ហេង សុខណា Heng Sokna

នាព្រឹកថ្ងៃព្រហស្បត្តិ៍ ១១កើត ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៩ ខែមករា ឆ្នាំ២០២៦ ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា នៃ ប.ភ.យ.ក និងសហការី បានជួបប្រជុំនឹងក្រុមជំនាញការនៃទីភ្នាក់ងារកិច្ចសហប្រតិបត្តិការជប៉ុន (JICA) នៅការិយាល័យការងារនៃក្រុមជំនាញការ ស្ថិតក្នុងបរិវេណទីស្ដីការក្រសួងយុត្តិធម៌។
កិច្ចប្រជុំពិភាក្សាធ្វើឡើងក្នុងគោលបំណង ជជែកពិភាក្សាការងារបច្ចេកទេសសំខាន់ៗ រវាងសាលា និងកម្មវិធីរបស់ JICA ក្រោមរបៀបវារ: ចំនួន ៣ រួមមាន ៖
១- ការបង្ហាញពីការងារសម្រេចបានរបស់សាលា ក្នុងការបង្កើតក្រុមការងារបច្ចេកទេសបង្កើតឯកសារសំណុំរឿងគម្រូសម្រាប់សវនាការត្រាប់ក្នុងរឿងក្ដីព្រហ្មទណ្ឌ និងរឿងក្ដីរដ្ឋប្បវេណី សម្រាប់សិស្សចៅក្រម និងសិស្សព្រះរាជអាជ្ញា ជាឯកសារអត្ថបទ និងខ្សែវិដេអូ ដែលគ្រោងនឹងរៀបចំផលិតដោយក្រុមការងារបច្ចេកទេសមានសមាសភាពជាគ្រូបង្គោល ចៅក្រម និងព្រះរាជអាជ្ញា តាមសាលាជម្រះក្ដីគ្រប់ជាន់ថ្នាក់ ដែលត្រូវបានជ្រើសរើស និងបានទទួលការឯកភាពដ៏ខ្ពង់ខ្ពស់ពី ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ និងជាប្រធានក្រុមប្រឹក្សាភិបាលនៃ ប.ភ.យ.ក។
២- ការរៀបចំទម្រង់ប្លង់កម្មវិធីបង្រៀនលម្អិតសម្រាប់អនាគតគ្រូបណ្ដុះបណ្ដាល នៃសាលាភូមិន្ទចៅក្រម និងព្រះរាជអាជ្ញា។
៣-តាមដានវឌ្ឍនភាពនៃការដាក់សាកល្បងឲប្រើប្រាស់ទម្រង់បំពេញ ដើម្បីគ្រប់គ្រង ត្រួតពិនិត្យម៉ោងបង្រៀននិងការរៀបចំកាលវិភាគប្រចាំសប្ដាហ៍។

ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា និងសហការី ព្រមទាំងសិស្សចៅក្រម និងសិស្សព្រះរាជអាជ្ញាជំនាន់ទី១២ និងទី១៣ គោរពជូនពរ សិរីមង្គល វិបុលសុខ មហាប្រសើរ សូមកើតមានចំពោះ ឯកឧត្តម កើត រិទ្ធិ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ និងជាប្រធានក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា ព្រមទាំងលោកជំទាវ ក្នុងឱកាសបុណ្យចូលឆ្នាំថ្មី ឆ្នាំសកល២០២៦ នេះ។

តបតាមការណែនាំដ៏ខ្ពង់ខ្ពស់​របស់សម្តេចក្រឡាហោម​ ស​ ខេង​ ឧត្តមប្រឹក្សាផ្ទាល់ព្រះមហាក្សត្រនិងជាអ្នកតំណាងរាស្រ្តមណ្ឌលបាត់ដំបង​,ឯកឧត្តម​កេីត​ រិទ្ធ​ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង​ ព្រមទាំងក្នុងទឹកចិត្តចូលរួមជាមួយរាជរដ្ឋាភិបាលកម្ពុជាក្នុងបុព្វហេតុជួយជាតិមាតុភូមិ ដើម្បីគាំទ្រ និងលើកទឹកចិត្តដល់វីរកងទ័ពជួរមុខកម្ពុជាដែលបាននឹងកំពុងប្រយុទ្ធយ៉ាងអង់អាចក្លាហានការពារបូរណភាពទឹកដី តតាំងជាមួយខ្មាំងសត្រូវសៀម ដែលបានឈ្លានពានយ៉ាងកំរោលមកលើដែនអធិបតេយ្យភាពរបស់កម្ពុជា ព្រមទាំងជួយដល់បងប្អូនប្រជាពលរដ្ឋភៀសសឹកផងដែលនោះ សាលាភូមិន្ទចៅក្រម និង ព្រះរាជអាជ្ញា ដឹកនាំដោយ ឯកឧត្តម ហេង សុខណា នាយកសាលា និងមន្រ្តីរាជការ ព្រមទាំងសិស្សចៅក្រម និងសិស្សព្រះរាជអាជ្ញាជំនាន់ទី១២ និងជំនាន់ទី១៣ របស់សាលាភូមិន្ទចៅក្រម និងព្រះរាជអាជ្ញា នៃប.ភ.យ.ក បានចូលរួមបរិច្ចាគវិភាគទានឧបត្ថម្ភជូនរដ្ឋបាលខេត្តបាត់ដំបង ដើម្បីចាត់ចែងប្រគល់ជូនវីរកងទ័ពកម្ពុជាដែលកំពុងប្រយុទ្ធយ៉ាងអង់អាចក្លាហាននៅសមរភូមិមុខ និងបងប្អូនប្រជាពលរដ្ឋភៀសសឹកក្នុងមូលដ្ឋានខេត្តបាត់ដំបងផងដែរ។

ថវិកាដែលប្រមូលនិងបានប្រគល់ជូនក្រុមការងាររៀបចំ មានទឹកប្រាក់សរុប ១១.១៨៩.៩៩៩ រៀល និងប្រាក់ដុល្លារចំនួន ២.២៣០ ដុល្លារអាម៉េរិក។

ថ្នាក់ដឹកនាំ និងមន្រ្តីរាជការ ព្រមទាំងសិស្សចៅក្រម និងសិស្សព្រះរាជអាជ្ញាជំនាន់ទី១២ និងជំនាន់ទី១៣ របស់សាលាភូមិន្ទចៅក្រម និងព្រះរាជអាជ្ញា នៃប.ភ.យ.ក សូមគោរពដល់វីរភាពអង់អាចក្លាហានរបស់វីរកងទ័ពកម្ពុជាទាំងអស់ដែលកំពុងប្រយុទ្ធតតាំងនឹងខ្មាំងសត្រូវសៀមឈ្លានពាន​ ដើម្បីការពារអធិបតេយ្យភាពរបស់កម្ពុជា និងប្ដេជ្ញាចូលរួមសាមគ្គីក្រោមការដឹកនាំរបស់រាជរដ្ឋាភិបាលការពារឱ្យបានបូរណភាពដែនដីរបស់កម្ពុជា។ ម្យ៉ាងវិញទៀត យើងខ្ញុំសូមគោរព និងបួងសួងដល់វិញ្ញានក្ខន្ធវីរកងទ័ពកម្ពុជាដែលបាន ពលីទាំងអស់ សូមអស់លោកបានទៅកាន់សុគតិភាពកុំបីឃ្លៀងឃ្លាតឡើយ។

លិខិតរំលែកមរណទុក្ខរបស់សាលាភូមិន្ទចៅក្រម និងព្រះរាជអាជ្ញា ចំពោះសព លោក ញឹម វុធ ដែលត្រូវជាឳពុកបង្កើតរបស់ លោក ញឹម ពិសាល គ្រូបណ្ដុះបណ្ដាលនៃសាលាភូមិន្ទចៅក្រម និងព្រះរាជអាជ្ញា។

នៅរសៀលថ្ងៃពុធ ១០រោច ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥, ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា បានដឹកនាំសិស្សចៅក្រម និងសិស្សព្រះរាជអាជ្ញា ជំនាន់ទី១២ ចំនួន ១២រូបដើម្បីចុះកម្មសិក្សាក្នុងម៉ូឌុល៣ «កម្មសិក្សារួម» រយ:ពេល ៦ខែ នៅសាលាដំបូង និងអយ្យការអមសាលាដំបូងខេត្តតាកែវ ដោយមានការចូលរួម និងទទួលស្វាគមន៍ពីសំណាក់ ឯកឧត្តម ធាម ច័ន្ទពិសិដ្ឋ ប្រធានសាលាដំបូងខេត្តតាកែវ និង ឯកឧត្តម ឯក ឆេងហ៊ួត ព្រះរាជអាជ្ញា នៃអយ្យការអមសាលាដំបូងខេត្តតាកែវ ព្រមទាំងលោក លោកស្រី ចៅក្រម លោកព្រះរាជអាជ្ញារង លោកប្រធានលេខាធិការដ្ឋាន ព្រមទាំងមន្រ្តីនៃសាលាដំបូង និងអយ្យការអមសាលាដំបូងខេត្តតាកែវ ផងដែរ។

ក្រោយពីស្ដាប់មតិស្វាគមន៍ និងចំណាប់អារម្មណ៍របស់ ឯកឧត្តមប្រធាន និងឯកឧត្តមព្រះរាជអាជ្ញារួចមក ឯកឧត្តមនាយកសាលាភូមិចៅក្រម និងព្រះរាជអាជ្ញា បានថ្លែងនៅចំណាប់អាម្មរណ៍ មតិផ្ដាំផ្ញើ និងសំណូមពរ មានខ្លឹមសារជាអាទិ៍៖

១. ថ្លែងអំណរគុណចំពោះការស្វាគមន៍ដ៏កក់ក្ដៅរបស់ឯកឧត្តមប្រធានសាលាដំបូង និង ឯកឧត្តមព្រះរាជអាជ្ញា។

២. បង្ហាញពីគោលការណ៍ក្នុងក្របខណ្ឌបច្ចេកទេសក្នុងការជ្រើសរើសមណ្ឌលកម្មសិក្សា ព្រមទាំងគោលដៅក្នុងការចុះកម្មសិក្សារបស់សិស្ស។

៣. ផ្ដល់មតិផ្ដាំផ្ញើដល់សិស្សកម្មសិក្សាទាំងអស់ត្រូវខិតខំក្រេបយកចំណេះដឹង គោរពវិន័យសាលា និងអង្គភាព រក្សាសីលធម៌ និងសេចក្ដីថ្លៃថ្នូរនិងរក្សាការសំងាត់វិជ្ជាជីវ: ក្នុងនាមជាសិស្សចៅក្រម និងសិស្សព្រះរាជអាជ្ញា។

៤. សំណូមពរដល់ថ្នាក់ដឹកនាំនៃមណ្ឌលកម្មសិក្សា និងលោកគ្រូ លោកគ្រូដឹកនាំកម្មសិក្សា សូមជួយណែនាំ និងសម្របសម្រួលដល់សិស្សកម្មសិក្សាដើម្បីទទួលបានចំណេះដឹងល្អៗ ក្នុងការសរសេររបាយការណ៍ និងសូមរាយការណ៍មកសាលាក្នុងករណីមានបាតុភាព អសកម្មនានា កើតឡើងពីសកម្មភាពសិស្សក្នុងពេលកំពុងបំពេញកម្មសិក្សា។

នៅថ្ងៃអង្គារ ៩រោច ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៦ ខែកញ្ញា ឆ្នាំ២០២៥, ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា បានដឹកនាំសិស្សចៅក្រម និងសិស្សព្រះរាជអាជ្ញា ជំនាន់ទី១២ ដើម្បីចុះកម្មសិក្សា ក្នុងម៉ូឌុល៣ «កម្មសិក្សារួម» នៅសាលាដំបូង និងអយ្យការអមសាលាដំបូងរាជធានីភ្នំពេញ ដោយមានការចូលរួម និងទទួលស្វាគមន៍ពីសំណាក់ ឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ លោក ហុក ពៅ អនុប្រធានសាលាដំបូង ជាតំណាង ឯកឧត្តម ងួន ណារ៉ា ប្រធានសាលាដំបូងរាជធានីភ្នំពេញ ព្រមទាំងលោក លោកស្រី អនុប្រធាន លោកចៅក្រម លោកព្រះរាជអាជ្ញារង និងមន្ត្រី នៃសាលាដំបូង និងអយ្យការអមសាលាដំបូងរាជធានីភ្នំពេញ។
ក្រោយពីស្ដាប់មតិស្វាគមន៍ និងចំណាប់អារម្មណ៍របស់ ឯកឧត្តម ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងលោកអនុប្រធាន ជាតំណាងឯកឧត្តមប្រធានសាលាដំបូងរាជធានីភ្នំពេញ និងតំណាងលោកគ្រូ អ្នកគ្រូ ដឹកនាំកម្មសិក្សារួចមក ឯកឧត្តមនាយកសាលាភូមិចៅក្រម និងព្រះរាជអាជ្ញា បានថ្លែងនៅចំណាប់អាម្មរណ៍ មតិផ្ដាំផ្ញើ និងសំណូមពរដល់កម្មវិធីមានខ្លឹមសារជាអាទិ៍៖
១.បង្ហាញពីចំណាប់អារម្មណ៍ថ្លែងអំណរគុណដល់កិច្ចស្វាគមន៍យ៉ាងកក់ក្ដៅរបស់ថ្នាក់ដឹកនាំនៃមណ្ឌលកម្មសិក្សា និងបង្ហាញពីគោលការណ៍ នៃការជ្រើសរើសមណ្ឌលកម្មសិក្សាសម្រាប់សិស្សចៅក្រម និងសិស្សព្រះរាជអាជ្ញា ជាពិសេសមណ្ឌលកម្មសិក្សានៃសាលាដំបូង និងអយ្យការអមសាលាដំបូងរាជធានីភ្នំពេញ ដែលជាមណ្ឌលកម្មសិក្សាប្រកបដោយសក្ដានុពលភាពសម្រាប់ក្រេបយកចំណេះដឹង។
២.មតិគូសបញ្ជាក់ពីរយ:ពេលក្នុងការរៀបចំបញ្ចប់របាយការណ៍កម្មសិក្សាស្របតាមបច្ចេកទេស

៣.មតិផ្ដាំផ្ញើដល់សិស្សចៅក្រម និងសិស្សព្រះរាជអាជ្ញា ដែលត្រូវចុះកម្មសិក្សា ត្រូវខិតខំប្រឹងក្រេបយកចំណេះដឹង គោរពវិន័យសាលា និងមណ្ឌលកម្មសិក្សា ប្រកាន់ភ្ជាប់នូវសីលធម៌ និងការសំងាត់វិជ្ជាជីវ: ផងដែរ។
៤.សំណូមពរដល់ថ្នាក់ដឹកនាំនៃមណ្ឌលកម្មសិក្សា និងគ្រូដឹកនាំកម្មសិក្សា សូមជួយណែនាំ និងសម្របសម្រួលដល់សិស្សចៅក្រម និងសិស្សព្រះរាជអាជ្ញា ព្រមទាំងសូមរាយការណ៍ដល់សាលាក្នុងករណីមានបាតុភាពអសកម្មផ្សេងៗ របស់សិស្សចៅក្រម និងសិស្សព្រះរាជអាជ្ញាកម្មសិក្សា។

នៅថ្ងៃអង្គារ-ពុធ ៣-៤រោច ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១២-១៣ ខែសីហា ឆ្នាំ២០២៥ សាលាភូមិន្ទចៅក្រម និងព្រះរាជអាជ្ញា បានរៀបចំកម្មវិធីការពារបាយការណ៍កម្មសិក្សា ម៉ូឌុល៥ “កម្មសិក្សាឯកទេសកម្ម” របស់សិស្សចៅក្រម និងសិស្សព្រះរាជអាជ្ញា ជំនាន់ទី១១ ក្រោយពីសិស្សបានបញ្ចប់ការធ្វើកម្មសិក្សាតាមមណ្ឌលកម្មសិក្សាគោលដៅនៅតាមសាលាដំបូងនិងអយ្យការអមសាលាដំបូងរាជធានី-ខេត្ត ដែលជាការការពាររបាយការណ៍កម្មសិក្សាចុងក្រោយនៃកម្មវិធីសិក្សារបស់សាលាក្នុងគោលដៅផ្សាភ្ជាប់រវាងការសិក្សាទ្រឹស្ដី និងការអនុវត្តជាក់ស្ដែង ដើម្បីសិស្សចៅក្រម និងសិស្សព្រះរាជអាជ្ញាជំនាន់ទី១១ ដែលនឹងត្រូវបំពេញការងារជាចៅក្រម និងព្រះរាជអាជ្ញា នៅតាមសាលាជម្រះក្ដីនាពេលដ៏ខ្លីខាងមុខ។