09/10/2026
https://www.facebook.com/share/1cg9b6TUXG/
📍”𝗣𝗜𝗟𝗜𝗜𝗡 𝗔𝗡𝗚 𝗞𝗔𝗧𝗔𝗣𝗔𝗧𝗔𝗡 𝗦𝗔 𝗦𝗘𝗥𝗕𝗜𝗦𝗬𝗢 𝗣𝗨𝗕𝗟𝗜𝗞𝗢”
-𝗚𝗢𝗕. 𝗬𝗨
Hinimok ni Zamboanga del Sur Governor Divina Grace C. Yu ang mga lider ng lokal na pamahalaan na piliin ang katapatan at integridad sa halip na korapsyon at pansariling interes sa pagsasagawa ng kanilang tungkulin sa publiko.
Ito ang mensahe ni Yu sa panimulang seremonya ng ika-35 pagdiriwang ng Local Government Month noong Oktubre 6 sa Pavilion Hall, Provincial Government Center sa Dao, Pagadian City.
Binigyang-diin ng gobernador ang salitang “Timshel,” na nangangahulugang “maaari kang pumili,” bilang paalala na may kalayaan ang bawat tao na piliin ang kaniyang mga kilos at landas sa buhay. Hinango ang konseptong ito sa seryeng East of Eden ng Netflix.
Ayon kay Yu, may sapat na kakayahan at mga mapagkukunan ang mga lokal na pamahalaan upang maisakatuparan ang “Matinong Paglilingkod, Mahusay na Serbisyo at Maaasahang Pamamahala.” Gayunman, nagbabala siya na maaaring tuksuhin ng korapsyon at pansariling interes ang mga opisyal ng pamahalaan at ilabas ang pinakamadilim na bahagi ng kanilang pagkatao.
Binigyang-diin din niya na kailangang sadyang piliin ng mga lingkod-bayan ang tama sa kabila ng mga hamong moral na kaakibat ng kanilang tungkulin.
“Bawat lider ay may mahalagang pagpili na daigin ang kasalanan at kadiliman—Timshel,” ayon sa mensahe ng gobernador.
Nagpasalamat din si Yu sa Department of the Interior and Local Government (DILG) sa patuloy nitong paggabay sa mga lokal na pamahalaan sa pagpapatupad ng Republic Act No. 7160 o Local Government Code of 1991.
Ipinagdiriwang tuwing Oktubre ang Local Government Month upang bigyang-diin ang mahalagang papel ng mga lokal na pamahalaan sa paghahatid ng mabilis, angkop at epektibong serbisyo publiko sa mga mamamayan.
