Deputy Commissioner Ghanche

06/10/2026

پریس ریلیز
گنگچھے، 6 اکتوبر 2026
ڈپٹی کمشنر گنگچھے کی زیر صدارت ترقیاتی منصوبوں کی پیش رفت کا جائزہ اجلاس

ڈپٹی کمشنر ضلع گنگچھے ولی اللہ فلاحی کی زیر صدارت ڈپٹی کمشنر آفس خپلو میں ضلع کے مختلف محکموں کے ترقیاتی منصوبوں کی پیش رفت کے حوالے سے جائزہ اجلاس منعقد ہوا۔
اجلاس میں محکمہ تعلیم، محکمہ صحت، محکمہ مواصلات و تعمیرات، محکمہ برقیات، محکمہ بلدیات اور محکمہ آبی انتظام و انصرام کے سربراہان اور متعلقہ افسران نے شرکت کی۔ اجلاس کے دوران متعلقہ محکموں کے سربراہان نے اپنے اپنے محکموں کے جاری ترقیاتی منصوبوں پر کام کی رفتار، پیش رفت، درپیش تکنیکی مشکلات اور سماجی مسائل کے حوالے سے ڈپٹی کمشنر کو تفصیلی بریفنگ دی۔
ڈپٹی کمشنر ولی اللہ فلاحی نے ترقیاتی منصوبوں کی بروقت اور معیاری تکمیل کی ضرورت پر زور دیتے ہوئے متعلقہ افسران کو ہدایت کی کہ منصوبوں پر کام کی رفتار مزید تیز کی جائے، درپیش تکنیکی رکاوٹوں کو ترجیحی بنیادوں پر دور کیا جائے اور عوامی مفاد کے منصوبوں کی تکمیل میں غیر ضروری تاخیر سے گریز کیا جائے۔ انہوں نے متعلقہ محکموں کو ترقیاتی منصوبوں کی مسلسل نگرانی اور پیش رفت سے ضلعی انتظامیہ کو باقاعدگی سے آگاہ رکھنے کی بھی ہدایت کی۔
بعد ازاں ڈپٹی کمشنر گنگچھے ولی اللہ فلاحی نے ماؤنٹین اینڈ گلیشیئر پروٹیکشن آرگنائزیشن کے زیر اہتمام متعلقہ شراکت داروں کے باہمی رابطے اور مشاورتی اجلاس میں بطور مہمانِ خصوصی شرکت کی۔
اس موقع پر ڈپٹی کمشنر نے ضلع گنگچھے میں ماحولیات، پہاڑوں اور گلیشیئرز کے تحفظ سمیت مختلف شعبوں میں ماؤنٹین اینڈ گلیشیئر پروٹیکشن آرگنائزیشن کی خدمات اور کاوشوں کو سراہا۔ انہوں نے کہا کہ گنگچھے جیسے حساس پہاڑی ضلع میں ماحولیاتی تحفظ، قدرتی وسائل کے پائیدار استعمال اور موسمیاتی تبدیلی کے اثرات سے نمٹنے کے لیے سرکاری اداروں، غیر سرکاری تنظیموں، مقامی اداروں اور عوام کے درمیان مؤثر رابطہ اور باہمی تعاون نہایت اہم ہے۔
ڈپٹی کمشنر نے اس عزم کا اظہار کیا کہ ضلع گنگچھے میں عوامی فلاح، ماحولیاتی تحفظ اور پائیدار ترقی کے لیے تمام متعلقہ اداروں کے ساتھ تعاون اور رابطے کو مزید مؤثر بنایا جائے گا۔
عبدالرحیم
ترجمان برائے ڈپٹی کمشنر گنگچھے

05/10/2026

پریس ریلیز
*ضلع گنگچھے، 5 اکتوبر 2026
ڈپٹی کمشنر گنگچھے کی زیرِ صدارت تمام محکموں کے سربراہان کا اجلاس، 27 اکتوبر یومِ سیاہ اور یکم نومبر یومِ آزادی گلگت بلتستان کی تقریبات بھرپور قومی جذبے سے منانے کا فیصلہ

ڈپٹی کمشنر ضلع گنگچھے ولی اللہ فلاحی کی زیرِ صدارت آج ضلع گنگچھے کے تمام سرکاری محکموں کے سربراہان کا اہم اجلاس منعقد ہوا، جس میں ضلع میں جاری ترقیاتی منصوبوں پر عملدرآمد، محکموں کی کارکردگی اور آئندہ کے لائحہ عمل سمیت مختلف اہم امور پر تفصیلی مشاورت کی گئی۔
اجلاس میں 27 اکتوبر یومِ سیاہ اور یکم نومبر یومِ آزادی گلگت بلتستان کو قومی جذبے اور جوش و خروش کے ساتھ منانے کے حوالے سے بھی تفصیلی غور و خوض کیا گیا۔ اس موقع پر فیصلہ کیا گیا کہ دونوں اہم دنوں کے حوالے سے ضلعی سطح پر خصوصی تقریبات کا انعقاد کیا جائے گا اور تمام متعلقہ محکمے اپنی ذمہ داریاں بھرپور انداز میں ادا کریں گے۔
ڈپٹی کمشنر ولی اللہ فلاحی نے اجلاس سے خطاب کرتے ہوئے کہا کہ قومی اور تاریخی اہمیت کے حامل دنوں کو بھرپور انداز میں منانے کے ساتھ ساتھ نوجوان نسل کو ان دنوں کی تاریخی اہمیت اور قربانیوں سے آگاہ کرنا بھی ضروری ہے۔ انہوں نے متعلقہ افسران کو تقریبات کے لیے جامع اور مربوط انتظامات یقینی بنانے کی ہدایت کی۔
اجلاس میں ضلع گنگچھے کے مختلف محکموں کے زیرِ نگرانی جاری ترقیاتی منصوبوں کا بھی تفصیلی جائزہ لیا گیا۔ ڈپٹی کمشنر نے افسران سے منصوبوں پر پیش رفت، درپیش مسائل اور تکمیل کی صورتحال سے متعلق بریفنگ لی اور ترقیاتی منصوبوں کو مقررہ مدت کے اندر معیار کے مطابق مکمل کرنے پر زور دیا۔
انہوں نے تمام محکموں کے سربراہان کو ہدایت کی کہ عوامی فلاح و بہبود سے متعلق منصوبوں کی بروقت تکمیل کو یقینی بنایا جائے، ترقیاتی کاموں میں معیار اور شفافیت کو ملحوظ خاطر رکھا جائے اور کسی بھی قسم کی رکاوٹ کی صورت میں ضلعی انتظامیہ کو بروقت آگاہ کیا جائے۔
اجلاس کے اختتام پر ڈپٹی کمشنر نے ضلع کی مجموعی انتظامی صورتحال، ترقیاتی منصوبوں اور آئندہ کے سرکاری امور کو مؤثر انداز میں آگے بڑھانے کے لیے باہمی رابطہ اور تعاون کو مضبوط بنانے کی ہدایت کی
عبدالرحیم
پی آر او ٹو ڈپٹی کمشنر ضلع گنگچھے

01/10/2026

پریس ریلیز
یکم اکتوبر 2026
خپلو میں جی بی سکاؤٹس کے زیر اہتمام فٹبال ٹورنامنٹ کے انعقاد کے حوالے سے اہم اجلاس

ڈپٹی کمشنر ضلع گنگچھے ولی اللہ فلاحی کی زیر صدارت جی بی سکاؤٹس کے زیر اہتمام خپلو میں منعقد ہونے والے فٹبال ٹورنامنٹ کے حوالے سے ایک اہم اجلاس منعقد ہوا، جس میں ونگ کمانڈر جی بی سکاؤٹس کرنل سکندر پرویز ڈسٹرکٹ پولیس آفیسر گنگچھے حاجی محمد الیاس اسسٹنٹ کمشنر خپلو ڈاکٹر وجاہت سلیم اور فٹبال فیڈریشن گنگچھے کے اراکین نے شرکت کی۔
اجلاس میں آئندہ منعقد ہونے والے فٹبال ٹورنامنٹ کی تیاریوں، انتظامات، ٹیموں کی شرکت، کھیل کے میدان کی تیاری، سیکیورٹی، شائقین کے لیے سہولیات اور دیگر انتظامی امور کا تفصیلی جائزہ لیا گیا۔
اس موقع پر ٹورنامنٹ کو شایانِ شان اور منظم انداز میں منعقد کرنے کے لیے مختلف پہلوؤں پر غور و خوض کیا گیا اور متعلقہ حکام کو ضروری انتظامات بروقت مکمل کرنے کے حوالے سے ہدایات دی گئیں۔
ڈپٹی کمشنر ولی اللہ فلاحی نے کہا کہ کھیلوں کے فروغ سے نوجوانوں کو صحت مند اور مثبت سرگرمیوں کے مواقع میسر آتے ہیں، جبکہ ایسے مقابلے نوجوانوں میں نظم و ضبط، ٹیم ورک اور سپورٹس مین شپ کے جذبے کو پروان چڑھانے میں اہم کردار ادا کرتے ہیں۔ انہوں نے ٹورنامنٹ کے کامیاب انعقاد کے لیے تمام متعلقہ اداروں کو باہمی تعاون اور مؤثر رابطہ کاری کے ساتھ کام کرنے کی ہدایت کی۔
عبدالرحیم
پی آر او ٹو ڈپٹی کمشنر گنگچھے

01/10/2026

🔺*پاکستان آرمی میں شمولیت اختیار کریں*

پاکستان آرمی بھرتی ٹیم مورخہ 3 اکتوبر سے 8 اکتوبر 2026 کو ضلع بلتستان کی بھرتی کے لیے ائے گی۔

◀️ *پروگرام کی تفصیل*
▫️ 3 اکتوبر 2026 گورنمنٹ ہائی سکول خپلو گانچے
▫️ 4 اکتوبر 2026 گورنمنٹ ہائی سکول غواڑی گانچے
▫️ 5 اکتوبر 2026 گورنمنٹ ہائی سکول مہدی اباد کھرمنگ
▫️ 6-8 اکتوبر 2026 DBS گامبا سکردو

✅ عمر کی حد: ساڑھے17 سے 25 سال
✅ تعلیم: کم از کم مڈل پاس

📑 *درکار دستاویزات*

✅ اصل تعلیمی اسناد بمعہ 2 عدد فوٹو کاپیاں
✅ اصل ڈومیسائل سرٹیفکیٹ (گلگت بلتستان)
✅ اصل کمپیوٹرائزڈ قومی شناختی کارڈ یا فارم "ب"
✅ والد کا شناختی کارڈ (کاپی)
✅ 4 عدد حالیہ پاسپورٹ سائز تصاویر

خواہش مند نوجوان مقررہ تاریخوں میں اوپر دیے
گئے مقامات پر تشریف لائیں ۔

30/09/2026

پریس ریلیز
30 ستمبر 2026

ڈپٹی کمشنر گنگچھے ولی اللہ فلاحی کا بلتستان میڈیکل سائنس اینڈ ٹیکنالوجی خپلو کے اسپورٹس گالا میں بطور مہمانِ خصوصی شرکت

گنگچھے: ڈپٹی کمشنر ضلع گنگچھے ولی اللہ فلاحی نے آج Baltistan Institute of Medical Science and Technology (BIMST)، خپلو کے زیرِ اہتمام منعقدہ اسپورٹس گالا کی اختتامی تقریب میں بطور مہمانِ خصوصی شرکت کی۔

تقریب کے دوران ڈپٹی کمشنر نے مختلف کھیلوں میں نمایاں کارکردگی کا مظاہرہ کرنے والے طلبہ و طالبات میں انعامات اور اسناد تقسیم کیں۔ اس موقع پر انہوں نے طلبہ سے خطاب کرتے ہوئے کھیلوں کی صحت مند سرگرمیوں، نظم و ضبط، ٹیم ورک اور تعلیمی و غیر نصابی سرگرمیوں میں بھرپور حصہ لینے کی اہمیت پر زور دیا۔

ڈپٹی کمشنر نے طلبہ کو مخاطب کرتے ہوئے کہا کہ کھیل نہ صرف جسمانی صحت بلکہ ذہنی نشوونما، خود اعتمادی اور قیادت کی صلاحیتوں کو بھی پروان چڑھاتے ہیں۔ انہوں نے ادارے کی جانب سے طلبہ کے لیے تعلیمی اور کھیلوں کی سرگرمیوں کے انعقاد کو سراہا۔

اس موقع پر FBISE سے ادارے کی affiliation کی خوشی میں کیک بھی کاٹا گیا، جسے ادارے کے لیے ایک اہم تعلیمی سنگِ میل قرار دیا گیا۔

عبدالرحیم
پی آر او ٹو ڈپٹی کمشنر گنگچھے

30/09/2026

30/09/2026

پریس ریلیز
30 ستمبر 2026
ڈپٹی کمشنر گنگچھے ولی اللہ فلاحی کا زیرِ تعمیر دانش سکول گنگچھے کا دورہ، تعمیراتی پیش رفت کا جائزہ
گنگچھے: ڈپٹی کمشنر ضلع گنگچھے ولی اللہ فلاحی نے آج زیرِ تعمیر دانش سکول گنگچھے کا دورہ کیا اور جاری تعمیراتی کام کا تفصیلی معائنہ کیا۔
اس موقع پر سائٹ انجینئر حبیب نے ڈپٹی کمشنر کو منصوبے کی مجموعی پیش رفت، جاری تعمیراتی سرگرمیوں اور دیگر متعلقہ امور کے حوالے سے تفصیلی بریفنگ دی۔ ڈپٹی کمشنر نے منصوبے کے مختلف حصوں کا جائزہ لیتے ہوئے تعمیراتی کام کے معیار اور رفتار پر توجہ دینے کی ضرورت پر زور دیا۔
ڈپٹی کمشنر نے متعلقہ حکام کو ہدایت کی کہ منصوبے کے تعمیراتی کام میں معیار پر کسی قسم کا سمجھوتہ نہ کیا جائے اور مقررہ اہداف کے مطابق کام کو آگے بڑھایا جائے تاکہ اس اہم تعلیمی منصوبے سے طلبہ و طالبات کو بروقت استفادہ حاصل ہو سکے۔
بعد ازاں ڈپٹی کمشنر ولی اللہ فلاحی نے ڈپٹی کمشنر آفس گنگچھے میں ایڈمن آفیسر ڈی سی آفس گنگچھے عبدالجبار کے تبادلے کے موقع پر منعقدہ الوداعی تقریب میں شرکت کی۔
تقریب میں ڈپٹی کمشنر اور دفتر کے افسران و اہلکاروں نے عبدالجبار کی خدمات کو سراہتے ہوئے ان کے لیے نیک خواہشات کا اظہار کیا اور نئی ذمہ داریوں میں کامیابی کی دعا کی۔
عبدالرحیم
پی آر او ٹو ڈپٹی کمشنر گنگچھے

24/09/2026

پریس ریلیز
24 ستمبر 2026

ڈپٹی کمشنر گنگچھے ولی اللہ فلاحی کی مختلف تقریبات میں شرکت، NATCO بحالی سروس کا افتتاح اور اراضی تنازع کے حل کے لیے فریقین سے ملاقات
ڈپٹی کمشنر ضلع گنگچھے ولی اللہ فلاحی نے خصوصی تعلیمی اسکول خپلو میں منعقدہ عالمی یومِ اشاروں کی زبان (Sign Language Day) کی تقریب میں بطور مہمانِ خصوصی شرکت کی۔ اس موقع پر انہوں نے طلبہ و طالبات سے ملاقات کی، ان کی تعلیمی و تخلیقی سرگرمیوں کا مشاہدہ کیا اور خصوصی بچوں کی تعلیم و تربیت اور معاشرے میں ان کی مؤثر شمولیت کی اہمیت پر گفتگو کی۔
بعد ازاں ڈپٹی کمشنر گنگچھے نے خپلو سے راولپنڈی NATCO سروس کی بحالی کے سلسلے میں منعقدہ تقریب میں شرکت کی، جہاں گلگت بلتستان کے رکن قانون ساز اسمبلی محمد ابراہیم ثنائی اور منیجنگ ڈائریکٹر NATCO ذاکر حسین کے ہمراہ فیتہ کاٹ کر بحال شدہ سروس کا افتتاح کیا۔ اس موقع پر مسافروں کو بہتر سفری سہولیات کی فراہمی اور ٹرانسپورٹ کے نظام میں بہتری کی اہمیت پر بھی گفتگو کی گئی۔
دریں اثناء ڈپٹی کمشنر ولی اللہ فلاحی نے پایو تھنگ، ہلدی اور بلے گون کے درمیان متنازعہ اراضی کے معاملے کا جائزہ لینے کے لیے تنازع سے متعلق دونوں فریقین سے ملاقات کی۔ انہوں نے فریقین کا مؤقف تفصیل سے سنا اور معاملے کو باہمی رضامندی، قانون اور ضابطے کے مطابق حل کرنے کے لیے ضروری اقدامات کی یقین دہانی کرائی۔
ڈپٹی کمشنر نے اس موقع پر کہا کہ ضلعی انتظامیہ عوامی مسائل کے حل، باہمی تنازعات کے خاتمے اور علاقے میں پائیدار امن و ہم آہنگی کے فروغ کے لیے اپنا کردار جاری رکھے گی۔

عبدالرحیم
پی آر او

22/09/2026

پریس ریلیز
22 ستمبر 2026

ڈپٹی کمشنر گنگچھے ولی اللہ فلاحی کا پرائمری سکول ناصر آباد خپلو اور گرڈ اسٹیشن خپلو کا دورہ

گنگچھے: ڈپٹی کمشنر ضلع گنگچھے ولی اللہ فلاحی نے آج پرائمری سکول ناصر آباد خپلو کا دورہ کیا، جہاں سکول کی ہیڈ مسٹریس میڈم انیسہ نے ڈپٹی کمشنر کو سکول میں موجود اساتذہ اور طلبہ کی تعداد، تعلیمی سرگرمیوں، حاضری اور سکول کو درپیش مختلف مسائل کے حوالے سے تفصیلی بریفنگ دی۔

ڈپٹی کمشنر نے سکول کے مختلف حصوں کا معائنہ کرتے ہوئے تعلیمی ماحول، طلبہ کی حاضری اور تدریسی امور کا جائزہ لیا۔ اس موقع پر سکول انتظامیہ کی جانب سے سکول تک رسائی کے راستے، واش رومز کی سہولیات، سکول کے اطراف موجود درختوں کے باعث عمارت اور دیگر انفراسٹرکچر کو پہنچنے والے ممکنہ نقصانات، صفائی ستھرائی اور دیگر بنیادی ضروریات سے متعلق مسائل بھی ڈپٹی کمشنر کے علم میں لائے گئے۔

سکول انتظامیہ نے بتایا کہ سکول کے اطراف موجود بعض درختوں کی جڑوں اور شاخوں کی وجہ سے سکول کی عمارت اور دیگر حصوں کو نقصان پہنچنے کے ساتھ ساتھ طلبہ و اساتذہ کے لیے مختلف نوعیت کی رکاوٹیں بھی پیدا ہو رہی ہیں، جبکہ سکول تک رسائی کے راستے اور چاردیواری سے متعلق مسائل کے باعث تعلیمی ماحول اور طلبہ کی سہولیات متاثر ہو رہی ہیں۔

ڈپٹی کمشنر نے سکول کے مسائل کا تفصیلی جائزہ لیتے ہوئے متعلقہ محکموں سے راستے، چاردیواری، واش رومز اور دیگر بنیادی سہولیات کی بہتری کے لیے ضروری اقدامات کرنے کی یقین دہانی کرائی۔ انہوں نے سکول کے اطراف موجود درختوں کے معاملے کا بھی جائزہ لیتے ہوئے متعلقہ محکمے کے ساتھ رابطہ کرکے قواعد و ضوابط کے مطابق مناسب اقدامات کرنے کی ہدایت کی۔

ڈپٹی کمشنر نے اساتذہ پر زور دیا کہ طلبہ کو معیاری تعلیم کی فراہمی کے ساتھ ساتھ ان کی تربیت، اخلاقی نشوونما اور کردار سازی پر بھی خصوصی توجہ دی جائے۔ انہوں نے کہا کہ تعلیمی اداروں میں بنیادی سہولیات کی فراہمی اور سازگار تعلیمی ماحول یقینی بنانا ضلعی انتظامیہ کی ترجیحات میں شامل ہے۔

بعد ازاں ڈپٹی کمشنر ضلع گنگچھے ولی اللہ فلاحی نے ایگزیکٹو انجینئر محکمہ برقیات گنگچھے کے ہمراہ گرڈ اسٹیشن خپلو کا دورہ کیا، جہاں ایس ڈی او ہیڈکوارٹر نے گرڈ اسٹیشن کی موجودہ صورتحال، بجلی کی ترسیل اور نظام سے متعلق تفصیلی بریفنگ دی۔

ڈپٹی کمشنر نے گرڈ اسٹیشن کے مختلف حصوں کا معائنہ کیا اور بجلی کے نظام کو مزید مؤثر، مستحکم اور مربوط بنانے کی ضرورت پر زور دیا۔ انہوں نے ایگزیکٹو انجینئر محکمہ برقیات کو ہدایت کی کہ گرڈ اسٹیشن خپلو کو مکمل طور پر فعال بنانے کے لیے ضروری اقدامات تیز کیے جائیں تاکہ بجلی کے نظام کو سنٹرلائز کرتے ہوئے صارفین کو بہتر اور مستحکم بجلی کی فراہمی یقینی بنائی جا سکے۔

ڈپٹی کمشنر نے واضح کیا کہ ضلع گنگچھے میں تعلیم، بجلی، راستوں، بنیادی سہولیات اور عوامی مسائل کے حل کے لیے ضلعی انتظامیہ متعلقہ محکموں کے ساتھ مل کر مؤثر اقدامات جاری رکھے گی اور عوام کو درپیش مسائل کے حل کو ترجیحی بنیادوں پر یقینی بنایا جائے گا۔

عبدالرحیم
پی آر او ٹو ڈپٹی کمشنر گنگچھے