11/09/2026
سیرت طیبہ سے عملی رہنمائی کی ضرورت ہے۔
ریاستی استحکام کے لیے اسوۂ حسنہ بہترین رہنمائی فراہم کرتا ہے۔ مقررین
ریجنل دعوۃ سینٹر کراچی کے زیر اہتمام تیرہویں سیرت کانفرنس کا انعقاد
ریجنل دعوۃ سینٹر (سندھ) کراچی ،دعوة اکیڈمی، بین الاقوامی اسلامی یونیورسٹی اسلام آباد کے زیر اہتمام سالانہ تیرہویں سیرت کانفرنس منعقد کی گئی۔ کانفرنس کا عنوان ’’ریاستی استحکام کے تقاضے اور اسوہ حسنہ‘‘ تھا۔ سیمینار سے ملک کے مختلف ور علمائے کرام، تعلیمی ماہرین اور دانشور حضرات نے خطاب کیا۔ کانفرنس کے ابتدائی سیشن میں گفتگو کرتے ہوئے انچارج ریجنل دعوۃ سینٹر (سندھ) کراچی دعوۃ اکیڈمی، بین الاقوامی اسلامی یونیورسٹی اسلام آباد ڈاکٹر سید عزیزالرحمن نے کہا کہ الحمد للہ، ایک بار پھر ہم ریجنل دعوہ سینٹر کراچی میں علماء کے ایک گلدستے کو جمع کرنے میں کامیاب ہوئے ہیں۔
ریجنل دعوۃ سینٹر (سندھ) کراچی میں سالانہ سیرت کانفرنس کا آغاز ۱۵،۱۶ سال پہلے ہوا تھا اور الحمد للہ، سوا سال کے وقفے کے علاوہ یہ تسلسل برابر برقرار رہا ہے۔ اس موقع پر ہر سال کسی اہم موضوع پر علما کو مدعو کرنے کی کوشش کی جاتی ہے۔ اس بار ’’ریاستی استحکام اور اس کے تقاضے‘‘ کا عنوان منتخب کیا گیا۔ سیرت کانفرنس میں ڈاکٹر عاطف اسلم راؤ استاد جامعہ کراچی،ڈاکٹر عامر عبداللہ محمدی، امیر کراچی مرکزی جمعیت اہلحدیث، ڈاکٹر موسیٰ لاکھانی استاد بحریہ یونیورسٹی کراچی، ڈاکٹر محمد شہزاد شیخ، صدر شعبہ، فاسٹ یونیورسٹی کراچی، ڈاکٹر سید محسن نقوی، مولانا ڈاکٹر محمد نعمان نعیم، رئیس، جامعہ بنوریہ عالمیہ کراچی اور ڈاکٹر ذیشان احمد، پرو چانسلر الغزالی یونیورسٹی کراچی شامل تھے۔ مقررین نے ریاست کے پائیدار استحکام اور ترقی کے لیے سیرت النبی ﷺ کی تعلیمات کو ناگزیر قراردیا اور کہا کہ جب تک اسوہ حسنہ اور سیرت طیبہ پر عمل نہیں ہوگا ملک میں فلاحی اسلامی معاشرے کا قیام ممکن نہیں ہوسکے گا۔ اس کے علاوہ مقررین نے اس بات پر زور دیا کہ ہمیں اپنی زندگی کو سیرت رسول کی تعلیمات کے مزین کرنا چاہیے۔نشست کے شرکاء میں مختلف طبقات فکر سے تعلق رکھنے والے افراد شامل تھے، جنہوں نے ان خطابات کو نہایت ذوق و شوق سے سنا۔ کانفرنس صبح ۱۱ بجے سے دوپہر ۲:۳۰ بجے تک جاری رہی۔
