Mir Mutee Ur Rehman Mengal

13/07/2026

13/07/2026

نوابزادہ میر سراج خان رئیسانی شہید کی آٹھویں یوم شہادت کے موقع پر پاکستان پیپلز پارٹی کے مرکزی رہنما جھالاوان عوامی پینل کے سربرای میر شفیق الرحمن مینگل نے اپنے جاری کردہ پیغام میں کہا ہے کہ
نوابزادہ میر سراج خان رئیسانی شہید کی یوم شہادت صرف ایک عظیم شخصیت کی یاد کا دن نہیں بلکہ نظریۂ پاکستان، قومی وفاداری، جرات، استقامت اور بے مثال قربانی کی تجدیدِ عہد کا دن ہے۔ وہ ان معدودے چند عظیم بلوچ رہنماؤں میں شامل تھے جنہوں نے حالات کی سختیوں، مسلسل دھمکیوں اور جان لیوا خطرات کے باوجود پاکستان کے سبز ہلالی پرچم کو اپنی شناخت، اپنی غیرت اور اپنی سیاسی جدوجہد کا محور بنایا۔ وہ میرے عظیم بھائی، عظیم دوست اور بازو تھے،

شہید نوابزادہ میر سراج خان رئیسانی نے بلوچستان کی سیاست کو نفرت، انتشار اور تصادم کی بجائے قومی وحدت، آئینی جدوجہد، بھائی چارے اور امن کے راستے پر استوار کرنے کی کوشش کی۔ ان کی پوری زندگی اس حقیقت کی آئینہ دار ہے کہ بلوچستان کی بقا، ترقی اور خوشحالی پاکستان کے استحکام سے وابستہ ہے، اور جو عناصر اس رشتے کو کمزور کرنا چاہتے ہیں وہ درحقیقت بلوچستان کے مستقبل سے کھیل رہے ہیں۔

آج کا دن اور یہ لمحہ ہمیں یاد دلاتا ہے کہ قومیں اپنے شہداء کو محض آنسوؤں سے نہیں بلکہ ان کے افکار، کردار اور مشن کو زندہ رکھ کر خراجِ عقیدت پیش کرتی ہیں۔ میر سراج خان رئیسانی شہید نے اپنے خون سے یہ پیغام رقم کیا کہ پاکستان کے سبز ہلالی پرچم کی حرمت پر کوئی سمجھوتہ نہیں ہو سکتا، اور بلوچستان کی اصل شناخت امن، محبت، رواداری، قومی یکجہتی اور پاکستان سے غیر متزلزل وفاداری ہے۔

میں سمجھتا ہوں کہ آج بلوچستان کے نوجوانوں کو میر سراج خان رئیسانی شہید کی زندگی سے یہ سبق حاصل کرنا چاہیے کہ وقتی نعروں، نفرت انگیز بیانیوں اور تشدد کے راستے قوموں کو اندھیروں میں دھکیل دیتے ہیں، جبکہ علم، شعور، آئینی جدوجہد، قومی اتحاد اور وطن سے وفاداری ہی ترقی، عزت اور باوقار مستقبل کی بنیاد بنتے ہیں نوجوانوں کو اپنی آنکھیں کھول کر اپنے مستقبل کا فیصلہ کرنا ہوگا ایک طرف نفرت اور اندھیرے جبکہ دوسری طرف شعور اور روشنی کا سفر ہے

شہید میر سراج خان رئیسانی کا نام ہمیشہ اس جرات مند بلوچ رہنما کے طور پر یاد رکھا جائے گا جس نے خوف کے ماحول میں بھی حق بات کہی، پاکستان کا پرچم سربلند رکھا اور اپنے نظریے پر آخری سانس تک ثابت قدم رہے۔ ان کی شہادت اس حقیقت کی گواہ ہے کہ نظریات کو بارود سے دبایا جا سکتا ہے، مگر انہیں ختم نہیں کیا جا سکتا۔ ایسے کردار وقت گزرنے کے ساتھ مزید روشن ہوتے ہیں اور آنے والی نسلوں کے لیے مینارۂ نور بن جاتے ہیں۔

آج کا دن ہم اس عزم کا اعادہ کرتے ہیں کہ بلوچستان کو امن، تعلیم، ترقی، آئینی بالادستی، قومی یکجہتی اور پاکستان کی مضبوطی کا گہوارہ بنانے کی جدوجہد جاری رکھیں گے۔ یہی شہید نوابزادہ میر سراج خان رئیسانی کے مشن کا حقیقی تسلسل اور ان کی لازوال قربانیوں کو بہترین خراجِ عقیدت ہوگا۔

اللہ تعالیٰ شہید نوابزادہ میر سراج خان رئیسانی کے درجات بلند فرمائے، ان کی قربانی کو قوم کے لیے باعثِ ہدایت بنائے، اور ہمیں وطنِ عزیز پاکستان کی سلامتی، استحکام اور سربلندی کے لیے اسی عزم، اسی جرات اور اسی استقامت کے ساتھ آگے بڑھنے کی توفیق عطا فرمائے۔ آمین۔

12/03/2026