25/08/2026
PAANO MAGDESISYON PARA SA SUSPENSYON?
Ipinaliwanag ng Department of Education (DepEd) Schools Division of Angeles City ang desisyon ng lungsod sa pagsususpinde ng face-to-face classes, kasunod ng mga batikos kay Mayor Carmelo “Jon” Lazatin II online.
Ayon kay Schools Division Superintendent Edgard Domingo, dapat ibatay ang suspension sa aktuwal na kondisyon ng bawat lugar, kabilang ang lagay ng panahon at kaligtasan ng mga estudyante at g**o.
“Hindi po maaaring pare-pareho ang desisyon sa lahat ng lugar dahil hindi rin pare-pareho ang aktuwal na sitwasyon,” ani Domingo.
Sinabi ni Domingo na kabilang si Lazatin sa mga unang local chief executive sa Schools Division of Angeles City na nag-anunsyo ng suspension nang kailanganin ito ng sitwasyon.
“Hindi po madaling timbangin ang mga ganitong desisyon. Iba-iba ang aktuwal na sitwasyon sa bawat lugar, at mahalagang tingnan ang kabuuang larawan bago magdesisyon,” aniya.
Hinimok din niya ang publiko na maging mapanuri sa mga komento at impormasyong kumakalat sa social media.
“Ang bashing ay hindi nakatutulong. Mas makabubuti kung magiging mapanuri tayo sa mga impormasyon,” ani Domingo.
Samantala, sinabi ng Association of Government Employees for a New Dynamic Angeles City (AGENDA) na may epekto rin ang class suspension sa kabuhayan ng mga driver at maliliit na negosyong umaasa sa regular na pasok ng mga estudyante.
“Marami rin ang umaasang may pasok dahil nakasalalay dito ang kanilang arawang kita. Kaya bawat desisyon ay kailangang pag-isipang mabuti,” pahayag ng grupo.
Nanawagan ang DepEd Angeles at AGENDA sa publiko na umasa sa opisyal na impormasyon at maging responsable sa pagbibigay ng komento online.
“Sa panahon ng social media, mas kailangan ang pagiging mapanuri, makatarungan, at responsable. Hindi lahat ng desisyon ay magiging popular, pero ang mahalaga ay ginagawa ito nang may malasakit at batay sa aktuwal na sitwasyon,” ani Domingo.
