14/08/2026
ہنزہ: یومِ آزادی پاکستان قومی و ملی جوش و جذبے کے ساتھ منایا گیا
ملک بھر کی طرح ہنزہ میں بھی یومِ آزادیِ پاکستان قومی و ملی جوش و جذبے کے ساتھ منایا گیا۔ یومِ آزادی کے حوالے سے گرلز کالج کریم آباد ہنزہ میں قومی سطح کی ایک بڑی تقریب کا انعقاد کیا گیا، جس میں راجہ ناظم الامین، سینئر مرکزی نائب صدر استحکامِ پاکستان پارٹی، پاکستان پیپلز پارٹی کے سینیٹر سلیم مانڈوی والا، ضلعی انتظامیہ کے افسران، مختلف شعبہ ہائے زندگی سے تعلق رکھنے والے افراد، اساتذہ، طلبہ و طالبات اور بڑی تعداد میں عوام نے شرکت کی۔
اس موقع پر خطاب کرتے ہوئے راجہ ناظم الامین نے کہا کہ پاکستان کا قیام یقیناً اللہ تعالیٰ کی طرف سے ہمارے لیے ایک بہت بڑی نعمت ہے۔ پاکستان نے اپنے قیام سے لے کر آج تک بے شمار چیلنجز کا سامنا کیا، تاہم پاکستانی قوم نے ہمیشہ اتحاد، عزم اور حوصلے کے ساتھ ان مشکلات کا مقابلہ کیا ہے۔
انہوں نے کہا کہ دنیا میں امن، ترقی اور خوشحالی کے لیے پاکستان، گلگت بلتستان اور مقامی سطح کی قومی و سیاسی قیادت کی ذمہ داریاں انتہائی اہم ہیں۔ ہماری قیادت اور عوام کو مل کر ملک کی ترقی، استحکام اور خوشحالی کے لیے اپنا بھرپور کردار ادا کرنا ہوگا۔
راجہ ناظم الامین نے کہا کہ آج کے اس اہم قومی دن کے موقع پر ہمیں اس عہد کی تجدید کرنی چاہیے کہ ہم پاکستان کی ترقی، خوشحالی، امن اور استحکام کے لیے اپنی تمام تر صلاحیتیں بروئے کار لائیں گے اور آنے والی نسلوں کے لیے ایک مضبوط، پرامن اور خوشحال پاکستان کی بنیاد مزید مضبوط کریں گے۔
پاکستان زندہ باد 🇵🇰
گلگت بلتستان پائندہ آباد
