28/09/2026
نیازی بس ٹرمینل کے اطراف سروس روڈ پر غیر قانونی پارکنگ کا نوٹس، آر ٹی اے پشاور کی کارروائی
چئرمین ریجنل ٹرانسپورٹ اتھارٹی پشاور جناب ریاض خان محسود اور سیکریٹری پراونشل ٹرانسپورٹ اتھارٹی کی خصوصی ہدایت پر نیازی بس اسٹینڈ، مین جی ٹی روڈ کے قریب سروس روڈ پر بسوں اور کوچز کی پارکنگ کے حوالے سے موصول ہونے والی شکایت پر ریجنل ٹرانسپورٹ اتھارٹی (RTA) پشاور کے عملے نے کارروائی کی۔
آر ٹی اے پشاور کے عملے نے موقع پر صورتحال کا جائزہ لیتے ہوئے نیازی بس اسٹینڈ انتظامیہ کو سروس روڈ پر بسوں اور کوچز کی پارکنگ سے اجتناب کرنے اور گاڑیاں مقررہ ٹرمینل کی حدود میں کھڑی کرنے کی ہدایت کی۔
بس اسٹینڈ انتظامیہ کو واضح طور پر تنبیہ کی گئی ہے کہ سروس روڈ کو عوامی آمدورفت اور ٹریفک کے لیے کھلا رکھا جائے۔ مزید برآں، موقع پر "نو پارکنگ" کا بورڈ نصب کرنے کی بھی ہدایت جاری کی گئی ہے تاکہ سروس روڈ پر گاڑیوں کی غیر ضروری پارکنگ کی روک تھام یقینی بنائی جا سکے۔
اس موقع پر یہ واضح کیا گیا کہ ہدایات پر عمل درآمد نہ ہونے کی صورت میں قانون اور متعلقہ قواعد کے تحت سخت کارروائی عمل میں لائی جائے گی، جس میں نیازی بس اسٹینڈ کے ڈی کلاس بس اسٹینڈ لائسنس کی منسوخی بھی شامل ہو سکتی ہے۔
