07/07/2026
نو منتخب وزیر اعلیٰ امجد حسین ایڈوکیٹ کو منصب سنبھالنے پر مبارکباد اور عارضی ملازمین کی مستقلی کی امید
گلگت: گلگت بلتستان کے مختلف سرکاری محکموں میں خدمات سرانجام دینے والے عارضی، کنٹریکٹ، پراجیکٹ اور کنٹیجنٹ ملازمین کی جانب سے نو منتخب وزیر اعلیٰ گلگت بلتستان امجد حسین ایڈوکیٹ کو اپنے عہدے کا باقاعدہ حلف اٹھانے اور دفتری امور سنبھالنے پر دل کی گہرائیوں سے مبارکباد پیش کرتے ہے۔ عارضی ملازمین نے وزیر اعلیٰ کے اس احسن اقدام کو انتہائی سراہا ہے کہ انہوں نے منصب سنبھالنے کے پہلے ہی روز اپنے پہلے انتظامی آرڈر کے ذریعے گلگت بلتستان کے 89 ڈاکٹروں کی ملازمتوں کو مستقل کرنے کی منظوری دی۔ یہ تاریخی فیصلہ ان کی عوامی فلاح، میرٹ اور ملازمین کے حقوق سے مخلصانہ وابستگی کا منہ بولتا ثبوت ہے۔
عارضی ملازمین کا کہنا ہے کہ پہلے ہی دن ڈاکٹروں کی مستقلی کا حکم نامہ جاری کرنا وزیر اعلیٰ امجد حسین ایڈوکیٹ کے وژنری، غریب دوست اور ملازم نواز ہونے کا منہ بولتا ثبوت ہے، جس کا پورے خطے کے ملازمین دل سے خیرمقدم کرتے ہیں۔ اس تاریخی اقدام کے بعد گلگت بلتستان بھر کے تمام عارضی ملازمین میں امید کی ایک نئی لہر دوڑ گئی ہے۔
ملازمین نے اس مضبوط امید کا اظہار کیا ہے کہ نو منتخب وزیر اعلیٰ اپنے منشور "حقِ روزگار" کو مدنظر رکھتے ہوئے، گلگت بلتستان کے مختلف محکموں میں عرصہ دراز سے انتہائی قلیل اجرت پر شب و روز خدمات سرانجام دینے والے دیگر عارضی ملازمین کی مستقلی کے حوالے سے بھی جلد اہم احکامات جاری کریں گے۔ موجودہ معاشی حالات اور بڑھتی ہوئی مہنگائی کے پیش نظر ان ملازمین کو مستقل کرنا وقت کی اہم ضرورت ہے۔
عارضی ملازمین نے وزیر اعلیٰ سے اپیل کی ہے کہ مختلف محکموں میں سالہا سال سے کام کرنے والے عارضی (کنٹریکٹ، پراجیکٹ اور کنٹیجنٹ) ملازمین کو مستقل بنیادوں پر ریگولرائز کیا جائے۔ انہیں پورا یقین ہے کہ امجد حسین ایڈوکیٹ کی متحرک قیادت میں گلگت بلتستان سے معاشی عدم استحکام کا خاتمہ ہوگا اور وہ طویل عرصے سے اپنے مستقبل کے حوالے سے فکرمند عارضی ملازمین کو مستقلی کا حق دے کر ان کی ذہنی تشویش کا خاتمہ فرمائیں گے۔
جاری کردہ: عارضی ملازمین (کنٹریکٹ، پراجیکٹ اور کنٹیجنٹ) گلگت بلتستان
