16/09/2026
این ایس ایف کے طلبہ کے احتجاج سے اظہارِ یکجہتی
عوامی ورکرز پارٹی قصور نیشنل اسٹوڈنٹس فیڈریشن پاکستان کے احتجاجی کیمپ اور طلبہ کے جائز مطالبات کے لیے جاری جدوجہد سے یکجہتی کا اظہار کرتی ہے۔
اطلاعات کے مطابق احتجاجی کیمپ کو تقریباً 54 دن گزر چکے ہیں جبکہ طلبہ کی بھوک ہڑتال پانچویں روز میں داخل ہو چکی ہے۔ دو روز قبل ایک ساتھی کے بے ہوش ہونے اور آج رات این ایس ایف سندھ کے جنرل سیکرٹری کامریڈ الطاف کی طبیعت شدید خراب ہونے کے بعد انہیں ہسپتال منتقل کرنا پڑا۔
یہ صورتحال انتہائی تشویشناک ہے۔ طلبہ اپنے مطالبات کے لیے اتنے طویل عرصے سے احتجاج کر رہے ہیں، لیکن تاحال سندھ حکومت اور سندھ پبلک سروس کمیشن کی جانب سے طلبہ سے باضابطہ مذاکرات کے لیے کوئی نمائندہ بھیجنے کی اطلاع نہیں ہے۔
عوامی ورکرز پارٹی قصور مطالبہ کرتی ہے کہ:
سندھ حکومت فوری طور پر طلبہ کے نمائندوں سے مذاکرات کرے۔
سندھ پبلک سروس کمیشن طلبہ کے مسائل اور مطالبات پر سنجیدگی سے بات کرے۔
بھوک ہڑتال پر بیٹھے تمام طلبہ کی صحت اور زندگی کے تحفظ کو یقینی بنایا جائے۔
طلبہ کے مطالبات کو طاقت یا بے حسی کے بجائے مذاکرات اور جمہوری طریقے سے حل کیا جائے۔
طلبہ کی آواز کو دبانے کے بجائے سنا جائے۔
تعلیم، روزگار اور میرٹ کے لیے جدوجہد کرنے والے طلبہ کے مطالبات پر فوری بات چیت کی جائے۔
عوامی ورکرز پارٹی قصور
طلبہ کے ساتھ
