03/06/2026
ڈی پی او ایبٹ آباد ہارون رشید خان کا حویلیاں کا دورہ، جلوسِ گیارہویں محرم الحرام کے روٹ کا تفصیلی معائنہ
ڈی پی او ایبٹ آباد ہارون رشید خان نے محرم الحرام کے دوران امن و امان کی صورتحال اور سیکورٹی انتظامات کا جائزہ لینے کے لیے تحصیل حویلیاں کا دورہ کیا، جہاں انہوں نے گیارہویں محرم الحرام کے مرکزی جلوس کے روٹ، داخلی و خارجی راستوں، حساس مقامات، امام بارگاہوں اور دیگر اہم پوائنٹس کا تفصیلی معائنہ کیا۔
اس موقع پر ایس پی حویلیاں جمیل الرحمن، ڈی ایس پی حویلیاں سراج خان اور ایس ایچ او تھانہ حویلیاں کیڈٹ عبدالغفور قریشی بھی موجود تھے۔ پولیس افسران کی جانب سے ڈی پی او ایبٹ آباد کو جلوس کے روٹ، سیکورٹی ڈیوٹی، نفری کی تعیناتی، ٹریفک پلان، سرچ اینڈ سویپ آپریشنز، واک تھرو گیٹس، سی سی ٹی وی مانیٹرنگ، ایمرجنسی رسپانس اور دیگر سیکورٹی اقدامات کے حوالے سے تفصیلی بریفنگ دی گئی۔
ڈی پی او ایبٹ آباد ہارون رشید خان نے جلوس کے روٹ پر تعینات افسران و جوانوں کو الرٹ رہنے، مشکوک افراد پر کڑی نظر رکھنے، داخلی راستوں پر سخت چیکنگ یقینی بنانے اور عوام الناس کے ساتھ خوش اخلاقی سے پیش آنے کی ہدایات جاری کیں۔ انہوں نے کہا کہ محرم الحرام کے دوران امن و امان کا قیام پولیس کی اولین ترجیح ہے اور کسی بھی ناخوشگوار واقعہ سے نمٹنے کے لیے تمام دستیاب وسائل بروئے کار لائے جائیں گے۔
ڈی پی او ایبٹ آباد نے مزید ہدایات دیتے ہوئے کہا کہ جلوس کے دوران فول پروف سیکورٹی انتظامات، موثر ٹریفک مینجمنٹ اور عزاداروں کو ہر ممکن سہولیات فراہم کی جائیں تاکہ مذہبی ہم آہنگی اور پرامن ماحول کو برقرار رکھا جا سکے۔ انہوں نے پولیس افسران کو عوام کے ساتھ مسلسل رابطے میں رہنے اور تمام مکاتب فکر کے افراد کے ساتھ باہمی تعاون کو فروغ دینے کی بھی تاکید کی