Kapalong InfoCenter

𝐑𝐎𝐀𝐃 𝐂𝐋𝐄𝐀𝐑𝐈𝐍𝐆 𝐔𝐏𝐃𝐀𝐓𝐄𝐒 𝐒𝐀 𝐋𝐔𝐍𝐆𝐒𝐎𝐃 𝐒𝐀 𝐊𝐀𝐏𝐀𝐋𝐎𝐍𝐆

Padayon nga gipahigayon sa likal nga panggamhanan ang road clearing operation sa may dalang Gomez adlaw’ng Martes, Hunyo 2, 2026 aron masiguro sa LGU Kapalong ubos sa liderato ni Mayor Edgardo L. Timbol ang hapsay nga dagan sa trapiko, kalimpyo sa palibot, ug kaluwasan sa mga motorista ug pedestrian.

Ubos sa pagpanguna ni Engr. Edgar B. Rendon, Jr. isip Team Leader, nagtinabangay ang mga personahe gikan sa Municipal Environment and Natural Resources Office (MENRO), General Services Office (GSO), Municipal Engineering Office (MEO), Declogging Team, ug Philippine National Police (PNP) sa pagtangtang sa mga obstructions sa kadalanan ug pagpatuman sa kahapsay sa maong dapit.

Padayon usab nga gipalig-on sa administrasyon ang mga programa nga nagtumong sa usa ka limpyo, organisado, ug luwas nga komunidad pinaagi sa panaghiusa ug aktibong partisipasyon sa publiko.

𝐏𝐀𝐆𝐏𝐀𝐍𝐆𝐀𝐍𝐃𝐀𝐌 𝐒𝐀 𝐀𝐑𝐀𝐖 𝐍𝐆 𝐃𝐀𝐕𝐀𝐎 𝐃𝐄𝐋 𝐍𝐎𝐑𝐓𝐄, 𝐆𝐈𝐏𝐀𝐒𝐈𝐔𝐆𝐃𝐀 𝐒𝐀 𝐏𝐑𝐎𝐁𝐈𝐍𝐒𝐘𝐀𝐋 𝐍𝐆𝐀 𝐏𝐀𝐍𝐆𝐆𝐀𝐌𝐇𝐀𝐍𝐀𝐍

Mibisita karong adlawa, Hunyo 2, 2026, sa opisina ni Mayor Edgardo L. Timbol ang mga representante gikan sa Provincial Administrator’s Office ug Provincial Tourism Office aron ipahibalo ug hisgutan ang mga kalihokan alang sa umaabot nga pagsaulog sa Araw ng Davao del Norte.

Atol sa panagtagbo, gisusi ug gituki ang nagkalain-laing mga aktibidad nga ipahigayon isip kabahin sa kasaulogan. Gihisgutan usab ang maampingong pagplastar ug koordinasyon sa mga partisipante aron masiguro ang hapsay, organisado, ug malampusong pagpatuman sa matag kalihokan.

Gipasiugda sa mga opisyal ang importansya sa panaghiusa ug kolaborasyon tali sa lokal ug probinsyal nga panggamhanan aron mapalambo ang kalidad sa selebrasyon ug masiguro ang aktibong partisipasyon sa katawhan.

Pinaagi niini nga inisyatiba, gipaningkamotan sa Probinsyal nga Panggamhanan sa Davao del Norte ang paghatag og usa ka malipayon, makahuluganon, ug luwas nga selebrasyon alang sa tanang mga Dabaonon, bisan pa sa nagkalain-laing mga hagit nga giatubang sa katilingban karon.

𝐀𝐑𝐀𝐋 𝐒𝐔𝐌𝐌𝐄𝐑 𝐏𝐑𝐎𝐆𝐑𝐀𝐌 𝟐𝟎𝟐𝟔, 𝐌𝐀𝐋𝐀𝐌𝐏𝐔𝐒𝐎𝐍𝐆 𝐆𝐈𝐓𝐀𝐏𝐎𝐒

Sa padayong paningkamot sa Lokal nga Panggamhanan sa Kapalong nga mapalambo ang kahibalo sa mga kabataan, ilabina sa pagbasa ug sa Matematika, malampusong gitapos ang Aral Summer Program 2026, adlaw’ng Martes, Hunyo 2, 2026 sa Clementa F. Royo Elementary School.

Gipangunahan ni SB Member Edgardo R. Timbol Jr. ang maong kalihokan isip Chairperson sa Committee on Education. Mitambong usab si Ryan Alegre ug si Maria Elena H. Nimes, Principal III sa maong tulunghaan, kauban ang mga tutor ug volunteer teachers nga mipahinungod sa ilang panahon, kahibalo, ug dedikasyon alang sa kalampusan sa programa.

Sa iyang mensahe, gipasiugda ni SB Member Timbol ang dakong kahinungdanon sa Reading ug Math Program sa pagtabang sa mga kabataan nga mapalig-on ang ilang pundasyon sa pagkat-on ug mapauswag ang ilang akademikong kahimtang.

Gipadayag usab niya ang iyang hugot nga suporta sa sektor sa edukasyon ug sa mga programa sa administrasyon nga nagtumong sa paghatag og kalidad ug libreng edukasyon gikan sa elementarya hangtod kolehiyo alang sa mga lumulupyo sa Kapalong.

Ang Aral Summer Program usa ka mahinungdanong inisyatiba nga nagtumong sa pagtabang sa mga estudyante nga nagkinahanglan og dugang nga suporta sa pagbasa ug sa Matematika, isip kabahin sa padayong paningkamot sa pagpalambo sa kalidad sa edukasyon sa lungsod.

𝐏𝐑𝐈𝐂𝐄 𝐌𝐎𝐍𝐈𝐓𝐎𝐑𝐈𝐍𝐆 𝐔𝐏𝐃𝐀𝐓𝐄

Ania ang pinakabag-o nga presyo sa mga pamaliton sa atong merkado, as of June 2, 2026 sa lungsod sa Kapalong.

Ang maong mga datos gikolekta pinaagi sa pag-monitor sa mga nagkalain-laing establisyemento sa lungsod nga gipangunahan sa mga personahe sa Municipal Agriculturist’s Office (MAGRO).

𝐅𝐔𝐄𝐋 𝐏𝐑𝐈𝐂𝐄 𝐖𝐀𝐓𝐂𝐇

Ania ang pinakabag-o nga presyo sa petrolyo adlaw’ng Martes, June 2, 2026 sa nagkalain-laing gasolinahan sa lungsod sa Kapalong.

Padayon nga ginamonitor sa LGU Kapalong ang kahimtang sa presyo sa petrolyo aron masiguro nga ang katawhan adunay klaro ug tukmang impormasyon.

𝐀𝐍𝐍𝐎𝐔𝐍𝐂𝐄𝐌𝐄𝐍𝐓 | 𝟐𝐍𝐃 𝐐𝐮𝐚𝐫𝐭𝐞𝐫 𝐒𝐨𝐜𝐢𝐚𝐥 𝐏𝐞𝐧𝐬𝐢𝐨𝐧 𝐏𝐚𝐲𝐨𝐮𝐭 𝐒𝐜𝐡𝐞𝐝𝐮𝐥𝐞 𝐟𝐨𝐫 𝐒𝐞𝐧𝐢𝐨𝐫 𝐂𝐢𝐭𝐢𝐳𝐞𝐧

𝐃𝐚𝐭𝐞: 𝐉𝐔𝐍𝐄 𝟏𝟔, 𝟐𝟎𝟐𝟔
𝐁𝐚𝐫𝐚𝐧𝐠𝐚𝐲 𝐌𝐚𝐧𝐢𝐤𝐢
Time: 8:00 AM - 12:00 NN
Location:
(Surname A-L) - Municipal Gym
(Surname M-Z) - Green Paradise
𝐁𝐚𝐫𝐚𝐧𝐠𝐚𝐲 𝐆𝐮𝐩𝐢𝐭𝐚𝐧
Time: 8:00 AM - 2:00 PM
Location: Centro Gupitan Gym
________________________
𝐃𝐚𝐭𝐞: 𝐉𝐔𝐍𝐄 𝟏𝟕, 𝟐𝟎𝟐𝟔
𝐁𝐚𝐫𝐚𝐧𝐠𝐚𝐲 𝐒𝐮𝐚-𝐨𝐧
Time: 8:00 AM - 10:00 AM
Location: Florida Gym
𝐁𝐚𝐫𝐚𝐧𝐠𝐚𝐲 𝐅𝐥𝐨𝐫𝐢𝐝𝐚
Time: 10:00 AM - 12:00 NN
Location: Florida Gym
𝐁𝐚𝐫𝐚𝐧𝐠𝐚𝐲 𝐌𝐚𝐛𝐚𝐧𝐭𝐚𝐨
Time: 8:00 AM - 10:00 AM
Location: Capungagan Gym
𝐁𝐚𝐫𝐚𝐧𝐠𝐚𝐲 𝐂𝐚𝐩𝐮𝐧𝐠𝐚𝐠𝐚𝐧
Time: 10:00 AM - 12:00 NN
Location: Capungagan Gym
𝐁𝐚𝐫𝐚𝐧𝐠𝐚𝐲 𝐓𝐢𝐛𝐮𝐫𝐜𝐢𝐚
Time: 8:00 AM - 10:00 AM
Location: Gabuyan Gym
𝐁𝐚𝐫𝐚𝐧𝐠𝐚𝐲 𝐆𝐚𝐛𝐮𝐲𝐚𝐧
Time: 10:00 AM - 12:00 NN
Location: Gabuyan Gym
________________________
𝐃𝐚𝐭𝐞: 𝐉𝐔𝐍𝐄 𝟏𝟖, 𝟐𝟎𝟐𝟔
𝐁𝐚𝐫𝐚𝐧𝐠𝐚𝐲 𝐌𝐚𝐦𝐚𝐜𝐚𝐨
Time: 8:00 AM - 10:00 AM
Location: Sampao Gym
𝐁𝐚𝐫𝐚𝐧𝐠𝐚𝐲 𝐒𝐚𝐦𝐩𝐚𝐨
Time: 10:00 AM - 12:00 NN
Location: Sampao Gym
𝐁𝐚𝐫𝐚𝐧𝐠𝐚𝐲 𝐏𝐚𝐠-𝐚𝐬𝐚
Time: 8:00 AM - 10:00 AM
Location: Luna Gym
𝐁𝐚𝐫𝐚𝐧𝐠𝐚𝐲 𝐋𝐮𝐧𝐚
Time: 10:00 AM - 12:00 NN
Location: Luna Gym
𝐁𝐚𝐫𝐚𝐧𝐠𝐚𝐲 𝐒𝐞𝐦𝐨𝐧𝐠
Time: 8:00 AM - 10:00 AM
Location: Katipunan Gym
𝐁𝐚𝐫𝐚𝐧𝐠𝐚𝐲 𝐊𝐚𝐭𝐢𝐩𝐮𝐧𝐚𝐧
Time: 10:00 AM - 12:00 NN
Location: Katipunan Gym
________________________
𝐃𝐚𝐭𝐞: 𝐉𝐔𝐍𝐄 𝟏𝟗, 𝟐𝟎𝟐𝟔
𝐔𝐍𝐂𝐋𝐀𝐈𝐌𝐄𝐃
Time: 8:00 AM-10:00 AM
Location: OSCA Office



See less

𝐏𝐀𝐆𝐏𝐀𝐍𝐆𝐀𝐍𝐃𝐀𝐌 𝐀𝐋𝐀𝐍𝐆 𝐒𝐀 𝟏𝟐𝟖𝐭𝐡 𝐈𝐍𝐃𝐄𝐏𝐄𝐍𝐃𝐄𝐍𝐂𝐄 𝐃𝐀𝐘, 𝐌𝐀𝐒𝐔𝐒𝐈𝐇𝐎𝐍𝐆 𝐆𝐈𝐇𝐈𝐒𝐆𝐔𝐓𝐀𝐍

Aron masiguro ang malinawon, organisado, ug makahuluganon nga pagsaulog sa ika-128 nga Anibersaryo sa Philippine Independence Day, nagpahigayon ug usa ka mahinungdanong panagtapok si Municipal Information Officer Arnel L. Panimbo, MPA-LG, LPT, adlaw’ng Lunes, Hunyo 1, 2026, sa Conference Room, Executive Building.

Gitambongan kini sa mga representante gikan sa Armed Forces of the Philippines (AFP), Philippine National Police (PNP), Bureau of Fire Protection (BFP), Traffic Management Unit, ug mga personnel gikan sa nagkalain-laing opisina sa Lokal nga Panggamhanan sa Kapalong.

Atol sa miting, maalamong gisusi ug gihisgutan ang mga lakang, preparasyon, ug mga kalihokan nga ipahigayon atol sa selebrasyon. Lakip niini ang maampingong pag-organisa sa kinatibuk-ang programa, koordinasyon sa mga ahensya nga adunay katungdanan sa seguridad ug kaluwasan, ingon man ang mga pamaagi aron masiguro ang hapsay nga dagan sa maong kasaulogan.

Pinaagi sa hiniusang paningkamot sa tanang sektor, gilauman nga mahimong malampuson ug makahuluganon ang pagsaulog sa Independence Day sa lungsod sa Kapalong.

𝐌𝐆𝐀 𝐁𝐀𝐑𝐀𝐍𝐆𝐀𝐘 𝐂𝐀𝐏𝐓𝐀𝐈𝐍 𝐒𝐀 𝐊𝐀𝐏𝐀𝐋𝐎𝐍𝐆, 𝐌𝐈𝐁𝐈𝐒𝐈𝐓𝐀 𝐊𝐀𝐍𝐆 𝐌𝐀𝐘𝐎𝐑 𝐓𝐈𝐌𝐁𝐎𝐋; 𝐌𝐆𝐀 𝐏𝐑𝐎𝐆𝐑𝐀𝐌𝐀 𝐔𝐆 𝐁𝐀𝐑𝐀𝐍𝐆𝐀𝐘 𝐂𝐎𝐍𝐂𝐄𝐑𝐍𝐒 𝐆𝐈𝐇𝐈𝐒𝐆𝐔𝐓𝐀𝐍

Mibisita karong adlawa, Hunyo 1, 2026, sa Mayor’s Office ang mga Barangay Captain sa Kapalong aron makigpulong ug makighinabi kang Mayor Edgardo L. Timbol.

Mainiton nga giabi-abi ni Mayor Timbol ang delegasyon sa mga Kapitan, diin ilang nahisgutan ang nagkalain-laing mga proyekto, programa, ug mga positibong plano alang sa padayong kalamboan sa matag barangay sa lungsod.

Gipahibalo usab sa mga Kapitan ang umaabot nga Liga National Congress 2026 nga pagatambongan sa kaulohan. Malipayon nilang nadawat ang suporta ni Mayor Timbol diin iyang gipahibalo nga ang Lokal nga Panggamhanan sa Kapalong maoy mosalo sa ilang tagsa-tagsa ka registration fee isip pagpasalamat sa ilang padayon ug matinud-anong pag-alagad sa katawhan.

Atol sa maong panagtigom, mipahibalo usab ang Department of the Interior and Local Government (DILG) pinaagi ni Municipal Local Government Operations Office (MLGOO) Marc Voltaire Daquigan, kabahin sa Executive Order No. 43, Series of 2026 o ang “Inventory and Turnover of Barangay and Sangguniang Kabataan (SK) Properties, Financial Records, Documents and Money Accountabilities,” nga kinahanglan matuman sa dili pa matapos ang bulan sa Hulyo 2026.

Tumong niini ang pagsiguro sa hapsay, transparent, ug organisadong pagdumala sa mga kabtangan, rekord, ug pinansyal nga obligasyon sa mga barangay ug SK, ilabina sa pag-andam alang sa umaabot nga transisyon.

Nagpakita ang maong panagtigom sa lig-on nga panaghiusa ug kooperasyon tali sa Lokal nga Panggamhanan sa Kapalong ug sa mga lider sa barangay alang sa padayong paghatag og epektibo ug responsableng serbisyo publiko ngadto sa katawhan.

𝐁𝐔𝐋𝐀𝐍 𝐒𝐀 𝐇𝐔𝐍𝐘𝐎, 𝐆𝐈𝐒𝐔𝐆𝐃𝐀𝐍 𝐏𝐈𝐍𝐀𝐀𝐆𝐈 𝐒𝐀 𝐑𝐄𝐆𝐔𝐋𝐀𝐑 𝐂𝐎𝐍𝐕𝐎𝐂𝐀𝐓𝐈𝐎𝐍

Gisugdan sa Lokal nga Panggamhanan sa Kapalong ang unang adlaw sa bulan sa Hunyo pinaagi sa usa ka Regular Convocation nga gi-sponsoran sa Municipal Health Office (MHO), adlaw’ng Lunes, Hunyo 1, 2026, sa Kapalong Gymnasium.

Atol sa maong convocation, gipaabot sa Municipal Health Office ang ilang mga mahinungdanong kalihokan ug report pinaagi ni Municipal Health Officer Dr. Louelyn H. Exala, DPCOM. Lakip niini ang malampusong pagpahigayon sa Operation Tuli Program diin 530 ka mga kabataang Kapalongian ang nakabenepisyo sa maong serbisyo.

Gipahibalo usab ngadto sa publiko ang umaabot nga mga Blood Letting Activity nga ipahigayon sa mosunod nga mga petsa ug lugar: Hunyo 9, 2026 sa Barangay Mamacao, Hunyo 19, 2026 sa Barangay Sampao, ug Hunyo 23, 2026 sa Sitio Langan, Barangay Gupitan. Giawhag ang mga interesadong donor nga makigkoordinar o mobisita sa ilang tagsa-tagsa ka barangay alang sa dugang impormasyon.

Gipaila usab sa Municipal Human Resource Management Office (MHRMO) ang 68 ka On-the-Job Trainees (OJT) gikan sa College of Offic Administration sa Kapalong College of Agriculture, Sciences and Technology (KCAST),nga gilauman nga mohatag sa ilang serbisyo sulod sa 300 ka oras isip kabahin sa ilang practicum ug pagpalambo sa ilang propesyonal nga kahibalo ug kasinatian.

Sa laing bahin, gipresentar usab atol sa convocation ang bag-ong Fire Officer sa Bureau of Fire Protection (BFP) Kapalong nga si FO1 Andrei Meir C. Escobar, kinsa opisyal nang nanumpa sa iyang tahas sa pagserbisyo ug pagpanalipod sa katawhan sa Kapalong.

Usa usab ka dakong garbo alang sa Lokal nga Panggamhanan sa Kapalong ang pagdawat sa 25th Gawad KALASAG Seal Award pinaagi ni Municipal Disaster Risk Reduction and Management Officer Debbie E. Alilaya, MBA. Ang maong pasidungog gikan sa National Disaster Risk Reduction and Management Council (NDRRMC) nagtimaan sa pagkab-ot sa MDRRMO Kapalong sa “Beyond-Compliant” validation, nga nagpamatuod sa padayong paningkamot sa LGU sa pagpalig-on sa disaster preparedness, prevention, ug response programs sa lungsod.

Sa iyang mensahe, gipaabot ni Mayor Edgardo L. Timbol ang kalampusan sa benchmarking visit nga gipahigayon sa LGU Kapalong ngadto sa Pantukan Public Market sa Pantukan, Davao de Oro kaniadtong Mayo 30, 2026. Matod pa kaniya, ang mga nakat-unan ug maayong pamaagi gikan sa maong pagbisita mahimong magamit isip giya sa giplanong pagpalambo ug modernisasyon sa bag-ong merkado sa Kapalong nga pagasugdan sa umaabot nga mga bulan.

𝐋𝐆𝐔 𝐊𝐀𝐏𝐀𝐋𝐎𝐍𝐆 𝐍𝐀𝐆-𝐁𝐄𝐍𝐂𝐇𝐌𝐀𝐑𝐊𝐈𝐍𝐆 𝐕𝐈𝐒𝐈𝐓 𝐒𝐀 𝐏𝐀𝐍𝐓𝐔𝐊𝐀𝐍 𝐀𝐋𝐀𝐍𝐆 𝐒𝐀 𝐆𝐈𝐏𝐋𝐀𝐍𝐎𝐍𝐆 𝐏𝐀𝐆𝐏𝐀𝐋𝐀𝐌𝐁𝐎 𝐒𝐀 𝐊𝐀𝐏𝐀𝐋𝐎𝐍𝐆 𝐏𝐔𝐁𝐋𝐈𝐂 𝐌𝐀𝐑𝐊𝐄𝐓

Aron makatigom ug dugang kahibalo ug mga maayong pamaagi alang sa giplanong pagpalambo ug pagbag-o sa Kapalong Public Market, nagpahigayon ug benchmarking visit ang Lokal nga Panggamhanan sa Kapalong sa Public Market sa Pantukan, Davao de Oro niadtong Mayo 30, 2026.

Gipangunahan ni Mayor Edgardo L. Timbol ang hanay sa LGU Kapalong uban sa mga opisyal ug kawani gikan sa Municipal Engineering Office, Municipal Administrator’s Office, ug Economic Enterprise Development and Management Office (EEDMO). Mainiton usab nga gidawat sa Lokal nga Panggamhanan sa Pantukan ang delegasyon sa Kapalong ubos sa liderato ni Mayor Oliver “Kuya Noy” Ceniza.

Atol sa maong pagbisita, gisusi sa grupo ang disenyo, mga pasilidad, floor plan, ug mga operasyon sa merkado aron makakuha ug mga ideya ug estratehiya nga mahimong magamit sa giplanong pagpalambo sa Kapalong Public Market. Naghatag usab ug bililhong mga impormasyon ang mga engineers, architects, ug mga opisyal sa LGU Pantukan kabahin sa ilang kasinatian sa pagdumala ug Pag-operate sa pampublikong merkado.

Pinaagi niining benchmarking activity, gilaoman nga mas makahatag kini ug maaying mga ideya sa umaabot nga Pag improve sa Kapalong Public Market nga nakatakda nga sugdan sa mga mosunod nga mga bulan.