13/07/2026
عبید خان لوندخوڑ کی بطور مہمانِ خصوصی شرکت پر اعتراض، فائنل میچ کا مختصر دورہ
لوندخوڑ: عوامی نیشنل پارٹی کے رہنما عبید خان لوندخوڑ نے لوندخوڑ سپر لیگ کے فائنل میچ کے موقع پر گراؤنڈ کا مختصر دورہ کیا۔
ذرائع کے مطابق عبید خان لوندخوڑ کو فائنل میچ میں بطور مہمانِ خصوصی شرکت کرنا تھی، تاہم ان کے حامیوں کا دعویٰ ہے کہ پاکستان تحریکِ انصاف کے ایم این اے مجاہد خان، ایم پی اے اختشام خان اور بعض مقامی رہنماؤں نے ان کی بطور مہمانِ خصوصی شرکت پر اعتراض کرتے ہوئے فائنل میچ نہ ہونے دینے اور گراؤنڈ بند کرانے کی دھمکی دی۔
اسی صورتحال کے پیشِ نظر، عبید خان لوندخوڑ نے کسی بھی ممکنہ ناخوشگوار واقعے سے بچنے، ٹورنامنٹ کے تسلسل کو برقرار رکھنے اور نوجوانوں کے مفاد کو مقدم رکھتے ہوئے صرف مختصر دورہ کیا اور بغیر کسی وقفے کے واپس چلے گئے۔
عبید خان لوندخوڑ نے کہا کہ کھیلوں کے میدانوں کو سیاسی اختلافات کی نذر نہیں ہونا چاہیے۔ انہوں نے اس عزم کا اظہار کیا کہ لوندخوڑ کے نوجوانوں کے لیے مستقل سپورٹس گراؤنڈ کے قیام کی غرض سے زمین کی خریداری میں اپنا بھرپور کردار ادا کریں گے تاکہ علاقے میں کھیلوں کی سرگرمیوں کو مزید فروغ مل سکے۔
