13/09/2026
❤️ எனது இதயபூர்வமான நன்றியை அன்புடன் ஏற்றுக்கொள்ளுங்கள்...
அனுராதபுர ஜனசதன மாபெரும் பொதுக்கூட்டத்தை முன்னிட்டு நான் அனுப்பிய முழுமையான செய்தி
மதிப்பிற்குரிய மகா சங்கத்தினரே,
அன்பிற்குரிய தாய்மார்களே, தந்தையர்களே,
அன்பான பிள்ளைகளே,
சகோதர சகோதரிகளே, நண்பர்களே,
கொழும்பு விளக்கமறியல் சிறைச்சாலையின் இரும்புக் கம்பிகளுக்கு அப்பால் இருந்து உங்களை நான் காண்கிறேன்.
இங்கிருந்தபடியே நீங்கள் எனக்கு அளிக்கும் இந்த உறுதியான சகோதரத்துவத்தின் அரவணைப்பை நான் உணர்கிறேன். உங்களின் இந்த உற்சாகமான ஆதரவு எனக்கு மிகப்பெரிய உத்வேகத்தையும் வலிமையையும் அளிக்கிறது.
இந்தச் சவாலான தருணத்தை நான் மிகவும் உறுதியாக எதிர்கொண்டு வருகிறேன். உங்களைப் போன்ற துணிச்சலானவர்களுடன் அரசியல் பயணத்தை மேற்கொள்ளக் கிடைத்தது எனக்குக் கிடைத்த ஒரு ஆசீர்வாதமாகக் கருதுகிறேன்.
இந்த மாபெரும் மக்கள் பேரணி, நாட்டின் மக்கள் போராட்டப் பயணத்தில் ஒரு முக்கியமான புதிய தொடக்கமாக அமையும். இந்தக் காலகட்டத்தின் மிகவும் நியாயமான அரசியல் போராட்டக் களத்தை நோக்கி நாம் நகர்ந்து கொண்டிருக்கிறோம். நீங்கள் என்னுடன் இதை ஏற்றுக்கொள்வீர்கள் என்று நம்புகிறேன்.
உலகின் சிறந்த தலைவர்களில் ஒருவரான நெல்சன் மண்டேலா, ரொபென் தீவு சிறையில் இருந்தபோது எழுதிய ஒரு கட்டுரையில்,
“சிரமங்கள் சிலரை உடைத்துவிடுகின்றன; ஆனால் அதே சிரமங்கள் சிலரை உருவாக்குகின்றன.”
என்று குறிப்பிட்டுள்ளார்.
நாம் சிரமங்களுக்கு முன்னால் மேலும் வலிமை பெற்றவர்கள். சவால்களுக்கு மத்தியில் இன்னும் உறுதியாக நிற்க வேண்டும் என்ற பாடத்தை எனக்குக் கற்றுத் தந்தவர் எனது தந்தை.
மக்களின் ஆணையை மதிப்பது, கொள்கைகளுக்குப் பொறுப்பேற்பது, எடுக்கப்படும் தீர்மானங்களுக்கான காரணங்களை மக்களுக்கு விளக்குவது போன்றவற்றை ஒரு அரசாங்கம் புறக்கணிக்க முடியாது. ஆனால் இந்த அரசாங்கத்திடம் அத்தகைய அரசியல் ஒழுக்கம் இல்லை.
தற்போதைய மாலிமா அரசாங்கம் சொல்வதைச் செய்வதில்லை; சொல்லாதவற்றையே செய்கிறது. நாட்டினதும் ஒட்டுமொத்த மக்களினதும் உண்மையான எதிர்பார்ப்புகள் புறக்கணிக்கப்படுகின்றன. இது ஒரு நாட்டின் அரசியல் மீதான மக்களின் நம்பிக்கையைச் சிதைக்கும் செயலாகும்.
இந்த அரசாங்கத்தின் ஆட்சிக்காலத்தில் ஏற்கனவே மூன்றில் ஒரு பகுதி நிறைவடைந்துவிட்டது.
அவர்கள் வாக்குறுதியளித்த வளர்ச்சியடைந்த பொருளாதாரம், வசதியான வாழ்க்கை மற்றும் புதிய சமூக-அரசியல் மாற்றம் என்பவை வெறும் கற்பனையாகவே உள்ளன.
மக்களின் கோரிக்கைகளுக்கு மாலிமா அரசாங்கம் உரிய பதிலை வழங்கவில்லை. தங்களது வியர்வைக்கும் கடின உழைப்பிற்கும் நியாயம் கேட்ட விவசாயிகளுக்கு இந்த அரசாங்கம் அளித்த பதிலை நீங்கள் மறந்திருக்க மாட்டீர்கள்.
நியாயமான கோரிக்கைகளுடன் தொழிலாளர் போராட்டம் நடைபெற்றபோது, அதற்குப் பதிலாக சம்பந்தப்பட்ட நிறுவனத்தையே மூடிய அரசாங்கத்தை நீங்கள் கேள்விப்பட்டிருக்கிறீர்களா?
எரிபொருள் விலை, மின்சாரக் கட்டணம், பொருட்களின் விலை மற்றும் அரிசி விலை தொடர்பாக தவறான வாக்குறுதிகளை வழங்கிய ஒரு அரசாங்கம் இன்னும் ஆட்சியில் தொடர வேண்டுமா?
வரி சுமையைக் குறைப்பதாக வாக்குறுதியளித்த அரசாங்கம் இன்று உணவுப் பொருட்கள் முதல் பாடசாலை உபகரணங்கள் வரை வரிச் சுமையை அதிகரித்துள்ளது.
வாழ்க்கைச் செலவு தாங்க முடியாத அளவுக்கு உயர்ந்துள்ளது. அளவுக்கு மீறிய வரிச்சுமை சாதாரண மக்களின் அன்றாட வாழ்க்கையையும் நாட்டின் ஒட்டுமொத்த பொருளாதாரத்தையும் பாதித்துள்ளது.
சிறு மற்றும் நடுத்தர தொழில்முனைவோர், தொழிலதிபர்கள், விவசாயிகள், மீனவர்கள், தொழிலாளர்கள், அரச மற்றும் தனியார் துறை ஊழியர்கள் என அனைவரும் கடுமையான சிரமங்களை எதிர்கொள்கின்றனர்.
சமூக நீதிக்காக அரசாங்கம் எதையும் செய்வதில்லை.
அரசாங்கம் செல்வந்தமாகிறது; மக்கள் ஏழைகளாகிறார்கள்.
ஒரு நாட்டின் முதன்மைக் கணக்கு இருப்பு அல்லது வரவு-செலவுத் திட்ட உபரி போன்ற பொருளாதாரப் புள்ளிவிவரங்களால் மட்டும் சிறந்த பொருளாதாரத்தையோ மக்களுக்கு வசதியான வாழ்க்கையையோ உருவாக்க முடியாது.
நவீன சமூகம் வளர்ச்சியை வெறும் பொருளாதாரத் தரவுகளால் மட்டும் அளவிடுவதில்லை. மக்களுக்கு கிடைக்கும் சிறந்த வாழ்க்கைத் தரத்தின் அடிப்படையிலேயே வளர்ச்சியை மதிப்பிடுகிறது.
நண்பர்களே,
யாரும் சட்டத்திற்கு மேலானவர்கள் அல்ல என்ற அடிப்படைக் கொள்கை இந்த அரசாங்கத்தின் கீழ் கேள்விக்குறியாகியுள்ளது.
அரசாங்கம் அரசின் விசாரணை நிறுவனங்களை முழுமையாக அரசியல்மயப்படுத்தியுள்ளதாக குற்றச்சாட்டுகள் எழுந்துள்ளன. அரசாங்கத்துடனும் அதிகாரத்தில் இருப்பவர்களுடனும் தொடர்புடைய பல கடுமையான குற்றச்சாட்டுகள் முன்வைக்கப்பட்டுள்ளபோதிலும், அவற்றின் மீது ஏற்றுக்கொள்ளக்கூடிய நியாயமான விசாரணைகள் நடைபெறுவதாகத் தெரியவில்லை.
இந்த அரசாங்கம் புதிய அரசியலமைப்பை உருவாக்கி மக்கள் வாக்கெடுப்புக்கு விடுவதாக வாக்குறுதியளித்தது. நிறைவேற்று அதிகாரம் கொண்ட ஜனாதிபதி முறையை ஒழித்து, பிரதமரை மையமாகக் கொண்ட ஆட்சிமுறையை ஏற்படுத்துவதாகவும் புதிய தேர்தல் முறையை அறிமுகப்படுத்துவதாகவும் கூறியது.
மாகாண சபைத் தேர்தல்கள் தொடர்பாகவும் அரசாங்கம் மௌனமாக உள்ளது.
நீதி, சட்டத்தின் ஆட்சி மற்றும் ஜனநாயகத்தின் அடிப்படை அம்சங்களைப் புறக்கணித்து புதிய அரசியலமைப்புத் திருத்தம் ஒன்றை அரசாங்கம் முன்னெடுக்கிறது. அத்தகைய திருத்தத்தின் தேவைக்கான ஏற்றுக்கொள்ளக்கூடிய காரணம் தெளிவாக முன்வைக்கப்படவில்லை.
யாருக்கு எதிராக இருந்தாலும், “நாங்கள் விரும்பியதைச் செய்வோம்” என்ற அணுகுமுறை ஜனநாயகம் அல்ல.
இந்த அரசாங்கத்தின் இத்தகைய நடவடிக்கைகளை நாம் தொடர்ந்து அனுமதிக்க வேண்டுமா?
நமது நாட்டின் மக்கள்தொகைத் தரவுகளை ஆராயும்போது இளைஞர்களின் எண்ணிக்கையில் குறிப்பிடத்தக்க அதிகரிப்பு காணப்படுகிறது. இதன் பொருள் இலட்சக்கணக்கான இளைஞர்கள் வேலைவாய்ப்புச் சந்தைக்குள் நுழையும் எதிர்பார்ப்புடன் இருக்கிறார்கள் என்பதாகும்.
ஆனால் இளைஞர்களின் இந்த எதிர்பார்ப்புகளை மாலிமா அரசாங்கம் சரியாகப் புரிந்துகொள்ளவில்லை.
புதிய வேலைவாய்ப்புகளை உருவாக்குவதற்கான தெளிவான திட்டம் அரசாங்கத்திடம் இல்லை. அரச முதலீடுகள் கைவிடப்பட்டுள்ளன; தனியார் முதலீடுகளும் ஊக்கமளிக்கப்படவில்லை. அரசாங்கத்தின் வரிக் கொள்கைகளும் இதற்குக் காரணமாகியுள்ளன.
இவ்வாறு சிதைந்து கொண்டிருக்கும் இளைஞர்களின் எதிர்பார்ப்புகள் குறித்து அரசாங்கத்திற்கு அக்கறை இல்லை. குடும்பங்களின் பொருளாதாரச் சுமை காரணமாக இளைஞர்களின் உயர்கல்வி வாய்ப்புகளும் பாதிக்கப்படுகின்றன.
மாலிமா அரசாங்கத்தின் கீழ் ஏற்படும் நுட்பமான கலாசார தாக்கங்களையும் நாம் புரிந்துகொள்ள வேண்டும்.
ஒவ்வொருவரும் தமது மதத்தைப் பாதுகாத்துக்கொண்டு, மற்ற அனைவருடனும் ஒற்றுமையாக வாழ வேண்டும் என்பதே மக்களின் எதிர்பார்ப்பு. ஆனால் மத நல்லிணக்கம் மற்றும் சமூக ஒற்றுமையை முன்னெடுப்பதில் அரசாங்கத்தின் அணுகுமுறை போதுமானதாக இல்லை.
அன்பான தாய்மார்களே, தந்தையர்களே, சகோதர சகோதரிகளே,
அரசாங்கத்தின் கடுமையான அரசியல் அதிகாரத்திற்கு முன்னால் நான் ஒருபோதும் சரணடைய மாட்டேன்.
நான் அஞ்சவில்லை.
எமது உறுதியைச் சிறையில் அடைக்க முடியாது.
எங்களுக்கு யாரிடமும் வெறுப்பு இல்லை. ஆனால் இந்த சமூக, பொருளாதார மற்றும் அரசியல் நிலைமைகளுக்கு எதிராக நாம் போராட வேண்டும்.
வெற்றியின் மீதான அசைக்க முடியாத நம்பிக்கையுடன் முன்னேறுவோம்.
அச்சமின்றி துணிச்சலுடன் போராடுவோம்.
இது இன்றைய தலைமுறைக்காக மட்டுமல்ல; பிறக்கவிருக்கும் தலைமுறைகளுக்காகவும் நம்மிடம் ஒப்படைக்கப்பட்டுள்ள பொறுப்பாகும். அந்தப் பொறுப்பை நாம் கைவிட முடியாது.
எந்தச் சவாலையும் வெல்லக்கூடிய மாபெரும் மக்கள் சக்தியை உருவாக்குவோம்.
அமைதியாக இருப்போம்.
ஒழுக்கத்தைப் பாதுகாப்போம்.
சட்டத்தை மதிப்போம்.
இந்த வரலாற்றுப் பயணத்தை வெற்றியுடன் நிறைவு செய்வோம்.
உங்கள் அனைவருக்கும் எனது இதயபூர்வமான நன்றியை அன்புடன் ஏற்றுக்கொள்ளுமாறு கேட்டுக்கொள்கிறேன்.
நாமல் ராஜபக்ஷ
கொழும்பு விளக்கமறியல் சிறைச்சாலையிலிருந்து
