Baloch Students Front-Karachi Zone

بلوچ اسٹوڈنٹس فرنٹ کراچی ھنکین ءِ نیمگ ءَ چہ ماتی زبان ءِ میان استمانی روچ ءِ سر ءَ یکّ گِردانکے (لیکچرے) ھنکینی کماش کمبر بلوچ ءِ سرونکی ءَ برجم دارگ بوتگ۔اے
گردانک ءِ تران کنوک ھنکینی کماش کمبر بلوچ ھنکینی کارگشاد صلاح الدین بلوچ،ھنکینی شنگکار ایثم نثار ءُ بی ایس ایف کراچی ھنکین ءِ گْوستگیں کماش ھنیف بلوچ بوتگ اَنت۔سنگتاں تران کنان ءُ گْوشت کہ ماتی زبان ءُ میان اُستمانی روچ ھر سال 21 اُستپان ءَ برجم دارگ بیت۔ اے روچ ءِ برجم دارگ ءِ مول ءُ مراد سرجمیں دگنیا ءَ ماتی زبانانی اھترام کنگ بہ بیت اے روچ مارا یات کنت کہ زبان نہ ایوک ءَ گپ کنگ ءِ وسیلہ اِنت بلکیں مئے راج دپتر ءِ تاک اِنت۔اے روچ ءِ پشدر چو اے پیم ءَ انت کہ 1952 آ وھد بنگلادیش پاکستان ءِ یک بھر ات ءُ رودرآتکی بزاں مشرکی پاکستان گْوشگ بوتگ کہ ھما وھد ءُ زمانگ ءَ پاکستان ءِ ھکومت جار جنت کہ مئے راجی زبان اردو اِنت گڑا بنگالی اے گپ ءِ منّگ ءَ تیار نہ بنت انچوشکہ آ زمانگ ءَ آیانی کچ چہ اے لمب ءِ پاکستان ءَ گیش بوتگ۔ گڑا آ گْوش اَنت کہ مئے مھلوک گیشتر اِنت پمیشکا راجی زبان یا بنگالی بہ بیت یا بنگالی ءُ اردو دوئیں بہ بنت۔ما تھنا اردو ءَ زُرت نہ کن ایں۔ پرچ ءَ کہ آیاں زانتگ کہ اگاں آیانی زبان راجی زبان جوڑ کنگ نہ بوت گڑا آیانی زبان گار ءُ بیگواہ بیت، ایردست بیت ءُ لگتمال بیت۔ گڑا ھمے درگت ڈھاکہ یونیورسٹی ءِ نودربر گوں لس مھلوک ءَ ڈن ءَ در کاینت ءُ زھرشانی ءُ زرمبست بیت گڑا ھما وھد ءِ رودرآتکی پاکستان ءِ ایڈمنسٹریشن پولیس ءَ پرمان دنت کہ ایشانی سر ءَ تیر گْواری بہ کن اتءُ ایشانی زھرشانی ءَ ھلاس بہ کن ات۔گڑا پولیس انچوش کنت ءُ بنگالیانی سر ءَ تیر گْواری بیت ءُ بازیں کچے ءَ مردم نمیران کنگ بیت۔

سنگتاں دیمتر ءَ گوشت وھدے دگنیا ءِ توک ءَ UNESCO نامیں یک گلے جوڑ بیت کہ اے جھانی انسانانی ھک ءِ واست ءَ گپ کنوک ءُ کار کنوکیں گلے، اے 1999 جار جنت کہ ھمے روچ ءَ بنگالیاں وتی سر ندر کرتگ اَنت پہ زبان ءَ ما ھمے روچ ءَ کلیں جھان ءِ ماتی زبانانی روچ گْوش ایں۔ چہ ھما روچ ءَ دیم اے روچ ماتی زبانانی روچ ءِ درگت ءَ یات کنگ بیت۔اے روچ ءِ مکسد ھمیش اَنت کہ دگنیا ءِ توک ءَ ھر وڑیں راجے، چاگردے، مھلوکے ھست وتی ماتی زبان ءِ بابت ءَ بہ جیڑ ایت۔ کمو وتی دل ءُ دماگ ءَ کار بہ گیت کہ منی ماتی زبان چون اِنت؟ چون بوگ ءَ اِنت؟، دیم ءَ چون بیت؟ من پہ زبان ءَ چے کنگ ءَ آں؟ ، منی راج ءُ چاگرد پہ زبان ءَ چے کنگ ءَ اِنت؟ یک راج ءِ واست ءَ زبان ءِ ارزشت چے اِنت؟۔ اے روچ مارا ھمے پیم مارگ پرمائیت

سنگتاں گْوشت کہ زانشتی پڑ ءَ زبان یک بلاھیں ارزشت ءِ داریت پٹ ءُ پول ءَ اے گپ پدّر بوتگ کہ زھگانی ذھنی دیمروئی ھما وھد ءَ شرتر بیت وھدے بنداتی وانگ ءُ زانگ آیانی ماتی زبان ءَ دیگ بہ بیت آ گوں گیشتر اِیں دلجمی ءَ دربرت کن اَنت ءُ وتی ہُنراں شرتر دیمروئی کن اَنت۔ھمے زبان اَئی ءِ جیڑگ ءِ بُن ھِشت اِنت۔زبان آئی ءِ واباں دروشم دنت۔ھمے زبان آئی پجار ءَ دیم ءَ کار اِیت۔
بلوچ اسٹوڈنٹس فرنٹ کراچی ھنکین

بلوچ اسٹوڈنٹس فرنٹ کراچی مزن شَھدربرجاہ بنزہ ءِ بنزھی لس مجلسی دیوان، نوکیں کابینہ ءِ جْوڑشت ٹاھینگ بوتگ۔ اظہر بلوچ بنزھی کماش ءُ انس شکور بنزھی کارگشاد گچین کنگ بوتگ انت
بلوچ اسٹوڈنٹس فرنٹ کراچی ھنکین
بلوچ اسٹوڈنٹس فرنٹ کراچی مزن شَھدربرجاہ بنزہ ءِ بنزھی لس مجلسی دیوان بنزہ ءِ کمک کارگشاد ہرا بلوچ ءِ سروکی ءَ برجم دارگ بوتگ۔اے دیوان ءِ مھمان ھاس کراچی ھنکین ءِ کماش کمبر بلوچ ءُ گچینی مھمان ھنکینی کمک کماش نعمت بلوچ،ھنکینی کارگشاد صلاح الدین، ھنکینی کمک کارگشاد خلیل بلوچ ءُ ھنکینی شنکگار ھیثم بلوچ بوتگ اَنت۔دیوان ءِ تہ ءَ ھنکینی سرکولر، گل کاری، میان اُستمانی ءُ ھَندی سیاسی جاور ھال ءُ آیوکیں گامگیج ءِ سر ءَ گپ ءُ باوست کنگ بوتگ۔اولی بنگپ ھنکینی سرکولر ات۔آئی تہ ءَ زرتگیں پْیسلہ باسکانی دیم ءَ وانگ بوت انت۔دومی بنگپ گل ءِ کار ات انت۔سنگتاں جْوانیں رنگے گل کاری ءِ سرا وتی گپ ایر کرت انت ءُ ھمے گوشت کہ کراچی ءِ دمگ ءِ تہ بی ایس ایف ءِ پیگام گلی گلی آں سر کنگی انت۔مارا کراچی جاھمنندیں ورنا دست گرگی انت۔آیاناں نودربر سیا ست ءِ نیمگ ءَ آرگی انت۔کراچی گوستانک ءَ بلوچ سیاست ءُ لبزانک ءِ بنجاہ بوتگ۔ھمدا چہ بلوچ راج دوستی بُنھشت ایر کنگ بنت۔مارا ایدگہ نودربر گلاں گوں کہ کرس چارگی انت تانکہ نودربر سیاست ءَ چہ بھران ءَ در بہ کن انت۔وتی وانگ ءُ آسراتی ءِ واست ءَ جھد برجاہ دارگی انت۔گل کراچی ءُ ملیر ءِ دمگ ءَ مھکم کنگی انت۔سیمی بنگپ میان اُستمانی ءُ دمگی سیاسی جاور ھال ات انت۔سنگتاں اے بنگپ ءِ سرا گپ جت ءُ گوشت کہ مروچی دنیا ءِ تہ ءَ ھمک راج ءُ ملک وت ءَ تاکتے جوڑ کنگ ءِ واست ءَ جتائیں پڑ ءَ جنگ کنگ ءَ انت۔مرچی جنگ ءِ تب مٹ بوتگ۔مارا یک چیزے گندگ ءَ کیت آ مصنوعی ذہانت ءِ گیش بوھوکیں تاکت ءُ دنیا ءِ تہ ءَ بوتگیں تُرندیں بدلی انت - اے آئی،اے سرجمیں گوازی ءَ بدل کنگ ءَ اِنت۔ مصنوعی ذہانت مرچی ھما کرد ءَ پیلو کنگ ءَ اِنت کہ 1940 ءَ ایٹم بم ءَ کرتگ ات - ڈیفنسءِ بابت ءَ مئے جیڑگ ءِ راہ ءَ بدل کنگ ءَ انت۔نوں مصنوعی ذہانت ءُ ایشی ءَ گوں ھمگرنچیں پڑ جیو پولیٹیکس ءَ را سان کنگ ءَ انت۔ رابتہ کاری ءُ توانائی ءِ یکجاہ کنگ ءَ چہ دیمروی ءِ نوکیں پڑ جوڑ بوتگ۔چین ءُ امریکہ ءِ تجارتی جنگ ءَ ھوار ٹیکنالوجی جنگ بوگ ءَ انت۔ھمے واست ءَ مرچی تائیوان ءِ سرا امریکہ ءُ چین مِڑ برجاہ انت۔گرین لینڈ ءُ وینزویلا ءِ ابرمی گواجن انت کہ امریکہ وتی دست ءَ کنگ لوٹیت اش ھمے واست ءَ اودا دزمانجنی کنگ ءَ انت۔مرچی ڈیٹا نوکیں تیل اِنت ھرکس ءَ کہ شرتریں ڈیٹا ءُ مصنوعی ذہانت ھست آ دنیا ءِ سر ءَ راجداری کنت - تئی ھر پیگام ، پٹ ءُ پول، ویڈیو ءِ چارگ اے درستیں ڈیٹا اَنت کہ توان ءَ دنت
سنگتاں دیمتر ءَ گوشت کہ دو ھزار ھشت ءِ میان اُستمانی گزرانکی گپچل ءَ سامراج ءِ روتگ جَکّسینتگ۔اے بھران ءَ میان اُستمانی تَک ءَ سیاست ءِ رنگ مٹ کنگ بندات کرتگ ءُ دو ھزار دوازدہ ءِ ارب آشوب ءَ سرجمیں دنیا ھما وھد ءَ جَکسینت کہ دمگ ءِ یکّے پد دومی ملک ءِ تہ ءَ اُلسی جنبشاں ھما بدتریں آمریت کہ دَھکّاں چہ واکداری کنگ ءَ ات انت۔آ ھُنڈالاں چہ ولگوج کنگ بوت انت۔زوراکیں امریکہ ءِ نوکر لاچار بوت انت اے زوراکیں تاکت وتی سرجمیں زور ءُ تاکت ءَ ابید واکداری ءَ را رَکّینت کرت نہ کرت۔ارب آشوب ءَ یورپ ءُ امریکہ ءِ سرا ھم سان کرتگ ات ءُ اودا ھم اوکپائی وال اسٹریٹ ءِ وڑیں تھریکاں سیاست ءِ رھبند ءِ بدلی ءِ اشارگ داتگ ات۔شام ءِ بھران،ایران ءِ گزرانکی بندش ءُ رجیم مٹ کنگ ءِ جھد،بنگلہ دیش ءِ تہ ءَ حسینہ تچگ ءُ روگ، رجیم ءِ بدلی،ایشیا ءِ تہ ءَ دمگی تاکتانی جنگ، نوکیں الائنس آنی جوڑ بوگ ءُ نوکیں ادارھانی ٹاھینگ اے درست یکّے دومی ءِ سرا بے ستکی انت ءُ وتی راجی لوٹانی رکینگ ءِ سوب ءَ اے درستیں کار بوگ ءَ انت۔اشانی سان مئے سرا کپ انت۔اے گپ ءَ ما بہ زان ایں دنیا ءِ تہ ءَ چونیں مٹانکی یے کیت آ کلیں دمگاں متاثر کنت۔بلوچ مرچی وتی جند ءِ ڈگار ءِ سرا چو درامد ءَ زند گْوازینگ ءَ انت۔ھرچ وڑیں زبھری ءِ دیمپان انت۔جان سلامتی ءِ پڑ بہ بیت یاںکہ وانگ ءُ روزگار ءِ پڑ بہ بیت۔یک ڈول انت۔ھمک روچ ورنا چہ وانشتجاھاں چست کنگ بنت ءُ گار ءُ بیگواہ کنگ بنت۔کدی آیانی جون دروگیں میڑ ءّ نام چگل دیگ بنت۔مئے وانشتجاھ پوجی بنجل جوڑ کنگ بوتگ انت۔مئے چاگرد ءَ الم ءُ زانشت ءِ چراگ ءِ بالینگ ءِ سرا بندش انت۔کتابی مراگاھانی سرا بندش انت۔وانگ جاھانی تہ ءَ زانشتی گپ ءُ باوست، زانشتی پٹ ءُپول سرا مکن انت دومی نیمگ ءَ منشیات تچکی ءَ گوں بھا کنگ بوگ ءَ انت۔ایدگہ چاگردی سلکاری بوگ ءَ انت۔راجمان ءَ را ھنچو گند کنگ بوتگ تپنگ ءِ ربیدگے دیم ءَ آؤرتگ۔بلوچ چاگرد ءِ ایمنی تباہ کرت۔مئے ورناھاناں اے چیزانی سرا جیڑگی انت ءُ مارگی انت۔آیوکیں گامگیج ءِ بُنگپ ءِ سر ءَ بازیں پیسلہ زورگ بوت ءُ گچین کاری ءِ وسیلگ ءَ نوکیں بنزہ ءِ زمہ وار گچین کنگ بوت اَنت۔نوک گچین بوتگیں زمہ دار بنزھی کماش اظہر بلوچ، کُمک کماش زہرا بلوچ، کارگشاد انس شکور، کمک کارگُشاد کرا بلوچ، شنگکار محسن علی،جنکانی ھاسٹل سیکریٹری نازش بلوچ،سوشل سانئس ڈپارٹمنٹ ءِ کوآرڈینیٹر عدنان بلوچ ،سائنس ڈپارٹمنٹ ءِ کوآرڈینیٹر نادر بلوچ ءُ ایڈمین افیئرز کمیٹی ءِ باسک عمران مری،ءُ آصف بلوچ گچین کنگ بوتگ اَنت۔
بلوچ اسٹوڈنٹس فرنٹ کراچی ھنکین

چہ بلوچ اسٹوڈنٹس فرنٹ کراچی مزن شاھدربرجاھ بنزہ ءِ نیمگ ءَ نوک اتکگیں نودربراناں وش آتک کنگ بوتگ ءُ آیاناں مزن شَھدربرجاہ ءِ بابت ءَ سرپدی دیگ بوتگ۔کراچی ھنکین ءِ کماش ھنیف بلوچ ءَ نوک اتکگیں نودربراں گوں تران کنان ءَ گْوشت کہ مرچی شما درست اِدا یکجاھ نشتگ اِت۔ چہ جتا جتائیں دمگاں سیادی دار اِت۔ کوھ ءُ کوچگاں چہ درکپتگ اِت ءُ گیشیں وانگ ءِ ھاتر ءَ کراچی ءَ اتکگ اِت۔ شماء باز وش بھتیں مردم اِت کہ شماء را وانگ ءِ واست ءَ موہ رس اِتگ چوشیں بازیں مردم است اَنت آ شھر ءَ آیگ لوٹ اَنت بلے اتک کُرت نہ کنت۔ شماء را موہ رس اِتگ۔گیش ءَ چہ گیش بہ وان اِت۔
ڈاکٹر اسد اللہ قمبرانی ءَ نوک اتکگیں نودربراں گوں تْران کنان ءَ گْوشت کہ شماء را کراچی مزن شاھدربرجاہ ءَ داخلہ زورگ ءِ مبارک باتی دیاں ءُ ھمے امیت ءَ داراں کہ شما وتی وانگ گوں مخلص بہ ات۔وتی گساں چہ دور اتکگ انت۔بہ وان ات۔وتی وانگ گوں مخلص بہ بہ ات۔مارا باز وانگ ءِ زلورت انت۔ما کل پد منتیں جاھاں چہ سیادی دار انت
کراچی مزن شاھدربرجاہ بنزہ ءِ زمہ داراں کراچی یونیورسٹی ءِ ماھول ءُ وانگ ءِ بابت ءَ نوک اتکگیں نودربراناں سرپدی دات ءُ ھمے گوشت کہ شمئے مسترین زمہ واری ایش انت کہ وتی زات ءَ گوں ثابت قدم بِہ بَہ اِت۔ ھما ڈپارٹمنٹ ءُ فیلڈ ءَ داخلہ بوتگ۔ آیانی تہ ءَ شمئے بودناکی ءُ لائیکی الّمی اِنت- وتی کورساں ابید ایدگہ کتاب بہ وان اِت۔ مرچیگیں آرٹیفیشل انٹیلیجنس زمانگ ءَ وت ءَ چیز مٹ بوتگ اَنت اے تُرندیں وھد ءِ تہ ءَ شمئے سرا زمہ واری گیش اَنت۔ بلوچ اسٹوڈنٹس فرنٹ مُدام شمئے واست ءَ ساڑی اِنت۔ ھمک نودربر ءِ توار اِنت۔ شماء را ھمک وڑیں کار ءِ کراچی یونیورسٹی ءَ بیت بی ایس ایف ھمک وھد ءَ کارانی واست ءَ تیار اِنت-

بلوچ اسٹوڈنٹس فرنٹ کراچی ھنکین ءِ نیمگ ءَ یک وانگی گردانکے سرھال "بلوچ سیاستی بُندپتر 1920 تاں 1948" ھنکینی کماش ھنیف بلوچ ءِ سروکی ءَ برجم دارگ بوتگ۔
اے دیوان تران کنوک بلوچ اسٹوڈنٹس فرنٹ ءِ بنجاہی کارگشاد سنگت گل ھسن بوتگ۔

سنگت ءَ بلوچ سیاسی بُندپر ءِ سر ءَ تراں کناں ءَ گوشت کہ بلوچ سرڈگار ھزاراں سال ءَ چہ جنگ جاھے جوڑ بوتگ آرین ءَ بہ گر تاں پاکستان ءَ درستاں ادا اُرش کرتگ بلے 1920 ءَ پیسر بلوچاں ھر وھد کُٹمی دروشم ءَ جنگ کُرتگ ھچ پیمیں گل جوڑ نہ بوتگ۔ ھمے سوب اِنت بلوچ ءِ جنگ ھر وھد بے سوب بوتگ اَنت آسر ءَ سر نہ بوتگ اَنت ۔ 13 نومبر 1839 ءَ انگریز قلات ءِ سر ءَ اُرش کنت بلوچ ءَ وتی گلام جوڑ کنت میر مہراب خان جنگ کنت شہید بیت پدا جنگ ءِ جند کُٹمی دروشم ءَ بیت بلے جوانیں دابے ءَ پہ بلوچ ءِ سرڈگار ءِ آجوئی ءَ نہ بیت ۔
میر ٹلن خان میر عبدالعزیز کرد ءِ پس بیت آ جُھدے کنت تانکہ سیاسی گلے جوڑ بہ کنت انگریز ءُ خان ءِ بگیری ءَ جُھدے دیم ءَ بیار ایت ۔ چمداں اوگنستان ءَ امیر حبیب اللہ ءِ کرا روت پہ کمک ءَ بے سوب بیت واپس کیت ھماموش بیت ۔
اے ھما وھد بیت لینن ءِ سروکی ءَ سوویت یونین ءِ تہا سوشلسٹ آشوبے کیت دنیا باز لوٹ ایت آ ھمے جُنز ءِ بھرے بہ بنت بلوچ ھم اے لوٹ ءَ ھوار بنت 1920 ءَ آذربائیجان ءِ شہر باکو ءَ یک کانفرنسے لینن اڑ دنت بلوچانی نیمگ ءَ مصری خان کیھتران گوں ھمراہاں بھر زور ایت ۔ 1920 ءَ میر عبدالعزیز کرد مستونگ ءَ یک انگلش ورٹیکل اسکولے ءَ وانگ ءَ بیت ۔ ھمدا ھیر مھمد مری بلوچے استاد بیت ۔ دومی استاد ءُ سروک ایش ءَ گوں زوراکی کن اَنت گُڑا عبدالعزیز کرد چمداں ھیال کنت آ سیاسی گلے جوڑ بہ کنت اے وڑیں زوراکیاں بہ دار ایت ۔ 1920 ءَ اولی بلوچ گل ءِ بُنھشت ءَ ایر کنت آئی نام " ینگ بلوچ یا انجمن نوجواناں بلوچاں " ءِ نام ءَ دیم ءَ کیت چار سال ءَ رند ایش ءَ نام ءَ بدل کن اَنت " انجمن اتحاد بلوچ ءُ بلوچستان ایر کن اَنت ۔ 1931 ءَ یوسف عزیز مگسی ایش ءَ بھر جوڑ بیت ءُ انجمن ءِ سروکی ءَ کنت ۔ 1932 ءَ اولی آل انڈیا بلوچ کانفرنس ءَ ایر کن اَنت ماں سندھ ءَ دومی کانفرنس ءَ 1933 ءَ ھم سندھ ءَ ایر کن اَنت ادا گل بازیں لوٹ دیم ءَ کار ایت ۔ 1934 ءَ یوسف عزیز مگسی دران ڈیھہ کنگ بیت واپس بلوچستان ءَ 1935 ءَ کیت بدبھتی ءَ 30 ءُ 31 مئی 1935 ءِ شپ ءَ شال ءَ مزنیں زمین چنڈے بیت یوسف مگسی بیران بیت چمداں گل دیم پہ ھلاسی ءَ روان بیت ۔ عبدالعزیز کرد چار ایت گل روچ پہ روچ ھلاس بوہان انت آ 1937 ءَ ماں سبی ءَ اے انجمن ءِ نام ءَ بدل کنت قلات اسٹیٹ نیشنل پارٹی ءِ نام ءَ پارٹی یے جوڑ کن اَنت ۔ اولی کماش عبدالعزیز کرد،کُمک کماش گل خان نصیر ءُ کارگُشاد ملک فیض محمد یوسف زئی گچین کنگ بنت ۔ اے پارٹی ءِ سر ءَ 1939 ءَ خان بندش جنت اے پارٹی ھما وھداں ھلاس ءِ نیمگ ءَ روت عبدالعزیز کرد ایش ءَ سروکی ءَ یل دنت سرکاری نوکری ءَ بندات کنت ۔ اے گل تاں برطانیہ ءِ دست ءَ بلوچستان ءِ آجوئی ءَ ھست بیت پدا ھلاس بیت ۔
1937 ءِ وھداں انجمن اسلامیہ قلات ءِ نام ءَ ھم انجمنے جوڑ بیت بلے زوت ھلاس بیت ۔
سنگت ءَ دیمترا گوشت 1945 ءُ 1946 ءِ وھداں سید ظہور شاہ ھاشمی ھم انجمن اصلاح بلوچاں جوڑ کنت اے تہنا گوادر ءَ بیت گوادر آ وھداں مسکت ءِ دست ءَ بیت اے گل ءَ مکست گیش مُھکم بوگ ءَ نیل ایت سید ءَ سے سال گوادر ءَ آئیگ ءَ نیل ایت ۔
دیوان ءِ گُڈسر ءَ بازیں جُست کنگ بوت۔ سنگتانی جُستانی پسو شریں رنگے ءَ دیگ بوت اَنت ءُ پدا کماش ءِ موکل ءَ چہ دیوان ءِ ھلاسی ءِ جار پرینگ بوت

Baloch Students Front Karachi Zone is delighted to announce its online study circle:

Topic: Baloch Political History 1920 to 1948

Speaker: Gul Hassan Baloch Central Secretary General, BSF

Time: 9:30 P.M.
Date: 16 December 2025
Platform: Google Meet

Baloch Students Front Karachi Zone

بلوچ اسٹوڈنٹس فرنٹ کراچی ھنکین ءِ نیمگ ءَ یک وانگی گردانکے "سیاسی گل ءُ لَس مھلوک" سرھال ءِ سر ءَ ھنکینی کماش حنیف بلوچ ءِ سروکی ءَ برجم دارگ بوتگ۔
اے دیوان ءِ تران کنوک بی ایس او ءِ بنجاہی کماش جئیند بلوچ بوتگ۔
سنگت ءَ تران کنانان ءَ گوشت کہ سیاسی گل ءُ لَس مھلوک یکے دومی ءَ ابید نہ سرجم اِنت۔ لس مھلوک ءِ واستہ سیاسی گل ھژداری اِنت ءُ بے سیاسی گل ءَ لس مھلوک آشوب ءِ آرگ ءَ واستہ تپاک نہ بیت ۔بزاں لس مھلوک وتی تاکت ءِ برجاہ دارگ واستہ یک سیاسی گلے بنھشت ءَ ایر کنت۔ لس مھلوک ءُ سیاسی گل ءِ میان ءَ وتی یک سیادی یے بیت ءُ ھمے سیادی ءُ نزیکی یک آشوبی جنزے سوبمند کنگ ءَ بنکی کرد ءَ پیلو کنت۔

دیمترا سنگت تران کناناں ءَ گوشت کہ لس مھلوک ءِ تہ ءَ ڈاکٹر، مہنتکش ، نودربر، زالبول، ءُ دھکان ھوار درستیں پڑءِ مردم گشگ بنت۔ ھمک راج ءِ وتی دود ربیدگ بنت ۔ ہر چاگرد ءِ جُتائیں جیڑہ ءُ جنجال بنت ءُ ھمے مردم(لس مھلوک) وتی ھمک روچیں سیاسی جیڑہ ءُ جنجالاں ھلاس کنگ ءِ واستہ یک گلے بنھشت ءَ ایر کناں، بزاں کہ یک ڈانچہے کہ آئی بنکی لوٹ لس مھلوک جیڑہ ھل کنگ اِنت۔

سنگت ءَ گوشت کہ سیاسی گل ءِ کار ھما لیکہ گرگ کنگ اِنت کہ لس مھلوک ءَ لوٹ کتگ اگاں ما راج دپتراں پچار ایں گڑا تھنا ھما سیاسی جنز سوبمند بوتگاں کہ آئی سیادی گوں لس مھلوک ءَ سک نزدیک بوتگ ءُ اشی درور آشوب ء پرانس اِنت۔ سیاسی گل یک راجے تاکت ءِ برجاہ دارگ ءِ واستہ بنکی کرد پیلو کنت۔ یک راجے واستہ ھژداری اِنت کہ آئی بنکی جیڑہانی حل کنگءِ واستہ ھنجیں سیاسی گلے بہ بیت کہ لس مھلوک ءَ یک تلویے سرا مُچ بیکنت ءُ سیاسی سنچ، زانت ءُ سرپدی دیگ ءَ پد راجی تاکت ءَ برجاہ داریت۔

سنگت ءَ گوشت کہ اگاں ما فینن ءِ نظریہ ءَ لس مھلوک ءِ بچار ایں گڑا فینن ھمے ستک ءُ یکین ءَ کنت کہ زلم لس مھلوک ءِ تہ ءَ وت یک آشوبی تاکتے ودیگ کنت، بلے اشی واستہ ھژداری اِنت کہ یک سیاسی گلے بنھشت ایر بہ بیت گوں زانت ءُ سرپدی ءَ سیاسی گل لس مھلوک ءِ زھراں چہ آشوب ءِ بیار اِیت۔
سنگت ءَ تران کنانہ گوشت کہ اگاں ما بلوچستان ءَ بچاراں لس مھلوک ءِ چُکچینی، مڈیانی لوٹ پول، بےروزگاری ءُ ربیدگ ھتم کنگ ھوار بازیں زلم بوتگ بلے چشیں سیاسی گل بلوچ تنیگہ نہ رستگ کہ آ ھمے زھراں یک سیاسی تاکت بدل بکن ۔
دیمترا سنگت تران کناناں ءَ گوشت کہ ھمک استان کہ آئی تہ ءَ ھکومت جوڑ بیت وھدے کہ ھکومت لس مھلوک سرا زلم کنت گڑا یک سیاسی گلے ھمے زلم ءِ ھلاس کنگءِ واستہ یک بنکی کردے پیلو کنت ۔ زلم گوں تاکت ءِ گومہ ھلاس بیت ءُ تاکت لس مھلوک گوں اِنت۔ بزاں لس مھلوک وتی سرا بوتگیں زلم ءَ یک کینگے داریت ءُ ھمے سیاسی گل راج ءِ سرءَ بوتگیں زلماں چہ یک آشوبے ودیگ کنت ھا آشوب کہ راجانی وشیں باندات ءِ زامن اَنت۔
بلوچ سیاسی گلانی دپترءِ سرا سنگت ءَ تران کناناں ءَ گوشت کہ بلوچ سیاسی گلانی ءُ بلوچستان ءِ لس مھلوک ءِ میان ءَ سیادی سک نزور اِنت ھمے سبب اِنت کہ بلوچ راج وتی سرڈگارءِ سرا گلام جوڑ اِنت۔ سنگت ءَ گوشت کہ اگاں ما اے گپ ءَ بکن ایں کہ بلوچ ءَ سیاسی گل نیست اے گپ ھچ رد بوت نہ کناں۔ پرچہ کہ بلوچ سیاسی گل اگاں مکران ءِ تہ ءَ مھکم اِنت گڑا آ جھالاوانءِ تہ ءَ نزور اِنت، اگاں جھالاوان ءِ تہ ءَ مھکم اِنت، گڑا سراوان ءَ نزور اِنت اشی ءَ چہ پدر بیت کہ بلوچ تاکت بھر بانگ کنگ بوتگ۔
دیوان ءِ گُڈسر ءَ بازیں جُست کنگ بوت۔ سنگتانی جُستانی پسو شریں رنگے ءَ دیگ بوت اَنت ءُ پدا کماش ءِ موکل ءَ چہ دیوان ءِ ھلاسی ءِ جار پرینگ بوت

Baloch Students Front Karachi Zone is going to hold its online study circle.

Topic: The political Party and Masses

Speaker: Jiand Baloch
Central Chairman of BSO

Time: 9:30pm
Date: 08-December-2025
Platform: Google Meet

Baloch Students Front Karachi Zone.

بلوچ اسٹوڈنٹس فرنٹ کراچی ھنکین ءِ نیمگ ءَ چہ میان اُستمانی ھستیں سیاست ءُ جاورانی سر ءَ یکّ گِردانکے (لیکچرے) ھنکینی کارگشاد گلزار عالم ءِ سروکی ءَ برجم دارگ بوتگ۔اے گِردانک ءِ تران کنوک بی ایس ایف ءِ بنجاھی پتّر ءِ باسک سنگت میار عابد اَت۔
سنگت ءَ تران کنان ءَ گْوشت کہ مرچی دنیا ءِ سیاست گْوں تْرندی ءَ مٹ بْوگ ءَ اِنت۔ تاکت ءُ کانود ءِ راہ بدل بْوگ ءَ انت۔ کْوھنیں ھم سَنّت کاری پْروش دیگ بْوگ ءَ انتءُ نوکیں شوربندی ءُ ھَم سنّت کاری جوڈ بْوگ ءَ اِنت۔ گیش مِڑ ءُ جنگ بْوگ ءَ اِنت، گزرانکی گِر ءُ چیل گیش ودان اِنت ءُ آسینکاری (ٹیکنالوجی) ءَ سیاست ءِ دروشم مٹ کرتگ۔سنگت ءَ گوشت کہ مرچی تاکت تھنا امریکہ ءِ دست ءَ نہ اِنت بلکیں بازیں اِستان وتی تاکت ءِ تہ ءَ گِیشی آرگ ءَ اَنت۔ چُشکہ چین یک گزرانکی تاکتے جوڑ بوتگ، روس پوجی تاکت دار اِیت، یورپی یونین یک ھاسیں بلاک ئے۔ ءُ دمگی تاکتانی تہ ءَ بھارت، تْرکی اِیران اِژرائیل دیمروی کنگ ءَ اَنت۔ پمے ھاتر ءَ اے گندگ ءَ کیت مرچیگیں میاں اِستمانی جاور ھال مٹ بْوگ ءَ اَنت۔
دْومی نیمگ ءَ امریکہ ءُ چائینہ ءِ میانءَ دیریگیں سارتیں مِڑ ءِ برجاہ اِنت۔ پرچاکہ چائینہ ءِ لْوٹ اِنت مرچیگیں تْرندیں جاور ھالانی تَہ ءَ وت ءَ گِیش مْھکم بہ کن انت تانکہ آیوکیں وھد ءَ چائینہ امریکہ ءِ دیم ءَ یک مْھکمیں تاکتے جوڑ بہ بنت ءُ وت ءَ میان اِستمانی آڈر ءِ تہ ءَ بہ منارین انت۔ پَمیشکا مرچی چائینہ وتی گْزرانک ءِ تہ ءَ گِیشی آرگ ءَ اِنت۔ دْومی نیمگ ءَ وتی ٹیکنالوجی ءِ پڑ ءَ وت مْھکم کنگ ءَ اِنت۔

دِیمترا سنگت ءَ گْوشت کہ امریکہ، نیٹو ءُ رْوس ءِ میان ءَ اْوں بلاھیں مِڑ ءِ دیریگیں برجاہ اِنت ایشی ءِ مستریں درور یوکرین ءُ روس ءِ مِڑ کہ ایشی ءِ مستریں سوب نیٹو ءُ امریکہ ءِ اڈاند اِنت۔ اے مِڑ ءِ سوب ءَ دُگنیا ءِ اِیمنی ءُ گْزرانک ءِ تہ ءَ بلاھیں تْکانسری ءِ آورتگ۔جھان ءِ بازیں اِستان وتی دمگی ایمنی ءَ ھلاس کْرتگ ءُ یک زورگریں تبے ءِ دْروشم ءَ گام جَنگ ءَ اَنت۔ اِستان رسانکدر، روتاک ءُ آدگہ ھالرسںانی پِڑ وتی دَست ءَ کرتگ۔لس مھلوک ءِ ھک ءُ آدگہ بْنکی لوٹانی واست ءَ گپ ءُ باوست نَہ بِیت۔ لس مھلوک ءِ آزاتی مہ کن کنگ بْوتگ۔ راج دوستی ءِ لیکہ گیش بْوان اِنت ءُ تاکت لھتیں مردمانی دست ءَ اِنت۔ ایشی ءِ مستریں درور پاکستان، امریکہ، رْوس، بھارت ءِ سروک اَنت۔ ھمے پیم ءَ دنیا ءِ تہ ءَ گراں نِھادی گِیش بْوگ ءَ اِنت لس مھلوک ءِ واستا اے بلاھیں تْکانسری ءِ کہ مردمانی کِر ءَ زندگ بْوگ ءِ واست ءَ پہ ورگ ءَ ھِچ نِیست۔ ایشی ءِ مستریں درور جھانی مِڑ اَنت کہ آ دْگنیا ءِ ایمنی ھلاس بْوتگ۔ اِستانی سیادی ءِ تہ ءَ نِزوری آیگ ءَ اِنت۔
ھمے پیم ءَ دْنیا ءِ تہ بازیں انچیں جَھانی مِڑ بْوگ ءَ اِنت۔ ایشانی برورد ءَ جھانی سیاست ءُ آدگہ جاور ھال مٹ بْوتگ انت ءُ جھان ءِ ایمنی ءَ ھلاسی نِیمگ بران اَنت۔ چُشکہ یوکرائن ءُ رْوس، پلستین ءُ اژرائیل یانکہ دِگہ بازیں دمگانی مِڑ بِہ انت۔ پد ءَ امریکہ ءِ سروک ڈونلڈ ٹرمپ باز وھد ءَ ماں رسانکدر ءُ وتی گْشتانکانی تہ ءَ گوش ایت من دنیا ءِ ایمنی ءِ واست ءَ جْھد کنگ اوں ءُ بازیں اِستان ءِ میان من مِڑ ھتم کْرتگ ءُ ایمنی آرتگ۔ بلے المی نہ اِنت ایشی تہ ءَ راستی بِہ بیت پرچاکہ امریکہ وت جھانی ایمنی ءِ واست ءَ بلاھیں ھترہ یے۔ اے پندل سازیانی سوب ءَ مرچی مردمانی بْنکی اگبال، وتواجھِی، زندگ بْوگ ءِ ھک ھلاس کنگ بْوتگ۔
دیوان ءِ گُڈسر ءَ بازیں جُست کنگ بوت۔ سنگتانی جُستانی پسو شریں رنگے ءَ دیگ بوت اَنت ءُ پدا کماش ءِ موکل ءَ چہ دیوان ءِ ھلاسی ءِ جار پرینگ بوت۔

The Baloch Students Front Karachi Zone is going to hold its online study circle:

Topic: Current Situation Of World Politics.

Speaker: Mayar Abid
Central Committee member of BSF

Time: 09:00PM
Date: (Monday) 24-November-2025
Platform: Google Meet

بلوچ اسٹوڈنٹس فرنٹ کراچی ھنکین ءِ نیمگ ءَ چہ یک وانگی دیوانے برجم دارگ بوتگ۔اے وانگی دیوان ءِ سرھال رھبند، رھبندی دیمروی ءُ نوکیں زمانگ ءِ جیڑہ ءُ جنجال(The constitution From Historical Development to modern Challenges) بوت۔دیوان ءِ تْران کنوک بی ایس ایف ءِ بنجاھی کمک کارگشاد مھرناز بلوچ ات۔ بانک مھرناز بلوچ ءَ تْران کنان ءَ گْوشت کہ رھبند ءِ کار اِنت کہ لس مھلوک ءِ ھکّانی پاسداری کنگ ءَ ھوار استان ءِ ادارھانی زمہ داریانی ٹاھینگ اِنت کہ تاکت ناجائز کارمز کنگ مہ بیت۔ استان ءِ ھمک جیڑہ ءُ جنجالانی توجیل رھبند ءِ تہ ءَ نبشتہ اِنت ۔رھنبد ھمک استان ءِ بنیات اِنت۔ اے پیسلہ کنت کہ ھکومت چون جْوڑ بیت۔ آئی چے واک اَنت ءُ لس مھلوک ءِ ھک چے اَنت۔رھبند ءِ زانگ ءُ سرپد بوگ ءَ پیسر مارا آئی ءِ دپتر ءَ ھوار انوگیں زمانگ ءِ جیڑہ ءُ جنجال زانگ المی اِنت۔
بانک ءَ دیمترا تْران کرت کہ رھبند بزانکہ راہ ءُ رھبندانی لیکہ یک دم نہ اتکگ بلکیں زمانگی دودماناں ھوار یونان ءُ روم وڑیں بازیں اِستاناں کانود ءِ بالادستی ءُ لس مھلوک ءِ ھکانی رکینگ لیکہ بنھشت ایر کرتگ۔۔۔میڈیول ءِ زمانگ ءَ ھاکِماں ھمک وھد ءَ چہ جتائیں کُٹم ءُ ھانداناں پریشر زرتگ ایشی مستریں درور 1215 میگنا کارٹا اِنت کہ ایشی چہ انگلینڈ بادشاہ بے وس بیت کہ آ لھتیں کانودانی ھد ایر کنت۔ ایشی ءَ چہ مئے راہ ءُ راھبند جوڑ بیت کہ بادشاہ گوں ھوار ھچ کس چہ کانود ءَ برزتر نہ اِنت۔ اے پہ کانود ءُ رھبند ءِ واست ءَ یک بلاھیں سوب مندی یے ۔۔۔رژناپگری زمانگ ءِ سرا سنگت ءَ تْران کنان ءَ گوشت جون لاک ، روسو، ءُ مونتسکیو ءَ لس مھلوک ءَ را ھکومت ءِ جوڑِشت ئِے بُنکی زلورت گوشتگ انت ءُ تاکت ءِ بھر ءُ بانگ کنگ ئِے لیکہ دیگ ءَ ھوار بنی آدم ءِ بنیاتی ھکانی پاسداری کنگ ءِ سرا زور داتگ ھمے لیکہ ءُ پگر بوتگ انت کہ نوکیں زمانگ ءِ رھبند سازی ءِ بنیات جوڈ بوتگ اَنت۔ ھمے پگراں چہ لھتیں رھبندی دیمروی بیت کہ 1787 ءَ امریکہ وڑیں اِستان ءِ اولی رند ءَ رھبند نبشتہ بیت ءُ 1791 پرانس ءِ آشوب بنکی لوٹ برابری بنیات بیت۔ ھمے رنگ ءَ 19می ءُ 20می کرن ءَ بازیں استان المّی نکشّہ ودی بوھگ پد وتی رھبند نبشتہ کرتگ کہ ایشی تہ ءَ اُلسی ھکومت جوڑ بوتگ۔ نوک آباتکاری زمانگ ءُ وتواجھی رند ایشیا ءُ اپریکہ تہ ءَ بازیں اِستان است کہ آیاں وتی سیاسی ڈھانچہ ءُ راجی پجّار ءِ رکینگ ءِ واست ءَ نوکیں رھبند جوڑ کرتگ کہ اشانی تہ ءَ اُلسی رھبندانی پاسداری ھوار بوتگ انت۔نوکیں زمانگ ءِ رھبندی جیڑہ ءُ جنجالانی سرا سنگت ءَ تْران ءِ کنان گوشت کہ سیاسی بےستکی ءُ تاکت ءِ جہد، بنی آدم ءِ ھکانی جیڑہ، گلوبلائزیشن ، ٹیکنالوجی، پاپولزم ءُ بزرانکی نیزوری انجیں جیڑہ اَنت کہ ایشانی سوب ءَ اُستان ءِ رھبند ءِ سرا بازیں سان کاریت۔ گلوبلائزیشن ءُ داری زراب پہ رھبند ءِ واست ءَبلاھیں جیڑہ انت پرچا کہ میان استمانی گل، دری ھکومت ءُ آسمانی گزرانکی نزام ھمک وھد ءَ وتی سان ءِ دور دیگ ئِے کوشست ءَ کن انت راجی پیسلہ سازی کنگ ءِ وھد ءَ گڑاں ھمے درگت ءَ جست چست بیت کہ راج وتمستر انت ءُ وتی گزرانکی پیسلہ وت کرتگ یہ دری استان آئی راجی پیسلہ کرتگ اَنت۔
دیوان ءِ گُڈسر ءَ بازیں جُست کنگ بوت۔ سنگتانی جُستانی پسو شریں رنگے ءَ دیگ بوت اَنت ءُ پدا کماش ءِ موکل ءَ چہ دیوان ءِ ھلاسی ءِ جار پرینگ بوت۔

بلوچ اسٹوڈنٹس فرنٹ کراچی ھنکین ءَ نیمگ ءَ چہ نوک اتکگیں نودربر کہ چکاس ءِ واستہ کراچی مزن شھدربرجاہ اتکگ اَت اَنت دست گرگ بوتگ اَنت ءُ چکاس ءِ بابت زانت ءُ سرپدی دیگ ءَ پد آ جتائیں چکاس جاہ ءَ رسینگ بوتگ اَنت۔
ایشی چہ رند سنگتاناں کراچی مزن شھدربرجاہ ءِ وانگ، ماھول ءُ داخلہ ھوالہ زانت ءُ سرپدی دیگ ءَ ھوار جوانیں رنگے ءَ دلبڈی ءُ دیوان دیگ بوت۔

ھنکینی کماش ھنیف بلوچ تران کنان ءُ گْوشت کہ ما چہ بلوچ اسٹوڈنٹس فرنٹ ءِ نیمگ ءَ درستیں نودربراں کراچی مزن شاہ دربرجاہ ءَ وش اتک کن ایں۔ سنگت ءَ گْوشت کہ یونیورسٹی زند یک ھنچیں سفر یے کہ ایشی تہ ءَ نودربر ھرچ وڈیں جیڑہ ءُ جنجالانی آماچ بنت بلے ھمک جیڑہ ءُ جنجال ترا چہ گوستگیں جنجال ءَ گیش مھکم کن اَنت۔ بستارے نودربر تئی تہ ءَ ھنچو بودناکی ھست کہ تو ھمک اڈ ءُ جنجالانی مکابلہ کرت بکن ئے۔ پرچا کہ ھموک جنجال ءِ پشت ءَ سوبمندی بیت بائیدیں کہ ھرچ وڈیں جیڑھانی ما گوں ثابت کدمی ءَ مکابلہ بکن ایں ءُ پشت ءَ مہ کنز ایں۔

کماش ءَ تران کنان ءُ گْوشت کہ هنچیں نودربر ھست کہ آ ھمے جیڑیت کہ منی وانگ بنیات مھکم نہ اِنت ھمے واستہ ما مزن شاہ دربرجاہ ءَ پہ وانگ ءِ واستہ تیار نہ اَنت. بلے یک گپے یات بکن اِت کہ شمئے گوستگیں وھد شمئے باندات پیسلہ نہ کنت بلکیں شمئے انوگیں کہ گام بنت ھمے بانداتے پیسلہ کن اَنت کہ شما کئے اِنت ءُ شما چے کرت کن اِت۔

سنگت ءَ گْوشت کہ گوں مھنت ءُ جھد ءَ شما وتی ھمک نزوری ءَ ھلاس کت کن اِت۔ مُدام وتی سرا ستک ءُ بیسہ بکن اِت۔ جھد بکن اِت۔ مارا اُمیت اِنت کہ باندات شمے وڈیں بلوچ نودربرانی الّم رژناہ بیت۔ ما بستارے بلوچ شمئے وڈیں نودربرانی سرا پہر اِنت کہ شما آیوکیں رھشون بنت ءُ راج ءِ رھشونی یک شریں وڈے ءَ کن اِت۔

سنگت ءَ اے اھد ھم کرت کہ سنگتانی کُجام وھد ءَ کہ مئے واستہ کار بوت یا سنگتاناں جیڑہ بوت ما مُدام ساڈی بنت۔ بستارے نودربر گل ءِ باسک اے مئے فرض اِنت کہ ما نودربرانی رھشونی بکن ایں ءُ شریں راہ پیش بہ دار ایں ءُ مُدام ما وتی ذمہ داریانی سرا اوشت ایں ءُ کدی چک ءُ پد نہ بنت۔

”کتاب ءِ چِن ءُ لانچ“
بلوچ اسٹوڈنٹس فرنٹ کراچی ھنکین ءِ نیمگ ءَ چہ ” مھرگڑھ کِتاب کاروان“ ءِ نام ءَ پہ گَل ءِ باسکاں یک کِتابجاھے ءِ بُنھِشت ایر کنگ بوگ ءَ اِنت۔
اے کِتابجاہ ءِ بُنھِشت ءِ ایر کنگ ءِ مْول ءُ مراد ایش اِنت کہ بلوچ راج ءِ ورنایانی تہ ءَ کتاب وانگ ءِ رَبیدَگ ءَ ھوار مُلکاری، راجی بُندپتر ءُ شھزانتی ءِ پڑ ءَ آیاناں مُھکَم کنگی انت۔
کجام مردم کہ کِتاب سْوگات کنگ لوٹ اِیت گُڑا آ جھل ءِ داتَگیں لمبراں ھال بہ کنت۔

کارگشاد: گلزار عالم بلوچ: 03182329422
کمک کارگشاد: سیام بلوچ :03351332116
شنگکار:صلاح الدین بلوچ: 03342668390
بُنزہ کماش: اھمد جان: 03127797175

کِتابانی لَڑ شِنگ کنگ بیت۔

شُمئے مِنّتوار اَیں

بلوچ اسٹوڈنٹس فرنٹ کراچی ھنکین