27/03/2026
Kor mange ulykker skal til før vi får tryggare vegar i Ørsta og Volda?
Utviklinga i Ørsta/Volda området dei siste vekene burde bekymre langt fleire enn dei som ferdast på vegane til dagleg.
Trafikkulykker skjer no så ofte at det ikkje lenger kan forklarast som enkeltståande hendingar. Det byrjar å teikne seg eit tydeleg bilete av eit system som ikkje fungerer godt nok.
Berre sidan starten av februar har det vore 16 trafikkhendingar i området. Dette inkluderer utforkøyringar, kollisjonar, påkøyrsler og hendingar knytte til rus i trafikken. Sjølv om ikkje alle ulykkene er like alvorlege, er omfanget i seg sjølv eit varselteikn.
Dette er ikkje berre tilfeldigheiter det er eit resultat av ein kombinasjon av auka trafikk, krevjande køyreforhold og vegar som i for liten grad er tilpassa belastninga dei faktisk har i dag.
Engasjementet rundt trafikksituasjonen i Ørsta/Volda har allereie byrja å gi respons. Aksjonar og auka fokus på situasjonen, mellom anna langs E39, har ført til at politikarar no i større grad ser problema som lenge har vorte peika på av lokalbefolkninga. Det er eit viktig signal det viser at press verkar.
Men dette er berre ein start.
For realiteten er at utfordringane har vore kjende i årevis. Vegstrekningar med høg trafikkbelastning, smale køyrefelt og manglande sikring har lenge vore ein del av kvardagen. Når både lokaltrafikk, tungtransport og gjennomgangstrafikk blir pressa inn på dei same vegane, seier det seg sjølv at risikoen aukar.
Samtidig ser vi at nødvendige tiltak stadig blir utsette. Prosjekt som kunne bidrege til betre flyt og auka tryggleik, blir skuva fram i tid, medan problema veks her og no. Resultatet er at folk må leve med ein trafikksituasjon som mange opplever som både uhaldbar og farleg.
For oss i Framstegspartiets Ungdom handlar dette om prioriteringar. Trygge vegar er ikkje eit luksusgode det er ei grunnleggjande oppgåve for styresmaktene. Likevel ser vi gong på gong at investeringar i veg taper mot andre prosjekt, samstundes som konsekvensane blir tydelege lokalt.
Det er også viktig å vere ærleg: Ja, sjåførar har eit ansvar. Rus, fart og uoppmerksamheit spelar ei rolle i fleire ulukker. Men gode vegar og godt vedlikehald er med på å redusere konsekvensane når feil først skjer. Dårlege vegar gjer marginane mindre og utfallet langt meir alvorleg.
Fleire av ulukkene den siste tida har skjedd på glatte vegar. Dette peikar direkte på behovet for betre vintervedlikehald. Strøing og brøyting er ikkje berre rutineoppgåver det er avgjerande trafikksikkerheitstiltak. Når ein fotgjengar, ei feilvurdering eller eit lite glipp kan vere nok til å utløyse ei ulukke, seier det noko om kor pressa situasjonen faktisk er.
Dette er ikkje eit teoretisk problem det er ein reell risiko kvar dag.
Spørsmålet er ikkje om noko må gjerast.
Spørsmålet er kor lenge vi skal vente.
Kor mange ulukker skal til før tryggare vegar blir prioriterte høgare?
Vi treng: betre og sikrare vegar, auka satsing på vedlikehald, og meir effektiv brøyting og strøing.
Dette handlar ikkje berre om asfalt og investeringar. Det handlar om menneske, om tryggleik i kvardagen og i verste fall liv og død.
Engasjementet lokalt har vist at folk bryr seg.
No er det opp til regjeringa og staten å vise at dei gjer det same.
Aurora Iren Brekke Nytun.
Styremedlem/Studieleiar - Sunnmøre FpU
Styremedlem Ørsta FrP
