Neth Pheaktra

ទទួលជួបជាមួយក្រុមការងារសារព័ត៌មានថ្មីៗ និងការបង្ហាញពីស្នាដៃថ្មីសន្លាង«អង្គរក្នុងការចងចាំ»! ខ្ញុំសូមថ្លែងនូវការកោតសរសើរចំពោះលោក គី សុខលីម និងក្រុមការងារដែលបានចំណាយពេលវេលាក្នុងការស្វែងយល់ ស្រាវជ្រាវ និងចងក្រងនូវសៀវភៅឯកសារដ៏មានសារៈសំខាន់នេះ ដែលជាចំណែកមួយនៃភាពរស់រវើករបស់អង្គរ។ ខ្ញុំចងចាំជានិច្ចនូវប្រសាសន៍របស់លោកតាព្រឹទ្ធាចារ្យ ឆេង ផុន ថា«ទៅមើលអង្គរ ត្រូវចេះនិយាយជាមួយថ្ម…ថ្មនឹងប្រាប់រឿងរ៉ាវដែលឆ្លងកាត់រាប់រយពាន់ឆ្នាំមកយើង»។ ជាមួយគ្នានេះ ខ្ញុំបានជាវសៀវភៅនេះចំនួន ២០០ ក្បាលដើម្បីចែកជូនដល់ថ្នាក់ដឹកនាំ និងមន្ត្រីរាជការនៃក្រសួងព័ត៌មានដែលស្រឡាញ់អំណាន ដើម្បីអានចម្រើនពុទ្ធិ។

ដឹកនាំកិច្ចប្រជុំដើម្បីរៀបចំលិខិតបទដ្ឋានគតិយុត្ត

សារលិខិត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសខួបលើកទី៩ ទិវាជាតិនៃការចងចាំ ថ្ងៃទី២០ ខែឧសភា ឆ្នាំ២០២៦

ក្នុងក្របខណ្ឌនៃយុទ្ធនាការប្រឆាំងព័ត៌មានក្លែងក្លាយជំហានទី២ នៅឆ្នាំ២០២៦ នេះ អង្គភាពសារព័ត៌មានរដ្ឋនិងឯកជន រួមនឹងអ្នកផលិតមាតិកាបានចូលរួមយ៉ាងសកម្មក្នុងការផ្តល់ព័ត៌មានពិត ត្រឹមត្រូវ ច្បាស់លាស់ និងមានប្រភពច្បាស់លាស់ជូនដល់ប្រជាពលរដ្ឋ។ ក្រសួងព័ត៌មានតាមរយៈយុទ្ធនាការប្រឆាំងព័ត៌មានក្លែងក្លាយដោយមានការចូលរួមពីគ្រប់តួអង្គធ្វើឡើងក្នុងគោលបំណងពង្រឹងភាពធន់របស់ពលរដ្ឋក្នុងការប្រឆាំងព័ត៌មានក្លែងក្លាយ ដោយបញ្ជ្រាបអក្ខរកម្មព័ត៌មាននិងប្រព័ន្ធផ្សព្វផ្សាយដើម្បីសុវត្ថិភាពព័ត៌មានជូនដល់ប្រជាពលរដ្ឋ។

ក្រោយពីពិធីបើកផ្លូវការយុទ្ធនាការនិយាយថាទេចំពោះព័ត៌មានក្លែងក្លាយនៅវិទ្យាល័យ ហ៊ុន សែន ប៊ុនរ៉ានី វត្តភ្នំនៅព្រឹកថ្ងៃទី១៨ ខែឧសភា នៅពេលរសៀល ខ្ញុំបានដឹកនាំកិច្ចប្រជុំតម្រង់ទិសស្តីពីការអនុវត្តផែនការយុទ្ធនាការដោយមានការអញ្ជើញចូលរួមពីថ្នាក់ដឹកនាំក្រសួង មន្ទីរព័ត៌មានរាជធានីខេត្ត សមាគមសារព័ត៌មាន​ អង្គភាពសារព័ត៌មាន និងអ្នកផលិតមាតិកាឌីជីថល អ្នកអ្នកពាក់ព័ន្ធផ្សេងទៀត។ យើងរួមគ្នាប្រយុទ្ធប្រឆាំងនិងលុបបំបាត់ព័ត៌មានក្លែងក្លាយ និងផ្តល់នូវសន្តិសុខព័ត៌មាន សុវត្ថិភាពព័ត៌៎មានជូនដល់ប្រជាពលរដ្ឋ។ ប្រធានបទសំខាន់ក្នុងយុទ្ធនាការជំហានទី២ នេះ​គឺ«ពង្រឹងអក្ខរកម្មព័ត៌មាននិងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»ដែលមានទិសដៅតម្រង់ទៅរកយុវវ័យដែលកំពុងប្រើប្រាស់ប្រព័ន្ធបច្ចេកវិទ្យាក្នុងជីវិតប្រចាំថ្ងៃរបស់ពួកគាត់។

កិច្ចប្រជុំជាមួយលោក លោកស្រីប្រធានមន្ទីរព័ត៌មានរាជធានីខេត្តទាំង ២៥ ដើម្បីពង្រឹងប្រសិទ្ធការក្នុងការដឹកនាំនិងគ្រប់គ្រងវិស័យព័ត៌មាន និងសោតទស្សន៍ក្នុងរាជធានី-ខេត្ត, ថ្ងៃទី១៨ ខែឧសភា ឆ្នាំ២០២៦

រួមគ្នាផ្តល់ឈាម ផ្តល់ក្តីស្រលាញ់ មន្រ្តីក្រសួងព័ត៌មាន រួមគ្នាផ្តល់ឈាមដើម្បីជួយសង្គ្រោះជីវិតមនុស្ស! សូមអរគុណចំពោះថ្នាក់ដឹកនាំនិងមន្ត្រីរាជការនៃក្រសួងព័ត៌មានដែលបានចូលរួមបរិច្ចាគឈាមជូនដល់មជ្ឈមណ្ឌលជាតិផ្តល់ឈាមនៃក្រសួងសុខាភិបាលដើម្បីរក្សាក្នុងស្តុកសម្រាប់ការប្រើប្រាស់សង្គ្រោះជីវិតមនុស្ស។ ការផ្តល់ឈាមជាការផ្តល់ក្តីសង្ឃឹមដល់អ្នកជំងឺ និងក្រុមគ្រួសារអ្នកជំងឺផងដែរ។ ខ្ញុំសូមអំពាវនាវ និងថ្លែងអំណរគុណដល់សប្បុរសជនដែលបានចូលរួមស្ម័គ្រចិត្តបរិច្ចាគឈាម។

ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន នៅព្រឹកថ្ងៃទី១៨ ខែឧសភា ឆ្នាំ២០២៦នេះ បានអញ្ជើញជាអធិបតីភាពបើកជាផ្លូវការយុទ្ធនាការប្រឆាំងព័ត៌មានក្លែងក្លាយ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»។

នៅចំពោះមុខសិស្សានុសិស្ស ឯកឧត្តមរដ្ឋមន្ត្រីព័ត៌មាន បានគូសបញ្ជាក់ថា «យុវវ័យសម័យនេះ មិនត្រឹមតែត្រូវតាមឱ្យទាន់បច្ចេកវិទ្យាសម្រាប់ជាប្រយោជន៍នៃការសិក្សាប៉ុណ្ណោះទេ ប៉ុន្តែត្រូវបង្កើតភាពធន់សម្រាប់ទប់ទល់ និងប្រឆាំងព័ត៌មានក្លែងក្លាយ ដើម្បីកុំឱ្យធ្លាក់ក្នុងអន្ទាក់នៃពិភពឌីជីថល។ ក្មួយៗត្រូវពង្រឹងខ្លួនឱ្យមានសមត្ថភាពក្លាយជាភ្នាក់ងារសុវត្ថិភាពព័ត៌មានដ៏រឹងមាំ ដើម្បីបន្សុទ្ធលំហព័ត៌មានក្នុងសង្គម ការពារគ្រួសារ និងសហគមន៍ពីហានិភ័យ និងគ្រោះថ្នាក់នៃការផ្សាយបំភ្លៃ បំផ្លើស ក្លែងបន្លំ និងបំពុលសង្គម»។

ប្រឈមមុខនឹងហានិភ័យឌីជីថល និងព័ត៌មានក្លែងក្លាយក្នុងបរិយាកាសដែលបច្ចេកវិទ្យាមានការ វិវត្តយ៉ាងរហ័ស យុវវ័យចាំបាច់ត្រូវអភិវឌ្ឍផ្នត់គំនិតតាមអភិក្រម សុវត្ថិភាពព័ត៌មាន» ដែលទាមទារឱ្យចេះ គិតពិចារណា និងការយល់ដឹងច្បាស់អំពីប្រព័ន្ធឌីជីថល មធ្យោបាយទទួលព័ត៌មានជំនួសឱ្យទម្លាប់នៃការ ទទួលយកព័ត៌មានដោយអកម្ម។

យុទ្ធនាការនេះដើរតួជាប្រព័ន្ធការពារ និងជាយន្តការយុទ្ធសាស្ត្រផ្នែកអក្ខរកម្មឌីជីថល ដែលផ្តោតលើការលើកកម្ពស់សមត្ថភាពយុវជនក្នុងការទប់ស្កាត់ និងជៀសផុតពីអន្ទាក់នៃឧបាយកលនយោបាយបោកប្រាស់ និងឧក្រិដ្ឋកម្មបច្ចេកវិទ្យាទំនើប។

យុទ្ធនាការនេះនឹងបំពាក់ចំណេះដឹងផ្នែកអក្ខរកម្មព័ត៌មាននិង ប្រព័ន្ធផ្សព្វផ្សាយ ព្រមទាំងតម្រង់ទិសយុវវ័យឱ្យក្លាយជាភ្នាក់ងារសុវត្ថិភាពព័ត៌មាន ដែលមានស្មារតីម្ចាស់ការក្នុងការផ្ទៀងផ្ទាត់ និងផ្សព្វផ្សាយតែព័ត៌មានពិត ប្រកបដោយគុណតម្លៃសម្រាប់គ្រួសារ និងសហគមន៍។

យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២នេះ បានធ្វើឡើងនៅវិទ្យាល័យ ហ៊ុន សែន ប៊ុនរ៉ានី វត្តភ្នំជាមួយលោកគ្រូអ្នកគ្រូ និងសិស្សានុសិស្សចូលរួមជាង ២០០០នាក់៕

រូបថត៖ ខឹម សុវណ្ណារ៉ា