Amanat партиясы Маңғыстау облыстық филиалы

🔔 «AMANAT»: Республикалық мобильді қабылдау тобы Маңғыстау тұрғындарын тыңдады

«AMANAT» партиясының республикалық мобильді қоғамдық қабылдау тобы Маңғыстау облысына іссапармен келді. Сапар аясында топ мүшелері Түпқараған ауданына қарасты Форт-Шевченко қаласы мен Таушық ауылында болып, тұрғындардың өзекті мәселелері мен ұсыныс-пікірлерін тыңдады.

🔹Көшпелі қабылдауға «AMANAT» партиясы Республикалық қоғамдық қабылдау бөлмесі меңгерушісінің орынбасары Ермұхаммед Жұмабек, консультант Сағындық Жылқыбаев, партияның облыстық филиал төрағасы Нұрбек Қарасаев, облыстық қоғамдық қабылдау бөлмесінің меңгерушісі Мадияр Қалиасқаров, сондай-ақ бірқатар басқарма басшылары қатысты.

Қабылдауға 50-ге жуық аудан тұрғыны қатысып, өздерін толғандырған мәселелерді көтерді. Атап айтқанда, ауыз су тапшылығы, ауданішілік автомобиль жолдарының жай-күйі, балалар ойын алаңдарының жетіспеушілігі, қоғамдық көлік қатынасы, несие және қаңғыбас иттер мәселесі сөз болды.

🚌 Аудан тұрғыны Ләйла Асқар Ақтау қаласынан Түпқараған ауданына қатынайтын автобус бағытына қатысты мәселені көтерді. Оның айтуынша, қоғамдық көлік қазіргі таңда Ақшұқыр және Сайын Шапағатов ауылдарына кірмей, жаңадан салынған жол арқылы тікелей аудан орталығына қатынауда.

✅ – Мұғалім ретінде Форт-Шевченко қаласына жиі қатынаймын. Бұрын аудан орталығына автобуспен еш қиындықсыз жететін едік. Қазір бағыт өзгеріп, автобус ауылдарға соқпайтын болды. Соның салдарынан тұрғындар алдымен Ақтауға барып, кейін қайта автобусқа отыруға мәжбүр. Бұл уақытты да, қаржыны да талап етеді, – деді ол.

Бұл мәселеге облыстық жолаушылар көлігі және автомобиль жолдары басқармасы басшысының орынбасары Өмірбек Сағындықов жауап беріп, тұрғындардың ұсынысы бір ай ішінде шешімін табатынын жеткізді. Оның айтуынша, алдағы уақытта Ақтаудан қатынайтын автобус таңертең және кешкі уақытта ауыл ішіне кіріп, жолаушыларды тасымалдайды.

♦️ Сонымен қатар, тұрғындар жолдарды асфальттау мәселесін де көтерді. Әсіресе, жауын-шашын кезінде жол жүруге қолайсыз болатынын атап өтті.

Өз кезегінде Түпқараған аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Мұхаммед Ғибрат бұл бағытта нақты жұмыстар қолға алынғанын айтты.

✅ – Қазіргі таңда ауданішілік жолдарды асфальттау жұмыстарын жүргізетін мердігер мекеме анықталды. Алдағы екі жыл ішінде 10 шақырым жолға жөндеу жұмыстары жүргізіледі. Биыл бірінші кезекте ең маңызды жолдар асфальтталады. Ал кейбір көшелерде асфальт төсеуге дейінгі дайындық жұмыстары атқарылады, – деді ол.

«AMANAT» партиясы Республикалық қоғамдық қабылдау бөлмесі меңгерушісінің орынбасары Ермұхаммед Жұмабек тұрғындар тарапынан көтерілген мәселелер назардан тыс қалмайтынын атап өтті.

✅ – Жергілікті деңгейде шешілетін мәселелер хаттамаға енгізіліп, бақылауға алынды. Ал республикалық деңгейдегі түйткілдер орталық қоғамдық қабылдау бөлмесінде қаралып, тиісті шаралар қабылданады. Жалпы, биыл бес айда республикалық қоғамдық қабылдау бөлмесіне 42 мыңнан астам өтініш түсті. Оның 60 пайызы оң шешімін тапты. Бұл бағыттағы жұмыстар алдағы уақытта да жүйелі түрде жалғасады, – деді Ермұхаммед Жұмабек.

Айта кетейік, республикалық мобильді қоғамдық қабылдау тобының жұмысы ертең Маңғыстау ауданында жалғасады. Топ мүшелері Ұштаған және Онды ауылдарына барып, жергілікті тұрғындарды қабылдайды.


#мобильдіқоғамдыққабылдау

📣 Маңғыстауда «AMANAT» партиясының үш күндік оқу семинары басталды

Маңғыстау облысында «AMANAT» партиясы жанындағы Саяси менеджмент академиясының ұйымдастыруымен модульдік оқу басталды. Жергілікті жерлерде кәсіби әрі тиімді басқарушы буынды қалыптастыру мақсатында өтіп жатқан модульдік оқуға 135 адам қатысып жатыр. Олардың қатарында облыстық және аудандық мәслихат депутаттары, ауылдық округ әкімдері, бастауыш партия ұйымдары, сондай-ақ «AMANAT» партиясының облыстық және аудандық филиал қызметкерлері бар.

Іс-шараға «AMANAT» партиясы Саяси жұмыс департаменті директорының орынбасары Гүлнар Нурахметханова, «AMANAT» партиясы Маңғыстау облыстық филиалының төрағасы Нұрбек Қарасаев, ҚР Ұлттық экономика министрлігі Бюджеттік жоспарлау департаменті директорының орынбасары Динара Торина, «AMANAT» партиясы Саяси менеджмент академиясының штаттан тыс тренері Лаура Байдильданова, «Тұран-Астана» университетінің доценті, философия докторы Гаухар Жұмабекова, Өңірлік зерттеулер және өмір сапасы орталығының директоры Нұрболат Құрметұлы, Назарбаев зияткерлік мектебі Педагогикалық шеберлік орталығының жаттықтырушысы Жанна Мыңбаева қатысты.

Модульдік оқытудың ашылу салтанатында Гүлнар Нурахметханова «AMANAT» партиясы кадрлық әлеуетті арттыру және мемлекеттік басқару сапасын жақсарту мақсатында модульдік оқыту бағдарламасы әзірленгенін ерекше атап өтті. Аталған бағдарлама тек теориялық білім берумен шектелмей, практикалық дағдыларды дамытуға бағытталған.

✅ «Бағдарлама аясында қатысушылар жергілікті деңгейде заманауи талаптарға жауап беруді, нәтижеге бағытталған тиімді коммуникацияны құруды, әлеуметтік жобаларды басқарып, оны іске асыруға арналған дағдыларды меңгереді. Бұл өз кезегінде кадрлардың кәсіби деңгейін көтеріп қана қоймай, өңірлердегі басқару сапасын арттыруға, халықтың өмір сүру деңгейін жақсартуға мүмкіндік береді», - дейді Гүлнар Нурахметханова.

Бүгінде мемлекеттік басқару жүйесіне тек тәжірибе ғана емес, сонымен қатар жүйелі ойлау, тиімді шешім қабылдау және қоғаммен ашық байланыс орната білу қабілеті қажет. Бұл ретте «AMANAT» партиясы Маңғыстау облыстық филиалының төрағасы Нұрбек Қарасаев модульдік оқыту осы талаптарға толық жауап беретінін атап өтті.

✅ «Мемлекет басшысы айқындап берген реформалардың сапалы орындалуы ең алдымен білікті, жауапкершілігі жоғары кадрларға тікелей байланысты. Модульдік оқыту арқылы біз теория мен тәжірибені ұштастырып, жергілікті жердегі басқару сапасын арттыруға басымдық беріп отырмыз. Осы семинарға қатысып жатқан ауыл әкімдерінің, депутаттарымыздың және партия қызметкерлерінің алған білімі алдағы уақытты тиімді жұмыс істеуге негіз болады деген сенімдемін», – деді облыстық филиалдың төрағасы Нұрбек Қарасаев.

Айта кетейік, оқу семинары үш күнге жоспарланып отыр. Қатысушылар нақты көрсеткіштерге (KPI) негізделген жеке жобаларын әзірлейді. Бұл жергілікті деңгейде нақты мәселелерді қарастырып, шешім қабылдау сапасын арттыруға, әрекет етуге және басқару тиімділігін күшейтуге септігін тигізеді.

🔔 Ақтауда самбодан Азия және Океания чемпионаты өтіп жатыр

18 мамыр күні Ақтау қаласында самбодан жасөспірімдер арасындағы Азия және Океания чемпионатының салтанатты ашылу рәсімі өтті. Дүбірлі додаға 14 мемлекеттен 500-ден астам спортшы қатысып жатыр. Соның ішінде Маңғыстау облысы атынан 36 спортшы ел намысын қорғауда.

Чемпионаттың ашылу салтанатына Маңғыстау облысының әкімі Нұрдәулет Қилыбай, облыс әкімінің орынбасары Аббат Өрісбаев, «AMANAT партиясы» Маңғыстау облыстық филиалының төрағасы Нұрбек Қарасаев, сондай-ақ облыстық спорт басқармасына қарасты мекеме басшылары мен өзге де құрметті қонақтар қатысты.

Өз кезегінде партия филиалының төрағасы Нұрбек Қарасаев халықаралық деңгейде ұйымдастырылып жатқан жарыстың жоғары дәрежеде өтіп жатқанын атап өтіп, жас спортшыларға сәттілік тіледі.

Аталған чемпионат жасөспірімдер арасындағы самбо спортын дамытуға, халықаралық тәжірибе алмасуға және өңір спортшыларының шеберлігін шыңдауға зор мүмкіндік береді. Сонымен қатар, мұндай ауқымды жарыстар Ақтау қаласының халықаралық спорт аренасындағы беделін арттырып, өңірдің туристік тартымдылығын күшейтуге ықпал етеді.

Жарыс бірнеше күнге жалғасып, қатысушылар әртүрлі салмақ дәрежелері бойынша өзара мықтыны анықтайды. Чемпионат қорытындысы бойынша үздік спортшыларға арнайы марапаттар табысталады.

🔔 Депутаттар Емір ауылы тұрғындарының талап-тілегіне құлақ түрді

16 мамыр күні Маңғыстау облыстық мәслихатының депутаттары Киікбай Ешманов пен Раушан Аймұрзаева, сондай-ақ Мұнайлы ауданы әкімінің орынбасары Серікқали Қанапин Емір ауылының тұрғындарымен кездесіп, елді мекеннің жай-күйімен танысты.

Кездесу барысында халық тарапынан ауылдың әлеуметтік және инфрақұрылымдық мәселелері кеңінен көтерілді. Атап айтқанда, табиғи газдың жоқтығы, жол сапасының төмендігі және ауыл шаруашылығы саласын дамытудағы түйткілдер сөз болды.

✅ Ауыл белсендісі Ескендір Сардарбековтың айтуынша, Емір ауылын газбен қамту мәселесі бірнеше жылдан бері көтеріліп келеді. Алайда бүгінгі күнге дейін нақты нәтиже жоқ. Соның салдарынан кейбір тұрғындар тұрақты жағдай іздеп, ауылдан көшуге мәжбүр болып отыр. Сонымен қатар Баянды елді мекенінен Емір ауылына дейінгі жолды ретке келтіріп, грейдер төсеу қажеттілігі де тұрғындар тарапынан көтерілді.

♦️Өз кезегінде халық қалаулылары тұрғындардың көтерген мәселелеріне құлақ түріп, әрбір ұсынысты назарға алатынын жеткізді. Депутаттардың айтуынша, «AMANAT» партиясы Маңғыстау облыстық фракциясы тарапынан Емір ауылын газбен қамту мәселесі қолдау тапқан. Бүгінде облыс әкімі Нұрдәулет Қилыбайдың қолдауымен тиісті басқармалар тарапынан қаржыландыру тетіктері қарастырылып жатыр.

Айта кету керек, инфрақұрылымдық мәселелердің шешілуі ауылдың әлеуметтік-экономикалық дамуына тікелей әсер етеді. Газбен қамту, жол және жарықтандыру жүйелерін жақсарту – тұрғындардың өмір сапасын арттырып қана қоймай, ауыл шаруашылығының, оның ішінде түйе шаруашылығының дамуына да серпін береді.

🔹Сонымен қатар тұрғындар туризм саласын дамытуға да қызығушылық танытып отыр. Бұл бағытта жүйелі жұмыстар жүргізіп, мемлекеттік қолдау тетіктерін қарастыру қажеттігі айтылды.

Сапар соңында депутаттар көтерілген мәселелердің кезең-кезеңімен шешілуін бақылауда ұстайтынын атап өтті.