៊ុនឈ្មោះ Toyota Tsusho Manufacturing (Cambodia) Co., Ltd. ។ ជាមួយគ្នានេះ, លោក Takuma Hayashi បានរាយការណ៍អំពីវឌ្ឍនភាពរោងចក្រដំឡើងរថយន្តតូយ៉ូតា នៅព្រះរាជាណាចក្រកម្ពុជា ព្រមទាំងផែនការអាជីវកម្មរបស់ក្រុមហ៊ុន ។

ឯកឧត្តមបណ្ឌិតសភាចារ្យ បានវាយតម្លៃខ្ពស់ចំពោះវឌ្ឍនភាពរោងចក្រដំឡើងរថយន្ត របស់ក្រុមហ៊ុនតូយ៉ូតា នៅកម្ពុជា និង បានសំណូមពរដល់ក្រុមហ៊ុន ឱ្យខិតខំ និង យកចិត្តទុកដាក់ខ្ពស់ថែមទៀត លើការបង្កើតការងារ, ការផ្ទេរបច្ចេកវិទ្យា, ការពង្រឹងសមត្ថភាពជំនាញដល់ កម្មករ និយោជិត និង ការប្រើប្រាស់ធាតុចូលក្នុងស្រុកឱ្យកាន់តែច្រើនឡើង ។

ជាការឆ្លើយតប, លោក Takuma Hayashi បានថ្លែងអំណរគុណយ៉ាងជ្រាលជ្រៅ ចំពោះរាជរដ្ឋាភិបាលកម្ពុជា ជាពិសេស ថ្នាក់ដឹកនាំក្រសួងសេដ្ឋកិច្ច និង ហិរញ្ញវត្ថុ ដែលតែងគាំទ្រ និង ជំរុញឱ្យរោងចក្រដំឡើងរថយន្តតូយ៉ូតា លេចរូបរាងឡើងនៅព្រះរាជាណាចក្រកម្ពុជា ។ ទន្ទឹមនេះ, លោកនាយករងក្រុមហ៊ុន បានប្តេជ្ញានឹងខិតខំចូលរួមចំណែកក្នុងការអភិវឌ្ឍឧស្សាហកម្មយានយន្តនៅកម្ពុជា ឱ្យកាន់តែសកម្មថែមទៀត ។

ជាចុងក្រោយ, ឯកឧត្តមបណ្ឌិតសភាចារ្យ បានលើកទឹកចិត្តឱ្យក្រុមហ៊ុន សហការជិតស្និទ្ធថែមទៀត ជាមួយលេខាធិការដ្ឋានក្រុមការងារ សំដៅចូលរួមដោះស្រាយបញ្ហា ក៏ដូចជាសំណូមពរនានា ដើម្បីអភិវឌ្ឍឧស្សាហកម្មយានយន្តនៅកម្ពុជា និយាយជារួម, ព្រមទាំងជួយសម្រួលដល់ការវិនិយោគ និង ធុរកិច្ចរបស់ក្រុមហ៊ុន និយាយដោយឡែក ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ដឹកនាំកិច្ចប្រជុំពិភាក្សាលើការលើកទឹកចិត្តគម្រោងវិនិយោគដំឡើងរថយន្តអគ្គិសនី
----------

នារសៀលថ្ងៃទី ១៥ ខែ ឧសភា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារលើកទឹកចិត្តគម្រោងវិនិយោគផ្គុំ និង ដំឡើងយានយន្ត បានដឹកនាំកិច្ចប្រជុំពិភាក្សាលើការលើកទឹកចិត្តគម្រោងវិនិយោគដំឡើងរថយន្តអគ្គិសនី ដោយមានការអញ្ជើញចូលរួមពីថ្នាក់ដឹកនាំ និង មន្ត្រីជំនាញ នៃអគ្គនាយកដ្ឋាន និង អង្គភាពពាក់ព័ន្ធ ក្រោមឱវាទក្រសួងសេដ្ឋកិច្ច និង ហិរញ្ញវត្ថុ ។

អង្គប្រជុំ បានលើកឡើងអំពីគោលនយោបាយ ច្បាប់ គោលការណ៍លើកទឹកចិត្ត ស្ថានភាពវិនិយោគ និង វិធានការនានា ក្នុងការជំរុញការវិនិយោគក្នុងវិស័យយានយន្ត រួមទាំងការលើកកម្ពស់ខ្សែច្រវាក់ផ្គត់ផ្គង់ និង ផលប្រយោជន៍សង្គម-សេដ្ឋកិច្ច ។

ថ្លែងក្នុងកិច្ចប្រជុំនេះ, ឯកឧត្តមបណ្ឌិតសភាចារ្យ បានគូសរំលេចថា រាជរដ្ឋាភិបាលកម្ពុជា តែងយកចិត្តទុកដាក់ខ្ពស់លើការអភិវឌ្ឍវិស័យយានយន្តអគ្គិសនី ដើម្បីជំរុញពិពិធកម្មសេដ្ឋកិច្ច, កាត់បន្ថយការពឹងផ្អែកលើប្រេងឥន្ធនៈ, លើកកម្ពស់បរិស្ថាន, បង្កើតការងារ និង ផ្ទេរបច្ចេកវិទ្យា ។

មុននឹងបញ្ចប់, ឯកឧត្តមបណ្ឌិតសភាចារ្យ បានណែនាំឱ្យអង្គភាពពាក់ព័ន្ធ បន្តសិក្សា និង រៀបចំធាតុចូលសម្រាប់ការពិចារណាបន្ថែម ស្របតាមទិសដៅអភិវឌ្ឍវិស័យយានយន្ត នៅកម្ពុជា ៕

គណៈប្រតិភូជាន់ខ្ពស់ឡាវ ធ្វើទស្សនកិច្ចសិក្សា និង ដកស្រង់បទពិសោធន៍ ក្នុងការកសាង អភិវឌ្ឍ និង អនុវត្តប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) នៅព្រះរាជាណាចក្រកម្ពុជា
----------

ក្នុងស្មារតីពង្រឹងកិច្ចសហប្រតិបត្តិការក្នុងតំបន់ និង ការចែករំលែកបទពិសោធន៍ល្អៗ ក្នុងវិស័យគ្រប់គ្រងហិរញ្ញវត្ថុសាធារណៈ, គណៈប្រតិភូជាន់ខ្ពស់នៃសាធារណរដ្ឋប្រជាធិបតេយ្យប្រជាមានិតឡាវ (Lao PDR) បានអញ្ជើញមកបំពេញទស្សនកិច្ចសិក្សា នៅព្រះរាជាណាចក្រកម្ពុជា ដើម្បីសិក្សា និង ដកស្រង់បទពិសោធន៍ជាក់ស្តែង ក្នុងការរៀបចំ ការកសាង ការអភិវឌ្ឍ និង ការអនុវត្តប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) នៅព្រះរាជាណាចក្រកម្ពុជា ក្នុងក្របខណ្ឌកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ។ ដំណើរទស្សនកិច្ចសិក្សានេះ នឹងប្រព្រឹត្តទៅចាប់ពីថ្ងៃទី ១១ ដល់ថ្ងៃទី ១៣ ខែ ឧសភា ឆ្នាំ ២០២៦ នៅក្រសួងសេដ្ឋកិច្ច និងហិរញ្ញវត្ថុ និង ក្រសួងប្រៃសណីយ៍ និងទូរគមនាគមន៍ ។

ក្នុងដំណើរទស្សនកិច្ចនេះ, ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ជាប្រធានក្រុមការងារគ្រប់គ្រងគម្រោង FMIS តំណាងដ៏ខ្ពង់ខ្ពស់ ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ អមដោយ ឯកឧត្តម មន្ត ប្រាថ្នា អគ្គនាយកនៃអគ្គនាយកដ្ឋានបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ ព្រមទាំងថ្នាក់ដឹកនាំ និង មន្ត្រីជំនាញពាក់ព័ន្ធ បានជួបសំដែងការស្វាគមន៍ និង ពិភាក្សាការងារជាមួយគណៈប្រតិភូជាន់ខ្ពស់នៃសាធារណរដ្ឋប្រជាធិបតេយ្យប្រជាមានិតឡាវ ដែលដឹកនាំដោយ ឯកឧត្តម Phouvong Kittavong អនុរដ្ឋមន្រ្តី នៃក្រសួងហិរញ្ញវត្ថុ អមដោយថ្នាក់ដឹកនាំ និង មន្ត្រីបច្ចេកទេស ចំនួន ២៥ រូប ។ អមដំណើរទស្សនកិច្ចនេះដែរ ក៏មានវត្តមានរបស់តំណាងធនាគារពិភពលោក កញ្ញា ទេសា ឃ្លែ ឃូឡេន (Miss Tessa Clear Cullen) អ្នកជំនាញវិស័យសាធារណៈ និង ជាប្រធានកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈប្រចាំប្រទេសកម្ពុជា និង ឡាវ ។

ក្នុងឱកាសដ៏វិសេសនេះ, ឯកឧត្តមបណ្ឌិតសភាចារ្យ បានជម្រាបជូនគណៈប្រតិភូអំពីស្ថានភាពទូទៅ និង ការវិវត្តនៃគម្រោង FMIS ដែលត្រូវបានអនុវត្តជាបន្តបន្ទាប់ ចាប់ពីជំហានទី១ ពោលគឺចាប់ពីឆ្នាំ២០១៣ មក ដោយអនុលោមតាមយុទ្ធសាស្ត្រកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFMRP) ។ គម្រោង FMIS បានលទ្ធផលផ្លៃផ្កាទៅតាមជំហានៗ ចាប់ពីដំណាក់កាលបង្កើត និង កសាងនូវមូលដ្ឋានគ្រឹះ (ជំហានទី១) ដល់ដំណាក់កាលពង្រីក ពង្រឹង និង ការធ្វើឱ្យកាន់តែប្រសើរឡើង (ជំហានទី២ និង ជំហានទី៣), ជាពិសេស កំពុងធ្វើដំណើរឆ្ពោះទៅកាន់ជំហានទី៤ (២០២៦-២០៣០) ដែលត្រូវបានតម្រង់ទិសតាមចក្ខុវិស័យដ៏ច្បាស់លាស់ គឺ “នៅឆ្នាំ ២០៣០ ប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ នឹងក្លាយជាថ្នាលគ្រប់គ្រងហិរញ្ញវត្ថុសាធារណៈទំនើប មានលក្ខណៈសមាហរណកម្ម និង មានទិន្នន័យពេញលេញ ដែលអនុញ្ញាតឱ្យក្រសួង-ស្ថាប័ន និង អង្គភាពពាក់ព័ន្ធ មានលទ្ធភាពធ្វើការសម្រេចចិត្តបានទាន់ពេលវេលា ប្រកបដោយតម្លាភាព និង ប្រចក្សភាព” ។

ឯកឧត្តមបណ្ឌិតសភាចារ្យ បានគូសរំលេចបន្ថែមថា តាមរយៈបទពិសោធន៍នៃការអនុវត្ត FMIS នៅកម្ពុជា បាននាំមកនូវសមិទ្ធផលសំខាន់ៗជាច្រើន រួមមាន៖ ការកែលម្អប្រព័ន្ធគ្រប់គ្រង អនុវត្តថវិកា និង ការតាមដានប្រតិបត្តិការហិរញ្ញវត្ថុ, ការបង្កើនប្រសិទ្ធភាពនៃការគ្រប់គ្រងហិរញ្ញវត្ថុសាធារណៈ, ការកាត់បន្ថយនីតិវិធីអនុវត្តការងារដោយដៃ មកជាការប្រើប្រាស់ប្រព័ន្ធឌីជីថល, និង ការពង្រឹងសមត្ថភាព តម្លាភាព និង គណនេយ្យភាពនៃការគ្របគ្រងហិរញ្ញវត្ថុសាធារណៈ ។ FMIS បានបង្កើតមូលដ្ឋានទិន្នន័យមួយសំខាន់សម្រាប់គាំទ្រដល់ការវិភាគ និង ការសម្រេចចិត្តជាលក្ខណៈយុទ្ធសាស្ត្ររបស់រាជរដ្ឋាភិបាលកម្ពុជា ។

ក្នុងបរិការណ៍នៃការគ្រប់គ្រងការផ្លាស់ប្តូរ (Change Management), តំណាងក្រសួងសេដ្ឋកិច្ច និងហិរញ្ញវត្ថុកម្ពុជា បានចែករំលែកបទពិសោធន៍សំខាន់ៗ ដោយផ្តោតលើការរៀបចំផែនការ និង យុទ្ធសាស្ត្រក្នុងការកៀរគរឱ្យមានការចូលរួមពី ថ្នាក់ដឹកនាំ និង មន្ត្រីគ្រប់ជាន់ថ្នាក់, ជាពិសេសការបណ្តុះនូវឆន្ទៈភាពជាម្ចាស់នៃការប្រើប្រាស់ប្រព័ន្ធ ។ ការបណ្តុះបណ្តាល ការផ្សព្វផ្សាយ និង ការគាំទ្រយ៉ាងជិតស្និទ្ធទៅកាន់អ្នកពាក់ព័ន្ធ ដើម្បីធានាថាប្រព័ន្ធត្រូវបានអនុវត្តដោយរលូន និង មានប្រសិទ្ធភាព ។ តំណាងក្រសួង បានបង្ហាញអំពីមុខងាររបស់ FMIS និង ទំនើបកម្មនៃការអភិវឌ្ឍប្រព័ន្ធ FMIS ស្របតាមស្តង់ដា និង នវានុវត្តន៍អន្តរជាតិ ។ បន្ទាប់មក, គណៈប្រតិភូសាធារណរដ្ឋប្រជាធិបតេយ្យប្រជាមានិតឡាវ បានបន្តទស្សនកិច្ចនៅទីតាំងបំពេញការងាររបស់ក្រុមការងារ FMIS និង ការបង្ហាញនូវមជ្ឈមណ្ឌលទិន្នន័យសុវត្ថិភាពរបស់ FMIS ។
បច្ចុប្បន្ន, គម្រោង FMIS ត្រូវបានអនុវត្តនៅគ្រប់ក្រសួង-ស្ថាប័ន, គ្រឹះស្ថានសាធារណៈរដ្ឋបាល, រតនាគាររាជធានី-ខេត្ត, មន្ទីរជំនាញ និង អង្គភាពថវិកាពាក់ព័ន្ធទាំងថ្នាក់ជាតិ និង ថ្នាក់ក្រោមជាតិ ចំនួន ៣០០ ការដ្ឋាន ដោយមានអ្នកប្រើប្រាស់សរុបប្រមាណ ៣,៩៩២ រូប និង បានអនុវត្តកម្មវិធីបណ្តុះបណ្តាលបន្តបន្ទាប់ជាច្រើន ដើម្បីធានាដល់ការប្រើប្រាស់ប្រព័ន្ធឱ្យទទួលបានប្រសិទ្ធភាព នៅគ្រប់ការដ្ឋាន ។ FMIS ត្រូវបានកំណត់ថាជាស្នូលដ៏សំខាន់ ក្នុងការពង្រឹងគុណភាព និង ប្រសិទ្ធភាពនៃការគ្រប់គ្រងថវិកាជាតិ ដោយធានាបាននូវភាពត្រឹមត្រូវ តម្លាភាព និង ការទទួលខុសត្រូវខ្ពស់ ក្នុងការគ្រប់គ្រងធនធានសាធារណៈ ។

ក្នុងឱកាសនៃដំណើរទស្សនកិច្ចនេះ, គណៈប្រតិភូសាធារណរដ្ឋប្រជាធិបតេយ្យប្រជាមានិតឡាវ បានធ្វើបទបង្ហាញអំពីវឌ្ឍនភាព និង ទិសដៅនៃគម្រោងអភិវឌ្ឍប្រព័ន្ធ IFMIS របស់ប្រទេសឡាវ ដោយផ្តោតលើគោលបំណង និង តម្រូវការក្នុងការផ្លាស់ប្តូរ ពីប្រព័ន្ធគ្រប់គ្រងហិរញ្ញវត្ថុបែបប្រពៃណី ទៅកាន់ប្រព័ន្ធគ្រប់គ្រងព័ត៌មានហិរញ្ញវត្ថុសាធារណៈបែបទំនើប និង មានលក្ខណៈសមាហរណកម្ម និង មានទិន្នន័យ ដើម្បីពង្រឹងប្រសិទ្ធភាព តម្លាភាព និង គណនេយ្យភាពក្នុងការគ្រប់គ្រងហិរញ្ញវត្ថុសាធារណៈរបស់ខ្លួន ។

គណៈប្រតិភូឡាវបានគូសបញ្ជាក់ថា ការអនុវត្ត IFMIS គឺជាផ្នែកសំខាន់នៃកំណែទម្រង់ហិរញ្ញវត្ថុសាធារណៈ និង ការធ្វើបរិវត្តកម្មឌីជីថលរបស់រដ្ឋាភិបាលឡាវ ដោយមានគោលបំណងបង្កើតប្រព័ន្ធគ្រប់គ្រងហិរញ្ញវត្ថុ ដែលមានសមត្ថភាពពេញលេញ គាំទ្រដល់សមាហរណកម្ម រវាងការភ្ជាប់ទិន្នន័យរបស់ស្ថាប័ន ទៅនឹងការគាំទ្រការសម្រេចចិត្តដោយផ្អែកលើព័ត៌មានទិន្នន័យទាន់ពេល និងប្រកបដោយភាពប្រាកដប្រជា ។

គណៈប្រតិភូឡាវបានលើកឡើងអំពីយន្តការកែលម្អប្រព័ន្ធ IFMIS ជាពិសេសលើដំណើរការរៀបចំថវិកា (Budget Preparation) ដោយផ្តោតលើការធ្វើឱ្យប្រសើរឡើងនូវការរៀបចំផែនការ ការប៉ាន់ប្រមាណចំណូល-ចំណាយ និង ការភ្ជាប់ថវិកា ជាមួយគោលនយោបាយអភិវឌ្ឍសេដ្ឋកិច្ចសង្គម ។ គណៈប្រតិភូឡាវ បានចែករំលែកអំពីបញ្ហាប្រឈមមួយចំនួន ក្នុងការអនុវត្តគម្រោង IFMIS រួមមាន៖ បញ្ហាសមត្ថភាពធនធានមនុស្ស, ការគ្រប់គ្រងការផ្លាស់ប្តូរ, ការសម្របសម្រួលរវាងស្ថាប័ន, ការតភ្ជាប់ប្រព័ន្ធបច្ចេកវិទ្យា និង ការធានានិរន្តរភាពនៃការប្រើប្រាស់ប្រព័ន្ធ ។ បញ្ហាទាំងនេះត្រូវបានពិភាក្សា និង ផ្លាស់ប្តូរយោបល់ជាមួយភាគីកម្ពុជា ដើម្បីស្វែងរកដំណោះស្រាយ និង បទពិសោធន៍អនុវត្តល្អៗ ។

ដំណើរទស្សនកិច្ចសិក្សានេះ គឺជាឱកាសដ៏មានតម្លៃសម្រាប់ការផ្លាស់ប្តូរចំណេះដឹង ស្វែងយល់ ក៏ដូចជាដកស្រង់បទពិសោធន៍ រវាងប្រទេសទាំងពីរ និង ជាកត្តាជំរុញសំខាន់ ក្នុងការពង្រឹង និង ពង្រីកកិច្ចសហប្រតិបត្តិការក្នុងវិស័យគ្រប់គ្រងហិរញ្ញវត្ថុសាធារណៈ ដើម្បីឆ្ពោះទៅសម្រេចឱ្យបាននូវរដ្ឋាភិបាលឌីជីថល ដែលមានប្រសិទ្ធភាព តម្លាភាព និង ចីរភាពក្នុងតំបន់ ៕

ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ ទទួលជួបពិភាក្សាការងារជាមួយគណៈប្រតិភូក្រុមហ៊ុន Zhisheng Energy
----------

នារសៀលថ្ងៃទី ៦ ខែ ឧសភា ឆ្នាំ ២០២៦ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និង ជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានទទួលជួបពិភាក្សាការងារជាមួយគណៈប្រតិភូក្រុមហ៊ុន Zhisheng Energy ដែលដឹកនាំដោយលោក Liu Hui ប្រធានក្រុមហ៊ុន Zhisheng Energy ។

ក្នុងជំនួបនោះ, លោកប្រធានក្រុមហ៊ុន បានគោរពរាយការណ៍ជូនអង្គជំនួបពិភាក្សា អំពីអាជីវកម្មរបស់ក្រុមហ៊ុន ព្រមទាំងបានបង្ហាញនូវចំណាប់ក្នុងការស្វែងយល់អំពីបរិយាកាសវិនិយោគរបស់ព្រះរាជាណាចក្រកម្ពុជា ជាពិសេស ការសិក្សាអំពីលទ្ធភាពវិនិយោគលើការចម្រាញ់ប្រេង នៅព្រះរាជាណាចក្រកម្ពុជា ។

ឯកឧត្តមបណ្ឌិតសភាចារ្យ ហ៊ាន សាហ៊ីប បានសម្តែងការរីករាយ និង ស្វាគមន៍ចំពោះគណៈប្រតិភូក្រុមហ៊ុន Zhisheng Energy ដែលបានមកសិក្សាស្វែងយល់អំពីកាលានុវត្តភាពវិនិយោគនៅព្រះរាជាណាចក្រកម្ពុជា ជាពិសេស សិក្សាអំពីលទ្ធភាពវិនិយោគលើការចម្រាញ់ប្រេង នៅកម្ពុជា ដែលជាវិស័យអាទិភាព និង ទទួលបានការយកចិត្តទុកដាក់ខ្ពស់ ពីរាជរដ្ឋាភិបាល ។ ជាមួយគ្នានេះ, ឯកឧត្តមបណ្ឌិតសភាចារ្យ បានជម្រាបជូនគណៈប្រតិភូក្រុមហ៊ុនអំពី «អត្ថប្រយោជន៍ពិសេស» ទាំងការលើកទឹកចិត្តផ្នែកពន្ធ ការសម្របសម្រួលផ្នែករដ្ឋបាល និង ការសម្រួលនីតិវិធីផ្សេងៗ ពាក់ព័ន្ធនឹងការវិនិយោគក្នុងខេត្តព្រះសីហនុ ។

លោកប្រធានក្រុមហ៊ុន បានថ្លែងអំណរគុណយ៉ាងជ្រាលជ្រៅ ដល់ឯកឧត្តមបណ្ឌិតសភាចារ្យ ប្រធានក្រុមការងារ ដែលបានទទួលជួប និង ផ្តល់ព័ត៌មានអំពីសក្តានុពលវិនិយោគនៅព្រះរាជាណាចក្រកម្ពុជា ជាពិសេស «កម្មវិធីពិសេសជំរុញការវិនិយោគក្នុងខេត្តព្រះសីហនុ» ព្រមទាំងបានសំដែងការចាប់អារម្មណ៍ និង វាយតម្លៃខ្ពស់ លើការរីកចម្រើន និង ការអភិវឌ្ឍនៃហេដ្ឋារចនាសម្ព័ន្ធគមនាគមន៍ និង សេដ្ឋកិច្ចដែលផ្សារភ្ជាប់ពីខេត្តព្រះសីហនុ ទៅកាន់តំបន់ផ្សេងទៀត ក្នុងព្រះរាជាណាចក្រកម្ពុជា និង អន្តរជាតិ ។

ជាចុងក្រោយ, ឯកឧត្តមបណ្ឌិតសភាចារ្យ បានជូនពរគណៈប្រតិភូក្រុមហ៊ុន ទទួលបានផ្លែផ្កា និង សមិទ្ធផល ក្នុងដំណើរទស្សនកិច្ចនៅព្រះរាជាណាចក្រកម្ពុជា ៕